1. Addibila owinjhiva eneera ddi wihina emulabele Yehova ni kopolo dhewa dhatedhene?

WOONA wi elabo ela enna ofiya omakuthulo, nihikanna mabasa owinjhiva owapara. (Mat. 24:14; Luc. 10:2; 1 Ped. 5:2) Iyo atene efunelo yehu fumulabela Yehova ni kopolo dhehu dhatedhene. Athu owinjhiva enna wilibihera wapara mabasa oolaleya. Amodha enafuniwa fuukala piyonero, mbwenye amodhaya enagana ninga elabege oBeteli obe emagege nyumba dhomwene. Addibila owinjhiva enna wilibihera wihina ekale adhaari ookavihera obe anamaholela mulogo. (1 Tim. 3:1, 8) Yehova onohagalala vanlubale awonaga adharaaye yivahedhaga wihina emulabele mburo munahoweleya. — Sal. 110:3; Isa. 6:8.

2. Dhahakwanelaga dholuba nafunesihu, enereya ddi ni iyo?

² Malabo mamodha dholuba dhehu kadhinakwanela mowaguva ninga nafunelihu. Mwaha wa yeyo, iyo podi wukuwa. Obe ohukanna yaka dhinahoweleya wihina naakele mutholo naganesihu obe makathamiho mamodha ehinanenya wihina nerena nafunihu. (Pro. 13:12) Siyeyo yereye ni Melissa. * Ethu athabwesiye wunlela fulaba Obeteli ni odhowa Eskola yanamalaleya oOmwene. Oliye onosoriha egi: “Vano yaka dhaaga kadhinagenya wihina gilebe petisawu. Mwigumini mwaaga oneti ola ginoona wi gihiyelela. Malabo mamodha guubuwela, ginowukuwa.”

3. Wihina amodha yakele mutholo enahowela yiwegeredhe epaddi baani?

³ Mbwenye azombwe podi wera makathamiho enafwanya kahiyo  yala. Azombwe amodha bathotho, enopwasedha yaafunaga othoma ethu ni ehikanna kopolo dhomulabelana Yehova. Mbwenye enarusa fuunona ojheha, ohukanna marulu ni okanna nriho. Wilibihera wihina okanne dhikalelo ndha dhinahoweleya, mutholo onafuniwe dhinadhege yekiwa ni dhinafiye mudhidhi wahajheheriwe. Kasugwa yereye ni Nick. Nuwakwaniha yaka 20, oliye wukuwa vanlubale mwaha wohuthomiwa ninga mudhaari ookavihera. Oliye wera: “Miyo gera akala ethu yabure gerilimmina.” Mbwenye Nick kaselele. Oliye wilibiheragave weddiha pama mutholo anniyena. Peeno analaba nnikuru na Komisawu ya Ofiliyale.

4. Muwari mwa yohudhera ela, nnaasuze ddi?

⁴ Oli owukuwene mwaha wohakwaneliha dholuba dhawo dhomuzimuni? Kamwaddele Yehova dhinavira mmuruni mwawo. (Sal. 37:5-7) Ohiya eyo kukanne manyazo waloba dholaga addibila owithwelavo omuzimuni wihina yuwaddele makalelo owawenjhedhedha mabasa a Yehova. Windo, wilibihere wihina oparihedhe mabasa ndhe enawogiwa. Weragana ndo, podi wera onere wakela mutholo wafuniwe obe ethu-sithu waganesiwe. Mbwenye ninga yereye ni Melissa nimusorihilihu mundduli, mutholo onafuniwe peeno podi ohakela. Yereya ndo, onaawedhe addi ohuyelela ohagalala? Wihina naakule nikoho nna, yohudhera ela nnere owogamo (1) ethu enanivaha ohagalala, (2) nnenjhedhedhe addi ohagalala ni (3) dholuba baani nnahowelihu okanna wihina ohagalala wehu werege othabwa.

5. Wihina nikale athu ohagalala, enohoweleya nilibiherege ddi? (Eclesiastes 6:9)

⁵ Eclesiastes 6:9 onosoriha ethu baani enanivaha ohagalala. (Omwileri.) Muthu ‘anahagalala niile mento enooniwa’ anovaha thima nde anniyena, obe neere anohagalala ni dhithu dhinapadduwa mudhidhi yole. Wa epaddi emodha, ole anahara efunelo yaye anasayela dhithu ahinandiye okanna. Vala nnahudheravo ddi? Nnahudhera wihina akala nnofuna ohagalala nilibiherege niile ninnihuna obe ndhe nnakwanihihu.

6. Nladdaniho baani asorihe Yesu nnafunihu woona, ki nnahudheravo ddi?

⁶ Enowenyeya ohagalala nindhe ninnihuna? Athu amodha kinarumedha, mwaha athu owinjhiva enahagalala yakanna dhithu dhixa. Hee enowenyeya. Ninga nonilihu kanthabwege orumedha ‘mentwihu enooniwa’ iyo podi ohagalala niile ninnihuna mudhidhi yole. Mwahaya bwaddi nigasoriha ndala. Wihina nifwanye yowakulaya nnafuna nipwasedhe nladdaniho asorihe Yesu wodhela talentu nnafwanyeya va Mateus 25:14-30. Nnere woona ethu nnahudherihu ni nladdaniho nna wodhela okanna ohagalala ni wenjhedhedha ohagalala ni mareeliho ninnihuna peeno.

7. Kawogamo mogwaddela nladdaniho nna asorihe Yesu wodhela talentu.

⁷ Muwari mwa nladdaniho nna na talentu Yesu wera mulobwana dhaala afuna eedde olenddo. Vano ahinathi omaruwa, oliye wawithana adharaaye, vowindo kadda muthu omwihiyedha talentu ngasi-ngasi wihina yaweddihe malondda. * Oliye ahinona wi kadda mudhaari ohukanna thotho dhohiyana nimukwaye. Bumwahaya adhe anvahege mudhaari obajha talentu tanu, anabili talentu bili, mudhaari oogomihera talentu modha. Adhaari  abili nuthukula talentu ndhe olabana nuuviheya, mbwenye mudhaari oogomihera nuthukula omalana xaanga. Mwaha wa yeyo nabuye omwigara.

8. Mwahaya bwaddi mudhaari oobajha asorihiwe muwari mwa nladdaniho nna adhe ahagalalege?

⁸ Podi wera mudhaari obajha ahihagalala nuwakela talentu tanu wihina aweddihena malondda. Talentu yaali korowa yamuthengo wowinjhiva, yatapulela wihina nabuye omuroromela vanlubale mudharaaye. Ki wera mudhaari anabili? Nuliyeya agahitakaleliwa mwaha ohakela talentu moligana ni mudhaari oobajha. Mbwenye yereye siyeyo?

9. Ethu baani Yesu ahiwogiliye wodhela mudhaari anabili? (Mateus 25:22, 23)

⁹ Omwileri Mateus 25:22, 23. Yesu kawogile egi mudhaari anabili ahitakaleliwa mwaha wowakela talentu bili baahi. Newene Yesu kawogile wi mudhaari ole anna wunliha dhammurimani egi: “Kaginarumedha wihina givahiwe dhenda baahi. Miyo, gihanona waweddiha malondda ninga mudhaari ole avahiwe talentu tanu. Woona wi nabuyaga kanagiroromela, ginere othukula talentu dhaaga bili givuhelele, vano gidhowe geddelege dhithu ginafunimi.”

10. Mudhaari anabili erilena ddi talentu akenliye?

¹⁰ Vowindala ninga mudhaari obajha, mudhaari anabili aheddiha pama mutholo avahiwiye ni ahimulabela nabwiye ni kopolo dhaye dhatedhene. Mwaha wolaba ni oviheya oliye owedha okanna talentu dhimodha bili vano okala nayi. Nabuye ohagalala vanlubale mwaha wilibihera waye. Mbwenye oliye keere ohagalalave baahi ni mabasa aapariliye, ohiya eyo ahimuthomela mutholo dhimodha.

11. Onawedhe addi okanna ohagalala winlubale?

 ¹¹ Mutholo bumutholo nnakelihu munikuruni na Yehova vano nnolaba ni murimihu watene, nnere okanna ohagalala winlubale. Wilibihere ni murimawo watene wapara mabasa ni weregena dhatedhene onawedhiwe waaparaga mabasa ammulogoni. (Atos 18:5; Heb. 10:24, 25) Wahinadhowe omutugumanoni orajhihege wegeredha pama dhowakula dhawo wihina ovahege dhowakula dhodahinya murima. Wakanna epaddi mutugumano dhavaari vasumana, weregena ni murimawo watene. Akala anamaholela mulogo ehuloba wihina wapare mabasa-bimabasa mmulogoni, ofiyege mutaneene, teto okale oororomeleya. Kuwubuwelege ninga onanongela mudhidhi wawo ebewene mutholo oneddihiwe. Opathege mudhidhi ninga yoyo wihina owomihedhe dhikalelo dhawo. Wilibiheraga pamadhene, onere wunnuwelavo mohulegela epaddawo yomuzimuni, teto ohagalala wawo winerege othabwa. (Gál. 6:4) Ohiya eyo, akwawo yaakela mutholo wafunesiiwe kunatakaleliwe mbwenye onerege ohagalala naliwa. — Rom. 12:15; Gál. 5:26.

12. Wihina Melissa ni Nick ekanne ohagalala yerile ddi?

¹² Onomubuwela murogola Melissa aganesa olaba oBeteli ni odhowa Eskola yanamalaleya oOmwene? Naarive dholuba dhaye dhahereyile, oliye onosoriha egi: “Miyo ginowilibihera vanlubale wapara mabasa aaga oopiyonera, ohiya eyo ginowilibihera wihina gaxixe makalelo amatene oolaleya eliwo. Siyeyo enathabwa ogihagalasa.” Ki Nick ahinathomiwe okala mudhaari ookavihera aali aavi? Oliye anihina: “Miyo gowilibihera wapara mabasa gannimina — ninga olaleya ni ovaha dhowakula dhaaga mmutugumanoni. Vano ngalebile petisawu wihina gilabege oBeteli, evirile yaka modha baahi miyo withaniwa.”

13. Mareeliho baani onawakeliwe weddihaga ni murima watene mutholo onniwena ovanene? (Eclesiastes 2:24)

¹³ Akala onoweddiha ni murima wawo watene mutholo onniwena ovanene, nerege eyo enatapulela wihina onere wakela mutholo dhimodha osogolo? Podi wera onere wakela, ninga yereye ni Nick. Naarive emuthu yawo eliganege ninga ya Melissa, we podi okanna ohagalala mwaha wilibihera wawo. (Omwileri Eclesiastes 2:24.) Ohagalala wawo kunadha omala mwaha wonona wi Nabwiya Yesu Kiristu onohagalala ni mabasa onapariwe.

14. Nerege ethu yabure wilibihera okanna dholuba dhomuzimuni? Kawogamo.

¹⁴ Akala ninna wilibihera omulabela Yehova ovanene, eyo enatapulela wihina kanilibiherege wapara mabasa mamodha a Yehova? Kahi yeyo! Nilibiheregeve wihina nikanne dholuba dhimodha dhomuzimuni. Dholuba nda dhinere onikavihera wapara pama mabasa oolaleya, oohudhiha ni wakavihera addibila yanihowelaga. Mbwenye wihina dholuba nda dhereye nnofwanelela nikanne thotho ni naanone manddile ehu, ohiya withuwathuwelaga nannya mbwenye nathuwathuwelege wakavihera athu amodha. — Pro. 11:2; Atos 20:35.

15. Dholuba baani dhinenjhedhedhe ohagalala wehu?

¹⁵ Dholuba baani dhinafwaneleliwe okanna? Omulobe Yehova wihina ukavihere osakula dholuba onawedhiwe wakwaniha. (Pro. 16:3; Tia. 1:5) Onowakwaniha okala piyonero ookavihera obe amudhidhi wamutene, olaba oBeteli obe omaga nyumba dhomwene? Onofuna wawenjhedhedha mabasaawo oolaleya wodhela ohudhera ewogelo emodha obe otamela elabo emodha? Wihina onone ethu baani enahoweleya, wileri musolo 10 na livuru Organizados para Fazer a Vontade de  Jeová obe othapanye nnamaholela mulogo a mulogo wawo. * Wilibiheraga wihina wakwanelihe dholuba dhawo, athu atene enere woona oneriwe. Mwaha wa yeyo ohagalala wawo onerege othabwa.

16. Onere ddi akala yoluba wafunesiiwe kinereye?

¹⁶ Kito akala ofiyedha peeno kunakala mudhaari okavihera obe namaholela mulogo? Akala siyeyo, wubuwele dholuba dhimodha onawedhiwe wakwaniha. Kasugwa thalo dhinukavihere.

17. Mowiwanana ni 1 Timóteo 4:13, 15, wihina ddibila akale namahudhiha apama enahoweleya ere ddi?

¹⁷ Omwileri 1 Timóteo 4:13, 15. Akala oli ddibila obaddiziwa, wilibihere wihina onone owoga pama mwaha dhavathaddo. Mwahaya bwaddi? Mwahaya bowi ‘wubuwela pamadhene’ makalelo okovelela wileri, owoga mwaha dhavathaddo ni ohudhiha onere wakavihera ale enuvuruwana. Okanne elemelelo yohudhera ni ovirihamo dhoxagiha dhinafwanyeya muwari mwa buruxura Wilibihere wileri ni ohudhiha. Wakala vaade osakulege musolo mmodha wohudhera windo wixagiha; ohiya eyo wakanna epaddi wilibiherege oparihedha mabasa ohudheriwe. Omulobe dhoxagiha namaholela mulogo anavaha dhoholela obe anamaholela amodha ‘thabwathabwa ale enalaba nuuviheya mwaha wowoga ni ohudhiha.’ * (1 Tim 5:17) Efunelo yawo kikalege wonelamove baahi dhoxagiha dhinna buruxura nna, mbwenye osayelegemo makalelo owakavihera ale enuvuruwane wenjhedhedha nroromelo  newa ni wakongomedha wihina evirihegemo nde onahudhihiwe. Weragana ndo onere wenjhedhedha ohagalala wawo ni waale enuvuruwana.

18. Enaanikavihere ddi owomihedha makalelo ehu oolaleya?

¹⁸ Iyo atene nihikanna mutholo wolaleya ni wowahudhiha athu wihina ekale anamahara. (Mat. 28:19, 20; Rom. 10:14) Onowedha owomihedha makalelo awo oolaleya wihina wapare mabasa ala athima? Akala onowenya, ohudhere ni oparihedhe mabasa dhohudhera dha buruxura nna Wilibihere. Ohiya ohudherave, osayelegemo ohudhera ethu-sithu. Egumi ni mabasa mwana livuru na mutugumano ni vidiyudha dhinawoga makalelo othapanyedha muselu dha mBibliyani, dhinonihiwa nakanna mutugumano dha vaari vasumana, dhihikalamo dhoxagiha dhapama dhinanikavihera owomihedha makalelo ehu oolaleya. Oxixe ovirihamo dhoxagiha nda ni woone akala dhinere wukavihera. Waharaga dhoxagiha dhenda, onere owedha okala namahudhiha apama ni onere okanna ohagalala ohunaligana ni ethu emodha. — 2 Tim. 4:5.

19. Onande addi okanna dhikalelo dheekiristawu?

¹⁹ Kuddiwale wihina Yoluba yathima fukanna dhikalelo dheekiristawu dhinamuhagalasa Yehova. (Gál. 5:22, 23; Col. 3:12; 2 Ped. 1:5-8) Onande addi? Motajhiha, yahakale ninga onofuna okanna nroromelo nooliba. Akala siyeyo, yapama yakale wileri muselu dha malivuru ehu enna dholaga dhapama wodhela olibiha nroromelo. Obe osugwa vidiyu dha mu JW Broadcasting^® dhinawoniha addibila oliba nroromelo naari efwanyiwaga makathamiho. Osugwa vidiyu ndha ni waja makalelo owatajhiha addibila ala podi wukavihera.

20. Nnande addi okanna ohagalala ni ovugulela wukuwa bure-bure?

²⁰ Mohanganyedha efunelo yaathu atene fumulabela Yehova ni kopolo dhatedhene. Elabo exa nihinona wi nnere omulabela Yehova nulogomana. Nipathe mudhidhi yola ohalewo, wihina nihagalale. Nerena ndo nnere ovugulela wukuwa bure-bure. Teto vadhuluva nnere omuthithimiha ni onvuwiha Yehova ‘Mulugu oohagalala’. (1 Tim. 1:11) Vowindala, nihagalalege ni mutholo ninnihuna ovanene!