1. Enaanivahe ohagalala webaribari ddiniyani?

 YEHOVA anafuna wihina iyo nihagalalege. Iyo nihinona eyo mwaha ohagalala winookosa epaddi wa dhowima dhomuzimuni. (Gál. 5:22) Iyo nihinona wihina ovaha winothabwa ohagalasa opitha ovahiwa, bumwahaya iyo nnohagalala neragana ele nnandihu mmalaleyelo ni naakaviheraga addibilihu.—At. 20:35.

2-3. a) Mowiwanana ni Gálatas 6:4 dhithu baani biili dhinanikavihere okannave ohagalala naaparaga mabasa a Yehova? b) Muwari mwa musolo ola nnahudhere ddi?

² Murumiwi Pawulo ohusoriha wi dhihikalawo dhithu biili dhinanikavihera okannave ohagalala. Gálatas 6:4. (Omwileri.) Ethu yobajha, fukanna yoluba yowerana yele nnandihu naaparaga mabasa a Yehova. Neragana yele nnandihu, iyo nnerege ohagalala. (Mat. 22:36-38) Yanabili, fuhiliganiha naathu amodha. Nimutamalelege Yehova mwaha wa dhithu nnandihu opara. Kanipwathege makalelo eri egumi yehu, makalelo nixagihiwihu obe dhithu nnonilihu mwigumini mwehu. Podi wera dhatedhene ninnihuna mukono Yehova anivahiliye. Mudhidhi mmodhave, akala ddibila ohaanona mabasa oolaleya onikwaranya iyo, ni iyowa nihagalalege wihina ddibila ola anna olabihedha mukono wa Yehova wihina anvuwihe. Kahiyo wihina anafuna ithithimihena mwinnya. Nubuwela ndo, nnere orabela mubuwelo wowiliganiha, mbwenye nnerege waja makalelo ohudhera nuliye.

³ Muwari mwa musolo ola, nnere ohudhera ethu nnafunihu wera akala malabo mamodha nnokwerebeya naheragana dhithu dhatedhene nnafunihu wihina nimparele Yehova. Ohiya eyo nnere woona makalelo ooparihedha mabasa mukono Yehova anivahiliye naaparaga mabasa aye, ni makalelo yotajhiha yaathu amodha enanikaviheriwa.

4. Dhinakwerebeyiha athu amodha ddiniyani? Osorihe yotajhiha.

⁴ Amodha wa iyo, podi okala yorusa orumedha wihina kinanda omparela mabasa Yehova ninga mwafuneliwa mwaha woredda obe wowuluvala. Siyeyo empadduwele Karol. Wahifiya mudhidhi anniyena oneeti wolaba murudda wahoweleya anamalaleya oOmwene. Mudhidhi yola ahikanna ofuru wowahudhiha athu Bibliya owakwana 35 ni ahakavihera athu opeleka egumiwa mmadani mwa Yehova ni obaddiziwa. Oliye ohumparela mabasa owinjhiva Yehova! Mbwenye vasogolova, okala muredda vano kuhandaga ovenyavo vaade. Oliye anihina: “Miyo gihinona wihina mwaha oreddaga miyo kaginande wapara mabasa ninga athu amodha.” “Naarive dhigaari ndo, kaginiwoona wihina kagiri mukiristawu apama ninga athu amodha. Eyo ethu gunlelesimi wihina gerena ni ginafunimi werana, enogirusa werana dhatedhene dhendha.” Karol anafuna erena ele anandiye wihina amparele mabasa Yehova. Mubuwelo ola bwapama! Iyo podi okanna ebaribari wihina Yehova anovaha thima dhatedhene oliye anandiye.

5. a) Nakala ookwerebeyene mwaha wa makathamiho ninnihuna mwigumini, ethu baani nihinafwanelelihu oddiwala? b) Mowiwanana ni fotu ndha, ddibila ola andile addi omparela mabasa Yehova mwigumini mwaaye?

⁵ Akala malabo mamodha onokwerebeya mwaha kunanda omparela mabasa Yehova ninga wafuneliwe, karajhiha wikoha: ‘Yehova anajhehera wihina miyo gere ddi?’ Yehova anafuna wihina werena — yele onandiwe. Kubuwela yopadduwa ela: Murogola anna yaka 80 anokwerebeya mwaha kannanda omparela mabasa Yehova ninga afuneliye mowindala ninga aganna yaka 40. Naarive ilibiheraga, oliye wubuwela wi Yehova kanahagalala nuliye, nerege eyo ebaribari? Kubuwelavo pama. Akala murogola ola ohilibihera aganna yaka 40, naarive agakwanihe yaka 80 anna wilibiherave. Eyo enatapulela wihina ofiyera peeno anna waparave mabasa a Yehova. Naambela wubuwela wihina mabasa nnamparelihu Yehova kinakwana, nnofwanelela nihidduwale wihina di Yehova anasakula akala mabasa nnamparelihu bapama obe naari. Nilibiheraga vanlubale nnere okanna ebaribari wihina Yehova “anohagalala!”—Omusugwe Mateus 25:20-23.

6. Nihudhere ddi ni yotajhiha ya murogola Mariya?

⁶ Enokweya ohagalala naathabwaga osugwa ele nnandihu opara ohiya osugwaga ndhe nahinandihu opara. Kasugwa empadduwele murogola anithaniwa Mariya, oliye ohukanna oredda ohunamwenya wapara mabasa oolaleya. Omambelelowene womukuula vanlubale ni iwoona wihina kanna mabasa. Nuwindo omubuwela murogola dhaala ammulogoni ari muredda vanlubale, vano oliye othoma omukavihera. Mariya onosoriha egi: “Gahiwegeredha wihina gilaleye vamodha nuliye wodhela telefoni ni makarta. Kada labo galabimi vamodha nuliye, gahogolowelaga vaade gakala oohagalalene mwaha wonona wihina gihimukavihera ddibilaga.” Ni iyowa nnere ohagalala vanlubale naathabwaga osugwera ele nnadhihu opara ohiya wunlagana ele nahinandihu opara. We podi wawenjhedhedha mabasaawo wodhela ohudhera ethu-sithu wihina wapare mabasa a Yehova.

7. Yolaga baani murumiwi Peduru avahiliye makiristawu?

⁷ Karta noobajha na murumiwi Peduru ahakongomedha addibila oparihedha mabasa dhithu dhinonniwa, wihina yalibihena athu amodha. Peduru anihina: ‘Woona wi kadda muthu ohakela gari, aparelege mabasa athu amodha ninga murumiwi oopama  wohinifwanelela wa Mulugu.’ (1 Ped. 4:10) Iyo kanihiye werana dhithu nnonnihu noovaga wihina athu amodha enere okwerebeya obe enerege onikalela nrima. Yereya ndo, kanneregena ele nnandihu wihina napare mabasa a Yehova.

8. Mowiwanana ni 1 Coríntios 4:6, 7, mwahaya bwaddi iyo kannafwanelela withukulana dhithu nnandihu?

⁸ Ebaribari wihina nnofwanelela olabihedha dhithu nnonnihu wihina napare mabasa a Yehova, mbwenye kanithukulegena. (Omwileri 1 Coríntios 4:6, 7.) Podi wera kinanirusa ofugula ohudhera ni muthu. Mwebaribarene kahiyo yabure olabihedha enonelo eyo, mbwenye ethu emodha fufugula ohudhera wa Bibliya baahi. Ethu emodha fuwithukulana! Wubuwele ogafugunle ohudhera wa Bibliya mmalaleyelo, vano murima wambela wuthamaga wihina wawaddele addibila munalaleyinyuna nikuru nimodha. Vano waagumana naliwa, murogola mmodha wambela wuwaddelani wihina ohanda ohiya revista ni mwanamurala mmalaleyelo. Oliye ahile revista nimodha baahi. Mbwenye we ofugunle ohudhera wa Bibliya. Onere ddi? We ohunona wi addibila enere olibihiwa vanlubale mwaha ethu weriliwena, mbwenye yapama yakale ohawaddela, wawaddele labo nimodha mwaha podi ononga ohagalala wa murogola ole andile ohiya revista nimodha baahi. Werana ndo, wakale opama wawo. Mbwenye we kuwahiye ofugula ohudhera wa Bibliya mwaha wayeyo, mwaha we kinurusa ofugula ohudhera wa Bibliya. Mowindo kuhiye olabihedha — enonelo yawo!

9. Nlabihedhege avi dhithu nnandihu opara?

⁹ Kanidduwale wihina dhithu nnandihu opara nivahiwe ni Mulugu. Bumwahaya nilabihedhege wihina nalibihena addibilihu ohiya withukulagana. (Fil. 2:3) Nalabihedhaga kopolo dhehu ni dhithu nnandihu opara wihina nimulabele Yehova, kinanituwege ethu yonihagalasa. Kahiyo wihina nnafuna nikale athimaya wapitha athu amodhaya, mbwenye nnalabihedha dhithu nnonnihu wihina ninvuwihe Yehova.

10. Ehikalele ddi yapama wiliganiha naathu amodha?

¹⁰ Nahikala pasope, iyo podi omothela vamurakoni vowiliganiha dhithu nnonnihu opara ni dhithu athu amodhaya ehinandiwa opara. Motajhiha, podi wera ohukalawo ddibila anonne owoga pama mwaha wavathaddo. Eyo sithu anandiye opara. Mbwenye nasugwa pama murima waye, podi wera ddibila oyo onomutoriha ddibila mmodhaya mwaha wokanna makathamiho wowoga mwaha wavathaddo.  Naarive oliye ahinonne owoga mwaha dhavathaddo, ddibila oyo ohunona wawakela aleddo, onowahudhiha pama anaaye teto doviheya mmalaleyelo. Iyo natamalelege addibila wihina elabihedhe dhithu enandiwa opara wihina emulabelege Yehova ni yakaviheraga athu amodha!

11. Mwahaya bwaddi nigahowela omutajhiha Yesu?

¹¹ Nihinona wi kannahowela wiliganiha ni athu amodha, mbwenye iyo podi ohudhera vanlubale ni addibila amodha teto kaniddiwaale wihina yotajhiha enlubale di Yesu. Naarive Yesu agaari ologomana, iyo podi ohudhera ni yotajhiha yaye. Iyo podi ohudhera vanlubale ni dhikalelo dhaye ni mweddelo waye. (1 Ped. 2:21) Nilibiheraga vanlubale wihina nimutajhihe Yesu, nnere okala makiristawu apama teto nnere owomihedha yele nnandihu mmalaleyelo.

12-13. Nnahudhera ddi ni yotajhiha ya mwene Davidi?

¹² MBibliyani dhihikalamo dhotajhiha dhaalobwana ni ahiyana oororomeleya nnafwanelelihu otajhihaga. (Heb. 6:12). Omubuwele mwene Davidi, Yehova owoga wodhela mwene Davidi egi: ‘Gihinfwanya Davidi mwaana Jese, yoyo anahagalasa murima waaga.’ Ninga Bibliya mmodhaya anawogiye ‘duliyene anerena efunelo yaaga.’ Davidi kaari muthu ologomana, oliye aherana dhothega dhinlubale. Naarive dhigari ndo, oliye yotajhiha yapama wa iyo, mwahaya bwaddi? Mwahaya bowi oliye nusumululiwa kasayenle makalelo owisinjhedha. Oliye ahirumedha yolaga avahiwiye, nuwindo othwaruwa ni murima wamutene mwaha yothega eriliyena. Bumwahaya Yehova adhe amulevelelege.—Sal. 51:3, 4, 10-12.

¹³ Nahudheraga yotajhiha ya Davidi waweregena makoho ala: Galagiwaga ginakala avi? Ginowoona dhothega dhaaga obe ginowaja makalelo ovita? Ginorumedha wihina gihithega, obe ginawinkedha amodha? Ginowilibihera wihina gaherena yothega emodhave? We podi wawubuwela makoho ninga yala, wahudheraga adhaari amodha oororomeleya. Aliwa yahifwanyiwa makathamiho ninga yala enagifwanya? Dhikalelo baani yanniwana ginafwanelelimi watajhiha? Ginande avi okanna dhikalelo dholigana ni mudhaari ola a Yehova?

14. Nnahudhera ddi naaddibila ammulogoni mwehu?

¹⁴ Iyo podi ohudhera vanlubale ni dhotajhiha dha addibilihu ammulogoni mwehu. Naarive ekale azombwe obe ekale anakalaba.  Motajhiha, kamubuwele ddibila ammulogoni mwawo anafwanyiwa yoweha. Podi wera onoharahariwa naakwaye oskola, naamudhaye obe ohukanna oredda onamukathamiha. Dhikalelo baani anna ddibila ola dhinafuniwe omutajhiha? Mwebaribarene, dhotajhiha dha addibila ni arogola podi onikavihera vanlubale. Iyo podi oparihedha mabasa nnahudherihu naliwa wihina naagonjhihe makathamiho enanifwanya. Mwebaribarene nnohagalala vanlubale mwaha okanna addibila ni arogola ala ninga yotajhiha — ya nroromelo nnafwanelelihu ohara!—Heb. 13:7; Tia. 1:2, 3.

15. Yolaga baani avahile murumiwi Pawulo enanikavihere omulabela Yehova nuuhagalala?

¹⁵ Kadda muthu wahiyo, anofwanelela werana yele anandiye wihina mmulogoni mwehu mukale wiwanana ni murenddele. Iyo podi wubuwela yotajhiha ya makiristawu oobajha. Aatene yala yahikanna dhithu yanoniliwa ni mutholo dhohiyana-iyana. (1 Cor. 12:4, 7-11) Aliwa kayapokihana ofiyedha otatamula ohiwanana. Pawulo ahimukongomedha kadda ddibila ammulogoni, werana dhatedhene ‘wihina elibihe nnigo na Kiristu.’ Oliye walebela akudda Eefeso egihina: ‘Kadda yaano yalabaga pama, mwiili onowivenyihedha ni onowunnuwa nuudhivela.’ (Ef 4:1-3, 11, 12, 16) Makiristawu yahanre yolaga ya murumiwi Pawulo, yahidhana murenddele ni wiwanana mmulogoni — makiristawu a peeno onowerana emodhave.

16. Ethu baani nihinafwanelihu odduwala? (Hebreus 6:10)

¹⁶ Kuwiliganihege ni athu amodha. Ohiya eyo, wilibiherege wihina omutajhihe Yesu ni adhaari amodha oororomeleya a Yehova, naarive egaali akale obe a mudhidhi yola wa peeno. Wilibiherege teto okanne ebaribari wihina Yehova ‘dororomeleya, bumwahaya kadha aaddiwala mabasa enyu.’ (Omwileri Hebreus 6:10.) Omulabelege Yehova nuroromeleya, ohanganyedhaga wihina nnohagalasa murima waye neragana yele nnandihu.