OHUDHERA 14
‘Mowindo athu aatene eneere onona wi muli anamahara aaga’
‘Mowindo athu aatene eneere onona wi muli anamahara aaga — mwadhivelanaga mmodha ni mukwaye.’—JOÃO 13:35.
JHIBO 106 Odhivela ekalelo yinlubale
DHITHU NNAAHUDHERIHU a
Ethu baani enaatikiniha athu yonaga odhivela onna nlogo na Yehova? (Osugwe ddima 1)
1. Athu enabajha woona mutugumano dhehu dila yobajha ethu baani enaatikiniha? (Osugwe fotu.)
KAWUBUWELE anamatelana enoona mutugumano dila yobajha onyumbani yoOmwene ya anamoona a Yehova. Aliwa enakala ootikineene yonaga makalelo enaakeliwiwa. Teto, enowasugwa makalelo addibila enatonyihedhiwana odhivela mmodha ni mukwaye. Vano, yahogolowelaga owaniwa, muhiyanaya onowoga ni mamune egi: “Ohunona, anamoona a Yehova ehikanna ekalelo enathabwa ogidhivela.”
2. Mwahaya bwaddi amodha edhe ehiyege omulabela Yehova?
2 Odhivela onna nlogo na Yehova fwavayekiwa. Ebaribari wi anamoona a Yehova kahiyo athu ologomana. (1 João 1:8) Teto, mudhidhi nnanonigihu addibilihu ammulogoni, enerege okala yokweya woona dhoviriganiha dhewa. (Rom. 3:23) Yowukulihaya, sowihina addibila amodha ehihiya omulabela Yehova, mwaha dhoviriganiha dha amodha.
3. Yandeye aavi wanona makiristawu ebaribari? (João 13:34, 35)
3 Kahogolowela osugwa musolo wa yolebela vikumihiwe ohudhera wula. (Omwileri João 13:34, 35.) Enooniha wihina ala makiristawu ebaribari ddi? Fudhivela ohiya ologomana. Kabiha wubuwela, Yesu kawoonge, egi: “Nyu munere onona wihina muli anamahara aaga.” Mbwenye oliye awogile egi: ‘Mowindo athu aatene eneere onona wi muli anamahara aaga.’ Ni madhu yaala, Yesu woniha wihina anamahara aye kiyakale obajha onona wi ohukalawo odhivela webaribari mmulogoni. Mbwenye, naathuya oode, yere wanda woona odhivela wula.
4. Athu amodha enikoha ddi wodhela makiristawu ebaribari?
4 Ale yahili anamoona a Yehova, podi wera enowikoha: “Nimakalelo baani, odhivela winonihiwa wihina ale anamahara a Yesu? Ki nimakalelo baani Yesu aatonyihedhiye odhivela arumiwi? Ni, nnande aavi ohara yotajhiha ya Yesu peeno?” Naarive nigaali anamoona a Yehova, nnohowela wapendda makoho ala. Nerana eyo, enere okala yokweya wawoniha odhivela athu amodha ni ovilelana dhoviriganiha dha athu amodha. — Efé. 5:2.
MWAHAYA BWADDI NIGAWOGAGA WI ODHIVELA ONOWAWONIHA MAKIRISTAWU EBARIBARI?
5. Madhu a Yesu anafwanyeya va João 15:12, 13. Enatapulela ddi?
5 Yesu ahiwoga wihina anamahara aye yerege wonihana odhivela mmodha ni mukwaye mwamakalela avayekiwa. (Omwileri João 15:12, 13.) Kasugwa nlamulo avahiliye nnihina: ‘mudhivelanege mmodha ni mukwaya ninga miyo gudhivelimini.’ Eyo enatapulela ddi? Yesu ahawaddela anamahara aye wihina yohowela wadhivela athu amodha, ohiya widhivela yekiwa. Odhivela wula — winomuthukulela mukiristawu ovelela egumi yaye wihina amobolena mukiristawu mukwaye yahoweleyaga. b
6. Bibiliya anoniha aavi thima enna odhivela?
6 Bibiliya anahudhiha wihina odhivela ekalelo yathima. Motajhiha, athu owinjhiva, versu enathabwiwa odhiveliwa sindha: ‘Mulugu odhivela.’ (1 João 4:8) ‘Omudhivelege mwanddamani awo ninga onidhiveliwe.’ (Mat. 22:39) ‘Odhivela onokuunela dhotega dhowinjhiva.’ (1 Ped. 4:8) ‘Odhivela kunamala.’ (1 Cor. 13:8) Dholebela ndha ni dhimodha, dhinowoniha wihina ethu yathima woniha dhikalelo ndha dhapama.
7. Mwahaya bwaddi Saddana kanadha aanda wawiwananiha athu wihina edhivelanege mmodha ni mukwaye?
7 Athu owinjhiva enowikoha yegi: “Ginande aavi onona egereja yeebaribari? Dhigereja dhatedhene dhinawoga wihina dhinahudhiha ebaribari, mbwenye, dhatedhene dhinahudhiha dhithu dhohiyana wodhela Mulugu.” Saddana anna wanda osasanya dhigereja dhowinjhiva dhowoota. Teto, eyo enna wathuwathuwiha athu owinjhiva. Mbwenye, ebaribariya sowi, Saddana kanadha aanda wawiwananiha athu owinjhiva a dhilabo dhohiyana-iyana wihina ekale emudhi emodha baahi enadhivelana mmodha ni mukwaye. Yehova baahi dinna kopolo yowerana eyo. Teto, eyo enowoneleyamo mwaha odhivela webaribari onadhela wa Yehova — bumwahaya, ale enna mareeliho ni muzimu wa Yehova, binoonihana odhivela webaribari mmodha ni mukwaye. (1 João 4:7) Sotikiniha onona wi Yesu awogile wi odhivela webaribari bwaatonyihedhe makiristawu ebaribari!
8-9. Athu owinjhiva enoonamo aavi yoona odhivela enna anamona a Yehova?
8 Ninga mwawogele Yesu, athu owinjhiva peeno yere wanona makiristawu ebaribari mwaha wa odhivela enatonyihedhiwana mmodha ni mukwaye. Motajhiha, ddibila Iyani onowubula dila yobajha adhowiliye omusonkanoni wa anamoona a Yehova ethu yamudahinye murima. Musonkanoya weriwena waddamela vadevaye, kampo emodhave Iyani oniliyevo jogu yeriwena mweridhene mundduli. Oliye onowoga egi: “Athuya yaali ohiyana ni yorihana, teto, ekalelo yewa yowara yaali yapama ni aniwaya yaali ofwaseya. Ethu yathabwa ogitikiniha yali murenddele yanniwana, ni miyoya goofuna okala ninga aliwa. Kaginubuwela newene mwaha mmodha wawogiwe vamusonkanoni vale, mbwenye ethu gahinadduwalimi, bi makalelo aliwa yonihiwana odhivela mmodha ni mukwaye.” c Dhithu Iyani ooniliye va musonkanoni vale, dhinonthukulela wenjhedhedha odhivela ninnihuna. Teto, nadhivelaga addibilihu na arogola, enokweya waweddiha ni odhivela ni nnowariiha.
9 Ddibila dhaala anithaniwa John, ahoona ethu emodhave nubajha woona mutugumano onyumbani yoOmwene. Oliye onowoga egi: “Gahitikina vanlubale mwaha wiwanana yanniwana, yakala ninga athu oweela. Odhivela wewa webaribari wahigithukulela wonelamo wi gihifwanya ebaribari.” d Dhopadduwa ndha ni dhimodha dhinowoniha wihina anamoona a Yehova makiristawu ebaribari.
10. Mudhidhi baani nnahowelihu wooniha wi nnowadhivela addibila? (Osugwe nota.)
10 Ninga nonilihu omabajho wa yohudhera ela, kaavo muthu mmulogoni ali ologomana. Malabo mamodha addibilihu podi werana obe owoga ethu dhinanipiha mbani. e (Tia. 3:2) Eyo yapadduwa, iyo podi wawoniha odhivela addibilihu wodhela makalelo nnafunihu waweddiha. Mbwenye, nnande aavi werana eyo? Ethu enaanikavihere fuhudhera yotajhiha ya Yesu. — João 13:15.
YESU ONIHILE AAVI WI OWADHIVELA ANAMAHARA AYE?
Yesu owaweddiha arumiwi nuupama naarive eviriganihaga (Osugwe ddima 11 ofiyedha 13)
11. Ekalelo baani yabure yonihile Tiyagu ni Juwawu? (Osugwe fotu.)
11 Yesu kajheha wi anamahara aye ekale ologomana. Ohiya eyo, Yesu owakavihera aliwa owanana ohilogomana wewa wihina erumedhiwe vamentoni va Yehova. Nlabo dhaala arumiwi abiili, Tiyagu ni Juwawu, waloba ammiwa wihina ethapanye ni Yesu wihina evahiwe mburo wa thima mumweneni mwa Mulugu. (Mat. 20:20, 21) Ele yerilena Tiyagu ni Juwawu yali ekalelo yowithukula, mwaha aliwa yafuna yoniwege ninga athimaya wakwaranya amodha. — Pro. 16:18.
12. Nerege yonihile ekalelo ya bure ali Tiyagu ni Juwawu baahi? Owogemo.
12 Mudhidhi yole, onihile ekalelo ela ya bure kali Tiyagu ni Juwawu baahi. Kasugwa makalelo yali anamahara amodha: ‘Anamahara ale 10 nuwiwa muselu ole, aliwa waatikina anamahara ale abiili.’ (Mat. 20:24) Enowandeya wawubuwela madhu opiha mbani, yawogile arumiwi amodha mwaha wa ela yalobile Tiyagu ni Juwawu. Podi wera, aliwa yahaawoga madhu ninga ala: “Nyu muli aani wihina mulobe mburo wa thima mumweneni mwa Mulugu? Muniwoona ninga muli athimaya onikwaranya iyo, bumwahaya, mudha mulobege mburo wa thima mumweneni? Ni iyoya nnohowela okanna mburo wa thima mumweneni mwa Mulugu ninga mulobilinyu!” Naarive nahinonne yapadduwe, mudhidhi yole arumiwi yahiddiwala woniha thima enna opama ni odhivelana mmodha ni mukwaye.
13. Naarive arumiwi ale yeragana dhithu dha bure, Yesu aweddiha aavi? (Matewuji 20:25-28)
13 Ki mudhidhi yole Yesu enre ddi? Oliye kanyanyuwile newene kawonge wihina anere wasakula anamahara amodha yakale owiyeviha, athima ni yonihege odhivela. Ohiya eyo, Yesu ahithapanya ni aliwa mwamakalelo opwaaseya, mwaha ahinona wihina aliwa yafuna werana dhithu dhapama. (Omwileri Matewuji 20:25-28.) Ele kiyaali viyaje yobajha newene yogomihedha arumiwi ala yakanganiwa wihina enone baani aali athimaya. Naarive dhigaali ndo, Yesu owaweddiha nuupama. — Mar. 9:34; Luc. 22:24.
14. Anamahara a Yesu yaaleliwe ni makalelo baani?
14 Mohaganyedha, Yesu ahinona makalelo yaaleliwiwa mowiwanana ni mweddelo wa eelabwiwa. (João 2:24, 25) Aliwa yunnuwile murudda anamaholela gereja yahudhihiwa wihina muthu egi akale a thima, onohowela okanna mutholo wa thima vamuruddani. (Mat. 23:6; oladdanihe ni vidiyu enna musolo Primeiros assentos na sinagoga enadha va Bibiliya omuhudherana na livuru na Mateus 23:6.) Anamaholela a maJudewu yiwoona ninga athima wakwaranya amodha. f (Luc. 18:9-12) Yesu, ahinona wihina makalelo ale, yeere wavolowela anamahara aye wodhela makalelo yiwonegiwa ni yawonegiwa amodha. (Pro. 19:11) Teto, ahinona wihina anamahara aye, yerege oviriganiha. Mbwenye, oliye ahikalave ovilela ni aliwa. Oliye ahinona wi anamahara aye yahikanna murima dhapama. Mwaha wa yeyo, oliye owaja mudhidhi wihina ahudhihe okala athu owiyeviha ni wonihana odhivela mmodha ni mukwaye ohiya ofunaga okala athu athima.
NDANDE ADDI OMUTAJHIHA YESU?
15. Nnahudhera ddi ni yopadduwa ya Tiyagu ni Juwawu?
15 Iyo podi ohudhera dhithu dhowinjhiva ni yopadduwa ya Tiyagu ni Juwawu. Oloba mburo wathima mumweneni, mwebaribareene yali ethu yabure. Teto, arumiwi amodha yaherana ethu yabure, mwaha aliwa yahenya wihina mubuwelo ole wagawanye. Mbwenye Yesu, ahaweddiha arumiwi aatene nuupama vamodha ni odhivela. Eyo enanihudhiha ddi? Yathimaya, kahi osugwaga dhoviriganiha athu amodha enanereliwa, mbwenye, yathimaya bi makalelo nnaweddihihu athu yayo. Ki vano, enaanikavihere ddi waweddiha athu amodha mwamakalelo apama? Natakaleliwa mwaha ethu erilena ddibila, iyo podi wikoha: “Mwahaya bwaddi ele erilena ddibila ole edhe egitakalelege? Ele eriliyena enatapulela wihina ginohowela osaddula ethu-sithu? Ddibila ola onofwanyiwa makathamiho? Naarive akala oliye kanna razawu, ginohowela omoniha odhivela ni omulevelela?” Naaweddihaga amodha ni odhivela nnowoniha wihina nili anamahara a Yesu.
16. Ethu baani emodha enanihudhiha yotajhiha ya Yesu?
16 Yopadduwa ya Yesu, enonikavihera oveda makalelo owawonelamo addibila. (Pro. 20:5) Ebaribari wihina Yesu owanda woona dhili mmurimani mwa kadda muthu, mbwenye iyo, kaninna owedha wewula. Naarive dhigaali ndo, iyo podi ovilelana ohilogomana wa addibila. (Efé. 4:1, 2; 1 Ped. 3:8) Ethu enaanikavihere fuwanona pamadhene addibilihu. Kasugwa yopadduwa modha.
17. Omunona pamadhene ddibila, omukavihere aavi nameeddela mulogo?
17 Nameeddela mulogo dhaala anakavihera mabasa elabo yo Afrika oriyentali, onomubuwela ddibila dhaala anna ekalelo yorusa onvilelana. Ethu baani nameeddela ole athomiliye werana? Oliye onowoga egi: “Ohiya omuthawaga ddibila ole, miyo waaja mudhidhi wihina gimunone pama.” Mudhidhi amunonaga, oliye wonelamo wihina makalelo aaleliwe ddibila ole, kayali okweya. Bumwahaya, eyo yovolowela makalelo aweddihiye athu amodha. Nameeddela mulogo ole onowogave egi: “Nuwonelamo makalelo yaliwa yorusa ddibila ole osaddula mubuwelo waye wodhela makalelo owaweddiha athu amodha ni dhithu dhimodha ilibiheriye osaddula, eyo yahigithukulela omutikina vanlubale. Teto, iyo wandana pamadhene.” Niilibihedha wihina nonelemo dhithu dhinaapadduwela addibilihu, enere okala yokweya wawoniha odhivela.
18. Makoho baani nnahowelihu wawerana, akala ddibila uherana ethu entakalele? (Provérbios 26:20)
18 Malabo mamodha, eneere okala yokweya othapanya ni ddibila erilena ethu entakalele wihina ntxokotxele museluya. Mbwenye nahinathi owoga ni oliye yere okala yapama wikoha: “Miyo gihonelamo dhatedhene dhipadduwe?” (Pro. 18:13) “Oliye erilena yapudhave?” (Ecl. 7:20) “Ki miyo ginomwerelaga muthu di muthu ethu ninga yela?” (Ecl. 7:21, 22) “Gaxixa othapanya ni oliye, kaginathabwihe museluya?” (Omwileri Provérbios 26:20.) Naaja mudhidhi wihina nawubuwele makoho ala, podi wera nnere wonelamo wihina ethu yapama nnahowelihu werana fuumoniha odhivela ddibila ole ni oddiwala museluya.
19. Ethu baani othomiliwe werana?
19 Anamoona a Yehova ehikanna ebaribari wihina anamahara a Yesu. Mwaha enodhivelana mmodha ni mukwaye. Teto, kadda muthu wa iyo, nnowoniha wihina nili anamahara a Yesu, nawonihaga addibilihu odhivela webaribari naarive eviriganihaga. Neragana ndo, amodha eneere wonelamo wihina nili nikuru neebaribari. Teto, eyo enere wathukulela aliwa afunaga omwebedha Mulugu ehu Yehova. Bumwahaya, nithome wonihana odhivela webaribari onatonyihedha wi nili makiristawu ebaribari.
JHIBO 17 Miyo ginofuna
a Athu owinjhiva enoofuna ohudhera ebaribari, mwaha woona odhivela nnatonyihedhihuna mmodha ni mukwaye. Mbwenye iyo kanili ologomana. Mwaha wa yeyo, malabo mamodha podi okala ethu yorusa wonihana odhivela mmodha ni mukwaye. Bumwahaya nnere woona, mwahaya bwaddi odhivela ekala ethu yathima, ki nnande addi omutajhiha Yesu, naavilelagana dhoviriganiha dha amodha.
b Osugwe livuru “venha ser meu seguidor” ohudhera 17 ddima 10 ni 11.
c Osugwe ohudhera onna musolo, “Finalmente, minha vida tem objetivo” enafwanyeya Sentinela a 1 de Novembro a 2012, epaddi 13-14.
d Osugwe ohudhera onna musolo. “A minha vida parecia muito boa” Sentinela 1 de Maio a 2012, epaddi 18 ni 19.
e Epaddi ela kinaagana dhotega dhinahoowela weddihiwa ni anamaholela mulogo, ninga ndhe dhinawogiwa va 1 Coríntios 6:9, 10.
f Ehikalawo yopadduwa dhaala, enawoga wodhela namaholela a amaJudewu awogile egi: “Wapela elabo yaatene, alobwana eli apama ninga Abarawu, eli 30 baahi. Akala mwebaribareene ehikalawo, abiili wa aliwa, di miyo ni mwanaga, akala eli 10, abiili wa aliwa di miyo ni mwanaga, akala eli 5, abiili wa aliwa di miyo ni mwanaga, akala eli 2, di miyo ni mwanaga, akala ali mmodha, di miyo meeka.”
