Mwahaya bwaddi mulobwana Bibiliya anamwithaniye ‘Ngana’, adhe awogege wi eere ononga dhoorela dhaye ahere atelana ni Ruti? (Rute 4:1, 6)

Kale mulobwana atenle akwa ahahile ahima yokumelelavo makathamiho. Motajhiha, yapadduwe ddi ni mundda dhaye? Nerege ndina naaye neere othimihiwa vemudhini vaye? Nlamulo na Moyizeji nowaakula makoho ala.

Yapadduwa ddi, ni mundda dha mulobwana atenle nuwindo akwa? Obe yapadduwa ddi oliye aguliha mundda dhaye Mwaha ohaawa? Ddibile obe mmudhaye amwaddamele dagula, nimakalelo yayo munddaya kuwahiye okala wa emudhi yele. — Lev. 25:23-28; Núm. 27:8-11.

Mbwenye yandeya aavi ndina na marafula ole odhowagave nlabihedhiwaga vemudhini? Yowerana eyo wodhela wawerana matelo eemulamu, teto siyeyo yapadduwe ni Ruti. Ddibile a marafula ole damutela maamukwele wihina ambalena mwana. Mwaana ole, ohiya othukulave mundda dha marafula mbwenye owithaniwana ndina na marafula. Ola waali nvaho wamukavihera maamukwele ole osamaleliwa. — Deut. 25:5-7; Mat. 22:23-28.

Kasugwa yotajhiha ya Nowemi. Oliye ateliwe ni mulobwana ithaniwa Elimeleki. Elimeleki vamodha ni anaaye abiili nuukwa, Nowemi kanna muthu oomusamalela. (Rute 1:1-5) Vano Nowemi nuuhogolowela ojuda, oliye omwaddela nzaliyaye Ruti wihina amulobe Bowaji agule obe oobole mundda nde. Bowaji ali mmudhi Elimeleki. (Rute 2:1, 19, 20; 3:1-4) Mbwenye Bowaji wubuwela wihina ohukalawo mulobwana dhaala Bibiliya anamwithaniye ‘Ngana’ ali mmudhi obaliwana a Elimelki, oliyeene baahi danna owedha wowobola mundda ndhe. — Rute 3:9, 12, 13.

Omabajhowene ‘Ngana’ ole ofuna wakavihera. (Rute 4:1-4) Naarive ahowelaga werana ethu-sithu, Ngana ole wonelamo wihina Nowemi kaakwanihe okanna mwaana, vasogolova aathukule dhoorela dha marafula Babe. Mwaha wa yeyo, oliye ubuwela wi mundda nde dhakale dhaye ni eyo yere omukavihera wenjhedhedha dhoorela dhaye.

Vano ‘Ngana’ nunona wi yohoweleya omutela Ruti oliye osaddula mubuwelo waye. Oliye owoga egi: ‘Miyo kaginobole mundda oyo, wihina gihitotele makathamiho dhoreela dhaaga.’ (Rute 4:5, 6) Mwahaya bwaddi adhe asaddulege mubuwelo waye?

Ahere ‘Ngana’ ole obe mulobwana mmodha amutela Ruti, mwaana yambaliwa daathukule dhoorela dha Elimeleki. Mbwenye nimakalelo baani eyo yaatoteliwa makathamiho dhoorela dha ‘Ngana’? Bibiliya kanawoga mwahaya, mbwenye iyo podi wubuwela ethu yamuthukulele owoga ndho.

• Yobajha, oliye eere oyelela korowa aguliyena dhoorela dha Elimeleki, mwaha labo thi labo dhoorela ndhe dhakale dha mwana ambaliye ni Ruti.

• Yanabili, oliye eere okanna mutholo womusamalela Ruti vamodha ni Nowemi.

• Yanatharu, ‘Ngana’ ole ahere abaala ahima ni Ruti, ahima ale yere okanna ofuru wogawana dhoorela ni ahima a ‘Ngana’.

• Yanennayi, ‘Ngana’ ole ahere ahikanna ahima, mwana ambaliye ni Ruti, daathukule dhoorela dha marafula ni dha ‘Ngana’ dha. Teto ‘Ngana’ akwa mwana ole ambaliye ni Ruti, daathukule dhoorela dhatedhene ni kithaniwege ni ndina na ‘Ngana’ mbwenye ni ndina na marafula Elimeleki. Bumwahaya ‘Ngana’ kafuna oyelela dhoorela dhaye wihina amukavihere Nowemi. Oliye ohiya wihina Bowaji akwanelihe mutholo yola teto Bowaji orumedha werana ela. Mwaha oliye afuna ‘wihina ndina na marafula nidhowegeve nikalegewo wodhela dhoreela dhaye ni wihina ndina naaye nahithimihiwe.’ — Rute 4:10.

Enakala ninga ‘Ngana’ ole, kafuna wihina dhoorela dhaye ni ndina naaye dhahirimele. Oliye koninhe odhivela mwaha oliye kafuna wihina ndina naaye nahirimele. Mbwenye opadduwa ethu emodheene, ofiyedha peeno kaavo anonile ndina naaye. Teto oliye oyelela ofuru avahiwe Bowaji. Bowaji aali mmodha wa emudhi ya Yesu Kiristu. (Mat. 1:5; Luc. 3:23, 32) Yopadduwa ela, enoniha wa ale enna nrima yahinafuna wakavihera amodha.