1-2. Nlabo nobaddiziwa nnonesa ddi, ki dhithu baani onahoweliwe opendda?

 WE ONOWAWONAGA athu yivelelaga wihina ebaddiziwe vamusonkanoni wa labo nimodha obe wa malabo mararu? Enowoneleyamo makalelo enawaakuliwa ni murimiwa wamutene makoho menli eneriwana yahinathi obaddiziwa, ni wawona makalelo enakala amudhiwa naakwiwa ekalaga ohagalalene. Yatavuliwaga mmanjheni onowawiwa addibila yawobaga mada ni omentoni wewa wigaali womwesuwawene. Yakalukulariwa enakala ninga athu waapela elabo yaatene enoobaddiziwa kadda sumana wihina ekale anamoona a Yehova owivelela ni oobaddiziwa.

² Ki we? Akala onna wubuwela obaddiziwa, kuddiwale wihina oli ninga muthu anaara mwilaboni muna mudhanle yiihi ‘omusayelaga Yehova.’ (Sal. 14:1, 2) Kinapwatha akala oli muzombwe obe oli mwanakalaba, ohudhera wula wegeredhiwe wihina wukavihere. Teto, akala ohubaddiziwa ohudhera wula winere wukavihera olibiha nroromelo naawo ni omulabela Yehova ni mukalakala. Vano, kabeni noone dhithu tharu ninnihuna wihina nimulabele Yehova.

3. Mwahaya bwaddi adhaari a Yehova egadhiveliwaga ebaribari ni opama? (Salmos 119:128, 163)

³ Yehova ahiwoga ni nlogo naaye wihina ‘edhiveliwege ebaribari.’ (Zac. 8:19) Teto Yesu ahakongomedha anamahara aye wihina edidelege werana opama. (Mat. 5:6) Eyo enatapulela wihina iyo nnohowela okanna efunelo yowerana, ele Mulugu anawogiye wi sapama ni yowogowa. We onodhiveliwa ele eli yeebaribari ni yapama? Nihikanna ebaribari wihina he, mwaha we onowidda woota ni dhithu dhabure. (Omwileri Salmos 119:128, 163.) Ole anoota, anamutajhiha Saddana ali namathonga eelabo ela. (João 8:44; 12:31) Ethu Saddana anafuniye  futakaliha ndina na Yehova. Okuma mudhidhi Saddana aamurugunuweliye Yehova mu edeni, anna omwinkedhave Yehova avuwihaga dhowoota ofiyedha peeno. Saddana onowathukulela athu wubuwela wihina Yehova, namathonga abure, oogwalagwambi ni ahinafunana opama athu. (Gén. 3:1, 4, 5) Dhowoota anavuwiha Saddana wodhela Yehova, dhinononga mubuwelo ni murima dha athu. Vano, athuya ‘yahidhivela ebaribari,’ Saddana podi wathukulela aliwa weragana dhithu dhatedhene dhili dhabure ni dhowopiha. — Rom. 1:25-31.

4. Ethu baani erilena Yehova enoniha wi oliye “Mulugu ebaribari”? (Osugwe fotu.)

⁴ Yehova ‘Mulugu ebaribari,’ bumwahaya onowahudhiha ale enamudhivela nuupama. (Sal. 31:5) Mwaha wa yeyo, Yehova onowakavihera ohulekethiwa ni dhowoota dha Saddana. Yehova onowahudhiha adhaari aye okala athu apama ni ohukala ogwalagwambi. Teto, eyo enowakavihera ale enamudhivela Yehova okanna manddile, ni okanna murenddele. (Pro. 13:5, 6) We onowanda wonelamo wihina Yehova onowerana eyo mudhidhi waamuhudheraga Bibiliya? We onna ohudhera wihina makalelo a Yehova owerana dhithudha, bapama wodhela mwigumini mwawo ni waathu aatene. (Sal. 77:13) Bumwahaya, we onafuna werena ele Yehova anawogiye wi sapama. (Mat. 6:33) We onofuna wakihedha ebaribari ni woniha wihina dhatedhene Saddana anawogiye wodhela Yehova, sowoota. Onande addi werana eyo?

5. Onoonihe aavi wihina onna okavihera ele eli yeebaribari ni yapama?

⁵ We podi olabihedha egumi yawo mwamakalelo enoniha wi onna osukuma dhowoota dha Saddana ni wooniha wihina onorumedha ebaribari. Teto, we podi woniha pamadhene wi onorumedha othongiwa ni Mulugu ni werana ele oliye anawogiye wi sapama. Mbwenye onande addi werana eyo? Wodhela olobela wa Yehova wivelelaga ni ompaganyaga omulabela oliye egumi yawo yatene ni woniha vaari vaathu wodhela obaddiziwa. Odhivela onniwena wodhela ebaribari ni opama, sithu enuthukulele othoma obaddiziwa.

6. Mowiwanana ni Salmos 45:4 ethu baani enanthukulela omudhivela Yesu Kiristu?

⁶ Mwahaya bwaddi we ogamudhivelaga Yesu Kiristu? Va Salmos 45:4 ehikalavo ethu enoniha mwahaya bwaddi nigamudhivela Yesu Kiristu. (Omwileri.) Yesu onodhiveliwa ebaribari, dowiyeviha ni doologomana teto, podi wera  dhikalelo ndha dhinowuthukulela omudhivela Yesu. Mwaha Yesu uhaakihedha ebaribari ni oliba murima. (João 18:37) Mbwenye Yesu oninhe aavi wi nnohowela okala oliba murima?

7. Ethu baani enutikiniha wodhela wiyeviha wa Yesu?

⁷ Wodhela yotajhiha yaye, Yesu ohoniha wi nnohowela okala owiyeviha teto, oliye odhiveliwa omuthithimiha Yehova ohiya withithimihaga yeka. (Mar. 10:17, 18; João 5:19) Onakala aavi wonaga yotajhiha ela yowiyeviha ya Yesu? Mohanganyedha, enowuthukulela omudhivela Yesu ni okala namahara aye. Mbwenye mwahaya bwaddi Yesu akala muthu owiyeviha? Mwaha Yehova dowiyeviha, teto Yesu onodhiveliwa ni otajhiha dhikalelo dha ababe. (Sal. 18:35; Heb. 1:3) Eyo kinuthukulela we omudhivela Yesu anatajhiha pamadhene dhikalelo dha Yehova?

8. Mwahaya bwaddi sohagalasa okanna Yesu niga mwenihu?

⁸ Iyo nnohagalala okanna Yesu ninga mwenihu, mwaha oliye namathonga ofwanelela teto mwinnyene Yehova dimuxagihile Yesu ni omuthoma ninga namathonga. (Isa. 50:4, 5) Ohiya eyo Yesu ohuliva dhithu dhowinjhiva wodhela onidhivela. (João 13:1) Ninga mwenihu nnofwanelela omudhivela. Teto, Yesu ohuwoga wihina onowawona ninga akwaye ale enamudhivela, — teto akwaye, — enowoniha wihina enomudhivela mwaha wawiwelela malamulo aye. (João 14:15; 15:14, 15) Gari enlubale wandana ni mwaana a Mulugu.

9. Nimakalelo baani obaddiziwa wa Yesu winaliganiwa ni wehu?

⁹ Wamalamulo aamatene Yesu avahiliye, nlamulo nimodha nawoga wi anamahara aye enohowela obaddiziwa. (Mat. 28:19, 20) mwinnyene Yesu uhoniha eyo, wodhela obaddiziwa. Ebaribari wihina obaddiziwa wa Yesu ohuhiyana ni wehu, mwamakalelo vang’ono. (Osugwe kwaduru “ Obaddiziwa wa Yesu ni waanamahara aye — wihiyanne ni makalelo baani?”) Naarive dhigaali ndo, obaddiziwa wa Yesu ni waanamahara aye winoligana vang’ono. Yesu nubaddiziwa, oliye ahiivelela wa babe wihina erena efunelo yaye. (Heb. 10:7) Nimakalelo mamodhave, iyo nabaddiziwa nnowoniha vaari vaathu wi nihivelela wa Yehova wihina nerena efunelo yaye. Obajha mudhidhi yoyo ethu yathima mwigumini mwehu, fuwerana efunelo ya Yehova ohiya yehu. Nimakalelo yala nnowoniha wi nnohara yotajhiha ya Yesu.

10. Ethu baani enuthukulele we obaddiziwa?

¹⁰ Kabiha wubuwela vang’ono dhithu ononniwe wodha Yesu. We ohunona wi Yesu mwaana a Mulugu ni ohuthomiwa wihiha athonge elabo ya vati ninga mwene. Teto, we uhona wihina Yesu ohutajhiha pamadhene wiyeviha wa ababe ni ohuhudhera wi Yesu ahavaha yojha ale yanna dala ni ahatodola ale yali owukuwene ofiyedha wavulumusa aredda. (Mat. 14:14-21) We onowanda woona makalelo Yesu anakaviheriye mulogo peeno. (Mat. 23:10) Teto we ohunona wihina woona wi Yesu namathonga mumweneni mwa Mulugu, anere werana dhithu dhowinjhiva osogolo. Vano numala wubuwela dhithu dhatedhene dhendha onoonihe aavi wi onomudhivela Yesu, wodhela ohara yotajhiha yaye! (João 14:21) Ethu yobajha onahoweliwe werana, fuvelela egumi yawo wa Yehova ni obaddiziwa.

11. Ethu baani yathima enanthukulela obaddiziwa, ki mwahaya bwaddi?

¹¹ Ethu baani ethabwile okala yathima, enanthukulela iyo obaddiziwa? Yesu ahaakula nikoho nna, nuwoga nlamulo nthabwile okala nathima anivahile Mulugu, oliye ohuwoga egi: ‘omudhivelege Yehova, Mulugu awo ni murimawo watene, ni emuthu yawo yatene, ni mubuwelo wawo watene ni kopolo dhawo dhatedhene.’ (Mar. 12:30) We onowonelamo wi onomudhivela Yehova nimakalelo yala?

12. Mwahaya bwaddi ogamudhivelaga Yehova? (Osugwe fotu.)

 ¹² Dhihikalawo dhithu dhowinjhiva dhinanthukulela iyo omudhivela Yehova. Motajhiha, we ohuhudhera wi ‘Yehova ntxela na egumi’ teto ‘dhithu dhatedhene dhapama dhinadhela odhulu.’ (Sal. 36:9; Tia. 1:17) Yehova Mulugu ehu, ohuvaha dhithu dhatedhene dhapama onniwena.

13. Mwahaya bwaddi mukutho wa Yesu okala nvaho wa thima?

¹³ Mukutho wa Yesu mukono munlubale Yehova anivahiliye. Nihikanna dhithu dhowinjhiva dhinanithukulela owoga ndo. Motajhiha, onowabihaga wubuwela makalelo Yehova ni Yesu yaddamaaniwa mmodha nimukwaye? Yesu ohufiyedha owoga egi: ‘Ababa enogidhivela’ teto miyo ‘ginowadhivela Ababa.’ (João 10:17; 14:31) Yehova vamodha ni Yesu ehikalawo matxikwi ni matxikwi a yaka vamodha odhulu! Mwaha wa yeyo wandana wewa fooliba. (Pro. 8:22, 23, 30) Vano, kabiha wubuwela makalelo yampihiliwa mbani, mwaha omwihiya mwanaye wonihiwa goyi ofiyedha opiwa. Yehova weenya wihina mwanaye avelele egumiyaye ninga mukutho, wihina anivahe ofuru wokalawo nimukalakala. Dhatedhene dhendha dhinowoniha wihina Yehova onowadhivela athu aatene, vamodha niweya. (João 3:16; Gál. 2:20) Woboliwa ethu yathima enanithukulela iyo omudhivela Yehova.

14. Yothoma baani nnahowelihu werana mwigumini mwehu?

 ¹⁴ Odhivela wawo ni Yehova othabwile wunnuwa nubajha ohudhera wodhela oliye. Teto, mohanganyedha onoofuna wihina odhivela wawo ni Yehova odhowegeve wunnuwaga ni mukalakala. Mbwenye, onere wanda werana eyo, mwaha Yehova onowuloba wihina ohagalase murima waye. (Pro. 23:15, 16) We podi werana eyo ohiya ni dhowoga dhawo mbwenye ni dhowera dhawo. Werana ndo makalelo onalabihedhiwe egumi yawo enere woniha wihina onomudhivela Yehova. (1 João 5:3) Ela yothoma yapama onahoweliwe werana mwigumini mwawo.

15. Onoonihe aavi wihina onomudhivela Yehova?

¹⁵ Onoonihe aavi wihina onomudhivela Yehova? Werena nlobelo navayekiwa ompaganyaga omulabela. (Sal. 40:8) Wamala wonihe vaari vaathu yothoma yawo wodhela obaddiziwa. Ninga nonilihu muwari mwa yohudhera ela, obaddiziwa ethu yathima mwigumini mwehu. We onere obajha olabihedha egumi exa, okalagawo wihina werena efunelo ya Yehova ohiya yawo. (Rom. 14:8; 1 Ped. 4:1, 2) Eyo podi okalaga ninga yothoma enlubale. mwebaribarene enlubale. Mbwenye enofugula musiwo wihina nikanne egumi yapama. Nimakalelo baani?

16. Mowiwanana ni Salmos 41:12 nimakalelo baani Yehova anaarelihiye ale evelele egumi yewa wa oliye?

¹⁶ Yehova Mulugu anathabwa ovaha. Kinapwatha ethu baani oyeleliwe wihina omulabele oliye, Yehova, anere wureeliha okunamo. (Mar. 10:29, 30) Oliye anere wuvaha egumi yapama ni yohagalasa wahinakannigiwe, naarive okalaga elabo yela ehanle nenaa nufiya omakuthulo. Teto, wula fumabajhowene. Egumi onaathukuliwe wamala obaddiziwa podi okala yamukalakala. We podi odhowagave omulabelaga Yehova, malabo aamatene. Teto, odhivela onniwena ni oliye onerege odhowave wunnuwaga ni onere okala mwilaboni exa vamodha ni oliye.— Omwileri Salmos 41:12.

17. Ethu baani onahoweliwe onvaha Yehova oliye ahinniyena?

¹⁷ Wavelela egumi yawo wa Yehova ni wabaddiziwa, onokanna gari yonvaha Yehova ethu yathima. Teto, dhithu dhatedhene dhathima  wanniwena dhaali nvaho wa Yehova. Ninga makalelo ohogolosa, we podi onvaha Mulugu apaddunse elabo yodhulu ni yavati ethu ahinniyena nikalaga ororomeleya wa oliye ni omulabela ni murimihu wamutene. (Jó 1:8; 41:11; Pro. 27:11) Mwebaribarene, ala makalelo olabihedha pama egumi yehu! Mohanganyedha, odhivela onniwena ni Yehova ethu yathima onahoweliwe wihina obaddiziwe.

18. Makoho baani onahoweliwe wawerana?

¹⁸ We onofuna obaddiziwa? We baahi dinna ofuru wowakula nikoho nna. Mbwenye yere okala yapama we wikoha, ‘ginajheha ddi?’ (At. 8:36) Kubuwela dhithu tharu nisunzilihu muwari mwa yohudhera ela: yobajha, we onodhiveliwa ebaribari ni opama. Onofuna okala mwilaboni athu aatene enaawogegiwa ebaribari ni eneeregiwana dhithu dhapama? Yanabili, we onomudhivela Yesu. Kabiha wikoha, ginofuna wi mwaana aMulugu akale mwene aaga ni giharege dhotajhiha dhaye? Yanatharu eli enlubaleya, onomudhivela Yehova, mbwenye kabiha wikoha, ginofuna ohagalasa murima wa Yehova wodhela omparela mabasa? Akala makoho amatene yala wawakule wegi, hee! ki wahinabaddiziwela ddi? onajheha ddi? — Atos 16:33.

19. Mwahaya bwaddi kunahowela woova obaddiziwa? Owoge yoladdaniha. (João 4:34)

¹⁹ Akala we onowoova obaddiziwa, kubuwela yoladdaniha ela erilena Yesu. (Omwileri João 4:34.) Yesu ohuladdaniha efunelo ya Yehova ni yojha. Mwahaya bwaddi? mwaha yojha enonikavihera. Yesu ahinona wi dhatedhene ananiloba Yehova wihina nerena, dhinere onikavihera. Teto, Yehova kanafuna wi iyo nerena ethu-sithu yanitotele makathamiho. Nerege obaddiziwa winookosa epaddi ya efunelo ya Mulugu? Hee! (At. 2:38) Vano, we podi okanna ebaribari wi obaddiziwa winere wukavihera. Teto, akala we kunoova ojha yojha yapama, ki vano yuuthukulele ddi woova obaddiziwa?

20. Ohudhera winaharela nnone ddi?

²⁰ Onajheha ddi? Owinjhiva, enowakula nikoho nna mwamakalelo ala, “Kaginathi wiwegeredha.” Yothoma yovelela egumi yawo wa Yehova ni obaddiziwa, mwebaribarene ela yothoma yathima onahoweliwe yerana mwigumini mwawo. Bumwahaya we podi ohowela mudhidhi wowinjhivene wihina wubuwele pama yothoma ela. Teto, podi oviraga mudhidhi wowinjhivene ovedaga makalelo owiwegeredha. Mbwenye, akala mwebaribarene onofuna obaddiziwa onere ddi wihina wiwegeredhe? Nnere woona ohudhera winaharela yowakula ya nikoho nna.