1-2. Mwahaya bwaddi kunahowela wukuuwa akala kuniwegeredhe wihina obaddiziwe? (Osugwe fotu ya vakapani.)

 AKALA we onowubuwela obaddiziwa, onotamaleliwa vanlubale. Mwaha eyo yosakula yapama. Mbwenye oli owiwegeredhene wihina obaddiziwe? Akala oni hee, ni anamaholela mulogo ehonelamo wi onohowela obaddiziwa, othome obaddiziwa nlabona nafiya. Kuwanganyedhe, werana eyo, enere wuthukulela okanna egumi yohagalasa ni mmabasani a Yehova.

² Mbwenye, ki anamaholela mulogo yawoga wi onohowela wawerana masadduwo wahinathi obaddiziwa? Obe akala we wamwinyo ohonelamo wi onohowela wawerana masadduwo? Akala dhili ndo, kuwukuwe. We podi wawerana masadduwo wihina obaddiziwe. Kinapwatha yaka gaasi onniwena.

3. Muhetiyopi ole awogile ddi ni Filipi, ki nikoho baani nnakumelelavo? (Atos 8:36, 38)

³ Omwileri Atos 8:36, 38. Mulobwana dhaala oreela adheela elabo yo Etiyopiya, omukoha Filipi egi: ‘Enagihalela ddi wihina gibaddiziwe?’ Mulobwana ola, oofuna obaddiziwa. Mbwenye, oliye ali owiwegeredhene wihina abaddiziwe?

4. Muhetiyopi ole, onihile aavi wihina ofuna odhowagave ahudheraga?

⁴ Muhetiyopi ‘aadhowile oJeruzale wihina amwebedhe Mulugu.’ (Atos 8:27) Eyo enowoniha wihina oliye orumedha webedha webaribari wa maJudewu. Wodhela ohudhera dholebela dha Ebarayiku, oliye ahihudhera dhithu dhowinjhiva wodhela Yehova. Naarive dhigari ndo, oliye ofuna wihina adhowegeve ahudheraga. Teto, mudhidhi Filipi anfwanyiliye mulobwana ola murampani, oliye era wileri rolu dhilebiwemo dhovuhulela dha Isaías. (Atos 8:28) Dhovuhulela ndha dhaali dhoviteya dhebaribari dha mBibiliyani. Bumwahaya muhetiyopi ole, Kafuna ononave  dhithu dhokweya dha dholebela. Oliye ofuna wihina adhowegeve ahudheraga.

5. Muhetiyopi aali aavi nuhudhihiwa?

⁵ Muhetiyopi ole, ali mulobwana athima a musano okandasi elabo ya Etiyopiya. Oliye, ‘dasamalela dhoreela dhaye dhatedhene.’ (At. 8:27) Bumwahaya, podi wera oliye ali mulobwana aathabwile opinyaminyeya ni mutholo dhowinjhiva. Naarive dhigaali ndo, oliye ahigula mudhidhi wihina amwebedhe Yehova. Ohiya osunzave, Oliye ofuna wilibihedha wihina ande oparihedha mabasa nde ahudheriye. Bumwahaya, oliye aheedda olenddo woolapa, okuma wEtiyopiya ofiyedha oJeruzale wihina amwebedhe Yehova mutempulu. Oyo kawali olenddo wamasika. Podi wera ahiliva korowa dhowinjhivadhene. Mbwenye mulobwana ola, ahithoma omwebedha Yehova, naarive dhirusaga.

6-7. Muhetiyopi andile aavi olibiha odhivela anniyena ni Yehova?

⁶ Filipi ahimuhudhiha muhetiyopi ole dhibaribari dhixa dha thima, ni wodhela Mesiya. (Atos 8:34, 35) Mulobwana ola, ahihagalala ohudhera wodhela mukutho erilena Yesu ni ethu yatapuleliwa mwigumini mwaaye. Vano, ethu baani athomiliye werana nuumala ohudhera dhithu dhendha? Oliye ali mulobwana arihiwa ni maJudewu. Eyo yere omuthukulela oliye weragana nde yarumedha maJudewu. Mbwenye, odhivela anniyena ni Yehova vamodha ni mwanaye Yesu Kiristu, wothabwa odahinya murima waye. Bumwahaya, oliye othoma wawerana masadduwo manlubale mwigumini mwaaye, ofiyedha obaddiziwa ni okala namahara a Yesu. Woona wihina muhetiyopi ole, ahimala wiwegeredha. Bumwahaya, Filipi ombaddiza.

⁷ We onere wanda wiwegeredha wahara yotajhiha ya muhetiyopi. Teto, onere okanna ebaribari emodhave ninga muhetiyopi anniyena ofiyedha okoha wegi, “Enagihalela ddi wihina gibaddiziwe?” Nnere woona, makalelo owerana dhithu dhimodhave, erilena muhetiyopi. Oliye ahididela ohudhera ni owilibihedha oparihedha mabasa nde ahudheriye. Teto, owilibihedha wunuwiha odhivela waye ni Yehova.

8. Yolebela ya João 17:3 enanikongomedha weera ddi?

⁸ Omwileri João 17:3. Madhu ala a Yesu, ehukavihera we ofunaga omuhudhera Bibiliya? Owinjhiva wa iyo, siyeyo enipadduwenle. Vano nerege madhu ala enonthukulela odhowagave nihudheraga? Hee! “Iyo kannadha niselela ohudhera . . . ni omunona Yehova Mulugu ebaribari.” (Ecl. 3:11) iyo nnerege odhowave nihudheraga wodhela Yehova ni mukalakala. Teto, mudhidhi nnahudherigihu wodhela Yehova, wandana wehu ni oliye winerege othabwa oliba. — Sal. 73:28.

9. Namala ohudhera dhohudhiha dhinahoweleya dha mBibiliyani nithome wera ddi?

 ⁹ Ebaribari wi nabajhagawene ohudhera wodhela Yehova, nnabajha ni dhohudhiha dhokweya dhinahoweleya dha mBibiliyani. Karta alebeliiye meberewu, murumiwi Pawulo, ahiwoga wihina dhohudhiha ndo dhinahoweleya, dhinaligana ninga ‘yoojha anavahiwa mwana.’ Oliye kafuna awoge wihina dhoojha nda, kadhanna thima. Ohiya eyo, oliye afuna onihe wi dhinaligana ninga mukaka onavahiwa mwana ammadani. (Heb. 5:12; 6:1) Bumwahaya, oliye ahakongomedha makiristawu oveda dhithu dhinavaha kopolo, dhili, dhoviteya dhinafwanyeya mBibiliyani. Mbwenye, we onodhiveliwa wahudhera madhu a Mulugu? Ohuthoma ohiselela wijhiha epaddi yomuzimuni ni odhowagave ohudheraga wodhela Yehova ni efunelo yaye?

10. Mwahaya bwaddi athu owinjhiva kinadhiveliwa ohudhera?

¹⁰ Owinjhiva wa iyo, kannadhiveliwa ohudhera. Ki we? Oskola, ohudhenre wileri ni oleba mwamakalelo ohirusa? Wodhiveliwa wileri ni wowonelamo ndhe wahudheriwe? Obe wahikanna makathamiho ofiyedha wubuwelaga wi kunafwanelela ohudhera! Akala onubuwela ndo, kuli weka! Yehova podi wukavihera, oliye doologomana ni kawo namahudhiha apama omukwaranya oliye.

11. Yehova anoniha aavi wi namahudhiha munlubale?

¹¹ Mwinnyene Yehova onowoga wi ‘namahudhiha awo munlubale.’ (Isa. 30:20, 21) Oliye namahudhiha ovilela, apama ni ananda wonelamo dhithudha. Teto, kanaveda dhooviriganiha dha kadda namahudhera. (Sal. 130:3) Yehova kananiruma iyo werana ndhe nahinandihu. Teto, kuddiwale wi duliye apaddunse mubuwelo wawo, oli nvaho wa thima. (Sal. 139:14) Aatene iyo nipaddusiwe ni ekalelo yodhiveliwa ohudhera dhithu dhixa. Mpaddusi ehu, onofuna wihina nidhowegeve nihudheraga ni mukalakala — ni wihina eyo enihagalasege. Bumwahaya, okuma peeno ‘osayele okanna efunelo’ yowadhivela madhu a Mulugu. (1 Ped. 2:2) Osayele dholuba onandiwe wakwanihedha, wamala wilibihedhege omwileri Bibiliya Malabo amatene. (Jos. 1:8) Nnikavihero na Yehova, onerege wanda omwileri Bibiliya ni malivuru ehu ni opendda nde onileriwe.

12. Mwahaya bwaddi ekala yathima ohudhera egumi ya Yesu ni mabasa oolaleya aapariye?

¹² Malabo aamatene, waajege mudhidhi wihina opendde egumi ya Yesu ni mabasa oolaleya aapariye. Akala nnafuna nimulabele Yehova mwamakalelo apama, nnohowela omutajhiha Yesu. Thabwathabwa mudhidhi worusa. (1 Ped. 2:21) Yesu ahawaddela ebaribari anamahara aye, wihina yeere ofwanyiwa makathamiho. (Luc. 14:27, 28) Naarive dhigaali ndo, oliye ahinona wihina anamahara aye yeere okala ororomeleya wa Yehova ninga oliye. (João 16:33) Ohudhere wonelamo makalelo yaali egumi ya Yesu ni ovede makalelo oparihedha mabasa nde onaahudheregiwe kadda labo mwigumini mwawo.

13. Ethu baani nnahowelihu omuloba Yehova, ki mwahaya bwaddi?

¹³ Ebaribari wihina enonelo ethu ya thima, mbwenye, enahoweleya kahi okanna baahi. Nnohowela olabihedha. Mwaha enonelo enonikavihera omunona Yehova ni wenjhedhedha odhivela ninnihuna ni oliye ni olibiha nroromelo nehu. (1 Cor. 8:1-3) Wahudheraga wodhela Yehova, omulobege wihina ukavihere olibiha nroromelo naawo. (Luc. 17:5) Teto, oliye anerege wawakula malobelo awo. We wakanna nroromelo nooliba, nnadhela wa ndhe ohudheriwe wodhela Yehova, onere wanda wunnuwelavo epaddi yomuzimuni. — Tia. 2:26.

14. Nimakalelo baani murumiwi Peduru, oonihiliye thima enna oparihedha mabasa ndhe nnahudherihu? (Osugwe fotu.)

¹⁴ Alabihedhaga yopadduwa ya Nowe, Murumiwi Peduru woniha thima enna oparihedha mabasa edhe nnahudherihu. Yehova omwaddela Nowe wihina eere odhana mutokora wi atolose athu aatene abure amudhidhi yole. Ononave wihina Yehova eere odhana mutokora, kiyavuluse egumi ya Nowe ni ya amudhaaye. Awogaga wodhela muselu yola, sotikiniha onona wi murumiwi Peduru, uhalabihedha madhu owi ‘Mudhidhi osasanyiwaga mwanddeya.’ (1 Ped. 3:20) Eyo enowoniha wi Nowe ni amudhaaye yahiparihedha mabasa ndha yaddeliwiwa, ofiyedha osasanya mwanddeya. (Heb. 11:7) Murumiwi Peduru, ohuladdaniha obaddiziwa ni ndhe erilena Nowe. Oliye owoga egi: ‘Obaddiziwa winoniha eyo, winere wuvulusani mohilegela.’ (1 Ped. 3:21) Bumwahaya, iyo podi oladdaniha wiwegeredha ni wilibihedha wawo wihina obaddiziwe, ni wilibihedha wa Nowe vamodha ni amudhaaye yeriliwana muwari mwa yakadhene wihina esasanye mwanddeya. Ki vano, onere ddi wi okale owiwegeredhene wihina obaddiziwe?

15. Onoonihe aavi wihina mwebaribarene ohuthwaruwa?

¹⁵ Ethu yobajha nnahowelihu werana, futhwaruwa mwaha wa dhothega dhehu nerilihuna. (At. 2:37, 38) Nnere wanda wawerana masadduwo mwigumini mwehu, nathwaruwa mwebaribarene. We ohanda osukuma dhithu aniidda Yehova, ninga oraruwa, omujha soola obe walabihedha madhu ootakala? (1 Cor. 6:9, 10; 2 Cor. 7:1; Efé. 4:29) Akala we kunasukume dhithu dhendha, kuwukuwe. Odhowegeve osayelaga makalelo osukuma. We podi omuloba nikavihero namahudhiha awo obe anamaholela mulogo. Akala we oli muzombwe ni onakala ni makolo awo, ononamo aavi waloba nikavihero neewa wihina wande osukuma dhikalelo dhabure dhinuhiha obaddiziwa!

16. Enavolowelavo ddi wijhiha pamadhene epaddi yomuzimuni?

¹⁶ Ethu emodha ya thima, fudhiveliwa dhithu dhoomuzimuni, enavolowelavo odhowa omutugumanoni ni ovaha dhowakula dhawo. (Heb. 10:24, 25) Wabajha odhowa mmalaleyelo  kujhombege. Mwaha mudhidhi onaaparigiwe mabasa ala enavulusa dhigumi, enerege othabwa wudhivela. (2 Tim. 4:5) Akala oli muzombwe ni onakala ni makolo awo, kabiha wikoha: ‘Enohoweleya makolo aaga ogubusedha malabo aamatene wi gidhowe omutugumanoni ni mmalaleyelo? Obe miyo gaamwinnya dinabajha werana gahirumiwe ni muthu?’ Werana dhithu dhendha wahirumiwe ni muthu, enowoniha wi ohukanna nroromelo, onomudhivela Yehova ni onotamalela wodhela dhithu dhatedhene oliye anuuvahiye. Ninga anawogela Bibiliya onowerana dhatedhene wihina omwebedhe Mulugu. Ni madhu mamodha onakala ninga onanvaha Yehova ‘dhithu dhoweela dhathima.’ (2 Ped. 3:11; Heb. 13:15) Dhatedhene nnavahihu Yehova ni murimihu waamutene nahiwaddihedhiwe, dhinomuhagalasa. (Omuladdanihe ni 2 Coríntios 9:7.) Wa iyo sohagalasa onvaha Yehova nde nnandihu werana.

17-18. Dhithu baani dhathima dhinukavihere ofiyedha we obaddiziwa, ki mwahaya bwaddi? (Provérbios 3:3-6)

¹⁷ Mudhidhi oniiwegeredhegiwe wihina obaddiziwe onere ofwanyiwa dhoweha dhowinjhiva. Athu amodha enerege wuteya mwaha wa nde onarumedhiwe, amodhaya enere wuwidda. (2 Tim. 3:12) Obe we podi okwerebeya mwaha wa elemelelo onawaniwena wihina ogonjhihe. Mwaha wa yeyo, we podi wukuuwa wubuwelaga wihina kunande wakwanihedha dholuba dhawo. Dhithu ninga dhendha dhupadduwela enukavihere ddi ohikwerebeya? Ethu yathima enukavihere fudhivela onniwena ni Yehova.

¹⁸ Odhivela onniwena ni Yehova ethu yavayekiwa. Ekalelo ya thima onahoweliye osamalela. (Omwileri Provérbios 3:3-6.) Wakanna odhivela wooliba ni Mulugu, podi wukavihera wawanana makathamiho ohiyana-iyana nuuhagalala. Bibiliya onowoga dila dhowinjhivadhene, wodhela odhivela ohunamala onna Mulugu ni adhaari aye. Eyo enatapulela wi Yehova kadha aasukuma adhaari aye, newene kadha ahiya wawoniha odhivela ale enamwiwelela. (Sal. 100:5) Kuddiwale wihina opaddusiwe moligana ni Mulugu. (Gén. 1:26) Ki we onatonyihedha aavi odhivela wohimala?

19. Onaamutonyihedhe aavi Yehova wihina onomutamalela vanlubale wodhela dhatedhene anuwereliye? (Gálatas 2:20)

¹⁹ Ethu yoobajha nnahowelihu werana neegi nikanne odhivela wohimala, fuukala athu otamalela. (1 Tes. 5:18) Kadda labo wikohege, ‘Yehova anagoniha addi odhivela waye? Vano  walobelaga, omutamalelege Yehova wodhela ethu-sithu anuwereliye. Yehova onowudhivela vanlubale, teto onowuwerela dhithu dhapama mwigumini mwawo. Osayelege makalelo owoona dhithu dhendha ninga murumiwi Pawulo eresiye. (Omwileri Gálatas 2:20.) Vano we podi wikoha, “Miyo ginoofuna omoniha Yehova wi ginomudhivela? Odhivela onniwena ni Yehova bunuukavihere owanana dhoweha, ni winere wukavihera wawanana makathamiho enufwanye osogolo nuuhagalala. Teto fudhivela wewula, winuukavihere wijhiha epaddi yomuzimuni ni omutonyihedha Yehova malabo aamatene wi onomudhivela.

20. Enavolowelavo ddi ovelela egumi yawo wa Yehova, ki werana yothoma ela ethu yathima?

²⁰ Mudhidhi waviraga, odhivela onniwena ni Yehova onere wuthukulela okanna efunelo yowerana nlobelo na vayeka. Wodhela nlobelo nenna, we onere ovelela egumi yawo wa Yehova. Kuddiwale, ninga mudhaari obaddiziwa a Yehova, we onere okanna ejhehedho yapama ni onerege omulabela oliye ni mukalakala. Wavelelaga egumi yawo wa Yehova, we onopaganya omulabela oliye mudhidhi wapama ni worusa. Ovelela egumi yawo wa Yehova ethu oneriwena dila modha baahi. Ebaribari wihina onere werana dhothoma dhohiyana-iyana dhapama mwigumini mwawo. Mbwenye, we kudha werana yothoma yathima mwigumini mwawo ninga yela. ovelela egumi yawo wa Yehova. (Sal. 50:14) Saddana anere oveda makalelo oridhiha odhivela onniwena ni Yehova. Oliye anafuna wi ohiye, okala ororomeleya wa Yehova. Mbwenye, kumuhiye Saddana wugonjhiha! (Jó 27:5) Odhivela onniwena ni Yehova wakala woolibene, onere wanda wakwanihedha mpaganyo omwereliwe. Teto, onerege othabwa wandana ni baabo oodhulu Yehova Mulugu.

21. Nimakalelo baani obaddiziwa wiliwa omambelelo wa dhithu dhatedhene, ohiya omagomihedho?

²¹ Wamala werana nlobelo nowivelela wa Yehova, othapanye ni anamaholela a mulogo wawo wihina obaddiziwe. Mbwenye, kuddiwale wihina obaddiziwa kahi omagomihedho, mbwenye fuumambelelo. Obajha mudhidhi yola we onere wambela egumi yomulabela Yehova ni mukalakala. Bumwahaya, okuma ovanene othome olibiha odhivela wawo onniwena ni Yehova. Teto, okanne dholuba dhinukavihere wenjhedhedha odhivela onniwena ni Yehova kadda labo. Werana dholuba ndha, winere wuthukulela obaddiziwa. Nnakale nlabo na vayekiwa mwigumini mwawo. Mbwenye, kuddiwale wihina wula fuumabelelowa, nnojheha wihina odhivela onniwena ni Yehova vamodha ni mwanaye Yesu odhowegeve wenjhedhedheyaga ni mukalakala!