OHUDHERA 28
JHIBO 123 Nimwiwelelege Yehova nnikuru naaye
We onowanda ohiyaniha muselu webaribari ni wowoota?
“Mukale txithi, muware sintu neebaribari.” — EFE. 6:14.
DHITHU NNAAHUDHERIHU
Nnere woona makalelo oohiyaniha ebaribari nnahudherihu wodhela Yehova ni dhowoota anavuwiha Saddana ni amwiddani ehu.
1. Murima wawo oli aavi mwaha ofwanya ebaribari ya mBibiliyani?
NINGA nlogo na Yehova, iyo nnodhiveliwa ebaribari enafwanyeya mBibiliyani, teto nnororomela ebaribari ela. (Rom. 10:17) Iyo nihikanna ebaribari wi Yehova diitile mulogo weekiristawu wihina okale ‘ntxikwa ni obareleya webaribari.’ (1 Tim. 3:15) Teto iyo nnohagalala wakavihera ale enaniholela,’ mwaha wihina baaddibila yaala, enatapulela ebaribari enafwanyeya mBibiliyani ni enanikavihera werana efunelo ya Yehova. — Ebe. 13:17.
2. Mowiwanana ni Tiyago 5:19, ddiniyani yaapadduwe nahikala pasope?
2 Nahikala pasope, iyo podi opupuruwa naarive nigahudhere ebaribari ya mBibiliyani ni nrumedhaga wi nnohowela ohara dhoholela nnakelihu munikuruni mwa Yehova. (Omwileri Tiyago 5:19.) Saddana eere ohagalala vanlubale ahere anoona nanganyedhaga ebaribari eli mBibiliyani teto nahiroromelaga nikuru na Yehova. — Efe. 4:14.
3. Mwahaya bwaddi sathima onona ohiyaniha muselu dhowoota ni dheebaribari? (Efeziyu 6:13, 14)
3 Omwileri Efeziyu 6:13, 14. Mohilegela Saddana anere ovuwiha dhowoota ni anere wathukulela malogo orugunuwela nlogo na Yehova. (Ovuhu. 16:13, 14) Teto Saddana anere werana dhatedhene anandiye wi alekethe nlogo na Mulugu. (Ovuhu. 12:9) Bumwahaya sathima wiwegeredha ovanene wihina nandege ohiyaniha ebaribari nnahudherihu wodhela Yehova ni dhowoota anavuwiha Saddana. (Rom. 6:17; 1 Ped. 1:22) Mwaha wi negi nande ovuluwa mudhidhi wa mahoso manlubale, nnohowela onona ohiyaniha muselu webaribari ni wowoota!
4. Ohudhera wula nnoone ddi?
4 Ohudhera wula, nnere woona dhikalelo biili nnahowelihu okanna wi nandege woona ebaribari enafwanyeya mBibiliyani ni orumedha dhoholela nnakelihu munikuruni na Yehova. Teto nnere woona dhithu tharu nnahowelihu werana wihina nikale txithi mwibaribarini.
DHIKALELO NNAHOWELIHU OKANNA WIHINA NANDE ONONA EBARIBARI
5. Omoova Yehova winatapulela ddi, ki winukavihere aavi onona muselu weebaribari?
5 Omoova Yehova. Omoova Yehova winatapulela ddi? Winatapulela omudhivela vanlubale oliye, ofiyedha ohifunaga werana ethu-siithu yaamukuule. Bumwahaya iyo nnofuna vanlubale onona ohiyaniha ethu yapama ni yabure, muselu webaribari ni wowoota wihina nirumedhiwe ni Yehova. (Pro. 2:3-6; Ebe. 5:14) Teto kanihiye wi wawoova athu okale munlubale opitha odhivela ninnihuna ni Yehova, woona wihina dhithu dhowinjhiva dhinahagalasa athu dhinomutakalela Yehova.
6. Nimakalelo baani woova wathukuleliwa alobwana 10 aamwaana Ezarayeli wambela osukuma ebaribari?
6 Nathabwaga wawoova athu ompitha Yehova, iyo podi wambela osukuma ebaribari. Kasugwa yopadduwa ya amwaana Ezarayeli owakwana 12 yadhowile weddelela elabo yooKana. Anameddelela 10 yahenya wihina wawoova athu okale munlubale opitha odhivela yanniwana ni Yehova. Aliwa wawaddela amwaana Ezarayeli aatene yegi: ‘Kanidhowe owana naaliwa, mwaha aliwa bakopolo onipitha iyo.’ (Núm. 13:27-31) Ebaribari wi ni moonelo waathu, akananewu yaali akopolo wapitha amwaana Ezarayeli. Mbwenye nuwoga wi kanidhowe owana naaliwa, mwaha kannande wagonjhiha, yowoniha wihina kiyamuroromela Yehova. Alobwana ala kumi (10), yohowela wiwelela ethu Yehova aalobiliye wihina yerena ni wubuwela dhithu Yehova aawerenliye. Yaherena ndo, aliwa yeere wonelamo wi akananewu kayali ethu, yamuliganiha ni Yehova ali Mulugu a Kopolo Dhatedhene. Mbwenye Jozuwe ni Kalebe, yofuna orumedhiwa ni Yehova, bumwahaya edhe ewogege ni nlogo naamwaana Ezarayeli yegi: ‘Yehova afuna, mwebaribarene anere onenya wihina nivolowe elabo ela anipaganyiliye onivaha.’ — Núm. 14:6-9.
7. Nnere ddi wihina nithabwege omoova Yehova? (Osugwe fotu yavakapani.)
7 Wihina nthabwege omoova Yehova, nafunaga werana yothoma si yothoma, nnohowela orajhiha wubuwela akala yothomaya enere omuhagalasa Yehova. (Sal. 16:8) Teto wilerigi dhopadduwa dha mBibiliyani, wikohege: “Gahere gikala wamburoni va muthu yoola, gerena yothoma baani?” Motajhiha, alobwana ale kumi (10) nuwawoga madhu ale ookwerebeyiha, waakale epaddi yawani? Amwaana Ezarayeli kayaroromela ndhe yawoga Jozuwe ni Kalebe, bumwahaya kayandile ovolowa elabo yothomeliwa. — Núm. 14:10, 22, 23.
Ahakale we waakale epaddi yawani? (Osugwe ddima 7)
8. Ekalelo baani nnahowelihu okanna negi nihudhere ebaribari, ki mwahaya bwaddi?
8 Wiyeviha. Yehova anaahudhiha ebaribari ale ali owiyeviha. (Mat. 11:25) Teto iyo nandile ohudhera ebaribari, mwaha okala athu owiyeviha. (Dho. 8:30, 31) Naarive dhigaali ndo, nnohowela okala pasope wihina nihikale athu owithukula. Mwaha wihina nabajha withukula, iyo podi wambela wubuwela wi mubuwelo wehu bwathotho, opitha malagano a mBibiliyani ni dhoholela nnakelihu munikuruni mwa Yehova.
9. Nnande aavi odhowagave nikalaga athu owiyeviha?
9 Negi ndhowegeve nikalaga athu owiyeviha, nnohowela ohidduwala wi kanili ethu niliganiha ni Yehova. (Sal. 8:3, 4) Teto iyo podi olobela wa Yehova nimulobaga wihina anikavihere okala athu owiyeviha ni orumedha ohudhihiwa nuliye. Yehova anonihudhiha makalelo anubuweliye wodhela omulabihedha Bibiliya nnikuru naaye. Teto oliye anere onikavihera ovaha thima makalelo aye owubuwela, ohiya mubuwelo wehu. Wamwilerigi Bibiliya, opwasedhege woona makalelo Yehova anavahiye thima wiyeviha ni aniddiye withukula. Teto wakela mutholo bu mutholo munikuruni mwa Yehova, wilibihedhe okala muthu owiyeviha.
NNANDE AAVI OKALAVE MWIBARIBARINI?
10. Yehova aamulabihendhe aani wihina aavahe dhoholela nlogo naaye?
10 Ororomelege nikuru na Yehova. Kale Yehova ahimulabihedha Moyizeji ni Jozuwe wihina yavahege dhoholela amwaana Ezarayeli. (Jos. 1:16, 17) Amwaana Ezarayeli yorelihiwa vanlubale, yaharaga dhoholela yaakeliwa ni alobwana ala. Teto nuuvira yaka dhowinjhiva, mulogo weekiristawu nuwitiwa, yaali arumiwi owakwana 12 yaholela nlogo na Yehova. (Dho. 8:14, 15) Vasogolova nikuru nne na arumiwi nahenjhedhedheya ni anamaholela amodha ooJeruzale. Vano makiristawu yaharaga dhoholela yakeliwa ni alobwana ale oororomeleya, “addibila ammulogoni yolibihiwa munroromeloni ni yowinjhivana kadda labo.” (Dho. 16:4, 5) Nihiyoya peeno nnorelihiwa vanlubale, naharaga dhoholela nnakelihu munikuruni mwa Yehova. Ononamo wi Yehova aakale aavi, nahere nahiharaga dhoholela dha addibila enaniholela? Wihina nakule nikoho nna, nnere woona ethu yapadduwile naamwaana Ezarayeli, mudhidhi edhowaga elabo yothomeliwa.
11. Ddiniyani yapadduwele athu yahamuriha Yehova vamodha ni alobwana Yehova asakunliye wihina eholelege nlogo? (Osugwe fotu.)
11 Mudhidhi amwaana Ezarayeli edhowaga elabo yothomeliwa, alobwana dhaala oovuwa yahambela onvanya Moyizeji ni okoodda ohara dhoholela avahiwiye. Mwaha wa yeyo aliwa yahifiyedha owoga yegi: ‘Nlogo naatene thoweela [ohiya Moyizeji baahi,] teto Yehova ali vaari vewa.’ (Núm. 16:1-3) Ebaribari wihina ‘nlogo naatene’ naamwaana Ezarayeli naali noweela vamentoni va Yehova, mbwenye Yehova aamusakunle Moyizeji wihina aholelege nlogo naamwaana Ezarayeli. (Núm. 16:28) Alobwana ale owithukula kayanvanya Moyizeji baahi, mbwenye yanvanya Yehova. Aliwa kayapwasedha dhithu Yehova afuniye, ohiya eyo yapwasedha ndhe yafuniwa, yaali okanna mutholo ni okala athu oovuwa. Mwaha wa yeyo, Yehova watolosa alobwana ale ni athu yaakavihera. (Núm. 16:30-35, 41, 49) Ni makalelo mamodhave, peeno Yehova kanaarumedha ale enakoodda ohara dhoholela dha nikuru naye.
Ahakale we wamukavihere aani? (Osugwe ddima 11)
12. Mwahaya bwaddi nigaroromela nikuru na Yehova?
12 Iyo nnohowela ororomela nikuru na Yehova, mwaha wi wakumelela moonelo muxa wodhela dhithu nnarumedhihu dhinafwanyeya mBibiliyani obe wodhela makalelo nnamulabelihu Yehova, addibila enaniholela enowawerana masadduwoya mowaguva yahubuwele dila biili. (Pro. 4:18) Addibila ala enaniholela enowawerana masadduwo ala mwaha wi enafuna emuhagalase Yehova. Ohiya eyo, aliwa enowilibihedha vanlubale wihina dhothoma dhewa dhiwananege ni madhu a Mulugu, teto siyeyo adhaari aatene a Yehova enahoweliwa werana.
13. ‘Madhu eebaribari’ enagiwana ddi, ki dhohudhiha ndha dhinanikavihera aavi?
13 ‘Waparihedhege mabasa madhu eebaribari.’ (2 Tim. 1:13) ‘Madhu eebaribari,’ enagiwana dhohudhiha dhatedhene dhinafwanyeya mBibiliyani. (Juwa. 17:17) Dhohudhiha ndha, thinikoma wa dhithu nnarumedhihu. Nikuru na Yehova nnonihudhiha makalelo ooparihedha mabasa dhohudhiha ndha. Teto naparihedhaga mabasa dhohudhiha ndha, nnerege oreelihiwa.
14. Ddiniyani yaapadduwele makiristawu a nsaka noobajha, nuwambela wasukuma ‘madhu eebaribari?’
14 Ddiniyani yanipadduwele, nahere ‘naasukuma madhu eebaribari?’ Kasugwa ethu yapadduwile nsaka noobajha. Makiristawu dhaala, yanna ovuwiha muselu dhowoota wodhela nlabo na Yehova ewogaga wi nihifiya. Podi wera yahakela karta nakala ninga naalebiwe ni murumiwi Pawulo. Vano makiristawu amodha oTesalonika orumedha dhowoota ndhe ni wambela wawaddela addibila wodhela muselu ndhe dhowoota. Yahere makiristawu ale yubuwela dhithu yahudheriwa ni murumiwi Pawulo, kayalekethiwe ni muselu ndhe dhowoota. (2 Tes. 2:1-5) Mwaha murumiwi Pawulu ahawaddela wihina addibila ale, enarumedhege muselu bu muselu eniwiwa. Teto wihina aakavihere wi yahilekethiwe, murumiwi Pawulo omuleba asinaturaye egi: ‘Ala malojhelo aaga miyo Pawulo, ginaalebimi ni mada aaga. Enoniha makarta aatene ginalebimi, ola mulebelo waaga.’ — 2 Tes. 3:17.
15. Ddiniyani nnahowelihu werana wihina nahilekethiwe ni dhowoota dhinakala ninga seebaribari? Owoge yotajhiha. (Osugwe fotu.)
15 Nnahudhera ddi ni ndhe murumiwi Pawulo awaddenliye addibila oTesalonika? Niiwa ethu-sithu ehiniwana ni ndhe nihudherihu mBibiliyani obe niiwa ethu yohifwanelela, nnohowela okanna thotho. Motajhiha, o Uniyawu Soviyetika amwiddani ehu, walebela karta addibilihu, nakala ninga nadhela osede Enlubale ya Anamoona a Yehova. Kartana naakongomedha addibila wegeredha nikuru newa, yahihowelaga nikavihero naathu amodha. Kartana nakala ninga nadhela osede Enlubale. Mbwenye addibila yaali oororomeleya, kayarumendhe dhowoota ndhe. Aliwa yahonelamo wi dhithu dhalebiwe mukartani mune, kadhiwanana ni ndhe yahudhenriwa mBibiliyani. Peeno amwiddani ehu enolabihedha interneti ni redes sociais wihina evuwihe muselu dhowoota ni enithukulele ohiwanana naaddibilihu. Ohiya ‘waguvela ohiya zelu dhehu,’ nnohowela opendda pamadhene dhithu nnavuruwanihu obe nnilerihu akala dhinowiwanana ni ebaribari enafwanyeya mBibiliyani. — 2 Tes. 2:2; 1 Juwa. 4:1.
Kulekethiwe ni muselu dhowoota dhinakala ninga seebaribari (Osugwe ddima 15) a
16. Mowiwanana ni Romanu 16:17, 18, nnere ddi muthu ambela ovuwiha muselu dhowoota?
16 Okaleve owiwanana naale eli oororomeleya wa Yehova. Yehova anafuna wi nimwebedhege mowiwanana naaddibilihu. Mbwenye nnere wanda omwebedha mowiwanana nahiddelela ebaribari. Muthu anavuwiha muselu dhowoota anoodhana ohiwanana mmulogoni, teto Yehova anonaddela wi “naarabele athu yayo.” Mwaha naharabela, iyo podi wambela orumedha muselu dhowoota aliwa enavuwihiwa ni okala oohiroromeleya wa Yehova. — Omwileri Romanu 16:17, 18.
17. Mareeliho baani nnawakelihu, nanda ohiyaniha muselu webaribari ni wowoota ni ohiddelela pamadhene ebaribari?
17 Nanda ohiyaniha muselu webaribari ni wowoota ni ohiddelela pamadhene ebaribari, nnere wanda omwaddamela Yehova ni olibiha nroromelo nehu nuliye. (Efe. 4:15, 16) Teto kannadha nilekethiwa ni dhohudhiha dhowoota dha Saddana ni nnere okala obareleyene mmadani mwa Yehova mudhidhi wa mahoso manlubale. Bumwahaya kabeni aatene niparele pamadhene ebaribari, nerana ndo “Mulugu a murenddele anere okala ni [iyo].” — Fil. 4:8, 9.
JHIBO 122 Nikale owikomeene!
a OTAPULELIWA WA FOTU: Yoowoniha ya ethu yapadduwile Ohuniyawu Soviyetika, mudhidhi addibila egaakenle karta nakala ninga nadhela osede Enlubale, wula kartana nigaali namwiddani ehu. Peeno amwiddani ehu podi ovuwiha dhowoota wodhela nikuru na Yehova emulabihedhaga interneti.
