1. Ababi enaafunana ddi aniwa?

 ABABI, mohanganyedha nyu munoofuna wi aninyu emunone ni emudhivelege Yehova. Mbwenye, Yehova Mulugu ahinooneya. Vano munande addi wahudhiha aninyu wi Yehova, Mulugu aliwo ni enowandeya wandana ni oliye? — Tia. 4:8.

2. Ababi enaahudhihe addi aniwa wodhela dhikalelo dha Yehova?

² Ababi makalelo apama owahudhiha aninyu wodhela Yehova, fumuhudhera Bibiliya ni aliwa. (2 Tim. 3:14-17) Mbwenye, Bibiliya onowoga ethu emodha enakavihere azombwe ohudhera wodhela Mulugu. Livuru na Provérbios nnomuwoga babi anamubusedha mwanaye ohidduwala dhikalelo dha Yehova, dhinoneya wodhela dhopaddusa. (Pro. 3:19-21) Vano nnere woona nimakalelo baani ababi enalabihedhiwa dhopaddusa wihina yakavihere aniwa omunona pamadhene Yehova.

3. Nimakalelo baani ababi enahoweliwa wakavihera aniwa?

³ Bibiliya onowoga wihina ‘dhikalelo dhahinoneya dha Mulugu dhinowandeya wooniwa wodhela dhopaddusa dha Mwilaboni, mwaha dhinowoneleyamo mwamakalelo eegeredhiye.’ (Rom. 1:20) Malabo owinjhivene ababi enodhiveliwa waredha ni aniwa vathaddovene. We podi opatha ofuru yoola wihina wahudhihe dhikalelo dhotikiniha dha Yehova ni dhithu apaddusiliye. Vano kabeni none ababi enamutajhihiwa Yesu wodhela epaddi yela.

4. Yesu alabihedhe addi dhopaddusa wihina ahudhihe anamahara aye? (Lucas 12:24, 27-30)

⁴ Kasugwa makalelo Yesu alabihedhiye dhopaddusa wihina  ahudhihe anamahara aye. Labo dhaala, oliye waloba anamahara aye wihina yaasugwe anakungu ni folori dha mukokolani. (Omwileri Lucas 12:24, 27-30.) Yesu ahafune, eere olabihedha balame emodheene obe nikupu nimodhanene. Mbwenye, oliye aalabihedhe balame ni folori, anamahara aye yanoonniwa pamadhene. Podi wera mudhidhi yole aliwa yowawoona anakunguya evavaga ni foloridha dhigawapenle. Enowandeya wubuwela nimoonaga atonyaga wula awogaga ni anamahara aye. Ki vano Yesu enre ddi, nuumala owoga dhotajhiha ndha? Oliye wakavihera anamahara aye ohudhera ekalelo ya thima yovaha onna babihu odhulu. Ninga anaajhihiye anakungu ni anawarihiye folori, Yehova aneere wavaha yojha ni yowara adhaari aye.

5. Dhopaddusa baani ababi enahoweliwa olabihedha wihina yahudhihena aniwa wodhela Yehova?

⁵ Ababi, mudhidhi mwahudhihaga aninyu munande aavi omutajhiha Yesu? Nyu podi owoga yotajhiha modha enathabwa wudhivelani, podi okala mwanenyama obe folori. Mwahudhihaga, mwawonihege makalelo yopaddusaya enonihiwa dhikalelo dha Yehova. Wamala, we podi omukoha mwanawo mwanenyama baani anathabwiye omudhivela obe folori baani anadhiveliwiye. Walabihedha dhopaddusa oliye anathabwiye odhiveliwa, eneere okala yokweya oliye wuvuruwana waladdanihaga ni ekalelo ya Yehova.

6. Yopadduwa ya amaye Christopher enanihudhiha ddi?

⁶ Nerege ababi, enohowela ojha mudhidhi wowinjhivene esayelaga onona ekalelo ya kadda mwanenyama obe yakadda folori wihina yahudhihena aniwa wodhela Yehova? Kinathabwa ohoweleya. Yesu kajhile mudhidhi wowinjhivene awogaga makalelo anakungu enajhihiwiwa obe makalelo folori dhinunnuwiwa. Ebaribari wihina anawo podi ofunaga onona wodhela dhopaddusa dha Yehova. Mbwenye, malabo mamodha omwakula mwamakalelo okweya obe werana nikoho podi omukavihera wonelamo dhithu onafuniwe omuhudhiha. Ddibila dhaala anithaniwa Christopher kanadduwala dhithu ahudheriye agaali mwana. Oliye onowoga egi: “Amama yowogesa dhithu dhokweya dhanithukulela miyo ni addibilaga ovaha thima dhopaddusa. Motajhiha, naviraga sere-sere ya mwango amama yowogesa: ‘kasugwani makalelo olapile mwango ola, ohuthabwa owoma kahiyo! Yehova Mulugu akopolo, kamunoonelamo?’ Obe nakirati sere-sere ya niya, amama yowogesa yegi: ‘Kasugwani otekuma wa manjhe wula! Yehova kahi Mulugu akopolo?’” Christopher onowoga egi: “Dhithu amama yawogiwa dhaali dhokweya, mbwenye, dhoogithukulela opendda wodhela Mulugu.”

7. Onande addi, waxagiha anawo wihina etikinege dhopaddusa?

⁷ Mudhidhi anawo enunnuwegiwa, we podi waxagiha opendda dhopaddusa wi ekanne monelo wewa wodhela Yehova. Motajhiha, we podi osayela yopaddusa ni wakohe anawo, ethu ela enuhudhiha ddi wodhela Yehova? We podi otikina ni ohagalala vanlubale wiwaga mubuwelo wa mwanawo. — Mat. 21:16.

8. Mudhidhi wa amwaana Izarayeli, ababi yathoma werana ddi yeeddaga olenddo?

⁸ Mudhidhi wa amwaana Izarayeli, ababi yohowela wahudhiha aniwa malamulo yeeddaga ‘murampani.’ (Deut. 11:19) Elabo wakala amwaana Izarayeli, wahikala arampa owinjhiva, ni yaali yokweya wagumanana anenyama ni ofwanya folori. Vano amwaana Izarayeli yeeddaga olenddo ni amudhiwa, yopatha ofuru wowahudhiha aniwa wodhela dhopaddusa dha Yehova. Nyu muli ababi, podi werana  emodhave mwahudhihaga aninyu wodhela dhopaddusa dha Yehova. Vano, kabeni none makalelo ababi amodha yeriliwana eyo.

9. Onahudhera ddi ni Punitha vamodha ni Katya?

⁹ Mwihiyana dhaala ali mayi anithaniwa Punitha anakala sidadi enlubale yoIndiya, onowoga egi: “Amudhihu amodha enakala murudda dhothemba, bumwahaya, nadhowaga wawaredhela nnopatha mudhidhi yoyo wihina nahudhihe anihu wodhela dhopaddusa dha Yehova. Ginowanda wonelamo wihina anaaga enovaha thima dhopaddusa dha Yehova, yakala wolapela ni murudda widhanle athu.” Kahi ethu yokweya wa ahima oddiwala dhopaddusa, yakala murudda dhoriya vamodha ni makolwiwa. Murogola dhaala anithaniwa Katya anakala elabo yoMoldoviya anihina: “Dhithu gihinadduwalimi obajha ehimaga, bu mudhidhi geddilimi ni makolwaga murudda wothemba. ginowatamalela makolwaga wodhela ogihudhiha opendda dhithu Yehova apaddusiliye ni omunona pamadhene wodhela dhopaddusa dhaye.”

10. Ababi munere ddi yakala yorusa odhowa murudda dhothemba? (Osugwe kwaduru enna musolo “ Wihina yakavihere ababi.”)

¹⁰ Ki akala we vamodha ni amudhawo enowurusani odhowa murudda dhothemba, munere ddi? Ddibila dhaala anithaniwa Amol anakala elabo yoIndiya anihina: “Murudda ginakalimi ginohowela olaba mudhidhi wowinjhivene. Teto, odhowa murudda dhothemba kinakala ethu yokweya. Naarive dhigaali ndo, iyo podi woona dhopaddusa dha Yehova ni owoga wodhela dhikalelo dhaye nakala oparki obe nakala odhulu wa perediyu.” Wapwasedha osugwa pamadhene dhithu dhuwaddamenle, Podi wera, onere woona wihina waddamela vadevawo wihikala murudda winuukavihere omoniha dhopaddusa mwanawo. (Sal. 104:24) Murudda yoyo, podi wera onere ofwanya balame kwaakwa ni anenyama amodha. Karina anakala  elabo yoAlemanya anihina: “Amamaga enodhiveliwa folori. Malabo mamodha yogithukulesa wihina napaseyari vamodha, aliwa yogitonyihedha folori dhowinjhiva yadhiveliwiwa.” Nyu muli ababi podi olabihedha vidiyu ni maburuxura enawoga wodhela dhopaddusa wihina mwahudhihe aninyu. Kinapwatha murudda elabo onakaliwe we podi omukavihera mwanawo opendda dhopaddusa dha Yehova. Vano, nnere woona dhikalelo dha Yehova, dhinaakavihere anawo opendda wodhela dhopaddusa.

11. Nimakalelo baani ababi enakaviheriwa aniwa wonelamo odhivela Yehova anniyena ni iyo?

¹¹ Wihina wakavihere anawo wonelamo odhivela wa Yehova, we podi wawoniha makalelo anenyama enasamaleliwa aniwa. (Mat. 23:37) Teto, we podi wawoniha dhithu dhohiyana-iyana Yehova apaddusiliye wihina anihagalase. Karina awogiwe mundduli, anowoga egi: “Geeddaga ni amama, aliwa yogikongomedha wimela wihina gisugwe makalelo ewomile folori ni owomela wewa winonihiwa wihina Yehova ononidhivela. Ofiyedha peeno, ginopendda dhopaddusa, makalelo dhihiyaniwa ni koredha. Ela enogubusedha odhivela winlubale Yehova anniyena ni iyo.”

12. Ababi enakavihere addi aniwa wonelamo wihina Yehova Mulugu athotho? (Salmos 139:14) (Osugwe fotu.)

¹² Wakavihere anawo wonelamo wi Yehova Mulugu athotho. Yehova Mulugu athambwe okanna thotho wakwaranya athu aatene. (Rom. 11:33) Motajhiha, we podi owoga makalelo manjhe enahogoloweliwa odhulu ni makalelo enasadduwiwa wihina ekale murabo, ni makalelo murabo dhendha, dhinatameliwa mburo mmodhaya vang’ono-vang’ono. (Jó 38:36, 37) Teto, we podi owoga wodhela makalelo mwiili wehu opaddusiwiwa motikiniha. (Omwileri Salmos 139:14.) Kasugwa ethu awogile babi dhaala anithaniwa Vladimir. Oliye anihina: “Labo dhaala mwanihu omotha ni jhinga ni wivereya, nuuvira mwanamalabo nikwadda nne ovola. Vano miyo ni mwadhaaga iyo omwaddela mwanihu ole wihina Yehova apadduse mwiili wehu ni selula dhiniwegeredha yekiwa mudhidhi waviraga. Iyo omoonelihamo wihina naarive athu esasanyaga dhithu dhohiyana-iyana, kinasasanya ethu enegeredheya nimakalelo yala. Motajhiha karo kinawedha wiwegeredha yekiwa  yamwera asidenti. Eyo yahimukavihera mwanihu wonelamo wi Yehova alabihedhe thotho dhaye wihina apadduse egumi.”

13. Ababi enakavihere addi aniwa wonelamo wi Yehova Mulugu akopolo dhatedhene? (Isaías 40:26)

¹³ Yehova ononikongomedha osugwa odhulu ni opendda kopolo dhinlubale dhinahoweleya wihina thendderi dhatedhene dhikale vamburoni vewa. (Omwileri Isaías 40:26.) Ohiya eyo, we podi wakongomedha anawo osugwa odhulu ni waja mudhidhi wihina ependde ndhe enoniwa. Kasugwa awogile murogola dhaala anithaniwa Tingting anakala elabo yoOxina, oliye onowubuwela mudhidhi aviriliye agaali mwana oliye onowoga egi: “Labo dhaala amama ogithukula wihina naredhe okokolani, woona wihina murudda naalihu kawali maluju nowoona pamadhene thendderi. Eyo yapadduwe mudhidhi gifwanyiwaga dhoweha oskola ni gowanganyedha akala gerege odhowave gimulabelaga Yehova nuuroromeleya. Amama opatha mudhidhi yole wihina egikavihere woona kopolo Yehova alabihedhiye wihina apadduse thendderi dhatedhene. Teto, yogubusedha wihina Yehova anere olabihedha kopolo dhaye wihina akavihere owanana makathamiho bi makathamiho. Nuuhogolowela vaade, miyo othoma olibiha wandana waga ni Yehova ni odidela omulabela ni mukalakala.”

14. Ababi enalabihedhe addi dhopaddusa wihina yawonihe aniwa wi Yehova Mulugu amurenddele?

¹⁴ Dhopaddusa dha Yehova dhinowoniha wi oliye ntxela na odhivela. Masiyentista ehonelamo wihina anenyama enodhiveliwa waredha, mwa anenyama yala enovolowelavo balame ni oba. (Jó 40:20) Onomonaga mwanawo ateyaga mwaha omoona mwanenyama aredhaga? Obe, onowawoga anana apaaka yaredhagana mwiila wa mamiwa ni anaanabwa ethamagihanaga? Nlabo onamoniwe mwanawo ateyaga mwaha wawona anenyama yaredhaga, opathe mudhidhi yoyo wi omwaaddele wihina Yehova Mulugu amurenddele. — 1 Tim. 1:11.

15. Ethu baani enaakavihere ababi onona dhithu enubuwela aniwa? (Provérbios 20:5) (Osugwe fotu.)

¹⁵ Malabo mamodha ababi podi okanna makathamiho yaajaga makalelo wihina aniwa yaafugulele murima dhewa. We podi oveda  mudhidhi wapama wihina aliwa yuwaddele ndhe enubuweliwa. (Omwileri Provérbios 20:5.) Ababi owinjhiva ehonelamo wi okala ni aniwa mburo vili dhopaddusa dhowinjhiva, podi wakavihera aniwa wafugulela murima dhewa. Mwahaya bwaddi nigawoga ndo? Mwaha oyo mudhidhi wapama ababi vamodha ni aniwa enakaliwa opwaseyene dhahiliwo dhithu dhinanyonya. Babi dhaala anithaniwa Masahiko anakala elabo yo Japawu onowoga egi: “Miyo vamodha ni mwaraga naaredhaga ni anihu omwangoni obe sere-sere ya niya, aliwa enakala opwaseyene ni ohagalalene. Teto enakala yokweya othapanya naaliwa ni onona ethu enubuweliwa.” Katya asorihiwe mundduli, onowoga egi: “Malabo owinjhiva gaweruwa oskola amama yogidhelesa wihina ndhowe oparki, waali mburo wopwaseya wagikavihera wawaddela ethu egipadduwele oskola obe ethu enagukula.”

16. Emudhi enande addi olabihedha dhopaddusa dha Yehova wihina yaredhena ni ekale ohagalalene?

¹⁶ Emudhi yaatene yaajaga mudhidhi wihina ependde dhopaddusa, enohagalala ni enokala otapuwene. Teto, eyo enolibiha wandana weemudhi. Ninga Bibiliya anawogiye wihina ohukalawo ‘mudhidhi woteya’ ni ‘mudhidhi wowikubanyedha.’ (Ecl. 3:1, 4) Yehova ohupaddusa mburo wothabwa owoma wihina nithamagegemo, nikubuwege, naredhegemo ni werana dhithu dhimodha nnadhiveliwihu. Dhimudhi dhowinjhiva, dhinodhiveliwa waredha vamodha murudda dhokokolani, omwangoni ni sere-sere ya niya. Ahima owinjhiva enodhiveliwa waredha ni othamaga mparki, wasugwa anenyama obe okubuwa wiiko ni muniya. Nihikanna gari yojhavo dhopaddusa ni dhithu dhimodha dhili mwilaboni.

17. Mwahaya bwaddi ababi egahowela wakavihera aniwa otikina ni waredhana dhopaddusa dha Yehova?

¹⁷ Mwilaboni exa, ababi vamodha ni aniwa, enere ojhavo dhopaddusa dha Yehova ni mukalakala. Mudhidhi oyo wafiya, kannawovege anenyama ni aliwa kinanovege. (Isa. 11:6-9) Nnere okanna mudhidhi watene wihina nitikine ni naredhena dhopaddusa dha Yehova. (Sal. 22:26) Mbwenye, sathima ababi wakongomedha aniwa otikina dhopaddusa dha Yehova obajha ovanene. Ababi yalabihedhaga dhopaddusa wihina yahudhihena aniwa, podi wera aliwa enere orumedha ele awogile mwene Davidi egihina: ‘Oo Yehova newene kawo mabasa enaligana ni enyu.’ — Sal. 86:8.