1-2. Yohudhera ela nnaasuze ddi?

WE onakala avi akala onoojhehera wakela ethu mbwenye kinafiya? Onowukuwa? Obe onakala ninga anawoga Provérbios 13:12: ‘Ethu nnajhehihu yahereya enopiha mbani.’ Ki woona wi ethu ele wajhehiwe kifiyile mwaha wethu epadduwile? Eyo podi wera enowuthukulela we odhowaganave ojhedhihaga.

² Yohudhera ela, nnere wasuza malagano amBibliyani enaanikavihere ‘ojhedhiha nuuvilela.’ (Miq. 7:7) Ni nnere woona dhithu bili nnahowelihu omujhedhiha Yehova wihina erena ethu-sithu. Omagomihero, nnere wawoona mareeliho baani Yehova anavahiye ale enikome ovilela.

3. Provérbios 13:11 ananihudhiha ddi?

³ Provérbios 13:11 ononihudhiha mwahaya bwaddi egahoweleya okala athu ovilela. Vala vinawoga vegi: ‘Dhorela dhinadha mowaguva kadhinalegele, mbwenye dhorela dha muthu anugela vang’no vang’no dhinere winjhiva.’ Yolebela ela enanihudhiha ddi? Muthu athotho eragana dhithu dhaye kanna marulu, oliye onowerana vang’no-vang’no, teto eyo enodhana mareeliho apama.

4. Provérbios 4:18 anawoga yolaga baani?

⁴ Provérbios 4:18 anihina: ‘Mbwenye, dila yaathu apama eli ninga waara vati vasaga, winaroma vang’no-vang’no ofiyera wera nyimwa.’ Madhu enawoga wi ‘dila yaathu apama’ enowiwanana makalelo Yehova anakaviheriye adharaaye wonelamo efunelo yaye — teto Yehova anerana eyo vang’no-vang’ono. Ohiya eyo, yolebela ela enonikavihera wonelamo makalelo  baani mudhaari a Yehova anasadduliye egumaye vang’no-vang’no ofiyera okanna wandana wapama ni Yehova. Wunnuwelavo epaddi yomuzimuni, kunereya peeno ni mangwaana. Ethu enahoweleya mudhidhi. Nakala anamahudhera apama a Bibliya ni navirihagamo dholaga nnakelihu mBibliyani wodhela nikuru na Yehova, vang’no-vang’no nnere wanda otajhiha dhikalelo dha Kiristu. Teto nnere oomunona Mulugu. Nnafuna nihudhere yoladdaniha Yesu awogiliye wihina atapulele muselu ola.

5. Yoladdaniha baani Yesu alabihedhiye?

⁵ Yesu ohusoriha yoladdaniha wihina atapulele makalelo muthenga wOmwene onunnuwiwa mmurimani mwaathu enadhivela ebaribari. Oliye ohusoriha egi: ‘Thanga dhinomela ni wunnuwa, naari oliye ahinonaga makalelo baani dhinunnuwiwa. Vano mathaka ale enoovaha dhowima vang’no-vang’no, onabajha bumutati, vano omaga muhubu, ogomihedha thangadha.’ (Mar. 4:27, 28) Yesu afuna awoge ddi? Yesu ere otapulela wihina, ninga muthanko onunnuwa vang’no-vang’no, wunnuwa wamuthu epaddi yomuzimuni anarumedha muthenga dhapama dhomwene winereya vang’no-vang’no. Motajhiha, namahudhera a Bibliya aroma onfiyera Yehova vang’no-vang’no, nnowedha woona makalelo anasadduliye egumaye. (Efé. 4:22-24) Ebaribari wi kannafuna oddiwala wi di Yehova anunnuwiha thanga ndha. — 1 Cor. 3:7.

6-7. Nnahudheravo ddi makalelo Yehova apaddusiliye elabo yavati?

⁶ Yehova eragana dhithu dhaye kanna marulu. Wihina erena dhithu dhendho, oliye onolabihedha mudhidhi onahoweliye wula obuwelaga otxeniha ndina naaye ni wakavihera amodha. Motajhiha, kasugwa makalelo Yehova apaddusiye elabo vang’no-vang’no wihina okale murala waathu.

⁷ Awogaga wodhela makalelo Yehova apaddusiye elabo yavati, Bibliya onosoriha wihina oliye ‘opima mmaddilenimwa’, mmwenddonimwa  ‘oparelamo’ ni ‘omutibela aliserisiya.’ (Jó 38:5, 6) Teto nuwindo ahaja mudhidhi wihina oone dhithu dhatedhene apaddusiye. (Gén. 1:10, 12) Onowubuwela makalelo yaali angero nuwoona dhopaddusiwa dha Mulugu velaboni yavati? Aliwa yahihagalala vanlubale! Bumwahaya Bibliya agasoriha wi, malabo mamodha aliwa ‘yokuwa yobaga mada.’ (Jó 38:7) Nnahudheravo ddi? Yehova ohumala yaka dhowinjhivadhene wihina amale mabasa aye, mbwenye olabihedha yaka dhowinjhivadhene ni ohukanna marulu wihidhana dhowima dhapama. Vano nuwimela wihina oone dhatedhene apaddusiliye Yehova woona wi ‘dhahiwoma.’ — Gén. 1:31.

8. Dhithu baani nnafunihu ohudhera ovanene?

⁸ Ninga dhotajhiha dha malabo amundduli dhinatonyihedhiwa, dholaga dhowinjhiva dha Madhu a Mulugu dhinononiha makalelo eliwa yathima okala athu ojheha. Vano nnafuna noone dhithu bili dhinahoweleya omujhedhiha Yehova.

9. Ethu baani emodha enahoweleya omujhedhiha Yehova?

⁹ Podi wera nnohowela ojheha wihina Yehova awakule malobelo ehu. Malabo mamodha nnolobela wihina Yehova anivahe kopolo wihina nande owanana makathamiho obe anikavihere owanana ohulogomana wehu. Podi wera malabo mamodha nnokala nuwubuwelawa wihina Yehova onolegela wakula malobelo ehu. Mwahaya bwaddi ogaviraga mudhidhene Yehova ahinawakule malobelo ehu?

10. Nalobelaga, mwahaya bwaddi enohoweleya okala athu ojheha?

¹⁰ Yehova onovuruwana pamadhene nalobelaga. (Sal. 65:2) Vamentoni vaye malobelo ehu avati vamurima enowoniha wihina nikanna nroromelo. (Heb. 11:6) Nalobelaga, Yehova onowavuruwana pama malobelo ehu wihina oone akala ele nnalobihu nnofuna mwebaribarene, oliye onosugwa akala nnere wilibihera werana ele nlobilihu. (1 João 3:22) Bumwahaya, namala olobela wa Yehova nimulobaga wihina anikavihere ogonjhiha dhilemelelo dhabure ninnihuna obe ohulogomana wehu, podi wera nnohowela okala athu ojheha ni nilibihere wihina nsaddule egumi yehu. Yesu ohuwoga wihina malobelo ehu mamodha kiyakuliwege mowaguva. Oliye ohunikongomedha: ‘Mudidele oloba munere ovahiwa, mudidele osayela munere ofwanya, mudidele ogogodda mulago munere ofuguleliwa; mwaha muthu di muthu analoba, anoovahiwa; muthu di muthu anaveda, anofwanya; muthu di muthu ogogodda, anoofuguleliwa.’ (Mat. 7:7, 8) Naharaga yolaga ya ‘mudidele olobela,’ kannadha naaganyedha wihina Babihu oodhulu onovuruwana ni anere wakula malobelo ehu. — Col. 4:2.

11. Yakalaga ninga malobelo ehu enolegela wakuliwa, Hebreus 4:16 anaanikavihere addi?

¹¹ Noona wi malobelo ehu enolegela wihina yakuliwe, nubuwelege wihina Yehova ohupaganya wawakula malobelo ehu ‘mudhidhiya wakwana.’ (Omwileri Hebreus 4:16.) Bumwahaya, akala yowakula kinadha mowaguva ninga nahowelihu, kanubuwele wihina Yehova ere wafuga mabaru aye. Motajhiha, owinjhiva enolobela yaka dhowinjhivadhene wihina Omwene wa Mulugu odhe omarihe elabo ela yabure. Mwinyene Yesu ohunihudhiha olobela mwaha wa yeyo. (Mat. 6:10) Mbwenye wakale ozimola ohiya omuroromela Yehova mwaha kanadhena omakuthulo! (Hab. 2:3; Mat. 24:44) Yathimaya fumujhedhiha Yehova ni olobela ororomelaga wi oliye anere wawakula  malobelo ehu.Omakuthulo winere ofiya mudhidhi wapama waathu atene, mwaha wi di Yehova athomile ‘labona ni maworaya’ wihina eyo epadduwe. — Mat. 24:36; 2 Ped. 3:15.

12. Ethu baani yereye yakale yorusa iyo onona ojheha?

¹² Podi wera nnohowela ojheha wihina nthogiwe ni makalelo owogowa. Elabo ela nnakalihu athu owinjhiva kinaweddiha nuwogowa athu amodha, anlogo nimodha, anihimo nimodha, adhilemelelo obe elabo emodha. Amodha kineddihiwa nuwogowa mwaha makathamiho enniwana mmwiilini obe mmubuweloni. Anamona a Yehova owinjhiva kineddihiwa nuwogowa mwaha makalelo ewa owebedha. Iyo naafwanyiwaga makathamiho yala nubuwelege Yesu awogiliye: ‘Mbwenye muthu anaavilele ofiyera omakuthulo dinaavuluwe.’ (Mat. 24:13) Ki ethu baani onahoweliwe werana wanona wi ddibila ammulogoni oherana yothega enlubale? Anamaholela mulogo yanona yothega yele, onere ohiya muselu ole mmadani mwewa? Wihina aliwa yeeddihe muselu ole mwamakalelo a Yehova, dhopadduwa ninga dhendha anamaholela mulogo enohowela werana ethu-sithu. Nnere woona dhithu baani.

13. Yehova anajheha ddi waanamaholela mulogo yapadduwa yothega enlubale?

¹³ Anamaholela mulogo yanona wi ddibila mmulogoni oherana yothega enlubale, aliwa enolobela elobaga ‘thotho dhinadhela odhulu’ wihina yoone muladdu ole ninga Yehova anooniye. (Tia. 3:17) Ethu enafuniwa, dhandeya fumukavihera ole atheegile ‘ohogolowa dilaaye yabure.’ (Tia. 5:19, 20) Teto enowilibihera wihina yerena dhatedhene enandiwa wihina ebarele mulogo ni yalibihe ale yaheddihiwe nuwogowa. (2 Cor. 1:3, 4) Yamutorihaga muthu erilena yothega enlubale, anamaholela mulogo enofwanelela onona kadda ethu epadduwile, eyo podi ohoweleyaga mudhidhi wowinjhivene. Bumwahaya aliwa enolobela, ni makalelo apama onvaha dholaga mwamakalelo apama ole atheegile ni omusumulula ‘moopimedhedha.’ (Jer. 30:11) Ebaribari wi anamaholela mulogo kinafuna olegela wihina yeeddihe muladdu ole, mbwenye aliwa kidha ethoma werana ethu ni maruluya. Anamaholela mulogo yeeddiha muselu nimakalelo apama mulogo watene onokavihereya. Naari anamaholela mulogo yerana dhatedhene mwamakalelo apama, ole atheegile podi  okanna ntxiga. Siyeyo enupadduwela? Enukavihere ddi?

14. Akala ddibila oherana ethu yutakalele, yotajhiha baani ya mBibliyani yukavihere?

¹⁴ Onowabihaga weddihiwa nuhogowa, podi wera ni ddibila ammulogoni? Bibliya podi wukavihera. Madhu a Mulugu ehikanna dhotajhiha dhapama dhinanihudhiha omujhedhiha Yehova wihina oogolele dhithudha. Motajhiha, Juze keddihiwe mowogowa ni addibile, mbwenye oliye kahile wihina dhothega dha ddibile dhimuthukulele okala muthu abure. Ohiya eyo, Juze kaselele omulabela Yehova, oliye aali muthu ojheha ni ovilela. Bumwahaya, Yehova omureeliha vanlubale. (Gén. 39:21) Mudhidhi ovira, teto Juze walevelela addibile. (Gén. 45:5) Ninga Juze, nnotodoliwa nanfiyera Yehova ni namujhedhiha wi oliye oogolele dhithudha mwamakalelo apama. — Sal. 7:17; 73:28.

15. Yamukavihere murogola ole ohukangana ni mukwaye omabasani amuwogile obure ddi?

¹⁵ Ebaribari wi iyo kanneddihiwege mwamakalelo ohogowa nimukwaranya Juze. Mbwenye nihinona wi oheddihiwa nuwogowa, winomutakalela muthu di muthu. Podi akala nikanna muladdu ni ddibila obe ni muthu ahinamulabela Yehova, ethu yathimaya fuwahara malagano amBibliyani. (Fil. 2:3, 4) Kasugwa empadduwele murogola dhaala. Oliye ahoona wi mukwaye omabasani ere omuwoga obure naathu amodha. Ohiya okangana ni mukwaye, murogola ole wubuwela yotajhiha ya Yesu. Yesu aruwaniwaga oliye kaawelihedha nuruwana. (1 Ped. 2:21, 23) Ni mubuwelo yola, murogola ole othoma wihina ahiye muladdu ole. Mudhidhi nuuvira, oliye woona wi mukwaye ole omabasani aali muredda teto akala makathamiho awaniyena mwigumini mwaaye. Oliye woona wihina mukwaye ole omabasani kamuwogile obure yapudhave. Bumwahaya oliye ohagalala mwaha wojheha ni okanna murenddele.

16. Akala onnaweddihiwa mwamakalelo ohogowa enuulibihe ddi? (1 Pedro 3:12)

¹⁶ Akala onna woona goyi mwaha oheddihiwa ni wogowa obe ethu-sithu, wubuwele wi Yehova ali vakukuvene vaathu ‘enna murima woohoseya.’ (Sal. 34:18) Okanne ebaribari wi Yehova onowudhivela mwaha we okala muthu  ojheha ni onvokedha mutholo wawo. (Sal 55:22). Oliye di namathonga elabo yatene yavati. Kavo ethu enereya mbwenye oliye ahoona. (Omwileri 1 Pedro 3:12.) Bumwahaya wafwanyiwaga makathamiho ohunandiwe wagonjhiha, ethu yapamaya wi werena fumujheha Yehova otxokotxela muladduya.

17. Mowiwanana ni Isaías 30:18, ethu baani ananiroromeliha Yehova?

¹⁷ Vohilegela, Babihu oodhulu anere onivaha mareeliho alabihedhaga Omwene waye. Isaías 30:18 anihina: ‘Mbwenye Yehova anna ojhehera wihina uwoniheni opama waye, oliye anere ovenya wihina uweddeleni thagaraga. Mwaha Yehova, Mulugu owogowa. Oohagalala baale enamujhehera.’ Ale enikome emujhehaga Yehova enere wakela mareeliho owinjhiva, ovanene, teto mwilaboni exa.

18. Mareeliho baani nnajheherihu?

¹⁸ Navolowa mwilaboni exa, nlogo na Mulugu kannahowele owanana makathamiho enanifwanya peeno. Ohogowa watewene naari goyi yatene dhinaakale dhithu dhamundduli. (Apo. 21:4) Kannahowele ojhedhiha dhithu nnahowelihu. Athu atene enere okanna dhithu enahoweliwa, ohiya eyo enere wenjhedhedhiwa. (Sal. 72:16; Isa. 54:13) Yehova anere onireliha okunamo!

19. Mwahaya bwaddi Yehova aganegeredhaga vang’no-vang’no?

¹⁹ Mwana mudhidhi ola ohalewo, kadda labo Yehova ananikaviheriye ogonjhiha dhilemelelo dhabure obe wenjhedhedha dhikalelo dheekiristawu, oliye annonegeredha wihina nakalege mwilaboni exa. Bumwahaya kukwerebeye newene kuselele. Nihikanna osogolo wapama! Nikome wihina nimujhedhihe Yehova amarihe mabasaye.