1-2. Ethu baani yamuthukulele Yesu osoriha madhu eri va João 4:35, 36?

MUDHIDHI Yesu agali muulenddoni, ahifwanya mundda. Podi wera dhari mundda dha cevada dhikiti. (João 4:3-6) Dhoohala mweri minayi wihina ofiye mudhidhi wohadda mundda ndho. Vano Yesu osoriha ethu yotikiniha wera: ‘Muvenyihe mento enyu musugwe mundda, dhojha dhihimala wotowa wihina dhihaddiwe.’ (Omwileri João 4:35, 36.) Ki oliye, afuna awoge ddi?

² Podi wera Yesu kaagana ohadda webaribari, mbwenye aagana wasayela athu. Kubuwela ethu erilena oliye ahinathi wasoriha madhu ala. Naari ajudewu ehapwathaga asamaritano, Yesu ahimulaleya muhiyana oosamariya​—teto muhiyana oyo, ahivuruwana muthengadha! Oliye nusoriha madhu owi ‘mundda dhihimala wotowa wihina dhihaddiwe’, asamaritano atene yamwiwale muhiyana ole aalaleyiwe ni Yesu, obajha osusedha vaali Yesu wihina esuzihiwe. (João 4:9, 39-42) Wodhela yolebela ela, nihikalawu livuru nnasoriha negi: “Efunelo yinlubale yonvuruwana Yesu yanna athu oosamariya, yahitonyihedha wi aliwa yakala ninga mudda wowotowa onahowela ohaddiwa.”

3. Akala onaasugwa athu ninga Yesu, dhego baani dhapama dhinerihe we wakala mmalaleyelo?

³ Ki athu enakala murudda wawo? Onawona ninga mundda wootowile onahowela ohaddiwa? Akala onaasugwa ndo, onere werana dhego tharu: Yobajha, onere okanna munigwa wowalaleya mowaguva. Mudhidhi wohadda kunalegela ni kunaredhiwana. Yanabili, wawonaga athu erumedhaga muthenga dhixa dhomwene, onerege mathabwa ohagalala. Bibliya onosoriha egi: ‘Wafiya mudhidhi wohadda athu enohagalala.’ (Isa. 9:3) Yanatharu, onerege omusugwa kadda muthu nuupama ofiyedha omoona ninga namahara apama a Yesu. Mwaha wa yeyo wakala mmalaleyelo onerege orugunusedha olaleya wawo ni efunelo ya mwanamurala.

4. Dhithu baani nnafunihu osuza wodhela murumiwi Pawulo?

 ⁴ Podi wera anamahara a Yesu yowasugwa asamaritano ninga athu ehinna ejhehedhelo. Mbwenye mubuwelo wa Yesu kuwari ndo. Oliye aasugwa asamaritano ninga anamahara enna ejhehedhelo. Nihiyoya, athu enakala murudda wehu, naasugwege ninga anamahara a Kiristu. Murumiwi Pawulo, tajhiha yofwanelela ohara. Ethu baani nnahudherihu nuuliye? Muwari mwa yohudhera ela, nnere woona (1) Pawulo aalaleyaga, aanda addi onona dhorumedha dhaathu, (2) woona dhego dhafunesesa athu, ni (3) omusugwa kadda muthu ni monelo wapama.

5. Olaleya musinagoga, yali ethu yamukweyela Pawulo, mwahaya bwaddi?

⁵ Malabo owinjhiva, Pawulo alaleya musinagoga dhajudewu. Motajhiha, nufiya o Tesalonika, ‘a Sabado araru, Pawulo ahipendda Dholebela [najudewu].’ (Atos 17:1, 2) Podi wera olaleya musinagoga, yali ethu yamukweyela Pawulo, mwaha oliye aaleliwe ninga mujudewu. (Atos 26:4, 5) Oliye ooligana ni ajudewu, bumwahaya kayamurusa olaleya nuuliba murima.​—Fil. 3:4, 5.

6. Pawulo nufiya murudda wo Atenas, athu aafwanyiliye yahiyanne addi naale amusinagoga?

⁶ Pawulo nuumala wathawa amwiddani, oliye ahifiya elabo yo Bereya murudda wo Atenas. ‘Malabo amatene oliye oopendda najudewu musinagoga vamodha ni athu amodha yamwebedha Mulugu.’ (Atos 17:17) Mbwenye vaadhowiliye olaleya vinavira anamwinjhi, oliye ahithapanya naathu oohiyana naale amusinagoga. Oliye ahigumana naathu yanna filosofiya mmuruni, amodha kiyali ajudewu, teto, atene yonelamo muselo dhalaleya Pawulo ninga “dhohudhiha dhixa.” Aliwa yahifiyedha owoga ni Pawulo wera: ‘Dhego dhinasoriha we, iyo kannawedha wonelamo, nnafuna onaddele wihina nonelemo’ pama.​—Atos 17:18-20.

7. Ninga anawogela Atos 17:22, 23, Pawulo arugunusedha addi makalelo aye olaleya?

⁷ Omwileri Atos 17:22, 23. Pawulo nuufiya elabo yo Atenas, athu yahali ajudewu, kaalaleya ninga aalaleyiye ajudewu musinagoga. Podi wera Pawulo ahifiyedha wikoha: ‘Akudda atenas enarumedha ddi?’ Oliye ahisugwa pamadhene dhithu dhaali nikome na luwani yele, ofiyedha woona dhilemelelo ni makalelo ewa oowebedha. Voharela, Pawulo ahisayela makalelo ooliganiha webedha wewa ni ebaribari ya mBibliyani. Mulobwana, anonile muselu dha mBibliyani, ohusoriha egi: “Ninga mukristawu oojudeya; Pawulo ahinona wi agerego yaali akiristawu, kiyamulabela Mulugu ‘ebaribari.’ Naari dhigarive ndo, oliye ahitonyihedha wi mwebaribarene, Mulugu amulaleya oliye, kahiyo Mulugu ahinoniwe ni akudda  Atenas.” Pawulo aali ootapuwene wihina arugunusedhe obe aakakanihe makalelo aye oolaleya. Oliye ahiwoga naakudda Atenas wi muthenga alaleya oliye, wadhela wa Mulugu yole yamulabela aliwa wula ehimunonne pama. Amodha naari ehinone dholebela, Pawulo kaaselele walaleya. Oliye awoona athu yayo ninga mundda wowotowa onahowela ohaddiwa. Eyo yonvaha kopolo Pawulo wihina aalaleyaga muthenga dhapama, arugunusedhege makalelo aye oolaleya.

8. a) Onawedhe addi onona ndhe dhinarumedha athu a murudda wawo b) Ki vano, muthu awoga wi gihikanna gereja yaga, onamwakule avi?

⁸ Ninga pawulo, osugwerege pama. Osayele makalelo owoona dhilemelelo dhaathu a muradda wawo. Motajhiha, muthu onathapanyiwena mmalaleyelo, vaade vaye obe mukaroni mwaye, mwihikala dhego dha mugereja? Ki ndina naye, dhowara dhaye obe makalelo aye owoga, enootonyihedha gereja yaye? Ki vano, muthu awoga wi gihikana gereja yaga, onaakule avi? Pioneira avayeka anithaniwa Flutura, malabwene anfwanya muthu onasoriha ndo, onomwakula ayi: “Miyo kagidhele wuwaddihedha wihina orumedhe dhilemelelo dhaaga, mbwenye gidhele wihina githapanye ni we wodhela muselu ola . . . ”

9. Muselu baani dhinoniwe, dhiri dhofwanelela onathapanyedha naale enna gereja yewa?

⁹ Muselu baani dhinafwanelela othapanya ni muthu onna gereja yaye? Osayele muselu ononiwe naathu owinjhiva. Podi wera muthu onathapanyiwena onomwebedha Mulugu mmodha baahi, annarumedha wi Yesu duule olevile egumaye wi aavulusa athu atene, obe onorumedha wi elabo ela yabure enere omala ovanene. Olabihedhe ele enarumedha we ni ele oliye anarumedhiye. Wathapanyaga ni muthu anna gereja yaye, omoonihe muthenga dhiri mBibliani ni makalelo oothukula murima wihina oliye afunelegemove wiwa muselu dhimodha dhiri mBibliani.

10. Ethu baani enahoweleya werana, ki mwahaya Bwaadi?

¹⁰ Kahiyo malabo matene athu enarumedhiwa ele gereja yewa enasuzihiwa. Mwaha wa yeyo, wamala onona gereja ya muthu onathapanyiyena, osayele onona mwebaribareene ddiniyani enarumedhiye. Pioneiro avayeka a elabo yo Austaraliya anithaniwa David, ohusoriha egi: “Peeno, anamwinjhi enataganyihedha egereja ni filosofia.” Murogola Donalta a elabo yo Albaniya, ohuwoga egi: “Athu amodha enowoga wi ehikanna egereja, teto anya-anya, enosoriha yegi kaginarumedha wi Mulugu ohukalawo.” Ddibila ori misiyonariyu a elabo yo Arijentina, annoona wi ehikalawo athu enarumedha muselu wodhela amulugu araru (Trindade), teto anya-anya, kinarumedha wi Babi, mwana ni muzimu wotxena, di Mulugu mmodha baahi. Misiyonariyu ola ohusorihave egi: “Onona eyo, enokavihera osayela muselu ni makalelo okweya dhinaamuddiginye murima muthu anna gereja yaye.” Mowindala,  osayele onona ele athu mwebaribareene enarumedhiwa. Werana ndo, onere ‘wiiweriha mwa dhego dhatedhene wa athu atene.’​—1 Cor. 9:19-23.

11. Ninga munawogela Atos 14:14-17, o Listra Pawulo alaleya ni makalelo baani?

¹¹ Omwileri Atos 14:14-17. Pawulo oosayela onona dhego dhafunesesa athu, era ndo, aalaleyaga oorugunusedha makalelo aye oolaleya ni ethu yeyo. Motajhiha, athu eelabo yo Listra, amodha yahinona dholebela, amodha newene kiyanonne. Mwaha wa yeyo, Pawulo oowalabihedha madhu ookweya wonelamo. Oliye aawogaga, ooladdani ni dhojha dhammuddani vamodha ni enonelo enahoweleya muthu egi ajhevo egumi. Pawulo ohulabihedha madhu ookweya ni dholaddaniha dhaakavihera athu wonelamo mowaguva.

12. We onawedhe addi onona ele enafunesesa athu wihina orugunusedhena makalelo awo oolaleya?

¹² Osayele onona dhego dhinaadhivela athu amurudda wawo, vano walaleyaga ononege makalelo owirugunudhedha ni dhego dhendho. Ki wafiya vade vamwanamurala, onande addi onona dhego dhinamudhivela? Okale oosugwera. Werana ndo, onere wona ethu enerana mwanamurala. Podi wera oliye onamurepela jardim, obe onileri livuru, onawomihedha karo yaye obe naari onerana ethu-sithu. Dhenyeya, ononamo avi othapanyedha ethu yeyo anerana mwanamurala? (João 4:7) Ohiya eyeneve, guwo dhiwanre muthu, podi wutonyihedha dhego dhinadhiveliwa muthu yoyo​—motajhiha, guwoove bahi, we podi onona winadhela muthu yoyo, mabasa anapara oliye obe nikuro animelela oliye. Ddibila onithaniwa Gustavo, ohusoriha egi: “Miyo gahibajha othapanya ni muzombwe a yaka 19. Oliye ahiwara kamizeti yanna fotu yamaliba wiba oovuwa. Miyo omukoha wodhela kamizeti ele, vano oliye wera ginafuna gikale ninga oliye. Othapanya wule, wahimuthukulela oomuhudhera Bibliya, peeno oliye onokosa epaddi ya nikuru nehu.”

13. Onande addi ovaha ohudhera wa Bibliya ni makalelo ooddiginya murima wa muthu yoyo?

¹³ Wanvahaga muthu ohudhera wa Bibliya, werena yeyo ni makalelo oomuthukula murima. Omukavihere wonelamo opama winaadhena  ohudhera wa Bibliya mwigumini mwaye. (João 4:13-15) Motajhiha murogola anithaniwa Poppy, alaleyaga, ahinfwanya muhiyana dhaala, vano muhiyana ole omwithana wihina avolowe. Poppy nuuvolowa mba, omoona dipoloma ooniversidade agabadihedhiwe vasirini, nuwindo oliye awoga wodhela ohudhiha wapama. Vano Poppy wera, nihiyowa nnowahudhia athu ni porogarama ehu oomuhudhiha Bibliya vamodha ni muthugumano dhehu. Muhiyana ole orumedha ohudhera, sumana yele odhowa omuthugumanoni, nuuvira mudhidhi vag’ono, odhowa omusonkanoni wa nlabo nimoha. Nuuvira yaka modha, oliye obaddiziwa. Wikohe: “Athu ginawaredhelimi mmalaleyelo enafunesesa ddi? Ginaande addi wavaha ohudhera wa Bibliya ni makalelo ooddiginya murima dhewa?”

14. Wamusuzihaga muthu Bibliya, onande addi orugunusedha osuziha wawo ni dhego woniliwe nnamasuza?

¹⁴ Wamala ofugulela ohudhera wa Bibliya ni muthu, wegeredhege pamadhene epaddi dhamutene. Kahiyo olamusa efunelo ni dhego dhinamukathamiha namasuza. Wegeredhaga pama kaadda epaddi, osakule pama dholebela dhinafuniwe wileri nuliye, vidiyu onafuniwe omoniha, ni yoladdaniha onafuniwe olabihedha. Ohiya eyeneve, wabihege wikoha: Ethu baani enaamuhagalase namasuza ola? Ethu baani enamuddiginye murima? (Pro. 16:23) Elabo yo Albaniya, ahikalawo piyonera ithaniwa Flora. Oliye ahikanna namasuza asoriha ni kopolo egi: “Miyo kaginarumedha muselu onahudhiha nyu wodhela ovenyihiwa wanokwa.” Flora kaamuwaddihedhe wi arumedhe naari oliye ahonelagamo. Flora ohusoriha egi: “Miyo gahonelamo wi yohoweleya oliye aabihe omunona Mulugu yoyo apaganyile wavenyiha anokwa.” Nafiya nlabo nosuza nuliye, Flora oothabwesa owoga enonelo, odhivela ni kopolo dha Mulugu Yehova. Mwaha wa yeyo, namasuza aye ahibajha okanna nroromelo wihina winere okalawo ovenyihiwa wanokwa. Teto, peeno namasuza aye, Namona a Yehova ooviheya.

15. Ninga munawogela Atos 17:16-18, elabo yo Atenas olaleya wamukathamiha addi Pawulo, ki mwahaya bwaddi adhe ahiselelege walaleya athu?

¹⁵ Omwileri Atos 17:16-18. Atenas, yali luwani mwadhanle mararuwo, filozofiya, webedha wowoota ni dhikwamuthu. Naari egarive ndo, murumiwi Pawulo, podi akudda atenas emukulaga, oliye kaaselele walaleya muthenga dhoomwene. Pawulo kaadduwanle dhampadduwele mwigumini mwaye. Pawulo ahinathi okala mukiristawu, “owaharahara makiristawu ni oomunyemula Mulugu vanlubale”, mbwenye oliye ahifiyedha osaddula egumaye,vano okala mukiristawu eebaribari. (1 Tim. 1:13) Pawulo owoona opama wanna akudda atenas ninga Yesu voniliye opama mwigumini mwaye mudhidhi yole valiye namaharahara. Monelo ola wapama, wahinvaha mareeliho.​—Atos 9:13-15; 17:34.

16-17. Ethu baani enoniha wi athu amalogo matene, podi okala anamahara a Yesu? Owoge yotajhiha.

¹⁶ Nsaka noobajha, athu amalogo matene yahisakula omuhara Yesu. Pawulo nuwalebela karta makiristawu a luwani yo korintiyu, mukartanimwa ahisoriha wi mmulogoni mwewa, mwihikala athu yali apanga obe yathukunle mweddelo wa mararuwo. Vasogolova wera: ‘Ebaribarene amodha wa nyu yari ndo, mbwenye ehisuwiwa.’ (1 Cor. 6:9-11) Hee, akudda korintiyu ale, yahisaddula egumi yewa, vano okala anamahara. Yahaakale ninga ari we mudhi yole, ogahiwedha wona opama wewa?

¹⁷ Peeno athu owinjhiva, enofuna osaddula egumi yewa wihina ekale anamahara a Yesu. Motajhiha, Piyonera anithaniwa Yukina anakala elabo yo Australiya, ohusuza wi athu amalogo matene podi orumedha muthenga dhinasoriha Bibliya. Nlabo nimodha, Yukina agari eskiritoriyu enaakavihera athu ofwanya nyumba dhowalugari, ahimona namwali aanna sungu dha tatuwage mmaningoni wula agawanre guwo dhinddimuwa. Yukina ohusoriha egi: “Mudhidhi  yole, miyo wambela owaga meeka mmurimani: ‘Gimuwogena obe naari?’ Vano miyo osakula oremula muselu wihina githapanye nuliye. Nuwindo, miyo woona wi oliye oovaha thima muselu dhiri mBibliyani. Teto, miyo wona sungu dhimodha dhaanniyena, dhari dholebela dha Salmos!” Mohilegela namwali ole, obajha omusuza Bibliya ni oya omutugumanoni. *

18. Mwahaya bwaddi nihaatorihaga athu?

¹⁸ Monelo wa Yesu, bowi, mundda dhihimala wotowa wihina dhihaddiwe. Ki Yesu agari elabo yavati, oojhehera wi athu owinjhiva enere okala anamahara aye? Naari. Dholebela dhahiwoga wi athu van’gono baakanne nroromelo ni Yesu. (João 12:37, 38) Yesu ahikanna kopolo yonona ele eri mmurimani mwa muthu. (Mat. 9:4) Mowindo, oliye oowasugwa ni owalaleya athu atene yaanna nroromelo nuuliye. Yesu ahikanna Kopolo yowona murima wamuthu, mbwenye kaamusugwa muthu nuubure. Iyo nimutajhihege Yesu, nasugwege athu atene nuupama! Ohiya otoriha murudda obe watoriha anamurala a murudda, osayelege onona opama enna athu yayo. Misiyonariyu anithaniwa Marc, anakala elabo yo Burkina Faso, ohusoriha egi: “Athu ginawonimi wi enere wunuwelavo omuzimoni, teto biyayo enasukuma osuza. Mwenye ale ginawonimi wi osuza kinaadhowena vasogolo, biyayo enunnuwelavo omuzimuni. Vano ginowonelamo wi yapamaya, fuhiya muzimu wa Yehova wi oneddihege.”

19. Nawonege avi athu a murudda wehu?

¹⁹ Podi wera murudda wawo kawo, athu owinjhiva eri ninga mundda omanle wotowa onahowela ohaddiwa. Mbwenye wubuwele ele Yesu owogiliye ni anamahara aye. Mundda dhihimala wotowa, obe ohufiya mudhidhi wi dhihaddiwe. Athu podi osadula egumi, vano ekale anamahara a Kiristu. Yehova anowona anamahara ala ninga “dhego dhathima.” (Ageu 2:7) Akala we onawona athu a murudda wawo ninga Yehova ni Yesu, we onere ofuna onona dhego dhinaakathamiha ni dhego dhinafunesesa aliwa. Onere wasugwa ninga addibila ni arogola apama, ohiya wasugwa ninga amalabo.