OHUDHERA 35
JHIBO 123 Nimwiwelelege Yehova nnikuru naaye
Makalelo anamaholela mulogo enaamukaviheriwa muthu akumihiwe mmulogoni
“Odhulu winere okala ohagalala mwaha muthu mmodha oothega othwaruwa, ohiya athu 99 owoogowa ehinahowela othwaruwa.”— LUC. 15:7.
DHITHU NNAHUDHERIHU
Mwahaya bwaddi athu amodha enohowela okumihiwa mmulogoni? Ki anamaholela mulogo enaadidele aavi wakavihera wi ethwaruwe ni erumedhiwe ni Yehova?
1-2. a) Yehova anawoona aavi athu yaale ehinafuna othwaruwa? b) Ki ethu baani anajhehiye waaliwa?
YEHOVA kanarumedha mweddelo dhaatedhene. Oliye onowidda yothega. (Sal. 5:4-6) Yehova anajhehedha wihina iyo aatene nawiwelelege malamulo aye eli mBibiliyani. Mbwenye Yehova kanajhehedha wihina nikale ologomana mwaha nili athu otheega. (Sal. 130:3, 4) Mudhidhi mmodhave Yehova kanawenya “athu enerana dhithu dhamanyazo yinkedhaga opama wohinifwanelela wa Mulugu.” (Juda. 4) Mwebaribarene Bibiliya anowoga “otolosiwa wa athu abure” mukoddoni ya armajedo. — 2 Ped. 3:7; Ovuhu. 16:16.
2 Mbwenye Yehova kanafuna wi muthu di muthu atolosiwe. Ninga nonilihu ohudhera ovirile oliye “anafuna wi athu aatene ethwaruwe.” (2 Ped. 3:9) Anamaholela mulogo enoomutajhiha Yehova wodhela okala ovilela yakaviheraga ale ekumihiwe mmulogoni osaddula mweddelo wewa ni ohogolowela wandana ni Yehova. Yowukulihaya sowihina kahi aatene enarumedhe nikavihero nna. (Isa. 6:9) Amodha enere odidela werana dhithu dhabure naarive anamaholela mulogo dila dhowinjhivadhene yakaviheraga athuya. Yakala ndo ethu baani anamaholela mulogo enahoweliwa werana?
“MMUKUMIHEVO VAARI VENYU MUTHU ABURE”
3. a) Akala muthuya kanathwaruwa Bibiliya anawoga wihina eeriwena ddi? b) Dhereya ndo, mwahaya bwaddi nigawoga wihina duliye asakunle okumihiwa mmulogoni?
3 Muthu ahithwaruwaga anamaholela mulogo kinna yothoma emodha ehili ohara ele eli va, 1 Korintiyu 5:13: “Mmukumihemo mmulogoni muthu yoole anerana dhithu dhabure.” Ni madhu mamodha mwinnyene disakunle okumihiwa mmulogoni, oliye anahadda dhithu adhanliye. (Gal. 6:7) Mwahaya bwaddi nigawoga ndo? Mwaha muthu oyo eere okoodda othwaruwa naarive anamaholela mulogo egaxinxe omukavihera dila dhowinjhivadhene. (2 Reis 17:12-15) Dhowera dhaye sinoniha wihina oliye kanafuna wahara malagano a Yehova. — Deut. 30:19, 20.
4. Mwahaya bwaddi muthu ahithwaruwa egavuwihiwa wihina ohukumihiwa mmulogoni?
4 Muthu ahithwaruwaga ni akumihiwa mmulogoni addibila enowaddeliwa wihina oliye kahi Namoona a Yehova. Eyo, kinatapulela wihina muthuya anafuna atotiwe manyazo. Mbwenye enubusedhiwa addibila ohara yolaga ‘yoheedda nuliye’ ni ohujha nuliye.’ (1 Kor. 5:9-11) Dhihikala dhithu dhapama dhimuthukulele Yehova opweha yolaga ela mBibiliyani. Murumiwi Pawulo ohuwoga egihina: “emela vang’ono enonyakuwiha othu waatene wakanddiwa.” (1 Kor. 5:6) Ale ehinathwaruwa podi wathukulela athu amodha oridhiha efunelo yewa yowahara malamulo owogowa a Yehova. — Pro. 13:20; 1 Kor. 15:33.
5. Nimonege aavi muthu akumihiwa mmulogoni, ki mwahaya bwaddi?
5 Ki vano, nimonege aavi muthu akumihiwe mmulogoni? Iyo kannaredhege newene kannajhege mudhidhi ni oliye. Naarive dhigaali ndho, kanimonege ninga muthu ohufwanelela mbwenye ninga mwana nimbila nipupuruwile. Nimbila narimela podi ohogolowela munikolani. Kaniddiwaale wi muthu akumihiwe mmulogoni ohupeleka egumaye wa Yehova. Mbwenye yowukulihaya, oliye eere ohiya wahara malagano a Yehova ni okalawo mowiwanana ni efunelo yaye. (Eze. 18:31) Mbwenye Yehova afuna omweddela thagaraga ni wakalawo mudhidhi wihikala ejhehedho wihina aneere ohogolowa. Ki vano, anamaholela mulogo enaamukavihere aavi muthu akumihiwe mmulogoni?
MAKALELO ANAMAHOLELA MULOGO ENAKAVIHERIWA
6. Anamaholela mulogo enaamukavihere aavi muthu yole akumihiwe mmulogoni?
6 Muthu akumihiwa mmulogoni enatapulela wihina ohunyanyaliwa teto kanakaviheriwe ofiyedha omuhogolowela Yehova? Naari! Anamaholela mulogo yamwaaddelaga wi anere okumihiwa mmulogoni, enomwaaddela dhithu baani anahoweliye werana afunaga ohogolowa. Teto anamaholela mulogo enowerana ethu emodha. Motajhiha, aliwa enomukoha akala anowenya wi aliwa ethapanye ni oliye dhavira mwana mweridhene, wihina yoone akala oliye ohusaddula mweddelo waye obe naari. Muthuya arumedha, anamaholela mulogo enere ohogolowela othapanya ni oliye wi emukongomedhe othwaruwa ni omuhogolowela Yehova. Naarive muthuya ahithwaruwaga anamaholela mulogo enere oxixa othapanya ni oliye dhavira mweridhene wihina emukongomedhe oliye othwaruwa.
7. Anamaholela mulogo enatajhiha aavi thagaraga dha Yehova muthu akumihiwa mmulogoni? (Jeremias 3:12)
7 Anamaholela mulogo enowilibihedha otajhiha thagaraga dha Yehova yadhowaga owoga ni muthu akumihiwe mmulogoni. Motajhiha, Yehova kajhehile amwaana Ezarayeli othwaruwa wi aakavihere, mbwenye Yehova aali obajha naarive ehoonihile wi ehithwaruwa. Ninga nonilihu ohudhera wanabili wa Namasugwera ola, Yehova ahiwoga ni Ozeya wihina amulevelele ni amuhogolowele mwadhiye naarive oliye ahithwaruwile. Nimakalelo yala, Yehova woniha nlogo naaye wihina oofuna olevelela. (Ose. 3:1; Mal. 3:7) Ndala ninga Yehova anamaholela mulogo enofuna wihina muthu atheegile athwaruwe ni ahogolowele mmulogoni, aliwa kinaarusihe dhithudha ninga eliwa yorusa wa namathegaya. — Omwileri Jeremias 3:12.
8. Nladdaniho na mwana adduddumandhe vaade nnanikavihera aavi wonelamo thagaraga dha Yehova? (Lukaji 15:7)
8 Munowubuwela nladdaniho na mwaana adduddumandhe vaade makalelo baabi ole amwakenliye? Baabi ole nuumona mwanaye ahogolowelaga vaade oliye “omuthamagela, omukubarela ni ombejari.” (Luk. 15:20) Baabi ole kajhehile mwanaye omuloba nikurumuwelo. Oliye aali obajha omukavihera. Baabi odhivela eere werana emodhave ahamoone mwanaye adduddumadhe ahogolowelaga vaade. Ni anamaholela mulogoya enowilibihedha werana emodhave ni muthu yole akumihiwe mmulogoni. Aliwa enafuna wihina nimbila nirimele “nihogolowele vaade.” (Luk. 15:22-24, 32) Muthu athwaruwa Yehova, Yesu ni angero enothabwa ohagalala, teto siyeyo mulogo waatene onahoweliwa werana. — Mmwileri Lukaji 15:7.
9. Ethu baani Yehova anaalobiye ale etheegile?
9 Ofiyedha vala nihanda woona wihina Yehova kanafuna wihina muthu atheegile ahithwaruwa adidele okala mmulogoni. Mbwenye eyo, kinatapulela wihina oliye anomureya edduli muthuya. Yehova anofuna wihina oliye ahogolowele mmulogoni. Ozeya 14:4 onowoniha pamadhene makalelo Yehova anakaliiye amoona muthu athwaruwile. Yolebelaya enihina: ‘Ginere olevelela ohuroromeleya wewa. Gineerege wadhivela ni murima waga waateene, mwaha ginere warabeliha owali waaga amwaana Ezarayeli.’ Anamaholela mulogo yakanna monelo mmodhave wa Yehova aliwa enerege wilibihedha woona akala muthuya ohubajha othwaruwa. Vano niwogaga ni ale emusukumme Yehova, madhu ala enowoniha wihina Yehova anowudhivelani vanlubale, teto anafuna wihina mohulegela muhogolowele mmulogoni.
10-11. Anamaholela mulogo enaakavihera aavi ale ekumihiwe mmulogoni kale?
10 Ki akala muthuya akumihiwe mmulogoni kale, anamaholela mulogo enaamukavihere aavi muthu yoyo? Podi wera muthu yoyo ohuhiya werana yothega emuthukulenle okumihiwa mmulogoni. Teto podi wera ohuddiwala ethu emuthukulenle oliye okumihiwa mmulogoni. Podi akala ohuddiwala obe naari, anamaholela mulogo enere oxixa omwaredhela. Mudhidhi yamwaredhelaga, aliwa podi olobela nuliye emukongomedhaga ohogolowela mmulogoni. Mwaha wookala mudhidhi wowinjhivene ode podi wera ohuridha epaddi yomuzimuni. Vano oliye awoga wihina anofuna ohogolowela mmulogoni, anamaholela mulogo enere omuthoma muthu wihina amuhudhihege Bibiliya naarive akala kanahogolowele mmulogoni. Dhakala ndo, anamaholela mulogo binaamuhudhihege Bibiliya muthu yoyo.
11 Anamaholela mulogo enotajhiha thagaraga ni odhivela wa Yehova. Bumwahaya, aliwa enomusayela muthu yole amusukumme Yehova ni enomwaaddela wihina musiwodha dhili dhofuguwadheene akala anoofuna ohogolowa. Muthu atheegile ni ahiyile ekalelo yaye yabure oliye podi ohogoloseliwa mmulogoni. — 2 Kor. 2:6-8.
12. a) Mudhidhi baani anamaholela mulogo enahoweliwa okala pasope? b) Mwahaya bwaddi kiyakale yapama wubuwela wi amodha kinaleveleliwe? (Osugwe nota.)
12 Malabo mamodha anamaholela mulogo enoohowela okala pasope ehinathi omuhogolosela muthu mmulogoni. Motajhiha, akala muthuya amugonihile mwaana, apostata obe akala ohumuthukula muhiyana obe mulobwana a muthu mmodha, anamaholela mulogo enoohowela okanna ebaribari akala oliye ohuthwaruwa. (Mal. 2:14; 2 Tim. 3:6) Mwaha mutholo wa anamaholela mulogo wabarela mambila a Yehova. Teto mudhidhi mmodhave, anamaholela mulogo ehinona wihina Yehova anomurumedha muthu yole athwaruwile ni ahiile werana dhithu dhabure. Naarive anamaholela mulogo yabarelaga mambila a Yehova, kifiyedhe wubuwela wihina muthu atheegile kanafwanelela oleveleliwa ni Yehova. a — 1 Ped. 2:10.
ETHU MULOGO ONAHOOWELA WERANA
13. a) Nnamweeddiha aavi muthu yole asumululiwe? b) Ki nnamweeddiha aavi ole akumihiwe mmulogoni?
13 Ninga nonilihu ohudhera ovirile, yavuwihiwa mmulogoni wihina muthu ohusinyusiwa iyo podi odidela waredhaga ni oliye, mwaha nihinona wihina ohuthwaruwa ni ohuhiya werana ethu yabure eriliyena. (1 Tim. 5:20) Teto muthu oyo anokosa epaddi ya mulogo, bumwahaya onohowela nikavihero naaddibila vamodha ni naarogola wihina adidele werana ele eli yapama. (Ebe. 10:24, 25) Mbwenye akala muthuya akumihiwe mmulogoni kannerana emodhave. Akumihiwa mmulogoni ‘nnooselela weedda ni oliye’ teto newene ‘kannajha vamodha.’ — 1 Kor. 5:11.
14. Yothoma baani kadda mukiristawu anahoweliye werana akala ole akumihiwe mmulogoni ohudha woona mutugumano? (Musugwe fotu.)
14 Eyo enatapulela wihina nawoonege athu ale ekumihiwe mmulogoni ninga ohufwanelela? Naari. Ebaribari wihina kannajhege mudhidhi naaliwa, mbwenye makiristawu podi olabihedha mubuwelo waye oxagihiwe ni Bibiliya wihina ethome akala enere omwithanela muthu akumihiwe mmulogoni wihina adhe oone mutugumano podi wera muthu oyo di mmudhihu obe mukwihu. Ki vano muthuya arumedha? Kale iyo kanaalojhela athu yayo. Mbwenye vano kadda mukiristawu podi othoma mowiwanana ni mubuwelo waye oxagihiwe ni Bibiliya akala anere omulojhela obe naari. Athu amodha podi omulojhela obe podi owoga yegi odha wawo wapama. Mbwenye kannafuna ojha mudhidhi wowinjhiva nuliye obe okala vamodha neragana dhithu dhimodha.
Mukiristawu podi othoma akala anere omwithanela muthu akumihiwe mmulogoni omutugumanoni obe naari, ni akala anere omulojhela afiya omutugumanoniwa. (Osugwe ddima 14.)
15. Yoothega baani enawogiwa va 2 Juwawu 9-11? (Musugwe kwaduru “ Nerege Juwawu ni Pawulo yawoga Yoothega emodhave?”.)
15 Athu amodha podi wikoha yegi: ‘Bibiliya kanawoga wihina kanalojhelegeweene?’ (Mmwileri 2 Juwawu 9-11.) Mowiwanana ni 2 Juwawu 9-11 versu ndha dhinawagana mapostata ni athu enathukulela amodha werana dhithu dhabure. (Ovuhu. 2:20) Bumwahaya, anamaholela mulogo kinaamwaredhelege muthu yole ali apostata ni anathukulela amodha werana dhithu dhabure. Naarive dhigaali ndo, ehikalawo ejhehedhelo wihina aliwa enere othwaruwa ni osaddula ekalelo yewa. Mbwenye yahithwaruwa, kannalojhelege newene kannawithanelege omutugumanoni.
OTAJHIHE THAGARAGA NI NTHEBWA NA YEHOVA
16-17. a) Yehova anafuna wi ale etheegile yerena ddi? (Ezequiel 18:32) b) Anamaholela mulogo enalaba aavi ni Yehova wihina emukavihere muthu atheegile?
16 Dhohudhera ndha tanu nsuzile ddi? Niihudhera wihina Yehova kanafuna wihina athu etolosiwe! (Mmwileri Ezequiel 18:32.) Oliye anafuna wihina athu etheegile ethwaruwe ni emuhogolowele. (2 Kor. 5:20) Bumwahaya Yehova adhe akongomedhege adhaari aye etheegile othwaruwa ni omuhogolowela oliye. Anamaholela mulogo ehikanna oneti wolaba vamodha ni Yehova wihina yakavihere ale etheegile othwaruwa.— Rom. 2:4; 1 Kor. 3:9.
17 Kubuwelani makalelo Yehova, Yesu ni angero enahagalaliwa yamoona muthu atheegile agaathwaruwile! Thabwa-thabwa babi ehu Yehova anoothabwa ohagalala oonaga nimbila naye narimenle nihogolowelaga mmulogoni. Odhivela ninnihuna nuliye onowenjhedhedheya nubuwelaga thagaraga, nthebwa ni opama waye wohinifwanelela ananoonihiye. — Luk. 1:78.
JHIBO 111 Dhithu dhinanihagalasa
a Mowiwanana ni madhu a Pawulo enafwanyeya va 1 Korintiyu 5:13, nnaalabihedhege madhu owi okumihiwa mmulogoni ohiya otxosiwa.
Bibiliya anowoga wihina ehikalawo athu ehinaaleveliwe. Athu yayo baale ethomile omureya dduli Yehova pudhave. Yehova baahi ni Yesu binanda omoona akala muthu anere oleveleliwa obe naari. — Mar. 3:29; Ebe. 10:26, 27.
