Nicolas ni Céline yahifwanyiwa makathamiho mamodha. Beteli yoFransa, yahathoma aliwa wihina yakaviherege mulogo muxa. Aliwa enowoga yegi: “Omambelelowene nahihagalala vanlubale, mbwenye nuuvira mudhidhi, iyo wambela okanna munukwela wa akwihu. Naali nihinathi okanna akwihu axa a mulogo natamelihu.” a Woona wihina kahi ethu yokweya olemela mulogo muxa, onere ddi wihina dhawo dhuweddele pama? Onande aavi ohagalala watamela mulogo mmodhaya? Athu amodha enukavihere ni makalelo baani? Ki mareeliho baani oomuzimuni onafuniwe wawakela ni onaakavihere aavi addibila a mulogo muxa otameliwe?

DHITHU NAYI DHINUKAVIHERE OLEMELA MULOGO MUXA OTAMELIWE

1. Omuroromela Yehova. (Sal. 37:5) Murogola dhaala anakala o Japawu anithaniwa Kazumi, ahimala yaka 20 atugumanaga mmulogoni mwaaye, mbwenye oohowela otama mwaha mamune ahawakela mabasa mburo mmodhaya. Oliye andile aavi ‘omuhiyedha dila yaye Yehova?’ Oliye anowoga egi: “Miyo gahilobela wa Yehova gimwaddelaga makalelo gaalimi. Miyo gowova, giwoona ninga gili meeka ni gothuwathuwa vanlubale. Mbwenye kadda mudhidhi galobelimi wa Yehova, oliye oogivaha kopolo gahowelimi.”

Onere ddi wihina othabwege omuroromela Yehova? Ndala ninga muthanko onahoweliwa manjhe ni mathaka apama wihina wunnuwe pama. Nroromelo nehu nnohowela ojhihiwa wihina nikale nooliba. Nicolas awogiwe mundduli, Ahilibiha nroromelo naaye ni Yehova wodhela opendda yopadduwa ya Abarawu, Yesu ni ya murumiwi Pawulo, yalevile dhithu dhowinjhiva wihina emulabele Yehova. Teto sapama ompandda porogarama awo oohudhera wa vayeka, mwaha  anere wukavihera wagonjhiha makathamiho a mwigumi. Ohiya eyo, anere wukavihera ohudhera dhithu wihina walibihena addibila a mulogo muxa otameliwe.

2. Kuliganihege mulogo onadhiwe ni mulogo muxa otameliwe. (Ecl. 7:10) Jules akala elabo yoBenin wAfrika, aatamele wEstados Unidu, ahonelamo wihina mweddeloya ohuhiyana vanlubale. Oliye anowoga egi: “Miyo gubuwela wihina gohowela wawaddela addibila aatene gathapanyimina, yopadduwa ya mwigumini mwaaga. Mwaha wa mweddelo wohiyana, oliye wambela wasukuma addibila ammulogoni. Mbwenye numala wanona pama addibila, oliye osaddula monelo waye. Oliye anowogave egi: “Miyo ginorumedha wihina aatene iyo nili ooligana, naarive nikalaga mburo dhohiyana-hiyana. Mbwenye enanihiyaniha bi makalelo nnerihuna dhithudha. Yathimaya fuwarumedha athuya mowiwanana ni ekalelo yewa.” Bumwahaya sathima ohiliganiha mulogo naalihu ni mulogo muxa ntamenlihu. Piyonera dhaala anithaniwa Anne-Lise anowoga egi: “Miyo kagitamenle mulogo mmodhaya, gisayelaga ofwanya ethu gahilimi mundduli, mbwenye gitamenle wihina gihudhere dhithu dhixa.”

Nanamaholela mulogoya, kiliganihege mulogo waaliwa ni mulogo muxa etamenliwa. Akala addibila a mulogo muxa, enerana dhithudha mwamakalelo oohiyana, eyo kinatapulela wihina aliwa kinerana pama dhithudha. Bumwahaya sapama ohunathi owoga monelo wawo, waabiha onona makalelo addibila eneriwana dhithudha, mowiwanana ni mweddelo wa murudda wewa. (Ecl. 3:1, 7b) Teto sapama wahudhiha addibila wodhela yotajhiha yehu, ohiya wawaddihedha aliwa wubuwelaga ndala ninga iyo. — 2 Kor. 1:24.

3. Okale ooviheya ni mabasa oomuzimuni. (Fil. 1:27) Otamela mburo mmodhaya winovaha mabasa, teto podi ojha mudhidhi wowinjhivene. Mbwenye sathima wilibihedha woona mutugumano dhatedhene dha mulogo muxa otameliwe. Dhandeyaga sapama woona mutugumanodha tho-tho. Mwaha addibila a mulogo muxa kinande onikavihera, akala kinanonege omutugumanoni. Murogola dhaala anakala wAfrika du Sul anithaniwa Lucinda, aatamenle luwani emodha enlubale ni anaaye abiili anahiyana, anowoga egi: “Akwaaga yahigikongomedha osayela wandana ni addibila a mulogo muxa gadhowimi wodhela olaba vamodha naaliwa mmabasani oolaleya ni woona mutugumano. Teto iyo nahirumedha wihina addibila yeregena mutugumano wammalaleyelo vaade veehu.”

Ethu enaanikavihere othabwaga waroromela addibila amodha, fuwilibihedha olaba ‘dhipaddi dhatedhene’ wi nakavihere mabasa a mmulogoni. Anamaholela mulogo a Anne-Lise asorihiwe mundduli, yahimukongomedha wapara mabasa oolaleya naaddibila a mulogo muxa. Yokumelelavoya yaali eevi? Murogola Anne-Lise anowogave egi: “Ohunavire mudhidhi wowinjhiva miyo wonelamo wi olaba naaddibila mmabasani oolaleya yaali makalelo apama owaanona ni walemela addibila a mulogo muxa.” Ohiya eyo, we wakaviheraga mabasa ooxela ni oowomihedha Nyumba Yomwene, onere woniha wi vano mulogo ola muxa bwawo. Teto wathabwaga wapara mabasa ala, addibila ammulogoni enere wulemela ni onerege wiwoona okala epaddi ya mulogo muxa.

 4. Okanne akwawo axa mulogo otameliwe. (2 Kor. 6:11-13) Makalelo ookanna akwawo axa mmulogoni, fuudhela wathuwathuwela athu. Bumwahaya ofiyege mambeseene omutugumanoni, teto mutugumano dhamala kuwaguvelege odhowa, werana ndo onerege wanda othapanya ni wanona pama addibila. Wilibihedhe wanona mandina aaddibila. Ohadduwala mandina aaddibila, okala muthu apama ni ookweya winere wathukulela addibila wulemela ni okanna wandana wapama naliwa.

Kuthabwe othuwathuwela wi okale ooligana naliwa, mbwenye ohiye wihina addibila yunone mwaha ekalelo yawo. We podi omutajhiha Lucinda awogile egi: “Iyo nihikanna wandana wapama naaddibilihu, mwaha wawithanela vaade vehu.”

“MWAKELANEGE MMODHA NI MUKWAYE”

Athu amodha enowarusa ovolowa mu Nyumbani Yomwene, muli athu owinjhiva yahanonniwa. Onere ddi wihina wakavihere addibila axa enatamela mulogo wawo? Murumiwi Pawulo ohuleba egi: “ Mwakelanege mmodha ni mukwaye, ninga Kiristu uwakenliyeni.” (Rom. 15:7) Anamaholela mulogo podi wakavihera addibila enatamela mulogo wewa, okala ootapuwene yakala Onyumbani Yomwene. Yerana ndo, enere wooniha wihina enamutajhiha Yehova. (Osugwe kwaduru enna musolo “Ginande aavi woona ninga ethu yokweya otamela mulogo mmodha.”) Addibila aatene ammulogoni ni ahimaya podi wakavihera addibila axa okala ootapuwene.

Wawakela athu amodha enavolowelavo okala namakela aleddo. Teto enovolowelavo wakavihera ni ethu-sithu enahoweliwa. Motajhiha, murogola dhaala ahimukavihera murogola mmodha, aatamenle mulogo waye wodhela omoniha luwani yaatene ni makalelo onfwanya takisi. Murogola ole aatamenle mulogo muxa, ahitikina ni ethu murogola ole amwerenliye, teto eyo yahimukavihera olemela mulogo muxa aatameliye.

OTAMELA MULOGO MMODHAYA ONOWUVAHA OFURU WOWUNNUWELAVO EPADDI YOMUZIMUNI

Wihina kwaakwa yande ovava, enohowela wihuwa dila dhowinjhivadhene. Ni makalelo mamodhave, watamela mulogo mmodhaya, onere ohowela osukuma  woova ni dhithu dhowinjhiva dhuthukulele ohunnuwelavo epaddi yomuzimuni. Nicolas ni Celine esorihiwe mundduli enowoga yegi: “Otamela mulogo mmodha makalelo oohudhera dhithu dhimodha. Wihina nande walemela addibila ohiyana-hiyana ni mburo naatamenlihu, nohowela wilibihedha wi nikanne dhikalelo dhixa.” Ddibila Jean-Charles asorihiwe mundduli, anowoga mareeliho awakenliye ni emudhaye mwaha otamela mulogo muxa, oliye anowoga egi: “Nuutamela mulogo muxa, anihu yahithabwa withwelavo epaddi yomuzimuni ni yahikanna wandana woliba ni Yehova. Nuuvira mweri vang’ono, mwanihu amwana muhiyana obajha okanna dhipaddi mmutugumanoni dha vaari va sumana. Teto mwanihu amwana mulobwanaya okala namalaleya ohibaddiziwa.”

Ki akala onofuna otamela mulogo mmodhaya winahoweleya anamalaleya, mbwenye dhihikalawo dhithu dhihinuwenya werana eyo, onere ddi? Akala dhili ndo, we podi oparihedha mabasa dhoholela musolo ola mmulogoni mwawo. Ni makalelo yaala enakalege ninga otamenle mulogo muxa. Bumwahaya omuroromele Yehova ni odidele oviheyana ni mabasa a mmulogoni mwawo wodhela olaba ni addibila ohiyanahiyana mmabasani oolaleya. Teto wandane ni addibila amodha ni olibihe wandana onniwena naaliwa. Ohiya eyo, we podi wakavihera addibila enatamela mulogo wawo obe wakavihera ale enahowela nikavihero. Werana eyo, winere wukavihera okala oolibeene epaddi yomuzimuni, mwaha odhivela ekalelo ya makiristawu eebaribari. (Juwa. 13:35) Teto okanne ebaribari wihina ‘Mulugu onodhiveliwa mukutho ndho.’ — Ebe. 13:16.

Naarive otamela mulogo mmodha yahile ethu yokweya, addibila owinjhiva ehanda olemelela pamadhene mulogo muxa etamenliwa, teto we onere wanda! Murogola Anne-Lise anowogave egi: “Otamela mulogo muxa ohugikavihera okanna akwaaga axa.” Murogola Kazumi, vano ohukanna ebaribari wihina otamela mulogo mmodhaya, ohumukavihera woona nikavihero na Yehova mwamakalelo ahinoonigiye. Ki wodhela ddibila Jules? Oliye anowoga egi: “Wandana ginnimina, ohugikavihera okala ootapuwene. Vano giniwona ninga gili mulogo waaga, teto eneere ogirusa ohiya mulogo ola.”