OHUDHERA 31
JHIBO 12 Mulugu munlubale Yehova
Ethu erilena Yehova wihina anoobole muuthegani ni muukwani
“Mwaha Mulugu ohudhivela vanlubale elabo, omuleva mwanaye mmodha.” — JUWAWU 3:16.
DHITHU NNAAHUDHERIHU
Nnere ohudhera makalelo Yehova ananikaviheriye owanana yothega. Ni makalelo enyiliye wihina adharaaye ekalena egumi yohimala osogolo ehinna yothega.
1-2. a) Yothega ddi, ki nnande aavi ogonjhiha? b) (Mwasugwe “Madhu etapuleliwe”) Dhithu baani nnaasuzihu ohudhera wula ni dhohudhera dhimodha dha Namasugwera ola? (Teto musugwe “nota naanamileri” naNamasugwera ola.)
MUNOOFUNA onona makalelo Yehova anuudhiveliyeni? Negi nifwanye yowakula ya nikoho nna, kabeni noone ethu erilena Yehova wihina anobole muuthegani ni muukwani. Yothega a mwiddani munlubale nihinandihu omugonjhiha yekihu. Iyo aateene, nnothega kadda labo ni nnokwa mwaha wa yothega ela. (Rom. 5:12) Mbwenye dhihikalawo muthenga dhapama. Nnikavihero na Yehova, iyo nnere wanda ogonjhiha yothega ela. Owoga ebaribari yothega ela kinaanigonjhihe.
2 Yehova anna wakavihera athu owanana yothega muwari mwa yaka 6000. Mwaha bwaddi? Mwaha oliye anoonidhivela. Yehova aapaddusile athu mwaha wodhivela, bumwahaya oliye anowerana dhatedhene wihina aakavihere owanana yothega. Mulugu ohunona wihina yothega enoonthukulela okwa, bumwahaya oliye agilibihedha onikavihera mwaha kanafuna wihina iyo nikwe. Oliye anafuna wihina nikalegewo ni mukalakala. (Rom. 6:23) Siyeyo anaanfuniyena kadda muthu wahiyo. Ohudhera wula, nnere wawakula makoho mararu: (1) Yehova aavahile aavi ejhehedhelo athu oothega? (2) Ethu baani yerilena adhaari a Yehova akale wihina emuhagalase oliye? (3) Ethu baani Yesu eriliyena wihina awobole athu muuthegani ni muukwani?
YEHOVA AAVAHILE AAVI EJHEHEDHELO ATHU OOTHEGA?
3. Adawu ni Eva efiyendhe aavi otheega?
3 Yehova nuunpaddusa Adawu ni Eva afuna wihina aliwa ehagalalege. Oliye ahavaha murala wowoma, matelo ni mabasa oohagalasa. Efunelo ya Yehova yaali wihina aliwa ekalena ahima, wihina edhaale elabo yaatene ni wihina esaddule elabo akale parayizu. Oliye ahavaha nlamulo nookweya. Mbwenye wakongomedha wi yapwaza nlamulo nne yeere oyelela egumi yewa. Nihinona epaddunwe. Mungero abure ahaadhivela aliwa ni ahimudhivela Mulugu, waleketha wihina elupe nlamulo nne. Adawu ni Eva wiwelela dhawogile mungero ole. Aliwa opwaza ndhe dhawogile baabiwa aadhivela, mwaha wa yeyo aliwa oothega. Ninga nnoonihu madhu a Yehova yahakwanela. Obajha labo nenne aliwa ohiya okala ologomana vano, wuluvala, omakuthulowa aliwa okwa. Mohanganyedha aliwa ohogolowela okala nthubi. — Gén. 1:28, 29; 2:8, 9, 16-18; 3:1-6, 17-19, 24; 5:5.
4. Mwahaya bwaddi Yehova agiidda yothega ni aganikavihera ogonjhiha? (Romanu 8:20, 21)
4 Yehova enyile wihina elebiwe yopadduwa ela wihina enikavihere. Ndo nnowanda wonelamo ethu enamuthukulela oliye widda yothega. Yothega enononga wandana wehu ni Yehova ni enonthukulela okwa. (Isa. 59:2) Bumwahaya Saddana aatatamunle makathamiho maatene, agadhiveliwa yothega ni anowathukulela amodha werana emodhave. Podi wera oliye owubuwela wihina ahimugonjhiha Yehova. Mbwenye kanonne wihina Yehova Mulugu oodhivela. Mulugu kaasaddunle ethu aampaganyiliye Adawu ni Eva. Oliye anowadhivela athu, bumwahaya adhe avahege ejhehedhelo. (Mmwileri Romanu 8:20, 21.) Yehova ahinona wihina athu amodha yerege omudhivela ni yerege oveda nikavihero naye wihina egonjhihe yothega. Woona wihina di baabiwa ni mpaddusi ewa, eere wakavihera ogonjhiha yothega wihina yandane ni oliye. Wihina dhandeye, Yehova eere ddi?
5. Mudhidhi baani Yehova eriliyena mpaganyo wobajha? Owogemo. (Génesis 3:15)
5 Mmwileri Génesis 3:15. Mpaganyo wobajha Yehova erilena mudhidhi amutorihiliye Saddana mmuddani wo Ideni. Mulugu ahipaganya wihina weere okalawo “odhuulu” wawobole athu. Odhuulu oyo weere omunyenya Saddana ni were omariha obure waateene atotile Saddana mu Ideni. (1 Juwa. 3:8) Mbwenye odhuulu oyo weere oporosiwa obe opiwa ni Saddana. Yehova eere othabwa woona opa. Naarive dhigaali ndho, yakale yapama mwaha matxikwi ni matxikwi athu yere woboliwa muuthegani ni muukwani!
ETHU BAANI ADHAARI OHULOGOMANA AKALE YERILIWANA WIHINA YANDANE NI MULUGU?
6. Wihina Abeli nNowe yandane ni Yehova yerilena ddi?
6 Muwari mwa yakadhene vang’ono vang’ono Yehova woniha makalelo athu yafiyendhiwa wandana ni oliye. Mwaana a nabiili a Adawu ni Eva daali obajha omuroromela Yehova nupadduwa dhithu ndhe mu Ideni. Ni makalelo baani? Mwaha Abeli omudhivela Yehova oosayela omuhagalasa ni wandana ni oliye, bumwahaya adhe ampahelege mukutho. Abeli aali namakukula, bumwahaya owalabihedha mambila aaye wihina ampahele Yehova mukutho. Yehova akala aavi? Oliye ‘ahihagalala ni Abeli vamodha ni mukutho waye.’ (Gén. 4:4) Yehova oorumedha mukutho dhimodha dha athu ororomeleya ni yamudhivela ninga motajhiha, Nowe. (Gén. 8:20, 21) Mwaha woorumedha mukutho ndha Yehova ohoniha wihina athu ohulogomana podi wandana ni oliye ni onfiyedha. b
7. Nnahudhera ddi ni efunelo aanna Abarawu yompaha mwanaye ninga mukutho?
7 Yehova ahimuloba Abarawu ethu yoothabwa orusa: Ompaha mwanaye Izaki ninga mukutho. Mwebaribarene kayali yokweya Abarawu wakwanihedha yoloba ele. Naarive dhigaali ndo oliye ahiiwelela. Mbwenye Abarawu ahalaga neena nuumpa mwanaye Yehova omukooddiha. Yopadduwa ela enowahudhiha athu aateene enna nroromelo, Yehova eere ompeleka Mwanaye athabwiye omudhivela ninga yowobola mwaha oliye anoothabwa wadhivela athu. — Gén. 22:1-18
8. Nlamulo yavahiwe amwaana Ezarayeli noopeleka mukutho natonyihedha ddi? (Levítico 4:27-29; 17:11)
8 Nuuvira yaka dhowinjhiva, nlamulo yavahiwe amwaana Ezarayeli novolowelavo opeleka mukutho wihina dhithimihiwena dhothega dha nlogo. (Mmwileri Levítico 4:27-29; 17:11.) Mukutho ndhe dhatonyihedha mukutho munlubale waapelekiwe osogolo wihina wawobole athu aateene mutheegani. Anamavuhulela yahivetheliwa oleba wihina odhuulu wapaganyiwe, aali Mwaana a Mulugu, were otabusiwa ofiyedha okwa. Waapiwe ninga mwana nimbila. (Isa. 53:1-12) Kubuwelani: Yehova eere ompeleka mwanaye ninga mukutho wihina awobole athu vamodha ni nyunwa, muuthegani ni muukwani.
ETHU BAANI YESU ERILIYENA WIHINA AWOBOLE ATHU?
9. Juwawu Namabaddiza awogile ddi wodhela Yesu? (Eberewu 9:22; 10:1-4, 12)
9 Nsaka noobajha, mudhaari a Mulugu ithaniwa Juwawu ahiwoga wodhela Yesu aali oNazare eraga: “Kasugwani Nimbila na Mulugu, nnalevelela dhothega mwilaboni!” (Juwa. 1:29) Madhu ala enomooniha Yesu ninga odhuulu wapaganyiwe yakadhene mundduli. Oliye eere opeleka mukutho ole wapaganyiwe. Vano wahifiya mudhidhi wihina athu aateene ohulogomana yoboliwe muuthegani ni muukwani, mwebaribareene wula ogonjhihiwa wa yothega. — Mmwileri Eberewu 9:22; 10:1-4, 12.
10. Yesu onihile aavi wihina adheele wawithana “athu oothega”?
10 Yesu athabwa wakavihera ale yakala owukuwene mwaha wa dhothega dhewa ni owawithana wi ekale anamahara aye. Oliye ahinona wihina makathamiho maatene enadha mwaha wa yothega. Bumwahaya oliye owakavihera alobwana ni ahiyana yoona goyi mwaha wa yothega yeriliwana. Motajhiha, mudhidhi alabihedhaga nladdaniho oliye wera: “Athu agumi kinamuhoowela mediku, mbwenye aredda binamuhoowela.” Teto wenjhedhedha eraga: “Mwaha miyo kagidhele wawithana athu owogowa mbwenye athu oothega.” (Mat. 9:12, 13) Yesu keere wawogave madhu ala, mbwenye ahiwakwanihedha. Motajhiha, oliye ahimulevelela muhiyana dhaala asunwe manyalo aye ni mitori. (Luk. 7:37-50) Oliye ahimusuziha ebaribari yathima ya mBibiliyani muhiyana dhaala ali oSamariya, naarive anonaga wihina aali namararuwa. (Juwa. 4:7, 17-19, 25, 26) Teto Mulugu ahivaha kopolo Yesu wihina ogonjhihe okwa. Aavi? Yesu owavenyiha athu yaakwile ninga, alobwana, ahiyana, ahima ni anakalaba. — Mat. 11:5.
11. Mwahaya bwaddi athu oothega yodhiveliwa okala vaali Yesu?
11 Kannatikina onona wihina naarive athu yaali oothega yodhiveliwa okala vaali Yesu. Mwaha owaweddela thagaraga ni nthebwa. Aliwa kayoova omwaddamela. (Luk. 15:1, 2) Vano mwaha ororomeleya wewa oliye wareeliha. (Luk. 19:1-10) Dhithu ndha erana Yesu afuna awonihe athu wihina baabe dathagaraga. (Juwa. 14:9) Wodhela dhowera dhaye oliye ahoniha wihina baabi aye dokweya, athagaraga, oodhivela ni ofuna wakavihera athu wihina egonjhihe yothega. Yesu owakavihera athu wihina esaddule mweddelo wewa wi ekale anamahara aye. — Luk. 5:27, 28.
12. Yesu ahudhihile ddi wodhela okwa waye?
12 Yesu ahinona pamadhene dhithu dhaampadduwele. Dila dhowinjhivadhene Yesu owawaddela anamahara aye wihina eere ogulihiwa ni opiwa vantxikwani na goyi. (Mat. 17:22; 20:18, 19) Oliye ahinona wihina mukutho waye were othimiha yothega mwilaboni ndala ninga awogiliye Juwawu vamodha nanamavuhulela. Yesu ahasuziha wihina apeleka egumi yaye eere, ‘odahinya murima dhaathu ohiyana-hiyana.’ (Juwa. 12:32) Wihina athu oohilogomana emuhagalase Yehova yohowela omurumedha Yesu ninga Nabwiya ewa ni ohara thalo dhaye. Yahere ndo, yere ‘woboliwa muuthegani.’ (Rom. 6:14, 18, 22; Juwa. 8:32) Vano Yesu ahiipeleka nuuliba murima wihina apiwe vantxikwani na goyi. — Juwa. 10:17, 18.
13. Yesu akwile aavi, ki okwa waye onanihudhiha ddi wodhela Yehova? (Musugwe fotu.)
13 Yesu ogulihiwa, omagiwa, oruwaniwa, nuwindo otoriheliwa okwa. Anyakoddo omuthukulela mburo vafuniwa ompa nuwindo omukomela vantxikwani na goyi. Mudhidhi avilelagana okwa wule wa goyi ohukalawo muthu athabwa woona goyi. Muthu oyo di Yehova Mulugu. Naarive agaali akopolo dhatedhene oliye kamwakihedhe Mwanaye. Mwaha wa ddi? Yamuthukulele baabi oodhivela ohumwakihedha mwanaye ddi? Mwaha wa odhivela. ohuwoga egihina: “Mulugu ohudhivela vanlubale elabo, omuleva mwanaye mmodha, wi athu aatene enaamuroromele yahitolosiwe, mbwenye ekanne egumi yohimala.” — Juwa. 3:16.
Nuweenya wihina mwanaye apiwe, Yehova ahithabwa woona opa wihina anobole muuthegani ni muukwani (Musugwe ddima 13)
14. Mukutho wa Yesu onanihudhiha ddi?
14 Mukutho wa Yesu makalelo a Yehova woniha wihina anowadhivela athu aatene ohulogomana edhele wa Adawu ni Eva. Eyo enowoniha pamadhene makalelo anuudhiveliyeni. Oliye oherana dhaatedhene, naarive ehili yokweya wihina anobole muuthegani ni muukwani. (1 Juwa. 4: 9, 10) Hee, oliye anafuna anikavihere owanana yothega ofiyedha iyo ogonjhiha!
15. Negi nleveleliwe dhotheega dhehu ethu baani nnahowelihu werana?
15 Mwaha wa mukutho avahile Mulugu enowandeya oleveleliwa dhothega dhehu. Mbwenye nnohowela wera ethu-sithu wihina nleveleliwe dhothega dhehu. Ethu baani? Juwawu Namabaddiza vamodha ni Yesu ehiwoga yeraga: “Muthwaruwe, mwaha Omwene wodhulu ohaddamela.” (Mat. 3:1, 2; 4:17) Bumwahaya, othwaruwa si ethu enlubale nnahowelihu werana neegi nigonjhihe yothega ni wi nandane ni Baabi ehu odhivela. Mbwenye othwaruwa onatapulela ddi ni onanikavihera aavi ogonjhiha yothega ninnihuna? Ohudhera winaharela winere wakula nikoho nna.
JHIBO 18 Ginotamalela mukutho weenyu
a MADHU ETAPULELIWE: Mbibiliyani Madhu owi “Yothega” podi waganiwaga ethu yabure, ohivirihamo obe ohawiwelela malagano a Yehova. Teto madhu mamodhave owi “yothega” podi waganiwaga ekalelo ninnihuna yokala athu ohulogomana obe yothega nivalilihu ni Adawu. Ethu enanthukulela okwa si yothega nivalilihu.
