OTHUWATHUWA eri ninga ethu enaninyemela mmurimani. (Pro. 12:25) Wathuwa-thuwa we onakala ndala? Wowubuwela wi kunande ogonjhiha? Akala eyo ehupadduwela, kuddiwale wi kuri weka. Amodhaya enakala oogomeene, owuukuweene mwaha wa makathamiho ohiyana-iyana. Motajhiha, amodhaya enohowela omusamalela mmudhiwa ari muredda, amodhaya ehimuyelela muthu yamudhiveliwa muukwani teto amodhaya ehipadduweliwa ngovi. Wegi wande ogonjhiha othuwathuwa, enahoweleya were ddi? *

Ohudhera yotajhiha ya mwene Davidi, podi onikavihera ogonjhiha othuwathuwa. Oliye ahifwanyiwa makathamiho oorusa ofiyera egumaye okala vangovini. (1 Sam. 17:34, 35; 18:10, 11) Ethu baani emukavihere owanana othuwathuwa? Nnaamutajhihe avi?

Davidi ahifwanyiwa makathamiho ohiyana-iyana mudhidhi mmodhave. Kasugwa empadduwele Davidi mudhidhi amuthawaga mwene Sawuli. Nuuwana koddo ni amwiddani aye, Davidi ni alobwana aye ohogolowela oddammwani wewa. Nufiya wule, aliwa otakaleliwa vanlubale mwaha wawoona amwiddani ewa egamanle wawiyedha dhithu dhewa, opaha nyumba dhewa teto mwaha wathukula amwariwa vamodha naaniwa. Makalelo baani aari Davidi? ‘Davidi naalobwana aye wambela wunla ekuwihaga ofiyera vamelo olalavo.’ Ethu yathabwile ompa mbani Davidi sowi, alobwana ale aaroromeliye ‘yagana ompwesa ni mabwe.’ (1 Sam. 30:1-6) Davidi ahifwanyiwa makathamiho mararu manlubale mudhidhi mmodhave: emudhaye yaari vangovini, owanganyedha akala akwaye aaroromeliye kiyapangane wihina empe, teto mwene Sawuli oomusayela. Onowanda wubuwela makathamiho yanfwanya Davidi!

Ki Davidi enre ddi? Ahubuwele dila biili, Davidi ‘olibiha nroromelo naaye anniyena ni Yehova.’ Enrena ni makalelo baani? Davidi ahikanna elemelelo yoolobela wa Yehova amulobaga nikavihero teto oopenddesa makalelo Yehova amukaviheriye malabo amundduli. (1 Sam. 17:37; Sal. 18:2, 6) Davidi ahinona wihina ohowela osayela dhoholela dha Yehova, eyo yere omukavihera Davidi onona ethu afuniye wera. Nuwakela dhoholela dha Yehova, Davidi kalegele. Bumwahaya oliye vamodha ni alobwanaye edhe yawakelege mareeliho a Yehova. Aliwa yahanda wawaka dhego yathukunliwa, amwariwa vamodha naaniwa. (1 Sam. 30:7-9, 18, 19) Dhithu baani tharu Davidi eriliyena? Olobela wa Yehova aloba nikavihero, opendda makalelo Yehova amukaviheriye malabo amundduli ni aherana ethu-siithu mowiwanana ni efunelo ya Yehova. Nnaamutajhihe avi Davidi? Nnere wawoona makalelo mararu.

1. Olobele. Malabo mamodha nathuwa-thuwa nlobele wa Yehova nlobaga nikavihero ni thotho. Olobela wa Yehova nihithamagaga nimwaddelaga dhatedhene dhinanipadduwela, enere onikavihera okala oopwaseyene. Akala eyo kinenyeya, iyo podi olobela vati-vati mowaguva. Labo-thi-labo nnalobihu nikavihero na Yehova, nnowoniha wi nnomuroromela ninga Davidi awogile egi: ‘Yehova thi nibwe naaga, ni mburo waaga wothawela, ni duliye anagivulusa. Mulugu aaga thi nibwe naaga, ginathawelimiwo.’ (Sal. 18:2) Nerege olobela winotxova? Piyonera anithaniwa Kahlia ohuwoga egi: “Gaalobela ginokanna murenddele.  Nlobelo nnogikavihera wubuwela ninga Yehova ni omuroromela oliye.” Mohanganyedha, nlobelo mukono wa Yehova nnanikavihera wihina niwanena othuwathuwa.

2. Opendde. Onowubuwela mudhidhi wafwanyiwiwe makathamiho ni wanda ogonjhiha mwaha okaviheriwa ni Yehova? Napendda makalelo Yehova aakaviheriye adharaaye amundduli ni makalelo anikaviheriye, nnokanna murenddele webaribari teto nroromelo nehu ni Yehova nnowenjhedhedheya. (Sal. 18:17-19) Namaholela mulogo anithaniwa Joshua ohuwoga egi: “Dhowakula dha malobelo aaga Yehova agaakuliye gihilebela vapapelini. Eyo enogikavihera wubuwela. Ginowubuwela mudhidhi galombimi ethu gahowelimi vano Yehova anoogivaha.” Mwebaribarene, nubuwela dila ngasi Yehova anereliye malabo a mundduli, nnowanda owanana mubuwelo onanihiya oothuwathuwene.

3. Werena ethu-sithu. Ohunathi othoma werana ethu-sithu, onohowela osayela dhoholela dha Mulugu mBibliyani. (Sal. 19:7, 11) Athu owinjhiva ehonelamo wi yasayela yolebela ya mBibliyani, enokweya ohudheravo ethu ni oparihedha mabasa mwigumini mwewa. Namaholela Mulogo anithaniwa Jarrod anihina: “Osanyiha yolebela enogikavihera wonelamo, onona versikulu ele enawogiwa ni woonelamo ethu baani Yehova anagihudhihiye. Eyo enogikavihera okoya mmurimani ndhe ginahudherimi ni oparihedha mabasa mowiwanana ni yoholela yele gifwanyilimi.” Nasayela dhoholela dha Yehova mBibliyani ni naparihedha mabasa mwigumini mwehu, enokweya owanana othuwathuwa.

Davidi ahinona wihina egi ande ogonjhiha koddo awaniyena wodhela othuwathuwa, ohowela nikavihero na Yehova. Oliye oovaha thima ele Yehova amwereliye, bumwahaya adhe erege: ‘Ni kopolo dha Mulugu, miyo podi ogwelela txinga. Mulugu eebaribari dinagivaha kopolo.’ (Sal. 18:29, 32) Malabo mamodha nnowagumanana makathamiho manlubale enarusa wagonjhiha ninga txinga, mbwenye nnikavihero na Yehova iyo podi ogwelela txinga. Wihina niwanena othuwathuwa, nnohowela olobela wa Yehova nlobaga nikavihero, opendda makalelo Yehova anikaviheriye ni werana ethu-siithu mowiwanana ni dhoholela anivahiliye. Nerana ndo, kananganyedhe wihina Yehova anere onivaha kopolo ni thotho nnahowelihu wihina niwanena othuwathuwa!