1-2. Zadoki aali aani? (1 Crónicas 12:22, 26-28)

 KABIHA wubuwela yopadduwa ela, muthithi waathu ookwaranya 340 000, yahitugumana wihina emuthikithele Davidi ninga mwene, aamwaana Ezarayeli. Teto yahivira malabo mararu, athu yala egatugumanne mwango dhaali waddamela luwani ya Ebro. Aliwa yaali oohagalalene, ethapanyaga, eteyaga ni emwibelaga Yehova. (1 Cró. 12:39) Teto vaari va muthithi yoola, ahikalavo muzombwe ithaniwa Zadoki. Naarive vigaali athu owinjhiva, Yehova oheriha wi iyo nnone wi Zadoki aali vaari muthithi yoole. (Omwileri 1 Crónicas 12:22, 26-28.) Mbwenye Zadoki aali aani?

² Zadoki aali namakutha, alaba vamodha ni namakutha munlubale Abiyatar. Mulugu ahinvaha Zadoki thotho ni enonelo yowonelamo efunelo yaye. (2 Sam. 15:27) Teto athu yahowelaga yolaga yathotho, yamulobesa Zadoki. Mbwenye ohiya baahi okala muthu athotho, Zadoki aali ooliba murima. Muwari mwa ohudhera wula, nnere opwasedha ohudhera ekalelo ela yoliba murima aanna Zadoki.

3. (a)Mwahaya bwaddi nigahowela okala athu ooliba murima? (b) Dhithu baani nnafunihu woona muwari mwa ohudhera wula?

³ Woona wihina nnakalawo malabo ookuthula, Saddana anna werana dhatedhene anandiye wihina anikwerebeyihe. (1 Ped. 5:8) Mbwenye njhehaga mudhidhi Yehova anafuniye omutolosa Saddana, vamodha ni elabo ela yabure, nnohowela okala athu ooliba murima. (Sal. 31:24) Vano kabeni noone makalelo mararu ootajhiha oliba murima wa Zadoki.

OKAVIHEREGE BAAHI OMWENE WA MULUGU

4. Mwahaya bwaddi nigahowela okala athu ooliba murima wihina nikavihere Omwene wa Mulugu? (Osugwe fotu.)

⁴ Woona wihina nili nlogo na Mulugu, iyo nnokavihera Omwene waye ni murima wehu waatene. Malabo mamodha kahi yokweya  okavihera Omwene wa Mulugu, bumwahaya enohoweleya okala ooliba murima. (Mat. 6:33) Motajhiha, nnohowela okala ooliba murima wihina nande wawiwelela malamulo a Yehova ni olaleya muthenga dhapama dhOmwene, mwilaboni muna yabure nnakalihu. (1 Tes. 2:2) Teto nnohowela okala ooliba murima wihina nahivolosihe mpulitikani, woona wi elabwela enna othabwa ogaweya mwaha muselu dha pulitika. (Juwa. 18:36) Ohiya eyo, mwaha adhaari owinjhiva a Yehova othoma ohivolosiha mpulitikani ni ohukavihera koddo, ehonihiwa goyi ni anamathonga, ehiyelela dhoreela dhewa, teto amodha ehifiyedha ovolosihiwa mukambura mwaha odidela okala oororomeleya wa Yehova.

5. Mwahaya bwaddi nigawoga wi Zadoki aali muthu ooliba murima?

⁵ Zadoki kaadhowile wEbro baahi wihina aajhe mathanga yegeredhiwe, Davidi nuthikitheliwa ninga mwene, mbwenye oliye aadhowile owiwegeredhene, agathukunle futhaye wihina awane yakumelela amwiddani. (1 Cró. 12:38) Oliye ahivelela wihina amukavihere Davidi ni abarele nlogo naamwaana Ezarayeli mmadani mwa amwiddani ewa. Podi wera Zadoki kaali munyakoddo aanonne owana pama, mbwenye oliye aali ooliba murima.

6. Ddiniyani yamukavihenre Zadoki okala muthu ooliba murima? (Salmo 138:3)

⁶ Ddiniyani yamukavihere Zadoki okala muthu ooliba murima? Oliye akalesa naalobwana akopolo ni ooliba murima. Mwebaribarene oliye ahihudhera naaliwa okala ooliba murima. Motajhiha, Davidi aali namaholela ni munyakoddo ooliba murima. Bumwahaya, amwaana Ezarayeli aatene yahimukavihera wihina oliye akale mwene. (1 Cró. 11:1, 2) Davidi amuroromelesa Yehova aadhowaga owana ni amwiddani aye. (Sal. 28:7; Omwileri Salmo 138:3.) Mbwenye yahikalawo athu amodha ooliba murima Zadoki aatajhihiye, ninga Jeyoyada, Benaya vamodha ni anamaholela anlogo naamwaana Ezarayeli owakwana 22, yamukavihera Davidi. (1 Cró. 11:22-25; 12:26-28) Alobwana ala  oororomeleya, yahimukavihera Davidi okala mwene aamwaana Ezarayeli. Teto aliwa yaherana dhatedhene yaandiwa wihina embarele Davidi.

7. (a) Peeno dhopadduwa baani dhinaanikavihere okala athu ooliba murima? (b) Ohudhere ddi ni yopadduwa ya ddibila Nsilu?

⁷ Ni iyoya podi okala athu ooliba murima, nahudheraga dhopadduwa dha adhaari amodha a Yehova yaali ooliba murima wihina ekavihere Omwene wa Mulugu nuuroromeleya. Mwene ehu Yesu ahikoodda okavihera muselu dha pulitika ya elabo ela ya Saddana. (Mat. 4:8-11; Juwa. 6:14, 15) Oliye amuroromelesa Yehova wihina ande okala ooliba murima ni okanna kopolo yowerana ele eli yapama. Teto peeno nihikanna dhopadduwa dhowinjhiva dha addibila, enakodda okavihera koddo ni wivolosiha mpulitikani. Ononamo aavi wiileri wodhela dhopadduwa dhaaddibila ala musayitini jw.org? a

WAKAVIHEREGE ADDIBILA

8. Mudhidhi baani anamaholela mulogo enahoweliwa wooniha oliba murima?

⁸ Iyo ninga adhaari a Yehova nnodhiveliwa okaviherana mmodha ni mukwaye. (2 Kor. 8:4) Mbwenye malabo mamodha wihina nande okaviherana nnohowela okala ooliba murima. Motajhiha, mudhidhi wa koddo anamaholela mulogo enohowela walibiha addibila ammulogoni wodhela wakavihera epaddi yomuzimuni ni yahoweleyaga wakavihera epaddi yomwilini. Anamaholela mulogo enowadhivela mambila a Yehova, bumwahaya aliwa enopweha egumi yewa vangovini wihina yakavihere addibila enahowela nikavihero. (Juwa. 15:12, 13) Anamaholela mulogo yilibiheraga ni makalelo yaala, enowooniha wi athu ooliba murima ndala ninga Zadoki.

9. Mowiwanana ni 2 Samuel 15:27-29, ddiniyani Davidi aamulobiliye Zadoki werana? (Osugwe fotu.)

⁹ Egumi ya Davidi yaali vangovini, mwaha mwanaye Abisalawu afuna ampe ni akale mwene. (2 Sam. 15:12, 13) Mwaha wa yeyo, Davidi oohowela othawa oJeruzale mowaguva!  Bumwahaya oliye wawaddela adhaari aye egi: ‘Kabeni nthawe mwaha kaavo anaavuluwe mmadani mwa Abisalawu.’ (2 Sam. 15:14) Mudhidhi Davidi ni adhaari aye ethawaga, wonelamo wihina yohoweleya adhaari amodha ohala oJeruzale wihina emwaddelege Davidi dhithu Abisalawu afuniye weragana. Bumwahaya oliye omuruma Zadoki ni anamakutha amodha wihina ehogolowele oJeruzale. (Omwileri 2 Samuel 15:27-29.) Mbwenye alobwana ale yahale oJeruzale yohowela okala pasope, mwaha wi ole kawali mutholo wokweya. Woona wihina Abisalawu afuna aape ababe, mwebaribarene ahanone wi Zadoki ni anamakutha amodha yaali epaddi ya Davidi, podi wera eere wawerela ethu yabure!

10. Nimakalelo baani Zadoki ni alobwana amodhaya yaamukaviheriwa Davidi?

¹⁰ Davidi ahikanna palanu, mbwenye ohoowela nikavihero na Zadoki vamodha ni mukwaye mmodhaya oororomeleya ithaniwa Uzayi. (2 Sam. 15:32-37) Palanuya yaali ela, Uzayi ohoowela wiisinjhihedha ekalaga ninga amukavihera Abisalawu ni onvaha yolaga wodhela makalelo omwihidda Davidi. Vano Abisalawu nuuthoma ohara yolaga ya Uzayi, Uzayi omwaddela Zadoki ni Abiyatar dhithu dhaapadduwile. (2 Sam. 17:8-16) Nuwindo Zadoki ni Abiyatar omuruma muthu wihina aamwaddele Davidi ele Abisalawu afuniye werana. (2 Sam. 17:17) Nnikavihero na Yehova, Zadoki ni anamakutha amodha yahanda ombarela Davidi. — 2 Sam. 17:21, 22.

11. Nnatajhihe aavi oliba murima wa Zadoki, addibila ammulogoni yafwanyiwaga makathamiho ni yahowelaga nikavihero nehu?

¹¹ Ki vano addibila ammulogoni yafwanyiwaga makathamiho ni yahowelaga nikavihero nehu, nnaamutajhihe aavi Zadoki wodhela okala athu ooliba murima? (1) Oharege dhoholela. Nafwanyiwaga makathamiho bi makathamiho obe ngovi, sathima vanlubale okala owiwanana ni addibila. Teto sathima ohara dhoholela dhinadhela oBeteli. (Ebe. 13:17) Anamaholela mulogo, enohowela ohudhera dila dhowinjhivadhene dhoholela dha nikuru nehu, dhinawoga wodhela makalelo owiwegeredha yapadduwa  ngovi. (1 Cor. 14:33, 40) (2) Okale ooliba murima, mudhidhi mmodhave okale pasope. (Pro. 22:3) Wabihege wubuwela ohunathi werana ethu-sithu ni kuthabwege wipweha vangovini. (3) Omuroromelege Yehova. Kudduwale wi Yehova anothuwathuwela opama wawo ni wa addibila. Yehova podi wuvaha kopolo wi wande wakavihera addibila nuubareleya.

12-13. Ohudhenre ddi ni yopadduwa ya ddibila Viktor ni Vitalii? (Osugwe fotu.)

¹² Kasugwa yotajhiha ya ddibila Viktor ni Vitalii, addibila ala, yahakavihera addibila yakala elabo yo Ukaraniya mudhidhi wa koddo wodhela wagawela manjhe ni dhoojha. Ddibila Viktor anawoga egi: “Iyo noosayela dhoojha mburo dhatedhene, teto mudhidhi mmodhave noowiwa athu yobaga futhi. Ddibila dhaala aanna loja agulihiyemo dhoojha, othoma wakavihera addibila ni dhoojha dhaali muloja mwaaye. Ele eriliyena yahakavihera vanlubale addibila yahanna yoojha. Ginowubuwela labo dhaala, nikitihaga dhoojha, omotha bomba waddamela mburo nalihuwo. Labo nenne, Gahilobela wa Yehova gimulobaga wihina agivahe oliba murima wi gidhowegeve gaakaviheraga addibilaga.”

¹³ Ddibila Vitalii anawoga egi: “Yohoweleya okala ooliba murima. Olenddo wobajha gerilimina, gahimala mawora 12 ngali murampani geddaga. Miyo kaganda omaala, gaalobela mudhidhi wamutene.” Ddibila Vitalii ahoniha oliba murima, mudhidhi mmodhave okale pasope. Oliye anowogave egi: “Miyo omuloba Yehova wi agivahe thotho ni agikavihere okala amanddile. Nuwindo miyo othoma wahara baahi arampa anamathonga yarumedhiwa weddiwamo. Nroromelo naaga nahiliba vanlubale nuwawoona addibila yalaba owiwananeene. Aliwa yokavihera wegeredha dila wihina karo dheddegemo pama, amodha yodhana guwo ni dhoojha wi yavahe addibila ni yokavihera okitiha mukaroni dhoojha dhadhiwana. Teto yahinikavihera wodhela onivaha mburo ni dhoojha mudhidhi needdaga olenddo.”

KUSELELE OKALA OOROROMELEYA WA YEHOVA

14. Nnakala aavi mmudhihu obe mukwihu nnamudhivelihu athoma ohiya omulabela Yehova?

¹⁴ Ethu enathabwa weeha nroromelo nehu ni enarusa ovilelana, bu mudhidhi mmudhihu obe mukwihu nnamudhivelihu athoma ohiya omulabela Yehova. (Sal. 78:40; Pro. 24:10) Iyo naathabwaga omudhivela muthu yoola, enorusa vanlubale ovilelana widdelawa. Akala we onna ofwanyiwa makathamiho ninga yaala, ohudhera yopadduwa ya Zadoki enere wulibiha vanlubale.

15. Mwahaya bwaddi Zadoki oohowela okala ooliba murima wihina adhowegeve agaali oororomeleya wa Yehova? (1 Reis 1:5-8)

¹⁵ Zadoki kaselele okala oororomeleya wa Yehova, mudhidhi mukwaye Abiyatar, nuuthoma okala ohiroromeleya. Teto Abiyatar ahiyile okala ohiroromeleya, onamathonga wa Davidi ogaali omakuthulo. Davidi ahalaga neena nuukwa, Adoniya othoma okala mwene, naarive Yehova agaapaganyile onvaha Salomawu omwene. (1 Cró. 22:9, 10) Teto Abiyatar othoma omukavihera Adoniya wi akale mwene. (Omwileri 1 Reis 1:5-8.) Ni makalelo yaala, Abiyatar ohiya okala oororomeleya, ohiya baahi ni Davidi, mbwenye ni Yehovaya. Onowanda wubuwela makalelo aali Zadoki? Yaka 40 mundduli Zadoki ni Abiyatar yahilaba vamodha ninga anamakutha. (2 Sam. 8:17) Aliwa yathebesa vamodha ‘Nikasa na Mulugu eebaribari.’ (2 Sam. 15:29) Aabilene yahimukavihera Davidi ninga mwene ewa ni yahapara vamodha mabasa owinjhiva a Yehova.— 2 Sam. 19:11-14.

16. Ddiniyani yamukavihere Zadoki okalave oororomeleya?

¹⁶ Zadoki kaaselele okala oororomeleya wa Yehova, naarive Abiyatar agamusukumme Yehova ni Davidi. Teto Davidi ahinona wi Zadoki kaahiye okala oororomeleya. Vano Davidi nuwonelamo wi Abiyatar ahithoma okala oohiroromeleya, oliye omuthoma Zadoki, Nata ni Benaya wi emuthikithele Salomawu ninga mwene.  (1 Reis 1:32-34) Mohanganyedha, yotajhiha ya Nata ni ya adhaari amodha a Yehova yaali oororomeleya yamukavihera Davidi, yahimulibiha vanlubale Zadoki. (1 Reis 1:38, 39) Vano Salomawu nuukala mwene, ‘omuthoma Zadoki ninga namakutha munlubale vamburoni va Abiyatar.’— 1 Reis 2:35.

17. Onamutajhihe aavi Zadoki, akala muthu onamudhiveliwe anohiya omulabela Yehova?

¹⁷ Onaamutajhihe aavi Zadoki, akala muthu onamudhiveliwe anohiya omulabela Yehova? We podi omutajhiha Zadoki wodhela omoniha Yehova wi ohuthoma okala oororomeleya wa oliye ni odidela omulabela, naarive ofwanyiwaga makathamiho bi makathamiho. (Jos 24:15) Teto Yehova anere wuvaha kopolo onahoweliwe wihina werena ele eli yapama. Ohiya eyo, olobelege wa Yehova ni odidele wandana ni ale enamulabela oliye nuuroromeleya. Yehova anovaha thima ororomeleya wawo ni anere wureeliha wadidela omulabela nuuroromeleya. — 2 Sam. 22:26.

18. Ohudhere ddi ni yopadduwa ya Marco ni Sidse?

¹⁸ Kasugwa yopadduwa ya Ddibila Marco ni mwadhiye Sidse. Aniwa abiili anahiyana othoma ohiya ebaribari egaali apogweene. Ddibila Marco anawoga egi: “Okuma labo mwanawo anabaliwiye, we onowambela omudhivela vanlubale, teto onowilibihedha wihina ombarele wi yahimpadduwele ethu-sithu yowopiha. Bumwahaya oliye ahiya omulabela Yehova, enopiha mbani vanlubale. Mbwenye Yehova anonikavihera wavilelana makathamiho ala. Teto miyo gakala owukuwene mwaadhaga dinagilibiha, vano oliye akala owukuwene miyo dinamulibiha.” Vano murogola Sidse anawoga egi: “Iyo nandile wavilelana makathamiho ala, mwaha wa kopolo dha Yehova. Miyo gahukuwa vanlubale ni gowivaha nibili, mwaha gubuwela wi aniihu yahiyile ebaribari mwaha wa miyo. Bumwahaya miyo olobela wa Yehova, gimwaddelaga dhatedhene dhagipadduwela. Ohunavire mudhidhi wowinjhiva, murogola dhaala gamamlimi mudhidhi wowinjhivene gihigumannena, odha othapanya ni miyo. Oliye ogisugwa wintoni waaga, nuwindo owoga egi: ‘Sidse, kudduwale wihina dhithu dhipadduwile nibilina kahi nawo.’ Nnikavihero na Yehova ginna wanda odhowagave gimulabelaga Yehova nuuhagalala.”

19. Ethu baani oothomiliwe werana?

¹⁹ Yehova anofuna vanlubale wi adhaari aye aatene ekale ooliba murima ninga Zadoki. (2 Tim. 1:7) Mbwenye Yehova, kanafuna wi iyo niroromelege kopolo dhehu baahi. Oliye anafuna wi niroromelege kopolo dhaaye. Bumwahaya wafwanyiwaga makathamiho onahoweliwe wooniha oliba murima, omulobe Yehova wihina uvahe kopolo dhaye. Nnikavihero na Yehova we onere wanda okala ooliba murima ndala ninga Zadoki! — 1 Ped. 5:10.