OHUDHERA 17
“Nyu muri “akwaaga”
“Miyo ginuwiithanani akwaaga, mwaha wi dhatedhene giwilimi wababani guhuwaddelani.”—JOÃO 15:15.
JHIBO 13 Cristo, o nosso exemplo
MUSELU NNAFUNIHU OSUZA *
1. Wihina athu abili ekanne wandana wapama enahoweleya ddi?
OKANNA wandana wapama ni muthu, enohoweleya werana thalo. Thalo yoobajha, fuujha mufhidhi ni muthu yoyo. Wakala vamodha nuule onafuniwe wandana, munothapanya, munolibihana, munowoga thalako dha mwegumini mwenyu. Mwerana ndo oobili, munowandana pamadhene. Mbwenye malabo mamodha, okanna wandana wapama ni Yesu podi okala ethu yorusa. Mwahaya bwaddi?
2. Wodhela wandana ni Yesu, ethu yobajha enanikathamiha sivi?
2 Ethu yobajha enanikathamiha wandana ni Yesu, iyo kannamonege Yesu thoo-thoo. Siyeyo yapadduwe ni makiristawu a yaka zana dhoroma. Ohiya eyo, murumiwi Peduru ohusoriha egi: ‘Naari muhunamonege, nyu munomudhivela. Naari muhumonaga ovanene, munomuroromela.’ (1 Ped. 1:8) Eyo enowoniha wi, naari nihimonaga Yesu thoo-thoo, iyo podi okanna wandana wapama nuuliye.
3. Ki ethu yanabili enanikathamiha sivi?
3 Ethu yanabili enanikathamiha, iyo kannanda owoga ni Yesu. Naalobelaga, nnothapanya ni Yehova. Hee, eyo ebaribari. Iyo nnalobela ni ndina na Yesu, mbwenye kannathapanya nuuliye. Yesu kanafuna wi iyo nilobelege wa oliye. Mwahaya bwaddi? Mwaha wi nlobelo ekalelo yowebedha. Anafwanelela webedhiwa di muthu mmodha baahi, Yehova. (Mat. 4:10) Mbwenye, iyo podi woniha odhive ninihuna ni Yesu.
4. Ethu yanatharu enanikathamiha sivi, ki vano, muwari mwa yohudhera ela nnafuna ninasuze ddi?
4 Ethu yanatharu enanikathamiha, Yesu anakala odhulu; mwaha wa yeyo, iyo kaninwedha okala vamodha nuuliye kadda labo. Naarive nihimwaddamele Yesu, iyo podi onona dhitu dhowinjhiva wodhela oliye. Muwari mwa yohudhera ela, nnere wubusedhiwa dhithu naayi. Nerana dhithu dhendho, nnere okanna waandana wapama ni Yesu. Nahinaambele, nnafuna nisuze ekalele ddi yathima kadda muthu okanna wandana wayewene ni Yesu.
MWAHAYA BWADDI EGAHOWELEYA WANDANA NI YESU?
5. Mwahaya bwaddi egahoweleya wandana ni Yesu? (Osugwe kwaduru “ Wandana ni Yesu winothukulela wandana ni Yehova” vamodha ni kwaduru “ Monelo wapama wodhela Yesu.”)
5 Wihina nikanne wandana wapama ni Yehova, enohoweleya wandana ni Yesu. Mwahaya bwaddi egahoweleya? Mwaha wa dhithu bili. Ethu yoobajha, Yesu ohuwoga ni arumiwi aye, wera: ‘Anyene ababa enowudhivelani. Woona wi nyu munogidhivela.’ (João 16:27) Oliye ohusorihave egi: ‘Kaavo anadhowa wa ababa ahivirile wa miyo.’ (João 14:6) Oxixa wandana ni Yehova wula ohunna wandana wapama ni Yesu, enaligana ni ogwela operediyuni soovira omulagoniwa. Yesu ohulabihedha nifwanafwaniho nna iwithaniye ‘mulago wa mambila.’ (João 10:7) Ethu yanabili, Yesu ohutajhiha pamadhene dhikalelo dhababe. Oliye wawaddela anamahara aye, wera: ‘Ole onagoona, ohawoona ababa.’ (João 14:9) Mowindo, makalelo aathima oomunona Yehova, foosuza egumi ya Yesu. Nasuza dhego eerihedhe Yesu, makalelo ehu oomudhivela enere wunnuwa. Naamudhivelagave Yesu, nnokanna odhivela winlubale ni ababe.
6. Osorihe, ethu emodha enahoweleya werana wihina naandane ni Yesu?
6 Enohoweleya okanna wandana wapama ni Yesu wi malobelo ehu yaakuliwe. Enohoweleya werana ethu emodha ohiya baahi olobelave malabo matene “Ni ndina na Yesu”. Soofuneya onona makalelo Yehova anamulabihedhiye Yesu wihina malobelo ehu yaakuliwe. Yesu ahawaddela arumiwi aye, wera: ‘Dhatedhene munalobinyu ni ndina naga, gineere wuuvahani.’ (João 14:13) Mwebaribareene di Yehova onavuruwana ni anawakula malobelo. Teto Yehova aafunaga wakula nlobelo, oliye onamulabihedha Yesu. (Mat. 28:18) Wubuwele enapadduwa nalobela wa Yehova nimulobaga wi oliye alevelele dhothega dhehu. Ahinathi onilevelela, oliye onoveda onona akala iyo nnolabihedha yolaaga anivahile Yesu enasoriha wi naalevelege athu amodha. Yesu ohuwoga egi: ‘Mwaalevelelaga athu ni dhoothega dheewa, babiinyu oodhulu onere wuulevelelani; mbwenye, akala kamunaalevelela athu ni dhothega dheewa, babiinyu kandha alevelela dhothega dhenyu.’ (Mat. 6:14, 15) Mohanganyedha, Saathima wawoniha opama athu amodha ninga Yehova vamodha ni Yesu!
7. Wodhela yowobola irilena Yesu, baani anawakele mareeliho?
7 Ale enna wandana wapama ni Yesu, enere waakela mareeliho wodhela mukutho wowobola erilena Yesu. Nnone addi? Nnone mwaha Yesu ohuwoga wi: ‘Ere ovaha egumi yaye vamburoni vaakwaye.’ (João 15:13) Ni aleya oororomeleya yaliwo mudhidhi Yesu ahinathi odha elabo yavati, osogolo enere osuza dhithu wodhela Yesu ofiyedha wunuwiha odhivela nuuliye. Alobwana ni ahiyana ninga Abaraawu, Sara, Moses ni Raabe, yavenyihiwa muukwani aliwa enere wilibehera wihina yandane ni Yesu wi yakele egumi yohimala.—João 17:3; Atos 24:15; Heb. 11:8-12, 24-26, 31.
8-9. Ninga munawogela João 15:4, 5, wandana ninihuna ni Yesu winanikavihera wapara mabasa baani, ki mwahaya bwaddi mabasa ala edhe ekalege athima?
8 Iyo nnohagalala mwaha wolaba vamodha ni Yesu mmabasani oolaleya ni oowasuziha athu muthenga dhapama Dhomwene. Yesu agali elabo yavati, oliye aali namasuziha. Nuumala odhowa odhulu, Yesu othomiwa wi akale musolo wa mulogo, ni vanove, oliye onna wakavihera mabasa oolaleya ni oowasuziha athu. Yesu onosugwa ni onovaha thima ele oneeriwena wi wakavihere athu owinjhivene omunona oliye ni babe. Mwebaribareene, nnowanda wapara mabasa ala mwaha wanikavihero nnanivaha Yehova ni Yesu.—Omwileri João 15:4, 5.
9 Madhu a Mulugu enowoga soohiyedhedha wi, neegi nimuhagalase Yehova, enohoweleya omudhivela Yesu ni wilibihera wihina odhivela wula wihimale. Mwaha wa yeyo, nnere osuza dhithu naayi, teto, dhithu dhendho, dhinonikavihera okanna wandana wapama ni Yesu.
NNERE DDI WIHINA NANDANE NI YESU
We podi wandana ni Yesu werana ndha: (1) Omunone Yesu, (2) makalelo awo oowubuwela ni dhowera dhawo, omutajhihege Yesu, (3) wakavihere addibila oothikitheliwa a Kristu ni (4) okavihere dhoosakula dha nikuru na Yehova (Osugwe ddima 10-14) *
10. Thalo yoobajha enahoweleya werena wi nikanne wandana wapama ni Yesu siivi?
10 (1) Omunone Yesu. Nnere omunona Yesu niileri livuru na Mateus, Marcos, Lucas ni João. Napenddaga dhatedhene dhinasoriha malivuru ala, nnohudhera makalelo oomudhivela ni oomuriha Yesu. Oliye oowoniha opama aathapanyaga naathu. Mootajhiha, naari Yesu agari Nabuya aanamahara aye, oliye kaweddiha ninga anamalaba. Ohiya eyo, Yesu owawaddela mubuwelo waye ni dha mmurimani mwaye. (João 15:15) Yesu owaweddela thagaraga ofiyedha wuunla naaliwa. (João 11:32-36) Amwiddani a Yesu, yahinona wi oliye ohukanna wandana naathu eniwa muthenga waye. (Mat. 11:19) Natajhiha makalelo a Yesu owaweddiha anamahara aye, wandana wehu naathu amodha onere okala wapama, nnere ohagalala, teto, makalelo ehu ootamalela ni oomudhivela Yesu, enere wuunuwa.
11. Thalo yanabili enahoweleya wera wi nikanne wandana wapama ni Yesu siivi, ki mwahaya bwaddi thalo ela edhe ekalege yathima?
11 (2) Makalelo awo oowubuwela ni dhowera dhawo omutajhihege Yesu. Namunonave Yesu wula ntajhihaga makalelo aye oowubuwela, wandana wehu nuuliye winerege wuunuwa. (1 Cor. 2:16) Ki vano nnamutajhihe Yesu ni makalelo baani? Osugwe yotajhiha. Mubuwelo wa Yesu wali wowakavihera amodha ohiya widhiveliha yeka. (Mat. 20:28; Rom. 15:1-3) Wona wi ubuwela ndo, oliye owerana kukuthu wihina aakavihere amodha ni akale oolevelela. Athu yawoga dhithu dhohikala pama wodhela Yesu, oliye kaanyanyuwa muwaguva. (João 1:46, 47) Muthu amutheegela, Yesu kaakoya njhiga ni muthu yoyo, newene kuubuwela wi ola kaandha akala muthu apama. (1 Tim. 1:12-14) Yesu ohuwoga egi: ‘Athu atene enere onona wi muri anamahara aaga: ‘Mwadhivelanaga mmodha ni mukwaye.’’ (João 13:35) Wikohe: “Ginoohara yotajhiha ya Yesu, geragana dhithu dhatedhene ni kopolo wihina nkanne murenddele naadddibila vamodha naarogola?”
12. Thalo yanatharu enahoweleya werana wi nikanne wandana wapama ni Yesu siivi, ki vano, nnade addi olabihedha thalo ela?
12 (3) Wakavihere addibila oothikitheliwa a Kristu. Dhatedhene nnerihuna wi naakavihere addibila oothikitheliwa a Yesu, enakala ninga nnamulaba oliyeene. (Mat. 25:34-40) Yesu ohaaxagiha addibila aye othikitheliwa wihina elaleye Omwene ni waaveda anamahara. Naapara mabasa ala oolaleya, nnotonyihedha wi nnowakavihera addibila oothikitheliwa. (Mat. 28:19, 20; Atos 10:42) Oothikitheliwa yahere ehikaviheriwaga ni ‘mambila mamodha’ kiyaawedhe wapara mabasa oolaleya wapela elabo yaatene. (João 10:16) Akala we onokosa epaddi ya mambila mamodha, wubuwele wi, waparaga mabasa ala oolaleya, kunatonyihedha baahi odhivela onniwena ni addibila oothikitheliwa, mbwenye odhivela onniwena ni Yesu.
13. Nnaalabihedhe addi Yoolaga anivahile Yesu eri va Lucas 16:9?
13 Ehikalawo makalelo mamodha oowakavihera addibila oothikitheliwa a Yesu. Makaleloya, baala: Nilabihedhe dhorela dhehu wihina nikaviherena mabasa aneddiha Yehova ni Yesu. (Omwileri Lucas 16:9.) Mootajhiha, iyo podi ovaha dhoovelela dhehu wi nikavihere mabasa oomwene enapariwa elabo yatene. Dhovelela ndha, dhinolabihedhiwa wihina dhikaviheriwena mabasa oolaleya muthenga dhapama murudda dhoolapela, opara mabasa oomaga ni owomihedha mburo dhoomwebedhamo Yehova, ni wakavihera athu yapadduwa ngovi. Ohiya eyo, iyo podi ovaha dhovelela dhehu, wihina nitxove mologo wehu, obe iyo podi olabihedha dhovelela wihina nimutxovena ddibila oosegedheya. (Pro. 19:17) Iyo nerana dhithu dhendha, nnere okanna wandana wapama ni Yesu vamodha ni Yehova.
14. Ninga munawogela Efésios 4:15, 16, thalo yanennaayi enahoweleya werana wi nikanne wandana wapama ni Yesu siivi?
14 (4) Okavihere dhoosakula dha nikuru na Yehova. Yesu di musolo wa mulogo, oliye ohathoma athu oofwanelela wihina enisamalelege. Iyo nawiwelelaga aliwa nnokanna wandana wapama ni Yesu. (Omwileri Efésios 4:15, 16.) Mootajhiha, Vano iyo nnosayela okanna ebaribari wihina kadda Nyumba Yomwene, esamaleliwege pamadhene. Mwaha wa yeyo, yohoweleya owomihedha pama mulogo dhimodha vamodha ni muruddadha. Mabasa ala, ehitotela osamalela pama dhovelela dhehu. Teto, mudhidhi mmodhave, yohoweleya wi anamalaleya aatene esayele makalelo owirugunusedha mwigumini mwewa. Anamalaleya ala oororomeleya, podi wera owinjhiva yakosa epaddi ya mulogo mudhidhi wowinjhiveene, ni yahikanna akwiwa mmulogoni addibila ni arogola. Peeno aliwa ehithomiwa wihina edhowe yakaviherege mulogo mmodhene. Yesu onohagalala vanlubale aawawonaga anamalaleya ala oororomeleya, ehanyedhaga dhoosakula dha nikuru na Yehova.
AKWAYE YESU A MALABO MATENE
15. Wandana wehu ni Yesu onunnuwe ni makalelo baani osogolo?
15 Ale enathikitheliwa ni muzimo wotxena, ehikanna ejhehedhelo yookala vamodha ni Yesu malabo matene ni othonga vamodha nuuliye muumwene wa Mulugu. Mwebaribareene aliwa enere okala ni Yesu—enerege omoona, owoga nuuliye ni waredha vamodha nuuliye. (João 14:2, 3) Athu enna ejhehedhelo yookala elabo ya vati, Yesu onerege wasugwa pama ni wawoniha odhivela. Mwebaribareene aliwa kidha emona Yesu thoo-thoo. Mbwenye aliwa, enerege woona wandana wewa ni Yesu wuunuwaga, yavolowa mparayizu onaadhiwena ni Yehova vamodha ni mwaneye Yesu.—Isa. 9:6, 7.
16. Mareeliho baani nnawakeliho, mwaha wokanna wandana wapama ni Yesu?
16 Yesu anoonithana wihina naandane nuuliye. Narumedha wandana ni Yesu, nnere okanna mareeliho. Mootajhiha, ovanene Yesu ohukanna odhivela ni iyo ni ononikavihera. Nihakela ejhehedhelo yookalawo osogolo malabo amatene. Ethu emodha yathima, sowi wandana wehu wapama ni Yesu, winere onithukulela wakela mareeliho oopitha dhatedhene—wandana ni ababe Yesu, Yehova! Mohanganyedha, wandana ni Yesu oneti munlubale.
JHIBO 17 “Eu quero!”
^ paragarafu 5 Dhihivira yaka dhowinjhivedhene arumwi elabaga, ethapanyaga vamodha ni Yesu. Mwaha wa yeyo, aliwa yahaandana pamadhene ni Yesu. Peeno, Yesu annafuna wihina iyo naandane nuuliye. Mbwenye dhihikalawo dhithu dhinanikathamiha iyo, dhihinaligana ni dhaarumiwi. Muwari mwa yohudhera ela, nnere onona dhookathamiha ndho, teto, nnere woona dhoxagiha dhinanikavihere wandana pamadhene ni Yesu.
^ paragarafu 55 YOTAPULELA YA FOTU: (1) Mudhidhi nnakanihu ohudhera wemudhi, iyo podi osuza wodhela mapasa aapara Yesu. (2) Mmulogoni, iyo podi wilibihera wihina nikanne murenddele ni addibila atene. (3) Niilibiheraga mmalaleyelo, nnowakavihera addibila oothikitheliwa a Kristu. (4) Mmulogoni mwakala masadduwo, iyo podi okavihera wodhela ohanyedha dhoosakula dhaale enaholela mulogo.
