1. Onakala aavi waaparaga mabasa oolaleya? (Osugwe fotu.)

 NINGA nlogo na Yehova, iyo nnowalaleya athu amodha mwaha wi nnomudhivela Baabihu oodhulu Yehova, teto iyo nnafuna nakavihere athu amodha omunona Oliye. Anamalaleya owinjhiva enodhiveliwa wapara mabasa ala oolaleya, mbwenye anamalaleya amodha kinadhiveliwa. Ddiniyani enaathukulela aliwa ohidhiveliwa wapara mabasa oolaleya? Amodha kinadhiveliwa olaleya mwaha okala athu a manyazo, amodha enubuwela wi kinonne ohudhiha pama, amodha podi okala oothuwathuwene mwaha odhowa vaade va athu amodha wula yahithaniwe, amodha podi woovaga othamagihiwa ni anamuralaya, amodha enowoova onfwanya muthu anafuna okangana. Naarive emudhivelaga vanlubale Yehova, addibila ni arogola ala, enowarusa vanlubale wawaddamela athu yahanonniwa wihina yalaleye muthenga dhapama. Naarive eganna woova wula, aliwa ehinona wihina mabasa ala oolaleya bathima. Teto aliwa enowapara mabasa ala malabo aamateene. Mohanganyedha Yehova anohagalala vanlubale mwaha wawona addibila ala elaleyaga!

2. Akala malabo mamodha enowurusa wapara mabasa oolaleya nuuhagalala, mwahaya bwaddi kunahowela wukuuwa?

² Malabo mamodha enowurusa wapara mabasa oolaleya nuuhagalala? Akala oni hee, kuwuukuwe! Podi wera akala onubuwela wi kunonne ohudhiha pama, eyo enoniha wi oli muthu owiyeviha ni kunafuna withithimiha wamwinnyo, teto kunafuna muladdu ni muthu. Ohiya eyo, kaavo anadhiveliwa wakeliwa ni makalelo abure, thabwathabwa wafunaga wawerela opama athu amodha. Okanne ebaribari wihina Yehova ohunona pamadhene dhithu dhinupadduwela ni anofuna wukavihera ni ele onahoweliwe. (Isa. 41:13) Ohudhera wula nnere woona dhoxagiha tanu  dhinanikavihere ogonjhiha woova ni wenjhedhedha ohagalala wehu naaparaga mabasa oolaleya.

WENYE WI MADHU A MULUGU YULIBIHE

3. Ddiniyani yamukavihere Jeremiya okanna oliba murima wihina ande olaleya?

³ Okuma kale madhu a Mulugu enowalibiha adhaari a Mulugu, yafuna wakwaneliha mutholo worusa. Kasugwa yotajhiha ya namavuhulela Jeremiya, oliye ahithuwathuwa vanlubale Yehova nunvaha mutholo woolaleya. Jeremiya ahiwoga egi: ‘Kaginanda owoga, mwaha gili muzombwe.’ (Jer. 1:6) Ddiniyani yamukavihere Jeremiya okala ooliba murima wihina ande olaleya? Ethu Yehova aawogiliye ni Jeremiya yahimulibiha ofiyedha oliye owoga egi: ‘Madhu enyu eli ninga mootho onahidda mmurimani ni onapaha mmakuvani mwaaga; miyo gahaagomana, kaganda wavilelana.’ (Jer. 20:8, 9) Naarive murudda alaleya Jeremiya ogaali worusa, muthenga akenliye wihina alaleye wahinvaha oliba murima ahoweliye wihina ande wapara mabasa aye.

4. Namwilerigi Bibiliya ni naapenddaga dhithu nnilerihu, nroromelo nehu ni Yehova nnakala aavi? (Kolosense 1:9, 10)

⁴ Peeno makiristawu enowakela kopolo enahoweliwa wihina yande wapara mabasa oolaleya wodhela Bibiliya. Murumiwi Pawulo nuwalebela karta addibila oooloso, oliye owoga naaddibila wi yahere ehudhera wodhela efunelo ya Yehova, eyo yere wakavihera ‘oharaga dila enaafwanelela adhaari a Yehova,’ ni odhowagave ‘evahaga dhowima mmabasani mwatemwene apama.’ (Omwileri Kolosense 1:9, 10.) Mabasa aatene apama enasorihiwa va yolebela ela, enovolowelavo mabasa oolaleya muthenga dhapama. Bumwahaya namwilerigi Bibiliya ni naapenddaga dhithu nnilerihu, nroromelo nehu ni Yehova nnooliba ni nnowanda wonelamo mwahaya bwaddi sathima wapara mabasa ala oolaleya.

5. Ddiniyani nnahowelihu werana wihina nande wapurelamo pamadhene madhu a Mulugu?

⁵ Wihina nande wapurelamo pamadhene madhu a Mulugu, kuthabwege waguviha mudhidhi wilerigi, wahudheraga ni wapenddaga madhu a Mulugu. Wahudheraga opwasedhege pamadhene. Wileri yolebela ni wahonelagamo, kulupe. Ohiya eyo omulabihedhe Índice das Publicações da Torre de Vigia obe Guia de Pesquisa para Testemunhas de Jeová wihina ofwanye yotapulela ya yolebela ele. Wasayela mudhidhi wihina ohudhere nupwaseya, onere okanna ebaribari wi ndhe anawoga Bibiliya sebaribari. (1 Tes. 5:21) Vano wakanna ebaribari wihina Bibiliya madhu a Mulugu, ohagalala wawo onere  wenjhedhedheya ni onerege ofuna othapanya ni athu amodha wodhela ndhe onahudheriwe.

WIWEGEREDHEGE PAMA OHUNATHI ODHOWA MMABASANI OOLALEYA

6. Mwahaya bwaddi nigahowela wiwegeredha pama nihinathi odhowa mmabasani oolaleya?

⁶ Wiwegeredha pama wahinathi odhowa mmalaleyelo, enere okala yokweya othapanya ni athu amodha. Yesu ahawegeredha anamahara aye ahinathi waruma wi yalaleye. (Luk. 10:1-11) Teto aliwa yahiparihedha mabasa dhithu dhaatedhene Yesu ahudhihiliye, bumwahaya aliwa yahihagalala vanlubale mwaha wa dhithu dhaatedhene yandiliwa werana. — Luk. 10:17.

7. Nniwegeredhe aavi nihinathi odhowa mmalaleyelo? (Osugwe fotu.)

⁷ Nniwegeredhe aavi nihinathi odhowa mmalaleyelo? Nnohowela wubuwela dhithu nnafunihu owoga, wihina nande owoga ni murima wehu waatene, mudhidhi nathapanyaga ni mwanamurala. Teto sapama wubuwela dhithu biili obe tharu anamurala a murudda wawo enawogiwa wihina yugwadde wawogaga, wamala wegeredhe makalelo owawakula aliwa eyo yapadduwa. Vano nafiya wi nthapanye ni mwanamuralaya, iyo podi okala oopwaseyene, woniha emwerumweru ni okala owandaneyana.

8. Ni makalelo baani makiristawu eliwa ninga muno awogile murumiwi Pawulo?

⁸ Murumiwi Pawulo ahiwoga ni addibila egi: ‘Nihikanna dhoreela ndha dhikoyiwe mmunoni.’ (2 Kor. 4:7) Mbwenye dhoreela ndha dhinaagiwana ddi? Enagiwana mabasa oolaleya enavulusa dhigumi dhaathu ni enawoga wodhela Omwene wa Mulugu. (2 Kor. 4:1) Ki muno enagiwana ddi? Enagiwana adhaari a Mulugu, enalaleya muthenga wa Mulugu athu amodha. Mudhidhi wa murumiwi Pawulo, anameeddiha malondda yolabihedha muno wihina ethukulena obe ekoyemo dhithu dhathima, ninga dhoojha, korowa ni vinyu. Nimakalelo mamodhave iyo nili ninga muno, Yehova anonilabihedha wihina nilaleye muthenga dhapama dhili dhathima vanlubale. Nnikavihero na Yehova, nnowanda okanna kopolo nnahowelihu wihina nidhowegeve nlaleyaga muthenga dhapama nahiselenle.

OLOBELE OLOBAGA OLIBA MURIMA

9. Nnande aavi ogonjhiha wawoova athu? (Osugwe fotu.)

⁹ Malabo mamodha iyo podi woovaga olaleya, mwaha wawoova athu. Nnande aavi ogonjhiha  woova wula? Kasugwa nlobelo yerilena arumiwi nukoddihiwa olaleya. Ohiya ogonjhihiwa ni woova wule, aliwa omuloba Yehova nikavihero wihina “yahiselele walaleya madhu [a Yehova] nuuliba murima.” Teto Yehova ahaakula nlobelo newa mohilegela. (Dho. 4:18, 29, 31) Nabajha wawoova athu nakala mmabasani oolaleya ofiyedha okala oothuwathuwene, nnohowela olobela nlobaga oliba murima wihina nande olaleya. Omulobe Yehova wihina odhivela onniwena ni athu okale munlubale opitha woova onniwena.

10. Ni makalelo baani Yehova ananikaviheriye wihina nande okala Anamoona aye ooliba murima? (Isaías 43:10-12)

¹⁰ Yehova ohunisakula wihina nikale Anamoona aye. Teto Oliye ohunipaganya wihina anere onikavihera okala athu ooliba murima. (Omwileri Isaías 43:10-12.) Nnere woona makalelo mannayi Yehova ananikaviheriye wihina nikale athu ooliba murima. Makalelo oobajha, Yesu anakala ni iyo mudhidhi wamutene naalaleyaga muthenga dhapama. (Mat. 28:18-20) Anabiili, Yehova ohathoma angero wihina enikavihere wapara mabasa oolaleya. (Ovuhu. 14:6) Anatharu, Yehova anonivaha muzimu wotxena wihina nandege wubuwele dhithu nihudherihu. (Juwa. 14:25, 26) Anennayi, nnokaviheriwa ni addibilihu nnakalihuna naaparaga mabasa oolaleya. Nnikavihero na Yehova ni naaddibilihu, iyo nihikanna dhaatedhene nnahowelihu wihina nidhowegeve naaparaga mabasa oolaleya.

WISADDULEGE MOWAGUVA MOWIWANANA NI ELE MWANAMURALAYA ANAHOWELIYE NI OKANNE MONELO WAPAMA

11. Onere ddi wihina wafwanye athu owinjhiva wakala mmabasani oolaleya? (Osugwe fotu.)

¹¹ Onakala ookwerebeyene wahafwanyaga athu mmavaade mwewa murudda onalaleyiwe? Akala siyeyo sapama wikoha: ‘Athu a murudda waaga eli wuuvi mudhidhi yola?’ (Dho. 16:13) ‘Nerege eli omabasani obe wigereja?’ Akala siyeyo, ononamo aavi olaleya murampani wihina wande othapanya ni athu owinjhiva? Ddibila dhaala anithaniwa Joshua anowoga egi: “Ginopatha mudhidhi wihina gilaleye geeddaga murampani ni gaagulaga dhithu dhaaga mmaloja.” Oliye ni mwadhiye Bridget, enaafwanya athu owinjhiva egaali mmavaade mwewa ni mahiyu obe ni maDomingu. — Efe. 5:15, 16.

12. Ddiniyani enukavihere wonelamo ethu enamuthuwathuwiha mwanamurala ni ele anarumeedhiye?

 ¹² Woonelamo wihina mwanamuralaya kanna efunelo yowuvuruwana, osayele onona ethu enamuthuwathuwiha ni anarumeedhiye. Joshua ni Bridget, enolabihedha nikoho nnadha osogolo wa folyetu wihina yambele othapanya. Motajhiha, aliwa yaalabihedhaga folyetu We onamubuwelamowiddi Bibliya? enowoga yegi: “Athu amodha enubuwela wi Bibiliya livuru na Mulugu, mbwenye athu amodha enowanganyedha akala eyo ebaribari. Ki we onoonamo aavi?” Malabo owinjhiva, eyo enowathukulela okanna othapanya wapama ni athu enaafwanyiwa.

13. Naarive athuya yahifunaga ovuruwana muthenga nnalaleyihu mwahaya bwaddi kannahowela wukuuwa? (Provérbios 27:11)

¹³ Naarive athu yahifunaga ovuruwana muthenga nnalaleyihu, iyo nnowakwanihedha mutholo naakenlihu. Mwaha wa ddi? Mwaha iyo nnerana ele Yehova ni mwanaye Yesu enafuniwa wihina nerena, eli “ovaha onamoona wowakwana.” (Dho. 10:42) Naarive nahafwanyaga athu wihina naalaleye obe athuya yakooddaga onivuruwana, iyo podi okanna ohagalala mwaha wihina ninna omuhagalasa Babihu Yehova. — Omwileri Provérbios 27:11.

14. Mwahaya bwaddi nigahagalala nanona wihina ddibila ohunfwanya muthu mmalaleyelo anna efunelo?

¹⁴ Iyo nnohagalala vanlubale nanona wihina ddibila obe murogola ohunfwanya muthu anna efunelo mmalaleyelo. Namasugwera dhaala ahiliganiha mabasa oolaleya ni mabasa oomusayela mwaana arimeenle. Athu owinjhiva enomusayela mwaana ole mburo dhohiyana-hiyana. Vano mwaana ole afwanyiwa, ole anfwanye ni aatene yamusayela enoohagalala vanlubale. Ni makalelo mamodhave addibila aatene a mmulogoni enowapara mabasa oolaleya ni enokavihera olaleya murudda waatene, teto addibila aatene enohagalala vanlubale yaamoonaga muthu alaleyiwe ambela woona mutugumano.

WUBUWELEGE WODHELA ODHIVELA ONNIWENA NI YEHOVA VAMODHA NI ATHU ONAALALEYIWE

15. Yolebela ya Matewuji 22:37-39 podi enanikavihera aavi wenjhedhedha ohagalala wehu ni mabasa oolaleya? (Osugwe yavakapani.)

¹⁵ Iyo podi wenjhedhedha ohagalala wehu mmabasani oolaleya wodhela wubuwela odhivela ninnihuna ni Yehova vamodha ni athu nnaalaleyihu. (Omwileri Matewuji 22:37-39.) Kubuwela makalelo Yehova anahagalaliye aanoonaga nlaleyaga ni makalelo athuya enafuniwa  ohagalala mwaha wambela omuhudhera Bibiliya! Teto kudduwale wi ale enarumedha muthenga nnalaleyihu ni enathoma omulabela Yehova podi okalawo ni mukalakala. — Juwa. 6:40; 1 Tim. 4:16.

16. Nnande aavi ohagalala ni mabasa ehu oolaleya naarive nihandaga olaleya nyumba ni nyumba mwaha wa makathamiho enanifwanya? Owoge yotajhiha.

¹⁶ Ki akala kunanda olaleya nyumba ni nyumba mwaha makathamiho enuufwanya? Akala siyeyo enupadduwela, wubuwele makalelo owoniha odhivela onniwena ni Yehova vamodha ni athu. Mudhidhi wa mutipa wa Koronaviru, Samuel ni Dania kayanda ovenyavo vaade. Muwari mwa mudhidhi ole worusa, aliwa yolaleya elabihedhaga telefoni, karta ni yowahudhiha Bibiliya anamahudhera ewa emulabihedhaga Zoom. Mudhidhi yole Samuel aanna ojha murombwe wa kanser, vano aadhowaga ospitale, oopatha mudhidhi wihina aalaleye aatene aagumaniyena. Oliye anawoga egi: “Naafwanyiwaga makathamiho, iyo podi okala oogomene epaddi yomubuweloni, yomwiilini ni yomuzimuni. Bumwahaya sathima osayela ohagalala mmabasani nnamparelihu Yehova.” Muwari mwa mudhidhi yola, Dania okala muredda muwari mwa mweri miraru, vasogolova oliye ohoowela olabihedha kadera ya maroda muwari mwa mweri mitanu nammodha. Dania anawoga egi: “Miyo gahilibihedha werana ele ginandimi. Miyo goomulaleya enfermera adhesa vaade wihina agisamalele ni athu gaalobimi wi egule dhithu wihina edhena vaade. Teto goomulaleya muhiyana dhaala agisamalela, anaalaba empereza enaasamalela aredda, gilabihedhaga telefoni.” Mwaha wa makathamiho yaafwanya, Samuel ni Dania kayanda werana dhithu yeriwana kale, mbwenye yahihagalala vanlubale ni mareeliho yawakenliwa.

17. Nnande aavi opurelamo dhoxagiha noonilihu muwari mwa ohudhera wula?

¹⁷ Wilibihedhe oparihedha mabasa dhoxagiha ndha tanu noonilihu muwari mwa ohudhera wula. Kadda yoxagiha eli ninga ingrediente dha receita yopiyana. Nataganyiha ingrediente dhaatedhene napiyaga, yojhaya enothabwa odhiva. Ni makalelo mamodhave naparihedha mabasa dhoxagiha ndha, nnere okala owegeredheyene wihina nande ogonjhiha mubuwelo bu mubuwelo onanthukulela ohidhiveliwa wapara mabasa oolaleya, teto mabasa oolaleya enerege onihagalasa vanlubale.