1. Nsaka noobajha nikuru na Yehova negeredhiwe aavi?

 YEHOVA ohathomela mabasa adhaari aye ni anajheha wihina aliwa yakwanelihe mabasa ala mwamakalelo owegeredheya. (1 Kor. 14:33) Motajhiha, Yehova anafuna wihina muthenga dhapama dhilaleyiwe elabo yaatene yavati. (Mat. 24:14) Yehova amuthomile Yesu wihina aahoolelege mabasa ala oolaleya. Teto Yesu onowaholela mabasa ala wihina epariwege mwamakalelo owegeredheya. Nsaka noobajha, mulogo dheekiristawu dhifuguliwaga mburo dhohiyanahiyana, yothomiwa anamaholela mulogo wihina evahege dhoholela ni eholelege mulogo. (Dho. 14:23) OJeruzale wahikala Nikuru Noolamulela. Addibila ala yalaba ninga Nikuru Nolamulela, yaali arumiwi vamodha ni anamaholela mulogo, aliwa yowerana dhothoma wihina mulogo dhaatedhene yiwelelege. (Dho. 15:2; 16:4) Mwaha addibila wiwelela dhoholela yakeliwa, “addibila ammulogoni yolibihiwa munroromeloni ni yowinjhivana.” — Dho. 16:5.

2. Ddiniyani Yehova aneriyena okuma yaka ya 1919, wihina aavahe yoojha yomuzimuni ni aholele nikuru naye?

² Peeno Yehova anodhowave egeredhaga nlogo naye. Okuma yaka ya 1919, Yesu anolabihedha nikuru ning’ono wihina awegeredhe mabasa oolaleya ni wavaha yoojha yomuzimuni anamahara aye mudhidhi wofwanelela. a (Luk. 12:42) Mwebaribarene nnowanda woona pamadhene wihina Yehova anna wareeliha mabasa enapariwa ni Nikuru Nolamulela. — Isa. 60:22; 65:13, 14.

3-4. (a) Owoge yotajhiha enoniha mareeliho nnawakelihu mwaha okala nikuru nowegeredheya. (b) Ohudhera wula nnoone ddi?

³ Nahere nihikala owegeredheyene, kanande wapara mabasa  oolaleya anihiyedhile Yesu. (Mat. 28:19, 20) Kubuwela yahere addibila yahegeredhile murudda wihina nilaleyege, mwaha wa yeyo kadda muthu aalaleyege mburo anafuniye. Teto murudda dhimodha dherege olaleyiwa dila dhowinjhivadhene ni addibila ohiyanahiyana, mbwenye murudda dhimodha kadhalaleyiwege. Onowawubuwela mareeliho mamodha nnawakelihu mwaha okala owegeredheyene?

⁴ Ndala ninga Yesu awegeredhiliye anamahara aye mudhidhi agaali elabo yavati, oliye anowerana emodhave peeno ni nlogo na Mulugu. Ohudhera wula nnere woona yotajhiha Yesu anihiyedhiliye, ni makalelo nikuru nehu nnahariwa yotajhiha ya Yesu. Teto nnere woona makalelo owooniha wi nnororomela nikuru na Yehova.

NIKURU NEHU NNOHARA YOTAJHIHA YA YESU

5. Nikuru na Yehova, nnahara aavi yotajhiha ya Yesu? (Juwawu 8:28)

⁵ Yesu aahudhenre ni Ababe ethu yowerana ni yowoga. Nikuru na Yehova peeno, nnohara yotajhiha ya Yesu wodhela omulabihedha Bibiliya wihina enihudhihe ele eli yapama ni yabure ni onikavihera werana dhithu dhinamuhagalasa Yehova. (Omwileri Juwawu 8:28; 2 Tim. 3:16, 17) Nikuru na Yehova nnonubusedha dila dhowinjhivadhene omwileri Bibiliya ni oparihedha mabasa mwigumini mwehu dhithu nnahudherihu mBibiliyani. Wiwelela yolaga ela, enanikavihera ni makalelo baani?

6. Mareeliho baani nnawakelihu naamuhudheraga Bibiliya?

⁶ Iyo nnopurelamo vanlubale naamuhudheraga Bibiliya ninaalabihedhaga malivuru ehu. Motajhiha, nnoliganiha ndhe Bibiliya anawogiye ni dhoholela nnakelihu munikuruni mwa Yehova. Vano noonelamo wi dhoholela nnakelihu dhinadhela mBibiliyani, nnothabwa ororomela nikuru na Yehova. — Rom. 12:2.

7. Muthenga baani Yesu alaleyiye, ki nikuru na Yehova nnahara aavi yotajhiha yaye?

⁷ Yesu “oolaleya muthenga Womwene wa Mulugu.” (Luk. 4:43, 44) Teto, Yesu aharuma anamahara aye olaleya muthenga ola wOmwene. (Luk. 9:1, 2; 10:8, 9) Peeno, aatene iyo nnahara dhoholela dha nikuru na Yehova, nnolaleya nihipwathile mburo nnakalihu obe mutholo ninnihuna munikuruni mwa Yehova.

8. Gaari baani ninnihuna?

⁸ Gaari enlubale olaleya muthenga ola Womwene! Teto kahi athu aatene enakanna gaari ela. Motajhiha, mudhidhi Yesu agaali velaboni yavati, keenyile wi ademoniyu ewogege ethu-sithu wodhela oliye. (Luk. 4:41) Teto peeno enapadduwa emodhave. Muthu di muthu ahinathi obajha wapara mabasa oolaleya nnikuru na Yehova, anohowela openddiwa akala anowaparihedha mabasa malagano a Yehova mwigumini mwaaye. Bumwahaya iyo nnowooniha wi nnowavaha thima mabasa ala oolaleya wodhela olaleya mudhidhi waatene, mburo bu mburo nnafwanyihu athu. Teto ndala ninga Yesu efunelo yehu fuudhala bewu yOmwene mmurimani mwa athu ni wahudhiha ebaribari. — Mat. 13:3, 23; 1 Kor. 3:6.

9. Nikuru na Yehova nnooniha aavi wi nnovaha thima ndina na Mulugu?

⁹ Yesu ahahudhiha athu amodha ndina na Mulugu. Nlabo dhaala alobelaga wa Ababe, Yesu ahiwoga egi: “Miyo gihanoniha ndina nenyu.” (Juwa. 17:26) Eharaga yotajhiha ya Yesu, nikuru na Yehova peeno nnohara yotajhiha ya Yesu wodhela werana dhaatedhene enandiwa wihina yahudhihe athu ndina na Mulugu. Makalelo nikuru na Yehova nnahudhihiwa athu amodha ndina na Mulugu fuudhela omulabihedha Tradução do Novo Mundo da Bíblia Sagrada. Bibiliya ola anofwanyeya aatene obe epaddi modha ni dhiwogelo dhokwaranya 270, teto mBibiliyani muna mwihogoloseliwa ndina na Mulugu mburo dhaatedhene mwafwanyeyiwa ndina nna.  Apêndice A4 ni A5 anafwanyeya mBibiliyani muna, anawoga makaleloya ni mwahaya bwaddi ndina na Yehova ndhe nihogoloseliwegemo mBibiliyani. Teto Apêndice C, anafwanyeya mu Bíblia de Estudo anawoga dhithu dhinooniha wi ndina na Mulugu nnohowela ofwanyeya mu dholebela Dhegerego dila dhowakwana 237.

10. Nnahudhera ddi ni ethu awogile muhiyana dhaala anakala elabo yo Miyanmar?

¹⁰ Ndala ninga Yesu, nnafuna naakavihere athu owinjhiva onona ndina na Mulugu. Muhiyana dhaala anna yaka 67 anakala elabo yo Miyanmar, nuuhudhera wi ndina na Mulugu di Yehova, obajha wunla ni owoga egi: “Egumaaga yaatene kaginiwege wi ndina na Mulugu di Yehova. . . . We ohugihudhiha ethu yathima opitha dhaatedhene.” Ninga enooniha yopadduwa ela, athu yahudhera wodhela ndina na Mulugu eyo podi osaddula egumi yewa.

ODHOWEGEVE WONIHAGA WIHINA ONOROROMELA NIKURU NA YEHOVA

11. Anamaholela mulogo enooniha aavi wi enororomela nikuru na Yehova? (Osugwe fotu.)

¹¹ Anamaholela mulogo enoonihe aavi wihina enororomela nikuru na Yehova? Anamaholela mulogo yakela dhoholela enopwasedha wileri ni enowilibihedha oparihedha mabasa dhoholeladha. Motajhiha, ohiya baahi wakela dhoholela wodhela makalelo owerana dhipaddi ni olobela yakala mmutugumanoni, aliwa enowakela dhoholela wodhela makalelo owasamalela mambila a Kiristu. Anamaholela mulogo yaharaga dhoholela enakeliwa munikuruni na Yehova, addibila enowanda woona wihina Yehova anowadhivela ni anowasamalela.

12. (a) Mwahaya bwaddi nnohowela wawiwelela addibila enaniholela? (Eberewu 13:7, 17) (b) Mwahaya bwaddi nnohowela opwasedha osugwa dhikalelo dhapama dha addibila enaniholela?

¹² Naakela yoholela si yoholela ni anamaholela mulogo, nnohowela wiwelela. Naharaga dhoholela nnakelihu ni anamaholela mulogo, enere wakweyela aliwa wapara mabasa ewa ooholela mulogo. Bibiliya anonikongomedha wawilela ale enaniholela ni ohara dhoholela dhewa. (Omwileri Eberewu 13:7, 17.) Mbwenye malabo mamodha podi ohikala ethu yokweya wawiwelela anamaholela mulogo. Mwaha wa ddi? Mwaha wi aliwa athu oohilogomana. Vano iyo napwasedha osugwa dhoviriganiha dhewa ohiya osugwa dhikalelo dhapama enniwana, yakalege ninga nnaakavihera amwiddani ehu. Ni makalelo baani? Amwiddani ehu enafuna wi nubuwelege wi Yehova kanalabihedha nikuru nna wihina aniholele. Iyo naapwasedhaga osugwa dhoviriganiha dha addibila enaniholela, eyo yere onthukulela wubuwelaga dhithu dhabure wodhela nikuru nehu. Mwaha wa yeyo, neere ohiya ororomela nikuru na Yehova. Ddiniyani nnahowelihu werana wihina nahirumedhege dhowoota dha amwiddani ehu?

KUHIYE WI ATHU AMODHA YUTHUKULELE OHIROROMELA NIKURU NA YEHOVA

13. Amwiddani a Mulugu enaxixa aavi otakaliha nikuru na Yehova?

¹³ Amwiddani a Mulugu enoxixa werana dhithu dhinathukulela athu wubuwela wi dhithu dhapama dhinereya munikuruni na Yehova sabure. Motajhiha, iyo nnohudhera mBibiliyani wihina adhaari a Yehova enohowela okala oweela epaddi yomwilini, yomuzimuni ni yomubuweloni. Teto Bibiliya anawoga wihina muthu di muthu anerana ethu yabure, nuwindo ahithwaruwa, kanahowela okala mmulogoni. (1 Kor. 5:11-13; 6:9, 10) Mbwenye woona wihina iyo nnowiwelela nlamulo nna, amwiddani ehu enowoga wihina iyo kaninna odhivela ni athu amodha. Teto enowoga wihina nnowatoriha ni kannamurumedha muthu di muthu ahinaligana ni iyo.

14. Baani anavuwiha dhowoota wodhela nikuru na Yehova?

¹⁴ Kumudduwale muthu anaharahara nikuru  na Yehova. Saddana dhinavuwiha dhowoota wodhela nikuru nehu, oliye di “baabi owoota.” (Juwa. 8:44; Gén. 3:1-5) Bumwahaya kannatikina naamoonaga Saddana aalabihedhaga athu amodha wihina evuwihege dhowoota wodhela nikuru nehu. Siyeyo yapadduwile ni Yesu teto ni makiristawu ansaka noobajha.

15. Ddiniyani anamaholela gereja yaamwereliwa Yesu ni anamahara aye?

¹⁵ Yesu aali oologomana, ni ahawerana matikiniho owinjhiva. Naarive dhigaali ndo, Saddana ahaalabihedha athu wihina evuwihe dhowoota wodhela Yesu. Motajhiha, anamaholela gereja yowawaddela athu wi Yesu awigara ademoniyu ni kopolo dha “namathonga aademoniyu.” (Mar. 3:22) Teto mudhidhi Yesu atorihiwaga, anamaholela gereja omwinkedha Yesu wi oliye ahimuruwana Yehova ni wathukulela athu oloba wihina Yesu apiwe. (Mat. 27:20) Vasogolova anamahara a Yesu nuwambela olaleya muthenga dhapama, amwiddani ewa watujela athu amalogo wihina yarugunuwele. (Dho. 14:2, 19) Awogaga wodhela yolebela ya Dhowera Dhaarumiwi 14:2, Sentinela a 1 a Dezembro a 1998, anawoga egi: “Ohiya ohihagalalave mwaha wa muthenga yalaleya anamahara a Yesu, amwiddani amaJudewu yahaathukulela athu wanyemula anamahara ala, esayelaga makalelo owaweriha athu apama wawidda makiristawu.”

16. Ddiniyani nahinahowelihu odduwala niiwa muselu dhowoota dhinavuwihiwa wodhela nikuru na Yehova?

¹⁶ Peeno Saddana anodhowave avuwihaga dhowoota. Oliye aana ‘waholosa athu aatene elabo yavati.’ (Ovuhu. 12:9) Bumwahaya wiwa dhowoota wodhela nikuru na Yehova obe wodhela addibila enaniholela, kuddiwale makalelo amwiddani a Mulugu yamwinkedhiliwa Yesu vamodha ni anamahara aye  nsaka noobajha. Ndala ninga Bibiliya aawogiliye, athu a malabo yaala yerege oharahara ni owoga obure nikuru na Yehova. (Mat. 5:11, 12) Iyo kannarumedhe dhowoota ndha, nahimudduwala muthuya ananiharahara ni nerana ethu-sithu mowaguva wihina niibarele mwaha wa dhowoota ndha. Ddiniyani nnahowelihu werana wihina niibarele wa dhowoota ndha?

17. Ddiniyani nnahowelihu werana wihina niibarele wa dhowoota dhinavuwihiwa? (2 Timotiyu 1:13) (Osugwe kwaduru enna musolo “ Ddiniyani onahoweliwe werana wiwa muselu dhowoota dhinavuwihiwa wodhela nikuru na Yehova?”)

¹⁷ Orabele ovuruwana muselu dhowoota. Murumiwi Pawulo ahivaha dhoholela dhowooneleyamo wodhela ethu nnahowelihu werana niiwaga muselu dhowoota. Oliye omwaddela Timotiyu wihina ‘awaddele athu amodha wi . . . newene kipwasedhe ovuruwana thalako dhowoota’ ni ‘kamuvuruwanege thalako dhowoota dhahinna mabasa.’ (1 Tim. 1:3, 4; 4:7) Ebaribari wihina mwaha ohinona ethu, mwaana mung’ono podi oddodda ethu-sithu vati ni eeke muwano. Mbwenye muthu ali pogo kanerena eyo mwaha wihina ohunona wi sowopiha werana ethu ninga yeela. Nimakalelo mamodhave, iyo nnorabela muselu dhowoota mwaha nihimunona pamadhene muthuya anavuwiha dhowoota ndha. Ohiya eyo, iyo nnavuruwana baahi ‘madhu’eebaribari. — Omwileri 2 Timotiyu 1:13.

18. Nnonihe aavi wi nnororomela nikuru na Yehova?

¹⁸ Ohudhera wula, nihoona makalelo mararu nikuru na Yehova nnamutajhihiwa Yesu. Mudhidhi wamuhudheraga Bibiliya opwasedhe woona makalelo mamodha nikuru nehu nnamutajhihiwa Yesu. Wakavihere athu amodha ammulogoni oriha ni ororomela nikuru na Yehova, teto odhowegeve omulabelaga Yehova nuroromeleya wodhela wiwelela dhoholela ananivahiye wodhela nikuru naye wihina akwanihedhe efunelo yaye. (Sal. 37:28) Bumwahaya nidhowegeve nivahaga thima oneti ninnihuna wolaba vamodha ni nlogo noodhivela ni noororomeleya na Yehova.