1-2. Enamuthukulela Yehova orumedha makalelo ehu oomwebedha ddiniyani?

 WIIWAGA madhu owi ‘webedha’ onubuwela ddiniyani? Podi wera onamubuwela ddibila agaakokonre alobelaga wa Yehova ni murima waye wamutene ahinathi oginanti. Obe onubuwela murala ohudheraga, mbwenye ogaari murenddeleve.

² Makalelo amatene yala, bomwebedha Mulugu. Yehova anere orumedha webedha wewa? Ehe, anere orumedha, akala aliwa enerana ni efunelo ya Yehova teto akala enomudhivela ni enoomuriha. Iyo nnomudhivela vanlubale Yehova. Nihinona wihina oliye onofwanelela webedhiwa, nnafuna nimwebedhege mwamakalelo oofwanelela.

3. Dhithu baani nnaahudherihu muwari mwa musolo ola?

³ Musolo ola, nnere ohudhera webedha arumedha Yehova mudhidhi wakale, vasogolova, nnere wawoona makalelo matanu natharu oomwebedha Mulugu peeno mwamakalelo anarumeedhiye. Neragana ndo, nubuwele makalelo oowomihedha dhikalelo dhehu dhomwebedhana Yehova. Ohiya eyo, nnere ohudhera mwahaya bwaddi nigahagalala namwebedhaga Yehova mwamakalelo anarumeedhiye.

4. Yesu ahinadhe elabo yavati, adhaari oororomeleya, yoniha addi wihina yomudhivela ni yomuriha pamadhene Yehova?

⁴ Yesu ahinadhe elabo yavati, adhaari oororomeleya ninga Abeli, Nowe, Abarawu ni Jo, yowoniha wihina yomuriha ni yomudhivela vanlubale Yehova. Ni makalelo baani? Aliwa yaari owiwelela, yahikanna nroromelo ni Mulugu, ni  yaherana dhatedhene wihina emulabele. Bibliya kanasoriha dhatedhene wodhela dhithu yahoweliwa werana wihina emulabele Mulugu. Mbwenye, Bibliya onowoniha pamadhene wihina, aliwa yowilibihera vanlubale wihina emuthithimihe Yehova, teto webedha wewa woorumedhiwa ni oliye. Vasogolova, Yehova wavaha amwaana Ezarayeli malamulo kumi. Malamulo ala, yowoga pamadhene ethuya yahoweleya wodhela makalelo Yehova afuniye wihina ebedhiwege.

5. Yesu nuukwa vano nuvenyihiwa, makalelo oomwebedha Yehova esadduwe avi?

⁵ Yesu nuukwa vano nuvenyihiwa, Yehova kanamuwaddihedha muthu wawiwelela malamulo ala kumi. (Rom. 10:4) Makiristawu yiwelela nlamulo nixa, ‘nlamulo na Kiristu.’ (Gál 6:2) Wihina yiwelele ‘nlamulo’ nna, aliwa kayahowela werana dhithu dhowinjhiva, mbwenye yahoweliwa fumutajhiha Yesu ni ohara dhithu ahudhihiye. Peeno, makiristawu enowerana dhatedhene enandiwa wihina yiwelele ‘nlamulo na Kiristu’, mwaha wa yeyo, enomuhagalasa Yehova ni enokanna murenddele.—Mat. 11:29.

6. Musolo ola, onuukavihere addi?

⁶ Nahudheraga kadda ekalelo yowebedha yehu, wikohege: Ginowunnuwelavo pama epaddi ela? Obe podi wikoha ayi: Ginere wanda owomihedha makalelo aaga oomwebedha Yehova? Nihikanna ebaribari wihina we onohagalala mwaha wunnuwelavo ofiyera peeno, mbwenye ohiya eyo, omulobe Yehova wihina ukavihere epaddi baani onahoweliwe owomihedha.

7. Yehova anawoona avi malobelo ehu enakuma vati vamurima?

⁷ Iyo nnomwebedha Yehova nalobelaga. Bibliya anihina malobelo ehu enakala ninga insensu eegeredhiwa mwamakalelo oopwasedhiwa apelekiwa mutabernakulu, teto vasogolova wambela opelekiwa mutempulu. (Sal. 141:2) Insensu ole, ookumiha onukwela wamuhagalasa Mulugu. Ni makalelo mamodhave, malobelo ehu enakuma vati vamurima, enomuhagalasa Mulugu, naarive ekale ookweya. (Pro. 15:8; Deut. 33:10) Iyo kannanganyedha wihina Yehova onodhiveliwa aavuruwanaga malobelo ehu ni makalelo nnamutamalelihu mwaha wa dhithu ananereliye. Oliye anafuna wi nimwaddelege dhothuwathuwiha dhehu, dhithu nnafunihu werana osogolo ni dhofuna dhehu. Nihinathi olobela wa Yehova, ononamo avi okarati vang’ono wubuwela ethuya onafuniwe omwaddela? Werana ndo, onere onvaha Baabo awo oodhulu ethu yapama onandiwe werana.

8. Ofuru baani ninnihuna wonvuwiha Mulugu?

⁸ Iyo nnomwebedha Yehova naamuthithimihaga. (Sal. 34:1) Iyo nnomuthithimiha Yehova nawaddelaga athu amodha makalelo nnamudhivelihu ni nnatikinihu dhikalelo dhaye ni dhithu dhipaddusiliye. Namutamalelaga ni murima wamutene Yehova, enokweya omuthithimiha. Nasayela mudhidhi wihina nipendde dhatedhene Yehova anereliye mwigumini mwehu, kinanituwege ethu yoomuthithimihana. Mabasa oolaleya, ofuru wimodha ‘wonvuwiha Mulugu, eri yowima ya mulomo dhehu.’ (Heb. 13:15) Mowindala ninga eriiwa yathima okarati vang’ono wihina nubuwela ethu nnafunihu omwaddela Yehova nafunaga olobela, sathima okarati wubuwela pama dhithu baani nnafunihu wawaddela athu nnagumanihuna mmalaleyelo. Iyo nnafuna wi ‘mukutho’ wehu nnapelekihu omalaleyelo okale wapama. Mowindala, naalaleyaga athu amodha, kanaanganyedhege ethuya nnafunihu owoga.

9. Mowindala ninga amwaana Ezarayeli, mareeliho baani nnawakelihu mwaha wotugumana? Owoge yoladdaniha enoniha wihina mutugumano dhuhukavihera.

 ⁹ Iyo nnomwebedha Yehova noonaga mutugumano. Amwaana Ezarayeli yahivahiwa nlamulo nawoga negihina: ‘Alobwana aatene kadda yaka dila tharu, edhowege vamentoni va Yehova, Mulugu enyu, mburo osakunliye.’ (Deut. 16:16) Eyo yatapulela wihina, nyumba dhewa ni mundda dhewa, kaavo ahala asugweraga. Mbwenye Yehova wapaganya wi ‘mwadhaaga vamentoni va Yehova Mulugu eenyu, kadda yaka dila tharu, kaavo muthu anaakalele nrima elabo yenyu.’ (Êxo. 34:24) Mwaha womuroromela Yehova ni murima wewa wamutene, amwaana Ezarayeli yokanna muthupo dhatedhene yakanniwana kadda yaka ni mwaha wowerana ndo yowawakela mareeliho owinjhiva. Motajhiha, aliwa yohudhera dhithu dhowinjhiva wodhela malamulo a Mulugu, yopendda pamadhene dhithu dhatedhene Yehova awereliye, teto yohagalala okala vamodha ni adhaari amodha yamwebedha Yehova. (Deut. 16:15) Peeno, enowereya emodhave, nnowerana dhatedhene wihina noone mutugumano. Kubuwela makalelo Yehova anahagalaliye niwegeredha wihina nivahe dhowakula dhehu, dhowegeredheya pamadhene.

10. Mwahaya bwaddi wiiba epaddi yathima yowebedha wehu?

¹⁰ Iyo nnomwebedha Yehova naamwibelaga vamodha naaddibilihu. (Sal. 28:7) Wa epaddi yamwaana Ezarayeli wiiba yaari ethu yathima yamwebedhaga Yehova. Mwene Davidi ahathoma malevita owakwana 288 wihina yiibege mutempulu. (1 Cró. 25:1, 6-8) Iyo peeno, podi wooniha wihina nnomudhivela Mulugu, mwaha wowiiba jhibo dhomwene. Kinapwatheya akala nihikanna oyesa wowiiba obe naari. Motajhiha, kadda labo nawogaga ‘nnokwakwathuwa dila dhowinjhivadhene,’ mbwenye kannaselela ovaha dhowakula dhehu mmulogoni obe naari mmalaleyelo. (Tia. 3:2) Ni makalelo mamodhave, iyo kanihiye omwibela Yehova mwaha wohikanna oyesa wowiiba.

11. Mowiwanana ni Salmos 48:13, mwahaya bwaddi sapama waaja mudhidhi wihina nikanna webedha weemudhi?

¹¹ Iyo nnomwebedha Yehova naamuhudheraga Bibliya ni naahudhihaga anihu wodhela oliye. Ni masabadu amwaana Ezarayeli kiyaapara mabasa, yathuwathuwela baani olibiha wandana enniwana ni Yehova. (Êxo. 31:16, 17) Amwaana Ezarayeli oororomeleya yowahudhiha aniiwa wodhela dhithu dhapama Yehova awereliye. Nihiyoya peeno, nnofwanelela nsayelege mudhidhi wihina nimwileri ni nimuhudhere Bibliya. Ela enokosa epaddi yomwebedha Mulugu ni enonaaddamaniha nuliye. (Sal. 73:28) Nakanna webedha weemudhi, iyo podi okavihera odhuulu onaadhege osogolo, obe neere anihu, okanna wandana wapama ni Babihu oodhivela oodhulu.—Omwileri Salmos 48:13.

12. Yehova awoona avi mabasa ala oomaga tabernakulu, ki eyo enanihudhiha ddi?

¹² Iyo nnomwebedha Yehova namagaga ni nasamalelaga mburo nnamwebedhihumo oliye. Bibliya anihina omagiwa wa tabernakulu ni dhoobo dhatedhene dhaarimo, yaari ‘mabasa ootaleleya.’ (Êxo. 36:1, 4) Peeno, Yehova onowawona ninga mabasa ootaleleya, mabasa enapariwa dhaamagiwaga nyumba dhomwene ni perediyu dhimodha dhinamagiwa munikuruni mwa Yehova. Addibila ni arogola amodha, enojha mudhidhi wowinjhivene yaaparaga mabasa yala. Iyo nnotamalela vanlubale nikavihero naaddibila eneriwana yaaparaga mabasa yala oOmwene. Nihinona wihina naaliwaya enowapara mabasa oolaleya. Podi wera amodhaya enofuna okala  apiyonero. Anamaholela mulogo enowoniha wi enowakavihera mabasa ala oomaga, wodhela wathoma mohulegela apiyonero, addibila yala eniipeleka ni eri oofwanelela. Naarive nihanonne wapara mabasa ala oomaga, aatene iyo, podi werana epaddiihu wodhela okalela oyesa mburo ndha ni wegeredha pamadhene.

13. Mwaha bwaddi dhovelela dhehu nnakaviherihuna mabasa oOmwene dhigoniwa ninga dhathima?

¹³ Iyo nnomwebedha Yehova, naakaviheraga nikuru naaye ni dhovelela dhehu. Amwaana Ezarayeli kiyadhowa vamentoni va Yehova ehithukunle ethu mmadani. (Deut. 16:16) Yadhowaga yohiddela ethu mmadani, ninga nvaho wiwanana ni yele yanniwana. Ni makalelo yala yowoniha wihina enomutamalela Yehova dhatedhene awereliye. Ki iyo nnonihe addi wihina nnomudhivela Yehova mwaha wa dhithu dhatedhene ananivahiye? Makalelo mamodha fupeleka dhovelela dhehu wihina dhipariwena mabasa wapela elabo yatene, mowiwanana niile ninnihuna. Murumiwi Pawulo ohusoriha egi: ‘Mwakanna murima wovaha, nvahoya onere wakeliwa mowiwanana niile muthuya anniyena, ohiya ele ahinniyena.’ (2 Cor. 8:4, 12) Dhovelela dhatedhene nnanvahihu Yehova ni murimihu wamutene dhinomuhagalasa, naarive dhihithabwile winjhiva.—Mar. 12:42-44; 2 Cor. 9:7.

14. Mowiwanana ni Provérbios 19:16, Yehova anoona aavi makalelo nnaakaviherihu addibilihu?

¹⁴ Iyo nnomwebedha Yehova wodhela wakavihera addibilihu. Yehova ahapaganya amwaana Ezarayeli wihina yahakavihere aliba ohawa oliye eere wareliha. Mwebaribarene kadda labo nnamukaviherihu ddibila anahowela ethu-sithu, enakala ninga mukono anavahiwiye ni Yehova. (Omwileri Provérbios 19:17.) Motajhiha, murumiwi Pawulo agaali mukambura addibila ooFilipo nuwinkelela ethu wihina yanvahe, oliye wera ola ‘mukutho onarumedhiwa, wonukwela ni onamuhagalasa Mulugu.’ (Fil. 4:18) Kawubuwele addibila amulogo wawo windo wikohe wegi: Mmulogoni mwehu akala ddibila ‘anahowela nikavihero naaga?’ Yehova anohagalala aanoonaga nlabihedhaga dhokanna dhehu ninga mudhidhi wehu, kopolo dhehu ni dhithu nnonihu wihina nimukavihere ddibila anahowela. Vamentoni va Yehova ala, makalelo mamodha oomwebedha.—Tia. 1:27.

15. Naarive omwebedha Yehova ehoweleyaga mudhidhi ni kopolo, ehikalele ddi ethu yorusa?

¹⁵ Omwebedha Yehova mwamakalelo anarumeedhiye ethu enahoweleya mudhidhi ni kopolo. Mbwenye kahiyo ethu yorusa. (1 João 5:3) Mwahaya bwaddi? Mwaha odhivela funanthukulela omwebedha Yehova. Kamubuwele muzombwe anegeredha mwana dezenyu ninga mukono wihina aavahe ababe. Oliye podi ononga mudhidhi wowinjhivene alebaga dezenyu yele, mbwenye kanakubanya mwaha wa mudhidhi anongiliye. Oliye onowadhivela ababe, bumwahaya aavahaga mukono ole anohagalala. Ni makalelo mamodhave, iyo nnomudhivela Yehova, bumwahaya nnojha mudhidhi wehu ni nnowilibihera wihina nimwebedhe.

16. Mowiwanana ni Hebreus 6:10, Yehova anonamo aavi wilibihera wakadda muthu aneriyena wihina amuhagalase?

¹⁶ Abaabi oodhivela, ehinona wihina kadda mwaana anna ekalelo yayeene, teto kinafwanyiwa makathamiho mamodhave. Moligana, Baabihu oodhivela ohunona wihina kadda muthu podi werana yele anandiye. Podi wera we onowanda ovaha okunamo wakwaranya addibila amodha. Obe kunanda ovaha  ninga addibila amodha mwaha wowuluvala, woredda, obe mutholo onniwena vamuralani vawo. Akala siyeyo enupadduwela, kukwerebeye. (Gál. 6:4) Yehova onowoona wilibihera wawo. Teto kanadha aaddiwala mabasa onampareliwe, enahoweleya funvaha yele onandiwe. (Omwileri Hebreus 6:10.) Yehova anowoona wihina efunelo yawo enakuma vati vamurima. Ohiya eyo, Yehova podi onona dhithu dhili mmurimani mwehu ni ohunona wihina nnofuna omulabela.

17. a) Akala mabasa onampareliwe Yehova mamodha enowurusa, enahoweleya were ddi? b) Owogemo makalelo werana dhithu ndha dhinafwanyeya muwari mwa kwaduru “ Wenjhedhedhe ohagalala wawo” dhinukaviheriwa?

¹⁷ Kito akala we ohukanna makathamiho ooparihedha mabasa thalo dhendha nsorihilihu muwari mwa musolo ola, ninga okanna ohudhera wavayeka obe wapara mabasa oolaleya? Okanne ebaribari wihina wilibiheraga wapara mabasa yala nuuviheya, enerege wambela wudhivela ni onerege okanna mareeliho owinjhiva. Simodhave enapadduwa, namukunga porogarama wihina nambele okosa exersisiyu obe nambele ohudhera wiibana epano, niheragana malabo amatene kannakovelele. Mbwenye iyo nasakula werana malabo amatene, nambelaga ni mudhidhi vang’ono, vasogolova nnerege wenjhedhedha mudhidhiya. Kadda labo nnoonigihu wihina ninna okovelela, podi wera nnere wambela ohagalala vano nifunege werana malabo amatene. Iyo podi owoga emodhave ni mabasa nnaparihu wihina nimuhagalase Yehova.

18. Iyo nipadduseliwe ddi, ki mareeliho baani nnawakelihu nanona mwaha bwaddi ndhe nipaddusiwege?

¹⁸ Iyo nipaddusiwe wihina nimwebedhege Yehova. Bumwahaya namwebedhaga ni murima wehu wamutene, nnokanna egumi yohagalala ni yooriya. Nihikanna ejhehero yomulabela Yehova malabo amatene. (Pro. 10:22) Ohiya eyo, mubuwelo wehu kunanyemela, mwaha nihinona wihina Yehova onowakavihera adhaari aye yaafwanyiwaga makathamiho. (Isa. 41:9, 10) Mwebaribarene nihikanna dhithu dhowinjhiva dhinanihagalasa mwaha womwebedha Babihu, anafwanelela ‘wakela nthithimiho ni orihiwa’ ni dhopaddusiwa dhaye dhatedhene.—Apo. 4:11.