OHUDHERA 30
JHIBO 36 Obarele murima wawo
Dhithu baani dhathima nnahudherihu ni mamwene owIzarayeli?
‘Nyu munere woona dila biili ohiyana orivo wamuthu apama ni abure, ni ohiyana orivo wa muthu anamulabela Mulugu ni ahinamulabela.’ — MAL. 3:18.
DHITHU NNAAHUDHERIHU
Nnere ohudhera wodhela mamwene owIzarayeli ni makalelo enanikaviheriwa onona ethu nnahowelihu werana negi nimuhagalase Yehova.
1-2. Bibiliya anawoga ddi wodhela mamwene owIzarayeli?
BIBILIYA anowawoga mandina a mamwene ookwaranya 40, yathongile elabo Yowizarayeli. a Dhopadduwa ndha dhinafwanyeya mBibiliyani sororomeleya, mwaha kadhinakuwa dhithu yerilena mamwene ala. Motajhiha, mamwene amodha apama, yahifiyedha werana dhithu dhabure. Siyeyo yapadduwe ni mwene Davidi. Awogaga wodhela Davidi, Yehova ahiwoga egi: ‘Mudhaari aaga Davidi, awiwelela malamulo aaga ni aahara ni murima waye waatene wodhela werana baahi ele yaali yapama vamentoni vaaga.’ (1 Reis 14:8) Mbwenye kudduwale wihina Davidi ahimukumiha mba mwadha mwinnya ni olamula wihina mamuneya apiwe okoddoni. — 2 Sam. 11:4, 14, 15.
2 Teto Bibiliya anowaawoga mamwene amodha abure, yaherana dhithu dhapama. Kasugwa yopadduwa ya mwene Robowawu. Vamentoni va Yehova oliye ‘aherana dhithu dhabure.’ (2 Cró. 12:14) Naarive dhigaali ndo, oliye ahimwiwelela Yehova, nuwoga wihina anaadhowe owana ni mahimo 10 aamwaana Ezarayeli ni aahiye aliwa omusakula mwene mmodhaya. Teto oliye aahibarela luwani dhowinjhiva mumweneni mwaaye wihina nlogo na Yehova nikale nobareleyanene. — 1 Reis 12:21-24; 2 Cró. 11:5-12.
3. Nilerigi dhopadduwa dha mamwene owIzarayeli, nnakanna makoho baani? Ki ohudhera wula nnoone ddi?
3 Nilerigi dhopadduwa dha mamwene owIzarayeli, iyo podi wambela wikoha: Akala mamwene ala yowerana dhithu dhapama ni dhabure, Yehova athoma aavi akala mweneya aali oororomeleya vamentoni vaye obe naari? Yowakula ya nikoho nna, podi onikavihera wonelamo ethu kadda muthu wa iyo, anahoweliye werana wihina amuhagalase Yehova. Muwari mwa ohudhera wula, nnere woona dhithu tharu dhamuthukulela Yehova othoma akala mweneya aali apama obe naari. Ethu yobajha, akala mweneya oomudhivela Yehova ni murima waye waatene obe naari. Yanabili, akala mweneya oothwaruwa obe naari ni murima waye waatene erana yothega. Yanatharu, akala mweneya oodidela omwebedha Yehova obe naari egumaye yaatene mwamakalelo apama.
OMUDHIVELEGE YEHOVA NI MURIMA WAWO WAATENE
4. Ohiyana baani waalivo wa mamwene oororomeleya ni oohiroromeleya?
4 Mamwene yamuhagalasa Yehova, yomudhivela ni yomwebedha ni murima wewa waatene. b Mwene Jeyozafa aali mwene apama ‘amusayela Yehova ni murima waye waatene.’ (2 Cró. 22:9) Teto awogaga wodhela Joziya, Bibiliya anihina: ‘Kanakalegewo mwene oligana ni Joziya, amwiwelele Yehova ni murima waye waatene.’ (2 Reis 23:25) Vano wodhela Salomawu erilena dhithu dhabure ahalaga neena nuukwa, Bibiliya anihina ‘kaamulabenle Yehova ni murima waye waatene.’ (1 Reis 11:4) Teto wodhela Abiyawu, mwene mmodha ohiroromeleya, Bibiliya anihina: ‘Kaamulabela Yehova ni murima waye waatene.’ — 1 Reis 15:3.
5. Omulabela Yehova ni murima wehu waatene enatapulela ddi?
5 Omulabela Yehova ni murima wehu waatene enatapulela ddi? Muthu anamulabela Yehova ni murima waye waatene, kanamulabela mwaha owaddihedhiwa obe ninga elemelelo baahi. Ohiya eyo, anamulabela Yehova mwaha anomudhivela vanlubale ni anomuriha. Teto oliye anodidela olibiha wandana waye ni Yehova egumaaye yaatene.
6. Nnande aavi watajhiha mamwene oororomeleya owIzarayeli ni omulabela Yehova ni murima wehu waatene? (Provérbios 4:23; Matewuji 5:29, 30)
6 Nnande aavi watajhiha mamwene oororomeleya owIzarayeli ni omulabela Yehova ni murima wehu waatene? Nnohowela orabela ethu-sithu yanthukulele ononga wandana ninnihuna ni Yehova. Motajhiha, nnohowela okala pasope ni dhithu nnasistirihu obe yaredhelo yehu. Teto nnohowela wasakula pama akwihu ni ohubuwela wi okanna korowa dhowinjhiva obe okala muthu oorela sili ethu yathima mwigumini mwehu. Vano noonelamo wi ehikalawo ethu-sithu enaridhiha wandana wehu ni Yehova, nnohowela osukuma ethu yeyo mowaguva. — Omwileri Provérbios 4:23; Matewuji 5:29, 30.
7. Yoladdaniha baani enanikavihera wonelamo wihina sathima orabela ethu-sithu yanonge wandana wehu ni Yehova?
7 Kanenye werana dhithu biili mudhidhi mmodhave, wodhela omwebedha Yehova ni werana dhithu oliye aniddiye. Nahikala pasope, iyo podi wileketha nubuwelaga wi mwaha wapara mabasa owinjhiva omuzimuni, dhithu dhabure kadhinanivolowele. Motajhiha, kabiha wubuwela ogamanle oxela mba, nuwindo wafugula majanela ni musiwo wihina nivolobwe nipevo nithukunle lixu. Kunonelamo wi woonile goyi ebewene? Nnahudhera ddi ni yoladdaniha ela? Nnahudhera wihina ohiya baahi werana dhithu dhapama dhinalibiha wandana wehu ni Yehova, nnohowela orabela dhithu dhabure dhanonge wandana wehu ni Yehova. Ni madhu mamodha, nnohowela ofuga majanela ni musiwo wa murima ni mubuwelo wehu wihina nnavolowe lixu na elabo ela ya Saddana. Nerana ndo, nipevo nnadhana lixu na elabo ela, kannanivolowele ofiyedha ogawa murima wehu. — Efe. 2:2.
OTHWARUWE NI MURIMA WAWO WAATENE WERANA YOTHEGA
8-9. Mwene Davidi ni mwene Ezekiya yerile ddi nuvahiwa yolaga? (Osugwe fotu yavakapani.)
8 Ninga nonilihu mwene Davidi aherana dhoothega dhinlubale. Mbwenye namavuhulela Nata nudhowa omuwogana, Davidi ahiyeviha ni ahithwaruwa ni murima waye waatene. (2 Sam. 12:13) Madhu Davidi alebiliye enafwanyeya va Salmo 51, enowooniha wihina oliye ahithwaruwa ni murima waye waatene, mwaha wa dhithu eriliyena. Teto othwaruwa wa Davidi, kawali wowisinjhihedha wihina amulekethe Nata wi anasinyusiwe. — Sal. 51:3, 4, 17 ni wawileri madhu enadha vadhulu ya kapituluya.
9 Mwene Ezekiya ahimuthegela Yehova. Bibiliya anihina: ‘Oliye ahibajha withukula, vano mwaha withukula waye, Yehova otakaleliwa ni Juda vamodha ni Jeruzale.’ (2 Cró. 32:25) Mbwenye ddiniyani yamuthukulele mwene Ezekiya, wambela withukula? Podi wera yaali mwaha dhoreela anniyena, wagonjhiha anyakoddo awAsiriya obe podi wera yaali mwaha ovulumusiwa mwamakalelo ootikiniha nuukala muredda. Teto podi wera yaali mwaha wubuwela dhithu ndha, yamuthukulenle wawoniha dhoreela dhaye dhaatene aBabiloniyu. Mwaha wa withukula wula, namavuhulela Izayiya omwaddela wi Yehova ahitakaleliwa vanlubale nuliye. (2 Reis 20:12-18) Mbwenye ndala ninga Davidi, Ezekiya wiyeviha ni othwaruwa ni murima waye waatene. (2 Cró. 32:26) Bumwahaya vamentoni va Yehova, Ezekiya aali mwene oororomeleya ‘erilena dhithu dhapama.’— 2 Reis 18:3.
Mwene Davidi ni mwene Ezekiya, yahiyeviha ni yahithwaruwa ni murima wewa waatene, nuuvahiwa yolaga (Osugwe ddima 8-9)
10. Ddiniyani mwene Amaziya eriliyena nuuvahiwa yolaga?
10 Mwene Amaziya ooJuda aherena dhithu dhapama vamentoni va Yehova, ‘mbwenye kerilena ni murima waye waatene.’ (2 Cró. 25:2) Ethu baani yabure oliye eriliyena? Yehova nuumukavihera Amaziya wagonjhiha akudda edomita, Amaziya obajha wakokorela amulugu yawebedha akudda edomita. c Mbwenye namavuhulela a Yehova numwaddela wihina ndhe eriyena kadhali dhapama, kanvuruwane. Ohiya eyo, oliye omwigara. — 2 Cró. 25:14-16.
11. Mowiwanana ni 2 Korintiyu 7:9, 11, ddiniyani nnahowelihu werana, nerana yothega? (Osugwe fotu.)
11 Nnahudhera ddi ni dhopadduwa dha mamwene ala? Nerena yothega, nnohowela othwaruwa ni wilibihedha ohuhogolowela werana yothega emodhave. Teto anamaholela mulogo yanivaha yolaga wodhela ethu-sithu nnerihuna, nnonihu ninga eng’ono, kanubuwele wihina Yehova kananidhivela obe anamaholela mulogo, enna ntxiga ni iyo. Mwaha ni mamweneya yaali oororomeleya, yovahiwa yolaga ni yosumululiwa. (Ebe. 12:6) Navahiwa yolaga, nnohowela (1) orumedha yolagaya nuwiyeviha, (2) werana masadduwo enahoweleya ni (3) ndhowegeve nimulabelaga Yehova ni murima wehu waatene. Mwebaribarene nathwaruwa ni murima wehu waatene, Yehova aneere onilevelela. — Omwileri 2 Korintiyu 7:9, 11.
Navahiwa yolaga, nnohowela (1) orumedha yolagaya nuwiyeviha, (2) werana masadduwo enahoweleya ni (3) odhowagave nimulabelaga Yehova ni murima wehu waatene (Osugwe ddima 11) f
ODIDELE OMWEBEDHA YEHOVA EGUMAWO YAATENE MWAMAKALELO APAMA
12. Ddiniyani mamwene oororomeleya yeriwana yaahiyaniha ni mamwene oohiroromeleya?
12 Mamwene yaali oororomeleya vamentoni va Yehova, yaali ale yadidenle omwebedha Yehova mwamakalelo apama egumiwa yaatene. Teto aliwa yokavihera nlogo na Mulugu werana emodhave. Ninga noonilihu, mamwene ala yoviriganiha malabo mamodha, mbwenye aliwa yodidela omwebedha Yehova ni yowilibihedha vanlubale omariha webedha wowoota. d
13. Mwahaya bwaddi Yehova adhe amoonege Akabe ninga mwene abure?
13 Mwahaya bwaddi mamwene mamodha kayaali oororomeleya vamentoni va Yehova? Ebaribari wi malabo mamodha mamwene ale, yowerana dhithu dhapama. Motajhiha, mwene Akabe ali muthu abure, ahiyeviha ni ahithwaruwa nuumpa Naboti. (1 Reis 21:27-29) Teto oliye ahimaga luwani dhowinjhiva ni ahaagonjhiha amwiddani amodha aamwaana Ezarayeli. (1 Reis 20:21, 29; 22:39) Mbwenye Akabe aherana ethu yabure vanlubale. Mwaha wa mwadhiye, Akabe othukulela nlogo naatene webedha dhikwamuthu dhosema. Teto oliye kanathwaruwege mwaha werana yothega ela. — 1 Reis 21:25, 26.
14. (a) Mwaha bwaddi Yehova adhe amoonege mwene Robowawu ninga mwene abure? (b) Ethu baani mamwene oohiroromeleya yeriwana?
14 Kasugwa yopadduwa ya mwene mmodhaya aali oohiroromeleya, mwene Robowawu. Ninga noonilihu oliye aherana dhithu dhowinjhiva dhapama mudhidhi athongaga. Mbwenye dhithudha nuwambela omweddela pama ni omwene waye nuutikitereya, Robowawu omusukuma Yehova ni wambela wawebedha amulugu owoota. (2 Cró. 12:1) Okuma mudhidhi yole odhowa osogolo, mwene Robowawu malabo mamodha amwebedha Yehova, malabo mamodha awebeha amulugu owoota. (1 Reis 14:21-24) Mamwene yahiyile omwebedha Yehova, kaali Robowawu ni Akabe baahi. Mwaha ethu yaathukulela mamwene owinjhiva okala ohiroromeleya wa Yehova, yaali mwaha okavihera webedha wowoota. Ela enowooniha pamadhene wi odidela omwebedha Yehova baahi, yaali ethu yathima vanlubale yamuthukulela Yehova othoma akala mweneya aali apama obe abure.
15. Mwahaya bwaddi muselu ola womwebedha Yehova baahi bwathima?
15 Mwahaya bwaddi muselu ola womwebedha Yehova baahi bwathima? Mwaha wi mamwene ale yahikanna mutholo wokavihera nlogo naatene odidela omwebedha Yehova baahi. Ohiya eyo, webedha wowoota wowathukulela werana dhothega dhimodha dhinlubale. (Ose. 4:1, 2) Teto ethu emodhaya yathima, sowihina mamwene ale ni nlogo naatene, naali nlogo noosakuliwa na Yehova. Bumwahaya Bibiliya agaliganiha webedha wowoota ni okuma mba. (Jer. 3:8, 9) Mwaha muthu akuma mba, oliye anowooniha wi kahi oororomeleya ni mwadhiye obe ni mamune. Okuma mba winopiha mbani vanlubale, bumwahaya mudhaari a Yehova amanle wipeleka, avolowela webedha wowoota, oliye anamuthegela Yehova. Teto eyo enompiha mbani Yehova. e — Deut. 4:23, 24.
16. Ethu baani enamuthukulela Yehova othoma akala muthuya dowogowa obe naari?
16 Nnahudhera ddi? Nnahudhera wihina sathima ohivolosiha ni webedha wowoota. Mbwenye nnohowela omwebedha Yehova baahi ni okalave oororomeleya nimulabelaga Yehova egumihu yaatene. Namavuhulela Malakiya ohuwoga makalelo oomuhiyaniha muthu apama ni abure vamentoni va Yehova, wodhela oleba egi: ‘Nyu munere woona dila biili ohiyana orivo wamuthu apama ni abure, ni ohiyana orivo wa muthu anamulabela Mulugu ni ahinamulabela.’ (Mal. 3:18) Bumwahaya kanenye wi ethu-sithu obe ohulogomana wehu, winthukulele ohiya omulabela Yehova. Mwaha wi ohiya omulabela Yehova, yothega enlubale.
17. Mwahaya bwaddi nnohowela okala pasope nafunaga omusakula muthu nnafunihu otelana?
17 Akala we oli muddiye ni onna omusayela muthu wi mutelane, kunoona wi madhu ala a Malakiya enoopatha muselu wa matelo? Muthuya onafuniwe otelana podi okanna dhikalelo dhapama, mbwenye akala oliye kanamulabela Yehova, nerege vamentoni va Yehova dowogowa? (2 Kor. 6:14) Watelana ni muthu yoyo, nerege oliye anere wukavihera wunnuwelavo epaddi yomuzimuni? Kubuwela yopadduwa ya mwene Salomawu, podi wera ahiyana ale aatenliye yahikanna dhikalelo dhapama, naarive yahimulabelaga Yehova. Mbwenye woona wihina aliwa kiyamulabela Yehova, vang’ono vang’ono aliwa omuthukulela Salomawu wawebedha amulugu owoota. — 1 Reis 11:1, 4.
18. Ddiniyani ababi enahoweliwa wahudhiha aniwa?
18 Ababi podi olabihedha thalako dha mamwene owIzarayeli wihina yakavihere aniwa okanna efunelo enlubale yomulabela Yehova. Wakavihere anawo wonelamo wi vamentoni va Yehova, egi muthu akale apama obe abure, enovolowelavo makalelo muthuya anavahiye thima webedha webaribari. Teto wawonihe anawo wihina webedha webaribari bwathima wodhela ohujhomba omutugumanoni, omuhudhera Bibiliya, wapara mabasa oolaleya ni wakongomedha wunnuwelavo epaddi yomuzimuni. (Mat. 6:33) We waheragana dhithu ndha, anawo podi wambela wubuwela wi okala Namoona a Yehova eli ninga okala “gereja ya makolo ewa baahi”. Mwaha wa yeyo, aliwa podi opweha webedha weebaribari mburo wanabili mwigumini mwewa obe podi ohiya omulabela Yehova.
19. Muthu ahiya omulabela Yehova, nerege oliye kanadha ahogolowa? (Osugwe kwaduru enna musolo “ We podi omuhogolowela Yehova!”)
19 Muthu ahiya omulabela Yehova, nerege oliye kanadha ahogolowa? Naari, kahi yeyo. Oliye podi othwaruwa ni athome ohogolowela omulabela Yehova mwamakalelo apama. Wihina muthuyoyo ande omuhogolowela Yehova, anohowela wiyeviha ni orumedha nikavihero na anamaholela mulogo. (Tiya. 5:14) Mbwenye ebaribariya sowihina, niilibihedha wi nimuhogolowele Yehova nnere wawakela mareeliho owinjhiva!
20. Nnande aavi watajhiha mamwene owIzarayeli yaali oororomeleya, ki nerana eyo Yehova ananoonege aavi?
20 Mogwaddela, nnahudhera ddi ni mamwene owIzarayeli? Nnahudhera wi iyo podi okala ninga mamwene oororomeleya owIzarayeli, nadidela omulabela Yehova ni murima wehu waatene. Teto nnohowela ohudhera ni dhoviriganiha dhehu wodhela othwaruwa nerana yothega ni wawerana masadduwo enahoweleya. Ohiya eyo, nnohowela ohidduwala wi odidela omwebedha Yehova baahi ethu yathima vanlubale. Wadidela omulabela Yehova nuuroromeleya, oliye anerege wuwoona ninga muthu anerana dhithu dhapama vamentoni vaye.
JHIBO 45 Mubuwelo dha mmurimani mwaga
a Muwari mwa ohudhera wula, madhu owi “mamwene owIzarayeli,” enagiwana mamwene aatene ethongile nlogo na Yehova. Eyo enovolowelavo onamathonga wa mahimo menddi ooJuda ni onamathonga wa mahimo kumi aamwaana Ezarayeli. Teto naleya yathongile nlogo naamwaana Ezarayeli nihinathi ogaweya.
b WONELAMO PAMA: Dila dhowinjhivadhene Bibiliya anowalabihedha madhu owi “murima” wihina onihe ekalelo ya muthu. Eyo enovolowelavo dhofuna dhaye, ekalelo yaye, ethu enamuthukulela werana ethu-sithu ni dholuba dhaye anafuniye wakwanihedha.
c Enakala ninga kale mamwene amodha yahikanna elemelelo, yowawebedha amulugu a malogo yagonjhihiwa.
d Mwene Aza aherana dhothega dhinlubale. (2 Cró. 16:7, 10) Naarive dhigaali ndo, Bibiliya anihina Aza aherena ele yaali yapama vamentoni va Yehova. Naarive omambelelo oliye agakoddile yolaga, enakala ninga nuuvira mudhidhi oliye ahithwaruwa. Yehova aathabwile osugwa dhithu dhapama eriliyena, ohiya dhoviriganiha dhaye. Yathimaya sowihina mwene Aza amulabela Yehova baahi, teto ahilibihedha vanlubale wihina amarihe webedha wowoota mudhidhi athongaga. — 1 Reis 15:11-13; 2 Cró. 14:2-5.
e Ela enowoniha pamadhene wihina webedha webaribari bwathima, mwaha wihina malamulo menddi oobajha a Moyizeji, yokoddiha omwebedha muthu obe ethu-sithu ahili Yehova baahi. — Êxo. 20:1-6.
f OTAPULELIWA WA FOTU: Namaholela mulogo ali muzombwe, athapanyaga ni ddibila mmodhaya wodhela makalelo aye ong’wa. Ddibilaya anorumedha yolaga nuwiyeviha ni anowawerana masadduwo enahoweleya, teto anodhowave amulabelaga Yehova nuuroromeleya.
