OHUDHERA 29
JHIBO 121 Sapama okala owithiha
Okale mento wihina ohumorele muwehiwani
“Mukale mento ni mudidele olobela wihina muhimorele muwehiwani.” — MAT. 26:41.
DHITHU NNAAHUDHERIHU
Nnere wonelamo mwahaya bwaddi sathima orabela dhoweha ni dhithu dhanithukulele werana yothega.
1-2. a) Ethu baani Yesu awogiliye ni anamahara aye? (b) Mwahaya bwaddi anamahara aye edhe emusukumege? (Osugwe fotu.)
YESU ahiwoga egi: “Ebaribarene muzimu onofuna, mbwenye mwiili oli wokwerebeyene.” a (Mat. 26:41b) Madhu ala enowooniha pamadhene wi Yesu ahinona wi iyo nili athu oohilogomana ni nnere werana yothega. Teto madhu ala enonxagiha wihina nnohowela ohuthabwaga wiroromela. Emahiyu yele, Yesu ahinathi wawoga madhu ala, anamahara aye yahiwoga wi kiyamusukume. (Mat. 26:35) Yothoma ele ya anamahara a Yesu yaali yapama, mbwenye aliwa yaali ehinathi wonelamo wi yahafwanyiwe yoweha yorusa, ohiya werana ethu yapama, yere werana ethu yabure. Bumwahaya Yesu adhe awaddelege egi: “Mukale mento ni mudidele olobela wihina muhimorele muwehiwani.” — Mat. 26:41.
2 Yowukulihaya sowihina anamahara a Yesu kayandile okala mento. Mwaha wihina Yesu nuumagiwa anamahara aye yahithawa mwaha wawoova athu. Vano mwaha ohikala mento, anamahara a Yesu werana ethu yathomiliwa oherana wodhela othawa ni omuhiya Yesu yeka. — Mat. 26:56.
Yesu ahaxagiha anamahara aye wihina ekale mento wi enaamorele muwehiwani. Mbwenye aliwa omuthawa (Osugwe ddima 1-2)
3. a) Mwahaya bwaddi kannahowela othabwaga wiroromela? b) Ohudhera wula nnoone ddi?
3 Ebaribari wi iyo nnofuna vanlubale omuhagalasa Yehova, mbwenye kanidduwale wi mwaha okala athu ohilogomana, iyo podi werana ethu yabure nahifunaga, bumwahaya kanithabwege wiroromela. (Rom. 5:12; 7:21-23) Teto malabo mamodha, iyo podi wehiwa wi nerena ethu yabure nahijhehedhaga. Mbwenye wihina ndideleve okala oororomeleya wa Yehova ni Yesu, nnohowela ohara yolaga ya Yesu yokala mento nafwanyiwaga yoweha. Ohudhera wula onere onikavihera woona makalelo ookala mento nafwanyiwaga yoweha. Vobajha, nnere woona dhipaddi dha mwigumini mwehu nnahowelihu okala pasope. Voharela, nnere woona makalelo owibarela nafwanyiwaga yoweha. Namala nnere woona makalelo oodidela okala mento wihina nnamorele muwehiwani.
ONONE DHITHU DHINUKWEREBEYIHA
4-5. Mwahaya bwaddi nnohowela okala pasope ni dhoothega dhinakala ninga dhing’ono?
4 Kanidduwale wi dhoothega dhinakala ninga dhing’ono podi oridhiha wandana wehu ni Yehova. Mwaha wihina nahikala pasope dhoothega ndha podi onithukulela werana dhothega dhinlubale.
5 Aatene iyo nnofwanyiwa dhoweha dhanithukulele werana dhoothega dhinlubale. Teto iyo aatene nihikanna ethu enanikwerebeyiha. Dhithu ndha podi okala, werana yothega enlubale, werana ethu yonyakavala obe ovoloweliwa ni makalelo owubuwela amwilaboni. Podi wera amodha enna owanana yoweha yowawerana mararuwo, amodha enna owanana yoweha yowerana ethu yonyakavala ninga, wikeha ni omoona pornografiya. Amodhaya enowawoova athu, amodhaya enowanana ekalelo yowithukula, teto amodhaya kinarusa onyanyuwa obe podi okalawo dhithu dhimodha enawaniwana. Teto Tiyago ohuwoga egi: ‘Kadda muthu aneehiwa ni munigwa wa mmurimani mwaaye.’ — Tiya. 1:14.
6. Ddiniyani iyo aatene nahinahowelihu oddiwala?
6 We ohunona dhithu dhinukwerebeyiha? Ethu yowopiha wubuwela wihina kaninna dhithu dhinanikwerebeyiha obe wubuwela wi kannadha nerana yothega mwaha nili athu owithwelavo epaddi yoomuzimuni. (1 Juwa. 1:8) Mbwenye kudduwale ethu murumiwi Pawulo aawogiliye egi: Naleya eli ‘owithwelavo omuzimuni’ podi werana yothega yahikala pasope. (Gal. 6:1) Bumwahaya nnohowela orumedha wi aatene iyo nihikanna ethu-sithu enanikwerebeyiha. — 2 Kor. 13:5.
7. Nikale pasope ninddi? Owoge yoladdaniha.
7 Ki namala onona dhithu dhinanikwerebeyiha, nnere ddi? Nnohowela olibiha efunelo yehu yohimorela muwehiwani! Motajhiha, mudhidhi wa kale epaddi ya txinga yaali yokweya amwiddani ovolowa, waali omusuwoni wa txinga, bumwahaya yopwehiwawo anamasugwera owinjhiva wihina esugwerege musiwodha. Ni makalelo mamodhave, iyo nnohowela okala pasope ni dhithu dhinanikwerebeyiha, wi nande ogonjhiha yoweha yanthukulele werana yothega. — 1 Kor. 9:27.
MAKALELO OWIBARELA WAFWANYIWAGA YOWEHA
8-9. Ddiniyani muzombwe anasorihiwa va Provérbios kapitulu 7, ahoweliye werana wihina arabele werana yothega? (Provérbios 7:8, 9, 13, 14, 21)
8 Nnande aavi okala mento ni orabela yoweha yanthukulele werana yothega? Iyo podi ohudhera ethu yathima ni yopadduwa ya muzombwe anasorihiwa va Provérbios kapitulu 7. Oliye aherana mararuwo ni muhiyana aali namararuwa. Va versu 22 vinihina ‘mohulegela’ muzombwe ole ahimuhara muhiyana ole amararuwo. Mbwenye versu dha mundduli, dhinowoniha dhithu muzombwe ole ambeliye werana vang’ono vang’ono, ofiyedha werana yothega ele enlubale.
9 Ddiniyani yamuthukulele muzombwe ole werana yothega ele enlubale? Ethu yobajha, muzombwe ole ‘ovira dila waddamela mburo [muhiyana ole amararuwo] vakalesiye’ vati viribaga. Nuwindo oliye ohara dila yathukulela vaade va muhiyana ole. (Omwileri Provérbios 7:8, 9.) Ethu yanabili, numoona muhiyana ole oliye kaamuthanwe, ohiya eyo, muzombwe ole wenya wihina muhiyana ole ambejare ni wambela ovuruwana dhithu awogiye. Muhiyana ole owoga wi ahivelela mukutho wowandaniha, podi wera oliye aawonge madhu ala wihina muzombwe ole amoonege ninga muthu apama. (Omwileri Provérbios 7:13, 14, 21.) Ahere muzombwe ole ahivira dila ele, eere orabela yoweha ele ni kaafiyedhe wawerana mararuwo.
10. Dhithu baani dhaamuthukulele muthu werana yothega emodhave erilena muzombwe anasorihiwa va Provérbios kapitulu 7?
10 Yopadduwa ela enowoniha wihina ethu ninga yela podi onipadduwela. Nahikala pasope iyo podi werana yothega ‘mohulegela,’ vano obajha wubuwela wi nerilena yothegaya nahifunne. Mbwenye nubuwela pamadhene, iyo podi wonelamo wi nerilena yothega ele, mwaha wa dhothoma dhohiyana-iyana dhabure nerilihuna. Podi wera ethu enithukulele werana yothega ele, yaali mwaha ohasakula pama akwihu, yaredhelo yonyakavala, obe odhowa mburo dhihinafwanela mukiristawu odhowawo obe wodhela ovolowa sayiti dhohufwanelela mwinterneti. Teto podi okala mwaha ohulobela, ohumwileri Bibiliya, ohoona mutugumano ni ohapara mabasa oolaleya. Ndala ninga yampadduwele muzombwe ole anasorihiwa va Provérbios kapitulu 7, podi wera nerilena yothegaya mwaha wa dhothoma dhohiyana-hiyana dhabure nerilihuna.
11. Ohiya baahi orabela werana yothega, ddiniyani nnahowelihu orabela?
11 Nnahudhera ddi ni yopadduwa ya muzombwe ole anasorihiwa va Provérbios 7? Ohiya baahi orabela werana yothega, nnohowela orabela dhithu dhanthukulele werana yothegaya. Salomawu ahooniha pamadhene nuwoga wodhela yopadduwa ya muzombwe ole ni muhiyana a mararuwo. Awogaga wodhela muhiyana ola a mararuwo, Salomawu ohuwoga egi: ‘Kuhare mweddelo waye.’ (Pro. 7:25) Teto wenjhedhedhave egi: ‘Kumwaddamele oliye, newene kuwaddamele vaade vaye.’ (Pro. 5:3, 8) Madhu ala awogile Salomawu beebaribari, negi nirabele werana yothega, nnohowela orabela dhithu, dhanithukulele werana ethu yaamukule Yehova. b Eyo enatapulela wi nnohowela orabela dhithu dhinakala ninga kahi dhabure, mbwenye dhanithukulele werana yothega. — Mat. 5:29, 30.
12. Ddiniyani Jo aathomiliye werana, ki yothoma eyo yamukavihere aavi oherana yothega? (Jó 31:1)
12 Negi nande orabela dhithu dhanithukulele werana yothega, nnohowela othoma werana ele eli yapama. Siyeyo Jo eriliyena, oliye ‘aherana nipangano ni mento aye’ wihina kaasugwe ahiyana amodha ni efunelo yowerana mararuwo. (Omwileri Jó 31:1.) Mwaha Jo ohara ele aathomiliye, ahanda orabela wawerana mararuwo. Nihiyoya podi othoma orabela ethu-sithu yanithukulele wehiwa.
13. Mwahaya bwaddi sathima obarela mubuwelo wehu? (Osugwe fotu.)
13 Iyo aatene nnohowela obarela mubuwelo wehu. (Êxo. 20:17) Athu amodha enorumedha wi wubuwela weragana dhithu dhabure kahi yothega, mbwenye yabureya fuwerana ethuya onubuweliwe. Mbwenye makalelo ala owubuwela bowopiha, mwaha wi muthu anubuwela eragana dhithu dhabure, anna wenjhedhedha ethakwithakwi yaye yowerana yothega. Teto muthu anubuwela eragana yothega, enakala ninga anna witotela yoweha yeka, vano afwanyiwa yowehaya, enere okala yorusa ogonjhiha. Ebaribari wihina malabo mamodha iyo podi wambela wubuwela dhithu dhabure, eyo yapadduwa nnohowela osukuma mowaguva mubuwelo ola wabure ni wilibihedha wubuwela dhithu dhapama. Niilibihedha osukuma mowaguva mubuwelo dhabure, kannamorele muwehiwani yanthukulele werana yothega enlubale. — Fil. 4:8; Kol. 3:2; Tiya. 1:13-15.
Nnohowela orabela ethu-sithu yanthukulele werana yothega (Osugwe ddima 13)
14. Ethu emodha nnahowelihu werana wihina nnamorele muwehiwani, yanthukulele werana yothega enlubale siivi?
14 Ethu emodha nnahowelihu werana wihina nnamorele muwehiwani, yanthukulele werana yothega enlubale siivi? Fuudhela okanna ebaribari wihina wawiwelela malamulo a Yehova winodhana mareeliho mwigumini mwehu. Ebaribari wi malabo mamodha podi okala yorusa wubuwela ni werana dhithudha ninga Yehova anafuniye. Mbwenye nilibihedha werana dhithu dhinamuhagalasa Yehova, nnere okanna murenddele, teto dhehu dhinerege oneeddela pama.
15. Okanna efunelo yowerana ethu yapama winaanikavihere aavi?
15 Iyo aatene nnohowela okanna efunelo yowerana ethu yapama. Nahudhera ‘widda obure ni odhivela opama,’ nnere olibiha efunelo yehu yowerana ele eli yapama, teto nnere orabela werana dhithu dhanithukulele werana yothega. (Amós 5:15) Okanna efunelo yowerana ethu yapama, enere onikavihera ogonjhiha dhoweha dhinadha morurumusa.
16. Nnande aavi okanna efunelo yowerana dhithu dhapama, ki okanna efunelo ela winanikavihera aavi okala mento? (Osugwe fotu.)
16 Nnande aavi okanna efunelo yowerana dhithu dhapama? Iyo podi okanna efunelo yowerana dhithu dhapama wodhela oviheyana dhithu dhomuzimuni. Iyo nakanna elemelelo yowona mutugumano ni wapara mabasa oolaleya, ninna olibiha efunelo yehu yomuhagalasa Yehova, teto kannafwanyiwe yoweha yanthukulele werana yothega. (Mat. 28:19, 20; Ebe. 10:24, 25) Teto namwilerigi ni namuhudheraga Bibiliya ni napenddaga ndhe nnilerihu, nnolibiha efunelo ninnihuna yodhivela ele eli yapama ni widda ele eli yabure. (Jos. 1:8; Sal. 1:2, 3; 119:97, 101) Teto kudduwale werana ele Yesu awaddenliye anamahara aye egi: “Mudidele olobela wihina muhimorele muwehiwani.” (Mat. 26:41) Nalobelaga wa Babihu Yehova, nnonvaha ofuru wonikavihera ni nnolibiha efunelo yehu yomuhagalasa. — Tiya. 4:8.
Oviheyana mabasa oomuzimuni, winere onikavihera ohimorela muwehiwani (Osugwe ddima 16) c
ODIDELE OKALA MENTO WIHINA ONAMORELE MUWEHIWANI
17. Yokwerebeyiha baani murumiwi Peduru anniyena ahandiliye osukuma?
17 Ebaribari wi iyo podi wanda osukuma dhithu dhimodha dhinanikwerebeyiha. Mbwenye podi wera nnere ohowela owanana dhokwerebeyiha dhimodha muwari mwa mudhidhi wowinjhivene. Kasugwa yopadduwa ya murumiwi Peduru, oliye aahoniha wi owawoova athu wodhela omukoodda Yesu dila tharu. (Mat. 26:69-75) Mbwenye nuuvira mudhidhi, Peduru woniha oliba murima wodhela ovaha onamoona oSinediriyu. Vano yakala ninga murumiwi Peduru ahigonjhiha ekalelo ele yowawoova athu. (Dho. 5:27-29) Mbwenye nuuvira yaka dhowinjhiva, Peduru ohiya ojha naathu yahali majudewu, ‘awoovaga athu owineliwa.’ (Gal. 2:11, 12) Ela enowoniha wi Peduru ahihogolowela wawoova athu. Podi wera murumiwi Peduru kandile osukuma ekalelo ela yowawova athu egumi yaye yatene.
18. Mwahaya bwaddi sapama okala pasope ni dhokwerebeyiha nnubuwelihu wi nihimala ogonjhiha?
18 Ethu emodhave yampadduwele Peduru podi onipadduwela nihiyoya. Ni makalelo baani? Podi wera iyo nihikanna yokwerebeyiha nnubuwelihu wi nihimala ogonjhiha. Motajhiha, ddibila dhaala anowoga egi: “Dhahivira yaka 10 gihimonile pornografiya, mwaha wa yeyo gubuwela wi gihimala ogonjhiha emanya ele yomoona pornografiya, mbwenye emanya ele yere wipita baahi.” Yohagalasaya sowihina ddibila ola kaaselele owanana emanya ela yoomoona pornografiya. Vano oliye wonelamo wi ohowela owanana emanya ela kadda labo obe egumaye yaatene mwilaboni yela yabure. Nnikavihero na mwadhiye ni na anamaholela mulogo, oliye anowanda okala pasope wi ahimoone pornografiya.
19. Nakanna yokwerebeyiha nahinandihu ogonjhiha, nnere ddi wihina yokwerebeyiha eyo ehinithukulele werana yothega?
19 Nakanna yokwerebeyiha nahinandihu ogonjhiha, nnere ddi wihina yokwerebeyiha eyo ehinithukulele werana yothega? Iyo podi ohara yolaga Yesu avahiliye anamahara aye egi: “Mukale mento.” Naarive woonaga wi oli oolibeene obe onowanda osugwera yokwerebeyiha yawo, orabelege dhithu dhuthukulele omorela muwehiwani. (1 Kor. 10:12) Teto wubuwelege dhithu dhuukavihere ogonjhiha yokwerebeyiha yawo ni odidele werana dhithu dhendho. Yolebela ya Provérbios 28:14 enihina: ‘Oohagalala di mulobwana anakala mento malabo matene.’ — 2 Ped. 3:14.
MAREELIHO NNAWAKELIHU NADIDELA OKALA MENTO
20-21. a) Nilibihedha okala mento wihina nnamorele muwehiwani, mareeliho baani nnawakelihu? b) Nerana epaddi yehu wihina nnamorele muwehiwani, ddiniyani Yehova anafuniye onivaha? (2 Korintiyu 4:7)
20 Nikanne ebaribari wi nilibihedha okala mento wihina nnamorele muwehiwani yanthukulele werana yothega, nnere wawakela mareeliho owinjhiva. Naarive akala muthu erana yothega, anokanna ‘ohagalala wa mudhidhi vang’ono,’ iyo nihinona wi ohagalala webaribari winadha mwaha wawiwelela malamulo a Yehova. (Ebe. 11:25; Sal. 19:8) Mwaha wi Yehova anipaddusile wihina naharege malamulo aye. (Gén. 1:27) Namwiwelelaga Yehova nnokanna mubuwelo wapama ni ejhehedhelo yokalawo ni mukalakala mwilaboni exa.— 1 Tim. 6:12; 2 Tim. 1:3; Juda 20, 21.
21 Ebaribari wi “mwiili oli wokwerebeyene,” mbwenye eyo kinatapulela wi kannahowela werana ethu-sithu wi nande ogonjhiha dhokwerebeyiha dhehu. Teto Yehova anere onivaha kopolo nnahowelihu wihina nande ogonjhiha dhokwerebeyiha dhehu. (Omwileri 2 Korintiyu 4:7.) Ohiya eyo, kudduwale wi Yehova anonivaha kopolo dhohikala dha masika. Mbwenye nnohowela olabihedha kopolo dhehu wihina nigonjhihe dhoweha dhinanifwanya kadda labo, mwaha oyo mutholo wehu. Nerana epaddi yehu, iyo podi ororomela wi Yehova anere wawakula malobelo ehu, wihina nande owanana dhokwerebeyiha dhehu. (1 Kor. 10:13) Iyo kannanganyedha wi nnikavihero na Yehova, nnere wanda okala mento ni ogonjhiha yoweha si yoweha enanifwanya.
JHIBO 47 Olobele wa Yehova malabo amatene
a WONELAMO PAMA: Madhu owi “muzimu” enafwanyeya va Matewuji 26:41 enagiwana kopolo dhinadha mmurimani mwa muthu dhinamuthukulela owoga ni werana dhithu mwamakalelo apama. Madhu owi “Mwiili” enagiwana ohulogomana wehu. Mwaha okala athu oothega, malabo owinjhiva nnowubuwela ni nnowerana dhithu dhabure. Bumwahaya naarive malabo mamodha nifunaga werana dhithu dhapama, nahikala pasope iyo podi werana dhithu Yehova aniddiye.
b Akala muthu oherana yothega enlubale oliye podi ofwanya nikavihero mu livuru Ofwanye egumi yohagalasa ya malabo amatene! Ohudhera 57 muselu 1-3 vamodha ni artigu anna musolo “Osugwege pamadhene osogolo” mu Namasugwera a Novembro a 2020 epaddi 27-29 ddima 12-17.
c OTAPULELIWA WA FOTU: Ddibila ilerigi yolebela ya kadda labo, mambeseene. Anomwileri Bibiliya mudhidhi wa almosu omabasani ni anowoona mutugumano wa vaari va sumana mahiyu.
