OHUDHERA 34
JHIBO 107 Yehova yotajhiha yapama ya odhivela
Makalelo anamaholela mulogo enawoonihiwa odhivela ni thagaraga ale etheegile
“Mulugu ni thagaraga dhaye ni nuuvilela anafuna wihina othwaruwe.”— ROM. 2:4.
DHITHU NNAAHUDHERIHU
Nnafuna noone dhithu enerana anamaholela mulogo wihina emukavihere muthu atheegile.
1. Ethu baani enapadduwa muthu erana yothega?
OHUDHERA wivirile, nihoona dhoholela murumiwi Pawulo aavahiliye mulogo woKorintiyu wodhela mulobwana dhaala eerana yothega enlubale. Mulobwana ole kaathwaruwile bumwahaya ohowela okumihiwa mmulogoni. Mbwenye ninga onooniha musolo wa ohudhera wula, muthu eerilena yothega enlubale podi okavihera ofiyedha othwaruwa. (Rom. 2:4) Anamaholela mulogo enaamukavihere aavi muthu ofiyedha othwaruwa?
2-3. Ethu baani nnahowelihu werana nanona wihina ddibila obe murogola oherana yothega, Ki mwahaya bwaddi?
2 Anamaholela mulogo yahinona wihina muthu oherana yothega enlubale, kinande omukavihera. Ethu baani nnahowelihu werana nanona wihina ddibila oherana yothega enlubale yamuthukulele okumihiwa mmulogoni? Nnere omukongomedha wihina asayele anamaholela mulogo wihina akaviheriwe.— Isa. 1:18; Dho. 20:28; 1 Ped. 5:2.
3 Ki akala muthuya eerilena yothega kanafuna owoga naanamaholela mulogo? Nnohowela owoga ni anamaholela mulogo wihina muthuya akaviheriwe. Werana eyo makalelo owoniha odhivela mwaha kannafuna omuyelela ddibilihu obe murogolihu. Akala muthuya kanathwaruwa, anere ononga wandana waye ni Yehova. Teto athu yanona ethu aneriyena podi omuwoga obure Yehova nnikuru naye. Bumwahaya nnohowela oliba murima wihina nawaddele anamaholela mulogo mwaha odhivela ninnihuna ni Yehova vamodha ni ddibilihu obe murogolihu. — Sal. 27:14.
ANAMAHOLELA MULOGO ENAMUKAVIHERA AAVI MUTHU EERILENA YOTHEGA ENLUBALE
4. Mwahaya bwaddi anamaholela mulogo egathapaanya ni muthu atheegile?
4 Ddibila obe murogola eerana yothega anamaholela mulogo enowaasakula anamaholela araru wihina ethapanye ni muthuya. a Anamaholela ala enohowela okanna manddile ni wiyeviha. Aliwa enowilibihedha wihina emukavihere muthu ole erilena yothega wi athwaruwe, mbwenye ehinona wi kinahowela omuwaddihedha muthuya osaddula mweddelo waye wabure. (Deut. 30:19) Teto aliwa ehinona wi kahi athu aatene enakala ninga Davidi aathwarunwe nuuvahiwa yolaga. (2 Sam. 12:13) Athu amodha yerana yothega kinafuna ovuruwana yolaga ya Yehova. (Gén. 4:6-8) Naarive dhigaali ndo, yoluba ya anamaholela mulogo fumukavihera muthu ofiyedha othwaruwa. Dhithu baani anamaholela mulogo enahoweliwa ohuddiwala mudhidhi yathapanyaga ni muthuya atheegile?
5. Anamaholela mulogo enakala aavi yatugumana ni muthu erilena yothega? (2 Timotiyu 2:24-26) (Osugwe fotu)
5 Anamaholela mulogo enamoona muthu ole atheegile ninga nimbila noofuneya na Yehova nirimele. (Luk. 15:4, 6) Bumwahaya, mudhidhi yathapanyaga ni muthuya atheegile kinawoga egaali oonyanyuweene newene kinamweeddiha mwamakalelo abure; newene wawerana makoho wihina enone ebaribari baahi ninga elemelelo. Ohiya eyo, aliwa enowilibihedha okanna dhikalelo dhinafwanyeya va 2 Timotiyu 2:24-26. (Mmwileri) Anamaholela mulogo enowoniha opama ni enopwaseya wihina yande omukavihera muthuya osaddula mweddelo waye wabure.
Ndala ninga anamakukula anamaholela mulogo enowerana dhaatedhene enandiwa wihina esayele nimbila nirimele (Osugwe ddima 5)
6. Anamaholela mulogo eniwegeredha aavi ehinathi othapanya ni muthu erilena yothega? (Romanu 2:4)
6 Anamaholela mulogo enosayela dhoholela dha Yehova. Aliwa enowilibihedha omutajhiha Yehova yamweeddihaga muthu atheegile, ni enowawubuwela madhu a Pawulo enihina: “Mulugu ni thagaraga dhaye ni nuuvilela anafuna wihina othwaruwe.” (Mmwileri Romanu 2:4.) Anamaholela mulogo anamakukula ni enohowela ohara dhoholela dha Kiristu ni otajhiha makalelo aneddihiye mulogo. (Isa. 11:3, 4; Mat. 18:18-20) Ehinathi othapanya ni muthu ole atheegile, anamaholela enohowela olobela ni opendda wodhela yoluba yewa enlubale: omuthukulela muthuya othwaruwa. Voharela enosayela mBibiliyani ni mmalivuruni mwehu ni enolobela elobaga enonelo. Teto anamaholela mulogo enohowela omunona pamadhene muthuya ni onona dhithu dhimpadduwele mwigumini mwaaye. Podi wera sidhithu dhimpadduwele mwigumini mwaaye dhimuthukulele wubuwela mwamakalelo yaale ni werana yothega ele.— Prov. 20:5.
7-8. Anamaholela mulogo enaamutajhihe aavi Yehova yathapanyaga ni muthu erilena yothega?
7 Anamaholela mulogo enotajhiha ovilela wa Yehova. Aliwa enowubuwela makalelo Yehova aweddihiliye adhaari aye akale yathegile. Motajhiha, Yehova ahoniha ovilela mudhidhi athapanyaga ni Kayini, ni omwaddela dhithu dhaampadduwele ahadidele werana dhithu dhabure ni omwaddela wihina eere omureeliha ahere akala owiwelela. (Gén. 4:6, 7) Yehova ahimulaga Davidi amulabihedhaga namavuhulela Nata, oliye owoga nladdaniho namudahinyile murima Davidi. (2 Sam. 12:1-7) Vano wihina aakavihere amwaana Ezarayeli mwaha ovuruvuru wewa, Yehova ‘owaaruma’ anamavuhulela wihina yakavihere ‘kadda labo.’ (Jer. 7:24, 25) Yehova kajhehile wihina athuya erajhihe othwaruwa wihina abajhe wakavihera, mbwenye oliye daali oobajha wakavihera. Naarive athuya edidelaga werana dhithu dhabure Yehova oowawadda wihina ethwaruwe.
8 Anamaholela mulogo enoomutajhiha Yehova yasayelaga wakavihera athu etheegile. Ninga anawoga 2 Timotiyu 4:2 anamaholela mulogo enoopendda ni muthuya ‘nuuvilela waateweene.’ Bumwahaya namaholela mulogo enohowela okala oopwaseya ni oovilela wihina amukavihere muthu atheegile werana ethu yapama. Namaholela mulogoya atakaleliwa muthuya podi ohuvuruwana yolagaya obe wathukulela amodha omorela yothega emodhave.
9-10. Anamaholela mulogo enamukavihera aavi muthu erilena yothega?
9 Anamaholela mulogo enosayela onona ethu emuthukulele muthu yole ofiyedha otheega. Nerege wandana anniyena ni Yehova wera oridha? Nerege oliye vang’ono vang’ono eere ohiya omuhudhera Bibiliya ni odhowa mmalaleyelo? Eere ohiya olobela wa Yehova kadda labo? Nerege eere ohiya owanana ogonjhiha dhithu dhabure? Anaaredhesa nnaani? Anaaredhesa ni dhithu baani? Dhithu ndha dhivolowele aavi mubuwelo waye ni murima waye? Oliye anowonelamo wihina dhothoma dhaye ni dhowera dhaye dhinomukuula Yehova Mulugu?
10 Anamaholela mulogo podi omukoha dhithu dhinamukavihere wubuwela dhithu dhimuthukulele oridhiha wandana waye ni Yehova ni dhimuthukulele otheega. Ebaribari wihina aliwa enaamukohege nuudhivela mbwenye kinahowela omukoha dhithu dhihinahoweleya onona. (Prov. 20:5) Teto aliwa podi olabihedha yoladdaniha wihina emukavihere muthuya opendda wihina oonelemo wi ele eeriliyena sabure, ninga erilena namavuhulela Nata. Yerana ndo dila yoobajha enaathapanyiwa nuliye anere wonelamo wihina ele eriliyena sabure ndo oliye podi othwaruwa ni murima waatene.
11. Yesu aweddiha aavi anamathega?
11 Anamaholela mulogo enowilibihedha omutajhiha Yesu. Mudhidhi Yesu athapanyaga ni Saawulu ooTarsu, aherana nikoho nadahinyale murima wa Saawulu, Yesu aamukohile egihina: “Saawulu, Saawulu, mwahaya bwaddi ogagiharahara?” Nimakalelo yayo Yesu omukavihera Saawulu wonelamo wihina dhithu eeriyena dhaali dhabure. (Dho. 9:3-6) Vano awogaga ni “Jezabeli,” Yesu weera: “Gihinvaha mudhidhi wihina athwaruwe.” — Ovuhu. 2:20, 21.
12-13. Anamaholela mulogo enaavahe mudhidhi aavi muthu atheegile wihina athwaruwe?
12 Emutajhihaga Yesu, anamaholela mulogo kinathamagela werana yothoma yubuwelaga wihina namatheegaya kanaathwaruwe. Amodha podi wera enoothwaruwa labo noobajha enaathapanyiwa ni anamaholela mulogo, mbwenye amodha enohowela mudhidhi wowinjhivene. Bumwahaya anamaholela mulogo enohowela othapanya ni muthuya ohiya dila modha baahi. Podi wera dila yobajha anamaholela mulogo enamuthapanyiwana oliye anobajha wonelamo wihina oherana yothega enlubale. Nuwindo, anobajha olobela wa Yehova asayelaga nlevelelo. (Sal. 32:5; 38:18) Ndo, anamaholela mulogo yahogolowela omuthapanyana anowoniha wihina ohuthwaruwa mohiyana ni dila yoobajha.
13 Wihina emukavihere muthu atheegile anamaholela mulogo enomweeddiha nuupama ni enowoniha wihina enoompwatha. Aliwa enolobela wihina Yehova areelihe wilibihedha waye teto enojheha wihina ddibiliwa anere wonelamo yothega yaye nuwindo athwaruwe.— 2 Tim. 2:25, 26.
Anamaholela mulogo podi othapanya ni muthu athegile dila dhowinjhivadhene wihina emukavihere othwaruwa (Osugwe ddima 12)
14. Baani anafwanelela othithimihiwa mwaha muthu athwaruwe ki mwahaya bwaddi?
14 Ddibila athwaruwa iyo aatene nnohagalala! (Luk. 15:7, 10) Naarive anamaholela mulogo yilibihedhaga wihina emukavihere ddibila othwaruwa, nthithimihona thawani? Newa? Mubuwele ethu asorihile murumiwi Pawulo wodhela anamathega: “Podi wera Mulugu anere osaddula murima wewa.” (2 Tim. 2:25) Yehova, dinamukavihera mukiristawu osaddula mubuwelo ni dhowera dhaye, ohiya muthu di muthu. Pawulo anowoga dhithu dhapama dhinapadduwa muthu athwaruwa: “Oliye anokanna enonelo yeebaribari, nroromelo naye nnooliba teto anogonjhiha murako wa Saddana. — 2Ti 2:26.
15. Anamaholela mulogo enaadidele aavi omukavihera ddibila athwaruwe?
15 Ddibila athwaruwa, anamaholela mulogo enerege omwaredhela wihina emukaviherege epaddi yomuzimuni wi ande owanana dhoweha dha Saddana ni eregena dhithu dhapama. (Ebe. 12:12, 13) Ebaribari wihina anamaholela mulogo kinamwaddele muthu mmodha yothega erilena muthu ole. Ki addibila a mmulogoni enohowela onona ethu-sithu?
“WASUMULULE ALE ENERANA YOTHEGA VAARI VAATHU AATENE”
16. Ninga munawogela 1 Timotiyu 5:20, Pawulo awagana aani nuwawoga madhu owi “vaari vaathu aatene”?
16 Mmwileri 1 Timotiyu 5:20. Pawulo aamulebenle madhu ala mukwaye Timotiyu aali namaholela mulogo amwaddelaga makalelo owaweddiha ‘ale enerana yothega.’ Eyo enatapulela ddi? Eyo kinatapulela wihina addibila aatene ammulogoni enohowela onona makalelo weddile museluya. Mbwenye, podi wera awagana ale yaanonne museluya. Podi wera athu ayo yahimoona oliye eeragana yothegaya obe podi wera mudhidhi awogaga wihina gihithega aliwa yaali venvo. Anamaholela mulogo enowawithana athu ayo moviteya wihina yawaddele wi muthuya ohukaviheriwa.
17. Ethu baani enavuwihiwa mmulogoni yothegaya yanoniwa obe akala enere onooneya, ki mwahaya bwaddi?
17 Malabo mamodha podi wera addibila owinjhiva ehinona yothegaya obe enere onona, yereya ndo podi wera athuya enahowela onona podi okala mulogo waateene. Bumwahaya anosakuliwa namaholela mulogo wihina aanusiyari wi ddibila obe murogola ohusumululiwa. Mwaha wa ddi? Ninga murumiwi Pawulo awogiliye: “Wihina amodha enerena emodhave” obe nere wihina amodha enaamorele yoweha emodhave.
18. Anamaholela mulogo enamweeddiha aavi muzombwe obe namwali abaddiziwe, mbwenye ahinakwanihe yaka 18 erana yothega? (Osugwe fotu.)
18 Ki anamaholela mulogo enere ddi akala muzombwe obe namwali ahinna yaka 18 mbwenye amanle obaddiziwa ohuthega? Anamaholela mulogo enowathoma anamaholela abiili wihina ethapanye nuliye vamodha ni makolo aye eli makiristawu. b Anamaholela mulogo enere wakoha makolo aye dhithu yeriliwana wihina emukavihere mwaniwa osaddula ekalelo yaye ni othwaruwa. Akala mwaana ole anowavuruwana makolo aye nuwindo osaddula ekalelo yaye anamaholela ale podi othoma ohususana museluya. Ndo makolo aye enere odidelave omukavihera epaddi yomuzimuni teto anamaholela mulogo kinaahogolowele omuthapanyana mwaha Yehova avahile abaabi mutholo wowasumulula aniwa mwamakalelo apama. (Deut. 6:6, 7; Prov. 6:20; 22:6; Efe. 6:2-4) Malabo mamodha anamaholela mulogo enere osayela onona akala makolo aye enna omukaviherave epaddi yomuzimuni. Ki akala oliye kanathwaruwa ni anodidelave werana dhithu dhabure? Yakala ndo, anamaholela mulogo enere osayela othapanya nuliye vamodha ni makolo aye eli anamoona a Yehova.
Muzombwe obe namwali abaddiziwe mbwenye ahinna yaka 18 erana yothega enlubale, anamaholela mulogo abiili ni makolwaye eli mukiristawu podi othapanya nuliye (Osugwe ddima 18)
“YEHOVA OHUTHABWA OKANNA THAGARAGA NI NTHEBWA”
19. Anamaholela mulogo enilibihedha aavi omutajhiha Yehova yamweeddihaga muthu erilena yothega?
19 Anamaholela mulogo yathapanyaga ni muthu atheegile kidduwale wihina ehikanna mutholo wokavihera wihina mulogo okale woweela. (1 Kor. 5:7) Mbwenye enofuna wihina namatheegaya athwaruwe bumwahaya aliwa enojheha wihina asaddule emuthu yaye ni athwaruwe. Mwaha wa ddi? Mwaha enafuna emutajhihe Yehova “ali muthu athagaraga ni anthebwa.” (Tiya. 5:11) Moone makalelo murumiwi Juwawu aweddihiye addibila ni arogola nuudhivela. Oliye ahalebela egihina: “Anaaga, ginulebelani dhithu ndha wihina munaadhe mwerena yothega. Mbwenye muthu athega, nikanna namakavihera oli vamodha ni Ababa: Yesu Kiristu, muthu owogowa.” — 1 Juwa. 2:1.
20. Ethu baani nnaasuzihu ohudhera winaharela ni wogomihedha wa namasugwera ola?
20 Yowukulihaya sowihina malabo mamodha muthu aathegile kanafuna othwaruwa. Yereya ndo muthu yoyo anofwanelela okumihiwa mmulogoni. Yakala ndo, anamaholela mulogo enerana ddi? Ohudhera winaharela ni wogomihedha wa namasugwera ola onere wakula makoho ala.
JHIBO 103 Anamaholela — nvaho wa Yehova
