OHUDHERA 33
JHIBO 130 Nilevelelanege
Addibila a mmulogoni enaamuthajhihe aavi Yehova yamweeddihaga muthu atheegile
“Muthu athega, nikanna namakavihera.” — 1 JUWAWU 2:1.
DHITHU NNAAHUDHERIHU
Nnere woona dhithu nnahudherihu ni makalelo makiristawu oKorintiyu yamweeddihiliwa mulobwana dhaala aathegile.
1. Yehova anafuna wihina iyo aateene nerena ddi?
YEHOVA anipaddusile wihina nandege werana dhothoma. Iyo aatene nnolabihedha ekalelo eyo neragana yothoma. Yothoma enlubale muthu aneriyena fuusakula wipeleka wa Yehova ni obaddiziwa. Yehova anafuna wi athu aatene yipeleke ni ebaddiziwe. Mwaha wa ddi? Mwaha oliye anowadhivela athu aatene ni onowafunana opama. Yehova anafuna wi nandane ni oliye ni nikalewo nimukalakala. — Deut. 30:19, 20; Gal. 6:7, 8.
2. Yehova anajheha wihina ale etheegile yerena ddi? (1 Juwawu 2:1)
2 Mbwenye Yehova kanamuwaddihedha muthu omulabela. Oliye anonvaha ofuru kadda muthu osakula anafuniye wera. Ki vano akala mukiristawu abaddiziwe, anowalupa malamulo a Mulugu ofiyedha werana yothega enlubale? Ahithwaruwa anofwanelela okumihiwa mmulogoni. (1 Kor. 5:13) Naarive akumihiwaga mmulogoni Yehova anafuna wi oliye athwaruwe, ni ahogolowele omulabela. Ethu emuthukulenle Yehova ompeleka mwanaye wihina anikwele so wihina athu aatene etheegile eleveleliwe. (Mmwileri 1 Juwawu 2:1.) Yehova Mulugu odhivela ni anafuna wi athu aateene etheegile ethwaruwe. — Zac. 1:3; Rom. 2:4; Tiya. 4:8.
3. Ohudhera wula nnaasuze ddi?
3 Yehova anonihudhiha makalelo anooniye yothega ni makalelo anamooniye muthu atheegile teto anafuna wi nimutajhihege. Ohudhera wula winere onikavihera woona makalelo (1) makiristawu oKorintu yamweeddihiliwa mulobwana dhaala atheegile, (2) dhoholela murumiwi Pawulo avahiliye makiristawu mulobwana ole nuthwaruwa, ni (3) makalelo Yehova anawona aavi makiristawu etheegile.
MAKIRISTAWU OKORINTUYU YAMWEDDIHILE AAVI MULOBWANA DHAALA ATHEGILE?
4. Ethu baani yapadduwa mulogo wa oKorintiyu? (1 Korintiyu 5:1, 2)
4 Mmwileri 1 Korintiyu 5:1, 2. Agaali muulenddoni waye wanatharu, murumiwi Pawulo wiwa wihina mulogo muxa wiitiwe oKorintiyu wahikala ethu yabure yapadduwa. Mmulogoni mune ahikalamo mulobwana dhaala amugoniha muhiyana aababe “ethu yahereya newene ni malogo!” Mbwenye aaddibila a mulogo ole kayoona yabure naarive mulobwana ole eeragana ethu ele yonyakavala. Amodha podi wera yubuwela wihina omuhiya mulobwana ole mmulogoni eragana dhithu ndhe dhabure yanna omutajhiha Yehova ali a nthebwa ni athagaraga. Mbwenye ebaribariya sowihina Yehova anowidda yothega. Mweddelo wabure wa mulobwana ole wanna ononga mulogo waateene. Teto mwaha ohiyiwa mmulogoni podi wera amodha yerege wubuwela wihina dhithu eriyena kadhali dhabure yindo aliwa yerege werana. Ki vano, dhoholela baani murumiwi Pawulo avahiliye addibila ale?
5. Murumiwi Pawulo aavahile dhoolaga baani makiristawu okorintiyu, ki eyo yatapulela ddi? (1 Korintiyu 5:13) (Musugwe fotu.)
5 Mmwileri 1 Korintiyu 5:13. Yehova ahinvethela Pawulo oleba wihina mulobwana ole erana dhithu dhonyakavala akumihiwe mmulogoni. Makiristawu yaali oororomeleya yamoonege aavi? Murumiwi Pawulo ahavaha dholaga wihina “ehiye weedda” nuliye. Eyo yatapulela ddi? Pawulo owoga wihina aliwa “newene enajhege ni mulobwana ole.” (1 Kor. 5:11) Okarati wihina nijhe ni muthu di muthu podi onithukulela wihina ojha mudhidhi wowinjhiva nuliye. Ni madhu mamodha Pawulo afuna awoge wihina addibila enajhege mudhidhi wowinjhiva nuliye. Yahere ehara yolaga ya Pawulo yere obarela mulogo mwahaya wa dhithu dhabure erana mulobwana ole. (1 Kor. 5:5-7) Teto yere omukavihera mulobwana ole wonelamo makalelo amukuunliye Yehova, eere wukuuwa mwaha ndhe eriliyena ni eere othwaruwa.
Nuvetheliwa, murumiwi Pawulo oleba wihina mulobwana ole atheegile akumihiwe mmulogoni (Musugwe ddima 5)
6. Addibila okorintiyu vamodha ni mulobwana ole erilena dhithu dhabure yerile ddi nuwileri karta na Pawulo?
6 Nuuvokedha karta nne mulogo woKorintiyu murumiwi Pawulo owikoha makalelo yakale addibila yileri karta nne. Nuuvira mudhidhi, Titu omwaddela muselu dhapama dha mulogo wa oKorintiyu. Addibila ale yahiwelela dholaga dha Pawulo ni yahimukumihamo mulobwana ole erana dhithu dhabure. (2 Kor. 7:6, 7) Yapamaya, nuuvira mwana mudhidhi Pawulo agalebile karta nne, mulobwana ole ohiya werana dhithu ndhe dhonyakavala. Oliye osaddula mweddelo waye ni ohogolowela wawiwelela malamulo a mBibiliyani. (2 Kor. 7:8-11) Numala murumiwi Pawulo awaddenle makiristawu wihina yerena ddi?
MAKALELO MULOGO WAMWEDDIHILIWA MULOBWANA OLE NUUTHWARUWA
7. Omukumiha mmulogoni mulobwana ole erana dhithu dhabure wamukavihenre aavi? (2 Korintiyu 2:5-8)
7 Mmwileri 2 Korintiyu 2:5-8. Pawulo ahileba egihina: “Makalelo asinyusiwe mulobwana oyo naathu owinjhiva ehakwana.” Ni madhu mamodha osinyusiwa wule wahimukavihera vanlubale. Nimakalelo baani? Wahimuthukulela mulobwana ole othwaruwa.— Ebe. 12:11.
8. Dhoholela dhimodha Pawulo aavahiliye addibila oKorintiyu siivi?
8 Vano Pawulo wavaha dholaga addibila ale egihina: “Mmulevelele ni murima waateene ni mmutodole” mulobwana oyo atheegile ni, “mmoonihe odhivela weenyu winlubale.” Moone wihina Pawulo kafuna baahi wihina mulobwana ole aakeliwe mmulogoni, oliye afuna wihina addibila ale yoonihege ni madhu ewa vamodha ni dhowera dhewa wihina ehimulevelela ni wi enomudhivela vanlubale. Ndo mulobwana ole eere onona wihina addibila ehihagalala vanlubale mwaha oliye ohogolowela mmulogoni.
9. Mwahaya bwaddi podi wera yaali yorusa athu amodha omulevelela mulobwana ole?
9 Omabajhowene, nerege yaali yokweya addibila ale orumedha wihina mulobwana ole ohuthwaruwa? Bibiliya kanawoga. Mbwenye podi wera amodha yowarusa orumedha. Mwaha dhowera dhaye dhahaadhana makathamiho mmulogoni teto podi wera dhahawukuula amodha. Numala wiwelela dholaga ndhe dhomukumiha mulobwana ole mmulogoni, podi wera kayaali yokweya omwaakela mulobwana ole nuudhivela. (Omuliganihe ni Lukaji 15:28-30.) Mwahaya bwaddi yaaliwa yathima addibila oKorintiyu omudhivela mulobwana ole ni murima wewa waateene?
10-11. Ethu baani yapadduwe yahere anamaholela mulogo oKorintiyu ehimulevelela mulobwana ole atheegile?
10 Mubuwele ethu yapadduwe yahere anamaholela mulogo ehimwenya mulobwana ole ohogolowela mmulogoni. Ki vano, ahere mulobwana ole ahogolowela mmulogoni vano addibila ehimooniha odhivela yapadduwe ddi? Oliye eere ‘ogonjhihiwa ni wukuuwa winlubale.’ Podi wera eerege wubuwela wihina kanna thima, teto wandana waye ni Yehova were oridha.
11 Teto addibila ale yahere ehimwakela mulobwana ole aathwarunwe, yere opweha vangovini wandana wewa ni Yehova. Mwaha wa ddi? Mwaha aliwa kayatajhihe makalelo oolevelela a Yehova, mbwenye yatajhihe ekalelo yabure ni yohaweddela thagaraga athu ya Saddana. Aliwa yakale epano Saddana alabihedhiye wihina aridhihe wandana anna mulobwana ole ni Yehova. —2 Kor. 2:10, 11; Efe. 4:27.
12. Makiristawu ooKorintiyu yaamutajhihe aavi Yehova?
12 Ki vano, makiristawu ooKoritiyu yaamutajhihe aavi Yehova omuhiya Saddana? Wodhela waweddiha athu etheegile ninga Yehova. Kasugwani dhithu anamaleba a Bibiliya ewogiliwa wodhela Yehova. Davidi ohuwoga eegi: “Mwaha wi nyu Yehova, muli apama ni owaguva olevelela.” (Sal. 86:5) Mikeya ohuleba eraga: ‘Mulugu baani analigana ni nyu, analevelela dhoviriganiha ni anadduwala dhothega dha nlogo naaye?’ (Miq. 7:18) Vano Izayiya owoga egi: ‘Athu abure ehiye weedda dila yewa, athu a murima wabure, mubuwelo wewa; emuhogolowele Yehova, anere waweddela thagaraga, wa Mulugu ehu, mwaha anolevelela ni murima wamutene.’— Isa. 55:7.
13. Mwahaya bwaddi yaali yapama omuhogolosela mmulogoni mulobwana ole atheegile? (Musugwe kaxa eni “ Mudhidhi baani ahogolonwe mulobwana ole ooKorintiyu?”)
13 Wihina emutajhihe Yehova, makiristawu oKorintiyu yohowela omulevelela mulobwana ole ni omooniha wihina yoomudhivela. Mwaha ohara dhoholela dha murumiwi Pawulo, makiristawu ale yere wooniha wihina yaali “owiwelela mwadhatedhene.” (2 Kor. 2:9) Ebaribari wihina mulobwana ole muwari ahogolonwe muwari mwa mweri dhing’onove, mbwenye osinyusiwa wule wahimukavihera vanlubale. Bumwahaya woona wihina mulobwana ole ahithwaruwa kayahooweleya ojheha mudhidhi wowinjhivene wihina ahogoloseliwe mmulogoni. Mwahaya bwaddi kayahooweleya olegela wihina anamaholela mulogo emuhogolosele mulobwana ole mmulogoni? Musugwe kaxa eni “Mudhidhi baani ahogoloseliwe mmulogoni mulobwana ole oKorintiyu?”
MAKALELO OTAJHIHA WOGOWA NI THAGARAGA DHA YEHOVA
14-15. Dhithu baani nnahudherihu ni muselu wa mulobwana ole oKorintiyu? (2 Peduru 3:9) (Musugwe fotu)
14 Mwahaya bwaddi muselu wa mulobwana ole ooKorintiyu odhe opwehiwege mBibiliyani? “Wihina onihudhihe.” (Rom. 15:4) Ononihudhiha wihina Yehova, kaneenya wihina athu enerana dhithu dhabure ekaleve mmulogoni. Ebaribari wihina Yehova dathagaraga, mbwenye kaneenya wihina athu ehinathwaruwa ekaleve mmulogoni newene wihina yanyigalelege malamulo aye. Yehova kaneenya wihina muthu enerana dhithu dhabure adidele weedda naathu enilibihedha werana dhithu dhapama. (Judasi 4) Yehova ahahiyege athu yayo mmulogoni kayakale makalelo owooniha thagaraga, mbwenye erege wapweha adhaari aye vangovini. — Prov. 13:20; 1 Kor. 15:33.
15 Naarive dhigaali ndo Yehova kanafuna wihina athu etolosiwe. Efunelo yaye sowihina athu aateene evuluwe. Oliye anowaweeddela thagaraga ale enooniha wihina ethwaruwa ni enoniha wihina enoofuna omuhogolowela oliye. (Ezek. 33:11; Mmwileri 2 Peduru 3:9.) Bumwahaya, mulobwana ole ooKoritiyu nuthwaruwa ni nuuhiya werana dhithu dhabure Yehova omulabihedha Pawulo wi awaddele addibila wi mulobwana ole ohowela wakeliwa ni wooniha odhivela.
Makiristawu etajhihaga odhivela ni thagaraga dha Yehova, enowawakela nuuhagalala ale yaakumihiwe mmulogoni (Musugwe ddima 14-15)
16. Nuuhudhera wodhela muselu ole wapadduwile oKorintiyu muli aavi?
16 Yopadduwa ya mulobwana ooKorintiyu enonooniha makalelo Yehova aliye apama, athagaraga ni owogowa. (Sal. 33:5) Eyo enonithukulela iyo aateene onvuwiha Yehova. Mbwenye iyo aateene nili athu oothega ni nnohowela oleveleliwa ni Yehova. Eyo enandeya mwaha wa mukutho wa Yesu, bumwahaya nnohowela vanlubale otamalela mukutho oyo. Solibiha vanlubale onona wihina Yehova anowadhivela adhaari aye ni anoofuna wakavihera!
17. Dhohudhera dhinaharela nnaasuze ddi?
17 Ki peeno, muthu athega anamaholela mulogo enatajhiha aavi thagaraga ni odhivela wa Yehova, ki enamukavihera aavi? Addibila ekalege aavi ddibila akumihiwa obe ahogoloseliwa mmulogoni? Dhohudhera dhinaharela dhinere wawakula makoho ala?
JHIBO 109 Okalena odhivela weebaribari
