1. Naafunaga wakela eegumi enahoweleya nere ddi?

WERE ofuna ovolowa mmapokani oothamaga, ogali muredda obe oogari oogomeene? Naari. Teto murumiwi Pawulo enre makiristawu atene eebaribari enoothamaga. (Heb. 12:1) Iyo atene, azombwe, owunnuwelavo, athu a kopolo obe athu oogoma, naafunaga omwaakela padamari eegumi Yehova ananivahiye, enohoweleya ovilela ofiyedha omakuthulo. Mat. 24:13.

2. Mowiwanana ni 2 Timóteo 4:7, 8, Mwahaya bwaddi Pawulo adhe akannege oneti wovaha nlamulo nnasoriha othamaga nuuvilela?

² Pawulo ahikanna oneti wovaha nlamulo nnasoriha othamaga nuuvilela. Mwaha oliye ohuthamaga “ofiyedha omakuthulo.” (Omwileri 2 Timóteo 4:7, 8.) Othamaga awonge Pawulo winatapulela ddi?

3. Othamaga awonge Pawulo winatapulela ddi?

³ Malabo mamodha, Pawulo afunaga ohudhiha ethu yathima, oolabihedha jogo dhereyesa elabo yo Grécia mudhidhi wakale. (1 Cor. 9:25-27; 2 Tim. 2:5) Pawulo ohuliganiha dila dhowinjhivadhene egumi ya mukiristawu nuuthamaga. (1 Cor. 9:24; Gál. 2:2; Fil. 2:16) Muthu anabajha “othamaga” nlabo anapelekiye egumaye wa Yehova ni abaddiziwa. (1 Ped. 3:21) Othamaga waye winafiya omakuthulo, Yehova anvaha egumi yohimala.​— Mat. 25:31-34, 46; 2 Tim. 4:8.

4. Peeno nnafuna nihudhere ddi?

⁴ Mwahaya bwaddi othamaga olenddo wolapelene oliganihiwaga ni egumi ya mukiristawu? Dhihikalawo mwaha dhowinjhivadhene. Mbwenye peeno nnafuna nihudhere mwaha miraru. Wobajha, nihare dila yapama. Wanabili, ndidele othamaga. Wanatharu, nagonjhihe makathamiho enaanifwanye mudila.

5. Dila baani nnafunihu ohara, ki mwahaya bwaddi?

⁵ Othamaga wa mapoka, anamathamaga atene enahara dila emodhave, esakuliwe naaliba wegeredha olenddo yoyo. Ole anathukula dila yayene podi okumihiwamo ni omuyelela padamaraye. Emodhave ni iyo, nafunaga wakela egumi yohimala, enohoweleya ohara dila esakuliwe. Nihare dila ya mukiristawu, dila yegumi. (Atos 20:24; 1 Ped. 2:21) Mbwenye Saddana, naale enamutajhiha, enotakaleliwa yanoonaga nthukulaga dila yegumi. Aliwa enafuna ‘nthamagege naliwa.’ (1 Ped. 4:4) Aliwa enonteya, enowoga wihina dila yehu kahiyo yapama, mbwenye yewa siri yapama ni ehikanna ofuru webaribari. Mbwenye eyo kahiyo ebaribari.​—2 Ped. 2:19.

6. Ohudhere ddi wodhela ele empadduwele Brian?

⁶ Muthu-di-muthu anasakula othamaga naale epupurusiwe ni Saddana, kanafwanya ofuru webaribari mbwenye anakala mudhari eelabo. (Rom. 6:16) Kavuruwana yopadduwa ya Brian. Makolo aye yahimukavihera osakula dila ya mukiristawu. Mbwenye nuukala muzombwe, oliye obajha wanganyedha akala ebaribarene dila ala yere odhana egumi yohagalasa. Vano, Brian osakula othamaga naathu enahara mweddelo wa Saddana. Brian ohusoriha egi: “Miyo kaganona wihina ele goonimi ninga ofuru yeere ogithukulela okala mudhari a munigwa wabure. . . . Nuvira malabo, miyo obajha ofumari, ong’wa, ni oraruwa. Nuvira yakadhene, miyo othabwaga wibwiniha, gihifiyedha ojha murombwe dhoviriganiha ogogo, ofiyedha okala mudhari. . . . Gihifiyedha oguliha murombwe dhoviriganiha ogoogo, wihina gisapele munigwa waga.” Vano, Brian osakula omuroromela Yehova ni wawiwelela malagano a mBibliyani. Brian osaddula egumaye ofiyedha obaddiziwa yaka ya 2001. Peeno Brian aneedda oohagalalene, mwaha ohuthukula dila yegumi. *

7. Mowiwanana ni Mateus 7:13, 14, dhiliwo dila ngasi?

⁷ Yopadduwa ela enonihudhiha wihina sapama ohara dila yegumi. Saddana anafuna wihina iyo atene nselele ohara dila yoopurana ‘enathukulela wigumini yohimala’, vano nthukule dila yorambalala anamwinjhi mwilaboni enahariwa. Dila eyo ehivuwa bure ni sokweya ohara, mbwenye enathukulela ‘omagujhuliwelo.’ (Omwileri Mateus 7:13, 14.) Akala nnofuna ohara dila yegumi, kahiyo opupuruwa, nikale athu eniwelela ni enamuroromela Yehova.

8. Namathamaga akwakwathuwa anera ddi?

⁸ Maliba othamaga olenddo wolapelene wihina ahikwakwathuwe, kanathamaga bure-bure, mbwenye anathamaga asugwaga osogolo. Naari dhigarive ndo, podi omothela muliddini obe namathamaga mukwe podi omukwakwathusa. Mbwenye amotha, kanalegela, anovenya witata, othamagagave. Kanimela osugwaga ele emukwakwathuse, oliye onunlela ofiya omakuthulo ni omwakela padamaraye.

9. Nakwakwathuwa, enahoweleya nere ddi?

⁹ Mulenddoni muna iyo podi okwakwathuwa dila dhowinjhivadhene, wodhela owoga ni werana ethu yabure. Obe akwihu podi onikwakwathusa. Yapadduwa ethu ninga yeyo, kanitikine. Mwaha kaavo alogomane, teto, atene iyo nnathamaga dila emodhave, yopurana enathukulela wigumini. Bumwahaya podi ofwanyiwa mudhidhi onanithukulele “otukumana.” Pawulo ahinona wihina malabo mamodha nnere ‘okanna muladdu’ mmodha ni mukwaye. (Col. 3:13) Bumwahaya, wakwakwathuwa, kusugwe yukwakwathuse, omubuwelege padamari onafuniwe omwakela. Kulegele, ovenye witate ni othamagegeve. Kunyanyuwe ni kukoye ntxiga. Waherana ndo, dhawo dhihiweya; kunaafiye omakuthulo ni onere omuyelela padamari eegumi. Ohiya eyeneve, we podi okala nibwe nnaakwakwathuse ale enafuna othamaga eharaga dila yegumi.

10. Nafunaga orabela wakwakwathusa athu amodha nere ddi?

¹⁰ Naafunaga orabela wakwakwathusa athu amodha, enafuneya sowi nikale athu ooleva. Ala makalelo apama oomariha muladdu, nakanna mubuwelo wohiyana naathu amodha. (Rom. 14:13, 19-21; 1 Cor. 8:9, 13) Eyo sinanihiyaniha iyo vano, naale enathamaga ni mapoka. Yofuna yewa fugonjhihana, ni omoona baani anamwakele padamari. Anamathamaga ala, anamakumbela vewa. Aliwa enofiyedha watukuma akwiwa wihina ekale osogolo. Mbwenye iyo kannawerana mapoka mmodha ni mukwaye. (Gál. 5:26; 6:4) Iyo nnafuna wihina anamwinjhi, efiye omakuthulo ni emwakele padamari eegumi. Bumwahaya nnowilibihera  wiwelela yolaga ya Pawulo enawoga: ‘Kadda muthu kasayelege opama wayeve baahi, mbwenye asayelege opama waathu amodha.’​—Fil. 2:4.

11. Namathamaga, yofuna yaye sivi, ki mwahaya bwaddi?

¹¹ Anamathamaga kinasugwa osogolove baahi. Mbwenye yathamagaga yofuna yewa fufiya omakuthulu. Naari mburo enafuniwa ogomelawo ogaalapele, enubuwela egafiyale ni emwakelaga padamari ewa. Mubuwelo ola onowakavihera anamathamaga wilibihera ofiyedha omakuthulo.

12. Yehova alibele onivaha ddi?

¹² Yehova dapama, bumwahaya ohulibela wihina kadda mudhari aaye anaathamage ofiyedha omakuthulo anere omwakela padamari​—podi okala egumi yohimala odhulu obe egumi yohimala mparayizu elabo yela yavati. Bibliya onomuwoga padamari oyo. Eyo enonikavihera wubuwela egumi yapama nnafunihu okanna. Nakanna ejhehedho yehu mmurimani, kannaakwakwathuwe, obe nakwakwathuwa nnere ovenya.

13. Iyo nanamathamaga amapoka nihiyane vaavi?

¹³ Anamathamaga akale elabo yo Grécia, yowagonjhiha makathamiho ninga, ogoma ni ovoreyiwa. Mbwenye ethu yakavihera yaali oxagihiwa ni wilibihera wewa. Emodhave ni iyo, kadda nlabo nnoxagihiwa wihina ndidele othamaga niharaga dila yegumi. Iyo niihiyana naanamathamaga ala, mwaha nihikanna ntxela na kopolo nihinamala. Namuroromela Yehova, oliye ohupaganya onixagiha ni onivaha kopolo!​—1 Ped. 5:10.

14. 2 Coríntios 12:9, 10, ananikavihera addi wagonjhiha makathamiho?

¹⁴ Pawulo ahifwaniwa makathamiho owinjhiva. Ohiya oruwaniwave nuharahariwa, wofiya mudhidhi oliye akale oogomeene. Ethu emodha yamukathamiha Pawulo sila ithaniye: ‘Mwinga mmwiilini.’ (2 Cor. 12:7) Kadda makathamiho yanfwana Pawulo, oliye kawoona ninga ofuru woselela othamaga. Mbwenye yanvaha ofuru womuroromela Yehova. (Omwileri 2 Coríntios 12:9, 10.) Mwaha wa yeyo, Pawulo oowakela nikavihero na Yehova, afwanyiwa makathamiho.

15. Niilibihera omutajhiha Pawulo, enaanipadduwele ddi?

¹⁵ Malabo mamodha iyo podi oruwaniwa obe oharahariwa. Obe naari, podi okala aredda obe ogoma. Mbwenye nilibihera omutajhiha Pawulo, kadda makathamiho enanifwanya enanifugulela mulago wowoona nikavihero ni odhivela wa Yehova.

16. Naari ofwanyiwaga makathamiho, ethu baani enahoweleya werena?

¹⁶ Kunawedha ovenya voolilini obe vakarinyani? Moddo dhawo dhinowupwesa obe mento awo kinoona pama? Akala dhiri ndo, enowedheya othamaga naazombwe akopolo? Hee, enowedheya! Addibila owuluvala, aredda ennana othamaga eharaga dila yegumi. Aliwa ehinona wihina kopolo enathamagiwana kahiyo dhewa. Aliwa enaroromela kopolo dhinadhela wa Yehova. Naari efwanyiwaga makathamiho, addibila ala enavuruwana muthugumano wodhela telefoni obe enoona mwinternetini. Addibila ala enowapara mabasa oolaleya wodhela walaleya amediku, menferemero obe amudhiwa.

17. Yehova anawona avi ale ehinna kopolo, mwaha woredda?

¹⁷ Naari ogari mureda, kukwerebeye. Newene kuwubuwele wihina kunna kopolo dhothamagana mu dila yegumi yohimala. Yehova ohukanna odhivela vanlubale ni we mwaha nroromelo ni ovilela wawo. Peeno  onohowela nikavihero na Yehova opitha kale, bumwahaya oliye kadha uunyanyala. (Sal. 9:10) Mbwenye anere okala ni we. Kaavuruwane madhu a murogola ola anafwanyeya agaali muredda: “Mwaha oredda dhohiyana-hiyana dhinagifwanya kaginawedha olaleya. Mbwenye enagihagalasa, fuunona wihina Yehova anohagalala ni yele ginawedhimi.” Wakwerebeya, kuwubuwele wi ori weeka. Wawubuwelege madhu ala oolibiha aasorihe Pawulo: ‘Okwerebeya winogidhivela, mwaha gakwerebeya, finakannimi kopolo.’​—2 Cor. 12:10.

18. Makathamiho baani oorusa enaafwanya addibila?

¹⁸ Mbwenye addibila amodha eli mulenddoni muna wothamaga enna makathamiho eweene, ehinoniwa naathu amodha. Ninga okubanya, tensawu, obe othuwathuwa. Makathamiho ala ewogiwe enaafwanya addibila, ethabwele ddi woopiha? Mwaha muthu akothowa moono obe aneedda ni karinya, iyo atene nnowedha omoona ni enokweya omukavihera. Mbwenye muthu anakubanya, anna tensawu, aneedda owukuwene, enorusa onona goyi anoniye, mwaha malabo mamodha kanawoga. Bumwahaya naarive aganna makathamiho oliye podi ohukaviheriwa. Mbwenye ebaribariya sowihina goyi anoniye enooligana ni ya muthu akothowe moono.

19. Yopadduwa ya Mefibozeti enanihudhiha ddi?

¹⁹ Akala we kunawedha, mwaha woredda vano wonaga wi kavo anawedha wonelamo makathamiho awo, yotajhiha ya Mefibozeti podi wulibiha vanlubale. (2 Sam. 4:4) Oliye aali ooragala, teto, mwene Davidi ahimutoriha ni makalelo abure. Mefibozeti kerilena ethu yabure wihina makathamiho ala enfwanye. Naari dhigarive ndo, oliye keenyile okanna mmurimani dhawubuwela dhabure. Ohiya eyo, oliye ubuwela dhego dhatedhene dhapama dhampadduwela mwigumini mwaye. Mefibozeti ootamalela dhego dhatedhene Davidi amwireliye malabo amundduli. (2 Sam. 9:6-10) Bumwahaya, Davidi numutoriha ni makalelo abure oliye ahipendda pama muselu ole. Mefibozeti kaahiile wi dhoviriganiha dha Davidi dhimwerihe oliye okala muthu owopiha. Oliye kaamusibile obure Yehova mwaha ele Davidi aamwireliye. Mbwenye Mefibozeti oowilibihera wi amukavihere mwene oothikitheliwa a Yehova. (2 Sam. 16:1-4; 19:24-30) Yehova ohuleba thalako ela ya Mefibozeti, wihina enilibihe nafwanyiwa makathamiho ninga yala.​—Rom. 15:4.

20. Dhithu baani dhinaapadduwela addibila enakubanya bure, ki ethu baani enahoweleya wi ehanganyedhe?

²⁰ Addibila naarogola enakubanya bure, yakala vaari vaathu amodha ginadhiveliwa,  teto, thomela yewa enothabwa ogwela. Enowarusa okala vanamwinjhi. Naari dhigarive ndo, aliwa enowilibihera oya omutugumanoni, omusonkanoni wa murudda, ni omusonkanoni wa malabo mararu. Ethu emodha enaarusa futhapanya ni muthu ehinamonegiwa, naari dhigarive ndo, enowawogana athu mmalaleyelo. Akala makathamiho enufwanya biyala, kuddiwale, we kuri weeka. Anamwinjhi enoofwanyiwa makathamiho mamodhave. Yehova anakala oohagalalene mwaha wilibihera wawo. Akala ohufiyedha peeno omulabelaga Yehova, eyo enoniha wihina duliye anureeliha ni anuvaha kopolo dhinuhalela. * (Fil. 4:6, 7; 1 Ped. 5:7) Naari akala makathamiho awo, enowoniwa obe kinoniwa naathu amodha, mbwenye nivano onomulabela Yehova, kuwanganyedhe wi oliye anohagalala vanlubale mwaha wilibihera wawo.

21. Ethu baani nnafunihu wanda nnikavihero na Yehova?

²¹ Ethu enanihagalasa fuunona wihina vihikala ohiyana othamaga wa mapoka ni othamaga asorihe Pawulo. Mwaha othamaga wa malabo akale, amwakela padamari akala muthu mmodha baahi. Mbwenye othamaga asorihe Pawulo, athu atene enaavilele enere omwakela padamari eegumi yohimala. (João 3:16) Othamaga wa mapoka athu atene yavolowamo yakala agumive, yaahikala agumi, kiyaddodda ethu. Mbwenye othamaga wa makiristawu, agumi kaninjhivale, naari dhigarive ndo, atene ninnana ovilela. (2 Cor. 4:16) Nnikavihero na Yehova atene nnere ofiya omakuthulo!