Makoho aanamileri
Akala mukiristawu anoomwalana ni mwariye vahili yothega Bibliya anarumeedhiye wihina emwalane vano anooteliwa ni muthu mmodha, mulogo onofwanelela okanne moonelo baani ni matelo oobajha ni matelo ala maxa?
Yereya ndo, mulogo yawonege matelo ale akale wihina ehikwela, matelo ale maxa bihanle vamentoni va Guvernu. Wihina noonelemo pama muselu ola, kabeni noone ethu awogile Yesu wodhela muselu woomwalana ni wotelana ni muthu mmodha.
Va Mateus 19:9, Yesu ohutapulelavo wihina oliwo muladdu mmodha baahi onamuthukulela muthu omwalana ni mwariye obe mamune. Oliye wera: ‘Ginowuwaddelani wihina yole anamwalane ni mwariye wula ahiraruwile, vano anodhowa omutela mmodha, ohukuma mba.’ Nimubuwelo yola, nnohudheravo dhithu biili, (1) Bibliya anenya muthu omwalana ni mamune obe mwariye yapadduwa mararuwo (2) mulobwana anamwalana ni mwariye vahili yothega Bibliya anarumeedhiye vano anodhowa omutela mwihiyana mmodha, ohukuma mba. *
Nerege madhu a Yesu enatapulela wihina mulobwana anakuma mba vano anoomwalana ni mwariye, Bibliya onowenya wihina amutele mwihiyana mmodha? Kahiyo yeyo. Akala mulobwana ohukuma mba, wula mwariye ahinna muladdu, oliye podi othoma akala anere omulevelela mamune obe naari. Mwariye athoma ohumulevelela aliwa emwalana, aabilene ehitapuwa podi kadda muthu oteliwa obe otela ni muthu mmodha, yamala omulebiha porosesu oomwalana.
Mbwenye mwariye ola ahinna muladdu afuna podi omulevelela mamune wihina matelo ewa edhowegeve vasogolo. Kito akala naarive mwariye agamulevelele mamune oliye onomwihiya? Woona wihina mwariye ahenya omulevelela mamune ni ahirumedha wihina matelo edhowegeve vasogolo, yereya ndo Bibliya anihina mulobwana oyo kanna ofuru womutela mwihiyana mmodha. Oliye athoma omutela mwihiyana mmodha wula ahinna ofuru yowerana yeyo, anna okumave mba dila biili. Akala yereye ndo, anamaholela mulogo enofwanelela ekunge komisawu exa yotoriha wihina egomihe muladdu yoyo.—1 Cor. 5:1, 2; 6:9, 10.
Kivano, akala mulobwana anootela dila biili wula Bibliya ahinvahe ofuru womutela mwihiyana mmodha, mulogo yawonege aavi matelo ale akele ni matelo ala maxa? Matelo ale akale ehikalawove mowiwanana ni Bibliya? Mwihiyana ole ahinna muladdu podi omulevelelave obe omukoodda ole aari mamune? Mulogo yawonege matelo ale maxa ninga enooraruwa?
Yaka dha mundduli, iyo noonelamo wihina akala mwihiyana ole ahinna muladdu ohukalawo teto kateliwe newene kakumile mba, matelo ala maxa yooniwa ninga mararuwo. Yesu kamusorihe mwihiyana ahinna muladdu awogaga muselu ola woomwalana ni wotela dila biili. Ohiya eyo, oliye erile akala mulobwana anoomwalana ni mwariye vahili muladdu Bibliya anarumeedhiye wihina emwalane, vano anoodhowa omutela mwihiyana mmodha, ohukuma mba. Yereya ndo, omwalana ni matelo ala maxa enowabibiddela matetelo ale akale.
‘Anamwalane ni mwariye wula ahiraruwile, vano anodhowa omutela mmodha, ohukuma mba.’—Mat. 19:9
Mulobwana amwalana ni mwariye vano amutela mwihiyana mmodha, kinenyeya ole aali mwariye ahinna muladdu omulevelela obe omukodda. Vowindo, oliye kanafwanelela othuwathuwa akala anere omulevelela obe omukodda ole aari mamune. Ohiya eyo, makalelo mulogo onawoniwa matelo ale maxa kunadhela mwaha wa mwihiyana ole ahinna muladdu okwa, oteliwa dila biili obe okuma mba. *
Yotajhiha nonilihu mundduli, mulobwana dikumile mba vano matelo omwadheya. Mbwenye akala mamune kakumile mba naarive dhigari ndo anoomwalana ni anodhowa omutela mwihiyana mmodha? Akala mamune kararuwile ehinathi omwalana, mbwenye erilena ndo egavinre malabwene ni omagomiherowa omutela mwihiyana mmodha, naarive mwariye akale agamulevelele? Dila dhatedhene nda, omwalana ni matelo ala maxa enooniwa ninga mararuwo ni winothukulela wamariha matelo akale. Matelo maxa kinakwele vamentoni va Guvernu. A Sentinela a 1.º a Fevereiro a 1980, epaddi 32 ohutapulela muselu ola ni makalelo ala: “Vano oliye aalebiha matelo maxa, kinenyeya wabibiddela matelo ala ni ahogolowela ninga ariye kale. Matelo akale ehikwela mwaha woomwalana, okuma mba ni wawerana matelo maxa.”
Mubuwelo ola nsaddulihu kinatapulela wihina mukiristawu ahiye wawona matelo ninga ootaleleya, obe okuma mba ninga ethu ehiri yothega enlubale. Mulobwana amwalana ni mwariye vahili muladdu Bibliya anarumeedhiye wihina emwalane ni anootela dila biili wula ahinna ofuru wowerana ndo, anamaholela mulogo enofwanelela ekunge komisawu yotoriha edhowe yawoge muladdu yoyo wokuma mba. (Akala mwariye muxa mukiristawu, nuliyeya anowogiwa muladdu mwaha wokuma mba.) Naarive matelo maxa yahoniwaga ninga mararuwo, mulobwana ola kafwanelele wakela mutholo dhavayekiwa mmulogoni yaka dhowinjhivadhene obe ofiyedha addibila ammulogoni wambela omuriha dila biili. Ahinambele wakela mutholo, anamaholela mulogo enofwanelela woona ekalelo ya mwariye akale ni ya anaaye, akala yahisukumiwa ni mulobwana ola akumile mba. — Mal. 2:14-16.
Nahaddiwalaga makathamiho enatotela omwalana ni matelo maxa yahiniwanana ni Bibliya, makiristawu enofwanelela okanna thotho ni omutajhiha Yehova woodhela wawona matelo ninga ootaleleya.—Ecl. 5:4, 5; Heb. 13:4.
^ paragarafu 2 Wihina muselu ola okweye woonelamo, nnerege mulobwana dikumile mba, mbwenye mwariye kanna muladdu. Mowindala, yolebela ela ya Marcos 10:11, 12 enononelihamo pamadhene wihina madhu a Yesu awogiliye va Mateus 19:9, enamwagana mulobwana ni mwihiyana.
^ paragarafu 1 Ala makalelo maxa owonelamo mubuwelo ole wakale wowoga wi matelo maxa yoniwege ninga okuma mba ofiyedha mwihiyana ole ahinna muladdu oteliwa dila biili, okuma mba obe okwa.
