1-2. a) Ewunisi aari aani, ki makathamiho baani afwanyiwiye ninga mayi? b) Katapulelamo fotu yavakapani.

 BIBLIYA kanawoga makalelo Timotiyu abaddiziwiye. Mbwenye kannanganyedha wihina Timotiyu abaddiziwaga labo nenne, amaye yahigalala vanlubale. (Pro. 23:25) Kamubuwele Ewunisi mento aye egaali ohagalalave mwaha wodhiveliwa, wula Timotiyu agaari mmanjheni ahalaga vang’no wihina abaddiziwe. Oliye anoteya wula Loyidi avwaye Timotiyu egamukubarele. Mitori dha Ewunisi kadhinamaala Timotiyu abwinihiwaga mmanjheni. Vano oliye atavuliwaga mmanjheni kovaaye egaali emwerumweruve, oliye kannanda omala ndo ahimorihile mitori. Ewunisi ahikanna makathamiho owinjhivene, mbwenye oliye ahanda omuhudhiha mwanaye omudhivela Yehova ni Yesu Kiristu. Makathamiho baani aagonjhihiye?

² Timotiyu abaliwe murala wogaweya wodhela webedha. Ababe yaali muGerego, mbwenye amaye ni avwaye yaari Majudewu. (At. 16:1) Podi wera Timotiyu agaari mwana muzombwene, Ewunisi ni Loyidi yaari​—makiristawu. Mbwenye baabe Timotiyu kaari mukiristawu. Ki Timotiyu asakule ddiniyani? Oliye ahimala wunnuwa ni oofwanelela werana yothoma yaye. Nerege oliye eere osakula ohara gereja yaababe? Eere ohalanave aharaga mweddelo wa Majudewu? Obe eere orumedha okala namahara a Yesu?

3. Mowiwanana ni Provérbios 1:8, 9, Yehova anakala aavi awonaga amayi yilibiheraga wihina yahudhihe aniwa ebaribari?

³ Mowindala amayi eri makiristawu peeno, enodhivela vanlubale murala dhewa. Ethu enunleliwa fuwakavihera aniwa  okanna wandana ni Yehova. Mwebaribarene Yehova onovaha thima makalelo yala owilibihera. (Omwileri Provérbios 1:8, 9.) Yehova anowaakavihera amayi owinjhiva wahudhiha aniwa omulabela ni omudhivela oliye.

4. Peeno, amayi amodha enafwanyiwa makathamiho baani?

⁴ Mbwenye podi wera malabo mamodha amayi enowikoha akala aniwa enere osakula omulabela Yehova ninga Timotiyu. Mwaha wi ababi ehinona makathamiho baani enafwanya aniwa elabo ela ya Saddana. (1 Ped. 5:8) Ohiya eyo, amayi amodha enaalela aniwa yekiwa obe ni mamuniwa ahinamulabela Yehova. Motajhiha, murogola anithaniwa Christine * ohusoriha egi: Mamunaga aari babi apama ni ahikanna odhivela ni murala wehu, mbwenye oliye kaafuna wihina anihu ekale Anamona a Yehova. Dhihivira yaka dhowinjhivadhene gunlagana akala nlabo nimodha anihu enere okala Anamona a Yehova.

5. Musolo ola nnahudhere ddi?

⁵ Akala we ori mayi, we podi wakavihera anawo omudhivela ni omulabela Yehova mowindala ninga Ewunisi. Musolo ola, nnere ohudhera makalelo amayi enafuniwa omutajhiha Ewunisi, wodhela wahudhiha aniwa ni makalelo ewa owoga ni dhowera dhewa. Ohiya eyo, nnere woona makalelo Yehova anafuniye wakavihera.

6. Mowiwanana ni 2 Timóteo 3:14, 15, yamukavihere Timotiyu okala mukiristawu yaari ddi?

⁶ Timotiyu agaari mwaana, Ewunisi ahilibihera vanlubale wihina amuhudhihe “dholebela dhotaleleya” mowiwanana ni mweddelo wa Majudewu. Hee enonelo anniyena kiyathabwile winjhiva mwaha wi kanonne wodhela Yesu. Naarive dhigari ndo, dhithu Timotiyu ahudheriye muwari mwa dholebela, dhaakale dhithu dhaamuthukulele wihina oliye akale mukiristawu. Mwebaribarene oliye agahikala mukiristawu? Timotiyu ahimala wunnuwa wihina asakule akala oliye agahikala mukiristawu. Mwebaribarene, Timotiyu ‘ahidahinyiwa murima’ wihina akanne nroromelo ni Yesu, mwaha wa ndhe Ewunisi amuhudhihiye. (Omwileri 2 Timóteo 3:14, 15.) Podi wera Ewunisi ahihagalala vanlubale, mwaha wowanda omuhudhiha mwanaye naarive afwanyiwaga makathamiho. Ndina nna Ewunisi, nnadhela wa madhu enatapulela otomola murima. Mwebaribarene oliye aherana mowiwanana ni ndina naaye.

7. Ewunisi eere ddi wihina amukavihere Timotiyu amala obaddiziwa?

⁷ Mwebaribarene obaddiziwa wa Timotiyu wahidhana ohagalala mwigumini mwaaye. Naarive dhigari ndo, Ewunisi oomuthuwathuwela mwanaye ni owikoha ubuwelaga: Oliye analabihedhe avi egumaye? Anere wanda wasakula akwaye ehinamuthukulele werana dhithu dhabure? Anere odhowa ahudhere sidadi yo Atena, vano arumedhege dhinahudhiha mafilozofu yahili makiristawu? Obe anere ononga mudhidhaye ni kopolo dhaye ezombwaye athamagihaga korowa? Ewunisi kamuthomele mwanaye dhithu afunegiye werana, ethu ahoweliye fumukavihera. kito vano Ewunisi amukavihere avi mwanaye? Oliye erege olaba nuviheya, wihina amuhudhihe mwanaye omudhivela Yehova, ni onona omutamalela Mulugu ni Yesu dhithu dheriliwana wihina ekavihere murala wewa. Ababi eri makiristawu enaahudhiha aniwa yekiwa, makathamiho ala kinafwanya aliweneve baahi. Naarive ababi aabilene egaali makiristawu, podi okala yorusa odahinya murima  wa aniwa wihina naaliwaya yambele omulabela Yehova. Ababi enahudhera ddi ni yotajhiha ya Ewunisi?

8. Mayi anaamukavihere addi mamune ari mukiristawu wahudhiha aniwa wodhela Yehova?

⁸ Wahudhihege anawo Bibliya. Yehova anafuna wihina ahiyana ooteliwa yakaviherege amamuniwa eli makiristawu wahudhiha aniwa ebaribari. Makalelo owerana ndo, fukavihera webedha weemudhi. Mwakanna ohudhera weemudhi mweregena ni murima wamutene. Ohiya eyo, osayelege makalelo wihina labo nenne nikale labo noohagalasa vanlubale. We podi omukavihera mamuno omukunga porogarama ohudhera. Ohiya eyo, podi wera yere okala yapama omukavihera mwanawo mmodha anna yaka yowonelamo dhithudha, ohudhera livuru ofwanye egumi yohagalasa ya malabo amatene! Akala siyeyo, we ni mamuno podi origanela wihina mwahudhihe aninyu.

9. Mayi anaahudhiha anaaye yeka mwibaribarini, anafwanye wuuvi nikavihero?

⁹ Amayi amodha, enowahudhiha aniwa yekiwa mwaha mamuniwa ohikala mukiristawu. Akala siyeyo enupadduwela, kuthabwege othuwathuwa. Yehova anere wukavihera. Oparihedhege mabasa dhipano dhomuhudherana Bibliya nikuru nehu ninnihuna wihina wakaviherena anawo omuhudhera Bibliya. Ohiya eyo, we podi wakohedha ababi ekovelele makalelo enaparihedhiwa mabasa dhipano ndha yakanna webedha weemudhi. * (Pro. 11:14) Olobelege wa Yehova wihina ukavihere onona pama murima wa anawo, ekalelo yewa ni mubuwelo wewa. (Pro. 20:5) Malabo mamodha nikoho nookweya ninga: ‘Makathamiho baani enuufwanya oskola?’ Podi othukulela wihina mukanne othapanya wapama.

10. Dhithu dhimodha onahoweliwe werana wihina wakavihere anawo ohudhera wodhela Yehova sivi?

¹⁰ Opathege kadda ofuru onakanniwena wihina wahudhihe anawo wodhela Yehova. Owogege wodhela Yehova wa dhatedhene dhapama oliye uwereliye. (Deut. 6:6, 7; Isa. 63:7) Eyo sathima thabwa-thabwa akala ehikalavo ethu enukathamiha wahudhiha anawo Bibliya. Christine asorihiwe mundduli anihina: “Ofuru gakannimina wowahudhiha anaaga kawali munene, bumwahaya gopatha mudhidhi-bumudhidhi gakannimina gaathukula wihina needde ni moddo obe needdihe mwanddeya. Gapathesa mudhidhi yole wihina gahudhihe wodhela dhopaddusa dha Yehova, ni wodhela dhithu dhomuzimuni. Anaaga nuumala wunnuwa, miyo wakongomedha wihina emuhudherege Bibliya yekiwa.” Ethu emodha yathima fuuwoga opama onna nikuru na Yehova ni addibila ammulogoni. Kujhege mudhidhi wawo, wawoga obure anamaholela mulogo. Dhithu dhatedhene onawogiwe wodhela anamaholela mulogo, sidhendho dhinathukulele anawo akala enere osayela nikavihero mmadani mwewa obe naari, yahowelaga.

11. Mowiwanana ni Tiago 3:18, ekalele ddi yathima okanna murenddele vamuralani?

¹¹ Okale muthu amurenddele vamuralani vawo. Dhenyeya omonihege mamuno ni anawo wihina onowadhivela vanlubale. Omuwogegena mamuno mwamakalelo apama ni nriho, teto wahudhihege anawo werana emodhave. Weragana ndala, vamuralani vawo vinere okala murenddele ni enere okweya wahudhiha anawo wodhela Yehova. (Omwileri Tiago 3:18.) Kasugwa yotajhiha ya ddibila anithaniwa Jozsef analaba oRomeniya ninga piyonero avayeka. Ababe yaherana dhatedhene  enandiwa wihina oliye, amaye ni addibile yahande omulabela Yehova. Jozsef onosoriha egi: “Amama yowilibihera vanlubale wihina vamuralani vehu vikale murenddele. Kadda labo apapa yathabwiwa okathamiha dhithudha amama yera othabwiha opama wewa. Amama nuwambela onoona wihina kananda waariha ni wawiwelela apapa, aliwa othapanya ni iyo wodhela yolebela ya Efésios 6:1-3. Nuwindo, aliwa yowoga dhikalelo dhapama yanna apapa ni yoonikavihera onona mwahaya bwaddi egahoweleya waariha ni wadhivela. Mwaha wayeyo, iyo nowanda okanna murenddele vamuralani.

12. Mowiwanana ni 2 Timóteo 1:5, yotajhiha ya Ewunisi yamukavihere avi Timotiyu?

¹² Omwileri 2 Timóteo 1:5. Ewunisi ahinvaha yotajhiha yapama Timotiyu. Oliye ahimuhudhiha Timotiyu wihina nroromelo neebaribari thinne nnathanana ni dhithu nnerihuna. (Tia. 2:26) Mwebaribarene dhowera dha amaye Timotiyu dhothanana ni odhivela woliba anniyena ni Yehova. Oliye owanda wawoona amaye wihina enahagalala mwaha womulabela Yehova. Dhowera dha amaye Timotiyu Ewunisi, dhamukavihere addi? Mowindala ninga murumiwi Pawulo awogiliye, Timotiyu ahikanna nroromelo nooliba ninga naamaye. Nno kanaali nroromelo noliganyedha. Timotiyu owoona yotajhiha ya amaye, bumwahaya adhe othomege werana emodhave. Nimakalelo mamodhave peeno, amayi owinjhiva enaakavihera aniwa ohudhera wodhela Yehova ni yotajhiha yewa baahi. (1 Ped. 3:1, 2) We podi werana emodhave. Ni makalelo baani?

13. Mwahaya bwaddi mayi agafwanelela opweha mburo wobajha wandana anniyena ni Yehova?

¹³ Opwehe mburo wobajha wandana wawo ni Yehova. (Deut. 6:5, 6) Wihina wasapele anawo epaddi yomwilini, enohowela osayela mudhidhi, korowa, mudhidhi wowithuwa vang’ono ni dhithu dhimodha. Mbwenye naarive weregena dhatedhene dhendha, enohoweleya wajaga mudhidhi wihina olibihe wandana onniwena ni Yehova. Malabo amatene olobelege wa Yehova, okanne ohudhera wavayekiwa wa Bibliya ni kujhombege omutugumanoni. Weragana ndala, onere wanda olibiha wandana wawo ni Yehova ni onere okala yotajhiha yapama ya murala wawo ni athu amodha.

14-15. Ohudhere ddi ni yotajhiha ya Leanne, Mariya ni Juwawu?

¹⁴ Osugwe yotajhiha yaazombwe amodha ehudhere omudhivela Yehova ni omuroromela oliye baahi wodhela ohara yotajhiha ya amayiwa. Leanne mwana Christine anihina: “Apapa yakala vaade iyo kananda omuhudhera Bibliya. Mbwenye amama yaari ororomeleya ni kiyajhomba omutugumanoni. Iyo kananonne dhithu yowinjhiva wodhela Bibliya. Naarive dhigarive ndo, iyo nahikanna nroromelo nooliba mwaha yotajhiha ya amama. Iyo nahinona wihina Anamona a Yehova binahudhiha ebaribari, naarive nihinambele woona mutugumano.”

¹⁵ Murogola dhaala anithaniwa Mariya, ababe kiyadhiveliwa yoonaga murala wamutene odhowaga omutugumanoni. Oliye anihina: “Mama murogola ooliba murima gihinamonigimi. Miyo ngaali mwaana, malabo mamodha kaganda dhithu dhimodha mwaha wa manyazo ni woova makalelo athu enafuniwa owoga. Mbwenye nuuliba murima wamama, woona wihina aliwa yompweha Yehova mburo woobajha mwigumini mwewa, ogikavihera ohawoova athu.” Juwawu anna ababe yakoddiha owoga dhithu dhomuzimuni vamuralani vaye, anihina: “Ethu emodha  gihinadduwalimi, sowihina amama yowerana dhatedhene enandiwa wihina yahagalase apapa. Mbwenye ohiya omulabela Yehova newene kiyaafuna.”

16. Athu amodha podi ohudhera ddi ni yotajhiha ya amayi eri makiristawu?

¹⁶ Ohuddiwale wihina yotajhiha ya amawo, podi wadahinya murima athu amodha. Nimakalelo baani? Kasugwa yotajhiha ya Ewunisi yamudahinyiliwa murima murumiwi Pawulo. Oliye ahileba egi: ‘Ginowubuwela nroromelo nawo nihinna ogwalagwambi, nroromelo nenno nambele ni . . . Ewunisi.’ (2 Tim. 1:5) Murumiwi Pawulo andile addi woona nroromelo nooliba anna Ewunisi? Podi wera onile olenddo waye wobajha ninga misiyonariyu vamunoniliye Loyidi ni Ewunisi Olistara. Podi wera duliyene aakavihere ahiyana ala okala makiristawu. (At. 14:4-18) Kubuwela pama muselu ola, dhigamanle yaka 15 Pawulo fimulebeliye Timotiyu. Oliye owubuwelave nroromelo nooliba na Ewunisi ni amoona Ewunisi ninga yotajhiha enafwanelela ohariwa! Yotajhiha ya Ewunisi yahalibiha vanlubale arumiwi ni makiristawu owinjhiva a nsaka nenne. Akala we onalela anawo weka, obe mamuno kahiyo mukiristawu, onaaddiwale wihina yotajhiha yawo ya nroromelo enowalibiha addibila owinjhiva.

17. Woona wihina mwanawo kanapwatha dhithu dhomuzimuni, enahoweleya were ddi?

¹⁷ Ki to akala onowilibihera omuhudhiha mwanawo dhithu dhomuzimuni, mbwenye oliye kanapwatha? Kuddiwale wihina omuhudhiha mwaana podi omala yakadhene. Ninga  enoniha fotu ela, we waala thanga kunakanna ebaribari akala onere okala muthanko onavahege dhowima. We kunonne akala muthanko ole onere wunnuwa obe naari. Naarive dhigarive ndo, we onerege ohelave manjhe muthanko ole wula weragana epaddi yawo wihina muthanko ole wunnuwe. (Mar. 4:26-29) Ni makalelo mamodhave, mayi podi wambela wanganyedha akala wilibihera waye onowakavihera anaaye obe naari. We kunonne akala mwanawo anere omulabela Yehova obe naari. Mbwenye we weragana epaddi yawo wihina omukavihere mwanawo ohudhera ebaribari, onere wakavihera epaddi yewa yomuzimuni.—Pro. 22:6.

18. Yehova anaakavihere addi anawo wunnuwelavo epaddi yomuzimuni?

¹⁸ Yehova uhakavihera azombwe owinjhiva okanna wandana nuliye. (Sal. 22:9, 10) Akala mwanawo onofuna, Yehova podi omukavihera epaddi yomuzimuni. (1 Cor. 3:6, 7) Naarive woonaga wihina mwanawo kanapwatha dhithu dhomuzimuni, Yehova kanadha ahiya omudhivela. (Sal. 11:4) Mwana efunelo vang’no anniyena yomulabela Yehova ni ilibiheraga mowiwanana ni ‘efunelo anniyena’, Yehova anere okala nuliye ni anere omutapulela nlada wihina amukavihere. (At 13:48; 2 Cró. 16:9) Ohiya eyo, podi wukavihera we owoga ethu enamudahinye murima mudhidhi yole wofwanelela — mwanawo ahoweliye madhu ninga yaale. (Pro. 15:23) Yehova podi omulabihedha ddibila obe murogola ammulogoni wihina amukavihere mwanawo. Naarive osogolowa anawo yunnuwe, Yehova podi weeriha wihina aliwa yubuwele ethu-sithu waahudhihiwe egaali ahima. (João 14:26) Mwebaribarene Yehova anere wureeliha vanlubale wahiselela wahudhiha anawo ni madhu awo ni dhowera dhawo.

19. Mwahaya bwaddi kinafwanelela wanganyedha wihina Yehova onowudhivela ni onowurumedha?

¹⁹ Odhivela anna Yehova ni we kawinadhela mwaha dhosakula dha mwanawo. Oliye onowudhivela mwaha we onomudhivela. Akala we walenle anawo weka, Yehova onopaganya wihina anere okala Babi anawo ni anere wubarela. (Sal. 68:5) Kinandeya onona akala anaawo enerege omulabela Yehova obe naari. Mbwenye wadhowagave omuroromelagave Yehova ni weragana ndhe onandiwe, mwebaribarene Yehova anere wurumedha mmadani mwaaye.