1. Ddibila Russell vamodha nakwaye, yaasuzaga yeresa avi, ki mwahaya bwaddi edhe ekalege makalelo apama?

OKWARANYA yaka cem dhivirile mundduli, ddibila Charles Russell vamodha naakwaye yahibajha otugumana vamodha nnikuru ning’ono naaliba osuza madhu a Mulugu. Aliwa yafuna enone ebaribari enahudhiha Bibliya wodhela Yehova Mulugu, Yesu Kiristu, yowobola ni makalelo aanokwa. Makalelo ewa oosuza yaali ookweya. Mmodha avoka nikoho, vano atene origanela opendda kadda yolebela enasoriha muselu yoyo. Yamala, oleba dhatedhene dhafwanyiwa. Makalelo ala oosuza yaali apama, ni kopolo dha Mulugu yahiwedha ofwanya ebaribari dhowinjhiva dhiri mBibliyani, dhinanikavihera iyo ofiyedha peeno.

2. Malabo mamodha iyo podi okanna mubuwelo onaviriganiha yovuhulela yatene. Mwahaya bwaddi egereya ndo?

² Nuuvira mwana mudhidhi, anamahudhera ale a Bibliya, yahonelamo wi oveda onona yohudhiha eri mBibliyani vihikala ohiyana ni oveda wonelamo pamadhene dhovuhulela dhiri mBibliyani. Mwahaya bwaddi egereya ndo? Ethu emodha eneriha sowi, dhovuhulela malabo mamodha dhinoneleyamo wafiya mudhidhi wowakwanela obe dhamala wakwanela. Ohiya eyeneve, ehikalawo ethu emodha: Wihina Yovuhulela yoneleyemo pamadhene, enohoweleya opendda yovuuhulela yatene. Napendda epaddi modha bahi ya yovuhulela, podi okanna monelo onaviriganiha yovuhulela yatene. Noonamo pama, siyeyo epadduwile ni yovuhulela eli livuru na Joel. Kabeni nubuwele yovuhulela ela, namala nipendde mwahaya bwaddi egahoweleya osaddula ovanane makalelo ehu oowonelamo yovuhulela ela.

3-4. Yovuhulela eri livuru na Joel 2:7-9, iyo natapulela avi?

³ Omwileri Joel 2:7-9. Namavuhulela Joel ahisoriha wi mulili wa kwakwa, onere ogujhula elabo yo wizarayeli. Kwakwa  ndha, dhihikanna enini vamodha ni meeno a poddogoma, teto, mwaha wadala yewa, yafwanya ethu-sithu yerege wuubedha! (Joel 1:4, 6) Dhihivira yaka dhowinjhiva, iyo nubuwelaga wi yovuhulela ela, enawagana adhari a Yehova. Iyo nonelamo wi adhari a Yehova, woona ehijhivana ninga kwakwa, enerege madhowave elaleyaga. Teto, muthenga enalaleyiwa onere ononga “elabo yavati”, obe onere wanonga athu enathongiwa ni anamaholela ammagerejani. *

⁴ Namwileri baahi Joel 2:7-9, enakala ninga monelo webaribari bulena nnadhihuna mundduli. Mbwenye napendda pama yovuhulela yatene ya Joel, enowoneya wi enohoweleya osaddula monelo wehu wodhela yolebela ela. Vano kabeni noone dhithu nayi dha muselu yola.

5-6. Makoho baani enakumelela, namwileri a) Joel 2: 20? b) Joel 2:25?

⁵ Ethu yobajha, kasugwa mpaganyo wa Yehova wodhela mulili wakwakwa: “Ole onadhela o Norte ginere onvokera wolapela ni nyu [mulili wa kwakwa].” (Joel 2:20) Madhu ala enodhiiha nikoho nna: Akala mulili ola wakwakwa, enawagana Anamona a Yehova eniwelela nlamulo na Yesu nnasoriha wi mwalaleye ni mwakose anamahara, ki mwahaya bwaddi Yehova adhe apaganyege wi onere ‘wavokera wolapela?’ (Eze. 33:7-9; Mat. 28:19, 20) Nikoho nna, nnowoniha ethu Yehova anavokeriye wolapela. Yehova kanaavokera wolapela adhari aye oororomeleya, mbwenye onavokera wolapela ale enafuna wawerela obure adhari aye.

⁶ Ethu yanabili, kasugwa madhu a Yehova eri va Joel 2:25: “Yaka dhubedhile murabo dha kwakwa miyo ginere oliva, wodhela kwakwa dhihinna mampelo, kwakwa dhoojha bure ni wodhela kwakwa dhooluma, nikuru naaga ninlubale naanyagoddo gaarumilimi wa nyu.” Yolebela ela enodhiiha nikoho nimodha: Akala kwakwa enawagana anamalaleya, mwahaya bwaddi egahoweleya wi Yehova “alive” mabasa enaapariwa? Eyo enoniha baahi wi muthenga nnalaleyihu, onnanonga elabo. Mbwenye eyo kahiyo ebaribari. Muthenga nnalaleyihu onowobola egumi, teto onosaddula egumi ya muthu abure ofiyedha otwaruwa. (Eze. 33:8, 19) Eyo ethu yapama, kahiyo ethu yabure mwigumini mwaathu yayo.

7. Madhu owi ‘yamala’ eri va Joel 2:28, 29, enanikavihera wonelamo ethu baani?

⁷ Omwileri Joel 2:28, 29. Ethu yanathuru​—oharana wa dhopadduwa dha yovuhulela. Kasugwave madhu a Yehova enasoriha yegi: “Yamala ginere wakuthulela muzimu waga.” obe kwakwa dhamala opara mabasa ewa. Akala kwakwa enawagana anamalaleya oomwene wa Mulugu, mwahaya bwaddi Yehova adhe erege ginere wakuthulela muzimo waga yamala opara mabasa ewa oolaleya? Ebaribari sowi, naaparaga mabasa ala, nnohowela okaviheriwa ni muzimu wotxena. Nahere nihikaviheriwaga ni muzimo ola wakopola, newene kanawedha olaleya yaka dhowinjhiva wula niwadelihiwaga obe niharahariwaga.

8. Nikuru na kwakwa nnasorihiwa va Apocalipse 9:1-11, enawagana aani? (Osugwe fotu eri vakapani.)

⁸ Omwileri Apocalipse 9:1-11. Vano kabeni noone ethu yanennayi. Wale, iyo nasoriha wi nikuru na kwakwa nnasorihiwa va Joel, enawagana adhari a Yehova, mwaha livuru na Apocalipse nihikanna yovuhulela yoladdana. Yovuhulela eri va Apocalipse, enasoriha  nikuru na kwakwa dhinna kove yamuthu, dhinna muru womareliwa ni woru. (Apo. 9:7) Muwari mwa mweri mitanu, mudhidhi vinagomela egumi ya kwakwa, kwakwa ndho dhinowaathusa athu ‘ehinna yintelelo ya Mulugu vakoveni’ obe dhinowaathusa amwiddani a Mulugu. (Apo. 9:4, 5) Yovuhulela ela, enakala ninga enawagana adhari oothikitheliwa a Yehova. Hee, nuuliba murima aliwa enolaleya dhotoriha dha Mulugu elabo ela yatene mudhanle obure . Mwaha wa yeyo, muselu enaleya aliwa onowanyonya athu owinjhiva enakosa epaddi yelabo.

9. Kwakwa dhinasoriha yovuhulela ya Joel ni kwakwa dhinasoriha yovuhulela ya Apocalipse, ohiyana wa thima orivo buvi?

⁹ Ebaribari sowi, dhego dhiri muwari mwa yovuhulela ya Joel, dhinoladdana ni dha Apocalipse. Mbwenye dhihikanna ohiyana wa thima. Mothajhiha, kwakwa dhinasoriha Joel, dhinononga makupu matene. (Joel 1:4, 6, 7) Mbwenye kwakwa dhinasoriha João, dhihiwadelihiwa “ononga makupu eri elabo yavati.” (Apo. 9:4) Ohiya eyeneve bahi, kwakwa dhonile Joel dhikumenle o Norte. (Joel 2:20) Teto kwakwa dhonile João dhikumenle mukwegweni. (Apo. 9:2, 3) Yovuhulela ya Joel, kwakwadha Yehova onovokera wolapela. Mbwenye dha Apocalipse, Mulugu annenya wihina emarihe mabasa ewa. Kawo ethu enoniha wi Yehova onotakaleliwa ni kwakwa ndha.​—Osugwe kwaduru “ Dhovuhulela dhinasoriha kwakwa​—Dholaddana, wula dhohiyana.”

10. Owoge yotajhiha ya mBibliyani, enoniha wi kwakwa dhili va Joel ni dha Apocalipse kahiyo dhimodhave!

 ¹⁰ Dhovuhulela ndha, dhihikanna ohiyana wa thima. Vano iyo, nnakula omarihawene wi dhovuhulela ndha, kahiyo dhimodhave. Eyo enatapulela wi kwakwa dhile va Joel ni dha Apocalipse kahiyo dhimodhave? Hee siyeyo. Malabo mamodha, Bibliya onolabihedha yintelelo wihina oonihe dhithu dhohiyana-hiyana, mbwenye muselu onasorihiwa, bunooniha yotapulelaya. Motajhiha, yolebela ya Apocalipse 5:5 enihina Yesu di “Poddogoma a nihimo na Juda”. Teto 1 Pedro 5:8 onihina Ddiyabo anakala ninga“poddogoma ananguruma.” Ni muselu ndha dhisorihiwe, enohoweleya ofwanya yotapulela emodha wodhela yovuhulela ya Joel. Ki yovuhulela ela enatapulela ddi?

11. Joel 1:6 ni 2:1, 8, 11, onanivaha dila baani enanikavihera wonelamo kwakwa dhinasorihiye?

¹¹ Nasugwa pamadhene yovuhulela yatene ya Joel, nnowonelamo wi yuvuhulela ela, enaawagana anyakoddo. (Joel 1:6; 2:1, 8, 11) Mwebaribarene Yehova afuna eere, ginere walabihedha “anyakoddo”(atoropa oobabiloniya) akopolo wihina yaasinyuse Amwana Ezarayeli ehinafuna wiwelela. (Joel 2:25) Anyakoddo ayo, yithaniwa “ole onadhela o Norte” mwaha akudda Babiloniya yahitikitedha wizarayeli murruda wonorte. (Joel 2:20) Aliwa yaliganihiwa nnikurru na kwakwa, nowegeredheya pamadhene. Joel ohusoriha egi: Atoropa ayo “kinagudhulana, enedda eharaga niguru naye-naye. . . Enogujhula luwani, enogwelela txinga, enovolowa mmamba eviraga mmajanelani ninga ambava.” (Joel 2:8, 9) Vano kubuwela osakasa wa anyakoddo ala! Aliwa enofwanyeya murudda watene. Kawo mmburo wothawela. Newene kaavo onawedha othawa supadda naakudda babiloniya!

12. Yovuhulela ya Joel enasoriha kwakwa, yakwanele avi?

¹² Yaka ya 607 M.W.O. akudda babiloniya (obe akaldewu) yahigujhula luwani yo Jeruzale ninga kwakwa dhuubedha makupu. Bibliya onihina: “Mwene aakudda Kaldewu, oliye wapa azombwe nsupadda mutempulu, oliye newene kaakalele thagaraga analobwana, anahiyana, newene anakalaba ni aredda. Mulugu onvahedhela atene mmadani mwaye. . . . Oliye opaha tempulu ya Mulugu eebaribari, ogujhula txinga noojeruzale, opaha ni motho sanjhala dhewa dhooliba ni ononga dhego dhewa dhatedhene dha thima.” (2 Cró. 36:17, 19) Akudda babiloniya yahimala omunonga Jeruzale atene. Athu atene yakala oJeruzale yahifiyedha owoga: “Elabo ela ehimala odduwa, kawili athu newene anenyama ni ehipelekiwa mmaddani mwakudda Kaldewu.”​—Jer. 32:43.

13. Otapulele yolebela ya Jeremias 16:16, 18!

¹³ Numala ovira yaka 200, Joel agamanle owoga yovuhulela yaye, Yehova ahimulabihedha Jeremiya wihina asorihe ethu yafuna werana anyakoddo oobabiloniya. Oliye ahisoriha wi anyakoddo ala oowopiha​—yere waseyela Amwana Ezarayeli enerana dhego dhabure wihina epariwe atene. Yehova ahisoriha egi: “ ‘Miyo ginere wasoka anamameza oowinjhiva’, aliwa enere wameza. ‘Vasogolova ginere wasoka anamasaya owinjhiva, aliwa enere watota mmwagoni mwatemwene, mmuhiruni ni mmabweni. Ginere wahogolesela pamadhene obure wewa ni dhoothega dhewa.’” Amwana Ezarayeli oohiwelela, kiyawedhe wipita mu niya newene mukokolani, ofiyadha ohupariwa ni anyakoddo oobabiloniya.​—Jer. 16:16, 18.

14. Yovuhulela eri va Joel 2:28, 29, yakwanele alini?

¹⁴ Namavuhulela Joel, ahisoriha dhego dhapama. Oliye ahisoriha wodhela ovenyihedhiwa. Jeruzale, eere ohogolowela ovaha dhowima. (Joel 2:23-26) Eyo enatapulela wi osogolowa, Yehova eere ovaha dhojha dhowinjhiva dhomuzimuni. Oliye ahipaganya egi: “Yamala ginere wakuthulela muzimu waga athu atene, aninyu alobwana ni ahiyana enerege ovuhulela. . . Ni adhariya, naari ekale alobwana obe ahiyana, ginere wakuthulela muzimu waga.” (Joel 2:28, 29) Yehova ahisoriha wi ginere wakuthulela muzimu waga wotxena. Eyo kipadduwe mudhidhi yole Amwana Ezarayeli nuuhogolowa obabiloniya, mbwenye epadduwile nuuvira yaka zana o Pentekoste yaka ya 33 M.W. Ki muselu ola nnonne addi?

15. Va Atos 2:16, 17, murumiwi Pedro osaddunle addi yuvuhulela ya Joel 2:28, ki eyo enoniha ddi?

¹⁵ O Pentekoste, nufiya mudhidhi wa mambesi mawora a 9, yahereya ethu yotikiniha. Nikuru na anamahara a Yesu, nahikuthuleliwa muzimu wotxena, vano obajha olaleya “muthenga dhapama dha Mulugu.” (Atos 2:11) Murumiwi Pedro, ahivetheliwa wihina iiwananihe matikiniho ala ni yovuhulela eri va Joel 2:28, 29. Mbwenye Pedro mudhidhi asorihaga yovuhulela ela, ahivetheliwa wihina asaddule vang’ono. Oliye osaddule ni makalelo baani? (Omwileri Atos 2:16, 17.) Ohiya wambela ni madhu owi “Yamala”, Pedro wambele osoriha yovuhulela ela ni madhu owi, “Malabo ookuthula”​—ni muselu onasorihiwa vala, malabo ala enagana omakuthulo wa dhego dha bure dha malabo aajudewu. Malabo yale ookuthula, “athu atene oofwanelela” egahikuthuleliwa muzimu wa Mulugu. Eyo enovaha ebaribari wi ogahivira mudhidhi wowinjhiva wihina yovuhulela ya Joel yakwanele.

16. Muzimu wa Mulugu okavihere avi mabasa olaleya yaka zana dhoroma? Ki peeno onakavihera avi?

 ¹⁶ Mulugu nuumala wakuthulela muzimu waye wotxena makiristawu ansaka nobajha; aliwa yahawambela mabasa oolaleya ofiyedha elabo yatene. Ninga munawogela karta naavahedheliwe akudda Kolosenses, naalebiwe yaka ya 61, murumiwi Pawulo ahisoriha wi murudda wili “dhopaddusiwa dhatedhene dhili elabo yavati” wahilaleyiwa muthenga dhixa. (Col. 1:23) Mudhidhi wa murumiwi Pawulo, “dhopaddusiwa dhatedhene” yagana murudda dhatedhene waavinre Pawulo nakwaye. Nnikavihero na muzimu wotxena, mabasa oolaleya ehifiya mburo dhohiyana-iyana malabo ehu a peeno​—mabasa ala ehifiya “wigomele elabo.”​—Atos 13:47; Osugwe kwaduru “ Ginere wakuthulela muzimu waaga.”

17. Nonelemo avi yovuhulela eri va Joel 2:7-9?

¹⁷ Vano iyo nihonelamo pama yotapulela ya yovuhulela eri va Joel 2:7-9. Ni madhu ogwaddela yolebela ela kinathoya mabasa ehu oolaleya, mbwenye enatonya ele anyagoddo oobabiloniya yeriliwana luwani yo Jerusale yaka ya 607 M.W.O.

18. Munikuruni mwa Yehova ethu baani ehisadduwile?

¹⁸ Ethu baani ehisadduwile? Adhari a Yehova, enodhowave elaleyaga muthenga dhapama mburo dhatedhene, elabihedhaga makalelo matene eliwo. (Mat. 24:14) Kavo namathonga onawedha oniwadeliha ofiyedha onigonjhiha wi nihaande wakwaneliha mutholo wehu wolaleya. Ni mareeliho a Yehova nili oolibene okwaranya malabo amundduli, teto, nnoolaleya nuuliba murima muthenga dhapama dhomwene! Nuwiyeviha, nnodhowave nimuroromelaga Yehova wi onere oniva enonelo ya dhovuhulela dhiri mBibiliyani. Mudhidhi wafiya wa kadda yovuhulela, oliye onere onitonyihedha “ebaribari yatene.”​—João 16:13.