OHUDHERA 32
JHIBO 44 Nlobelo na mudhaari osegedheya
Yehova anafuna wihina athu aatene ethwaruwe
“Yehova . . . kanafuna wi muthu di muthu agujhuliwe, mbwenye anafuna wi aatene ethwaruwe.” — 2 PED. 3:9.
DHITHU NNAAHUDHERIHU
Nnere wonelamo yotapulela ya madhu owi othwaruwa, mwahaya bwaddi ekala ethu yofuneya othwaruwa ni makalelo Yehova anaakaviheriye athu aatene othwaruwa.
1. Othwaruwa winatapulela ddi?
NATHEEGA nnohowela othwaruwa. Mowiwanana ni Bibiliya muthu athwaruwa onowidda ethu eriliyena, onosaddula mubuwelo waye, anohiya werana ethu ele yabure teto anothoma ohuhogolowela werana ethu emodhave. — Omusugwe Glosariyu, “Arrependimento.”
2. Mwahaya bwaddi iyo aatene nigahowela ohudhera wodhela othwaruwa? (Neemias 8:9-11)
2 Athu aatene enohowela ohudhera wodhela othwaruwa. Mwaha iyo aatene nnothega malabo aamateene. Iyo nili ahima a Adawu ni Eva, bumwahaya nihivala yothega ni okwa. (Rom. 3:23; 5:12) Kaavo muthu ahinna yothega. Naathuya oororomeleya akale ninga murumiwi Pawulo yohowela osugwera murima wewa wihina onathukulele werana dhithu dhabure. (Rom. 7:21-24) Nnohowela okala owuukuweene mudhidhi waatene mwaha wa dhotheega dhehu? Naari, mwaha Yehova dathagaraga, oliye anafuna nihagalalege. Karajhihani wubuwela dhithu dhapadduwele maJudewu a mudhidhi wa Neemiya. (Mmwileri Neemias 8:9-11.) Yehova kafuna wihina aliwa yeeddege owukuwene yubuwelaga dhoviriganiha dhewa dhakale. Oliye afuna wihina aliwa emwebedhege nuuhagalala. Yehova ohunona wihina muthu athwaruwa onohagalala, bumwahaya aganihudhiha wi sapama othwaruwa. Nathwaruwa, nikanne ebaribari wihina Baabihu a thagaraga anere onilevelela.
3. Ohudhera wula nnaasuze ddi?
3 Ohudhera wula nnere woona dhithu tharu dhinanikavihere osuza wodhela othwaruwa: (1) Yehova aahudhihe ddi amwaana Ezarayeli wodhela othwaruwa? (2) Yehova eerilena ddi wihina aakavihere athu oothega othwaruwa? Ni (3) Yesu aahudhihe ddi anamahara aye wodhela othwaruwa?
YEHOVA AAHUDHIHE DDI AMWAANA EZARAYELI WODHELA OTHWARUWA?
4. Ethu baani Yehova aahudhihiye amwaana Ezarayeli wodhela othwaruwa?
4 Yehova nuwegeredha nlogo naamwaana Ezarayeli oliye werana nipangano naaliwa. Yehova ahavaha amwaana Ezarayeli malamulo yabarele ni yakavihere, vano aliwa orumedha wawiwelela. Teto Yehova wapaganya eraga: ‘Nlamulo nna ginuvahimini peeno kannathabwa orusa wihina mwiwelele, newene kanulapenleni.’ (Deut. 30:11, 16) Yahere amwaana Ezarayeli ehawiwelela malamulo ale—, obe neere, esakula wawebedha amulugu amodha, Yehova eere ohiya wareeliha teto aliwa yerege woona goyi. Naarive dhigaali ndo, eyo kiyatapulela wihina Yehova eere waanyanyala. Aliwa yohowela ‘omuhogolowela Yehova, Mulugu ewa, ni ovuruwana ndhu naye.’ (Deut. 30:1-3, 17-20) Ni madhu mamodha, aliwa yahikannave ofuru wothwaruwa. Teto yahathwaruwe, yere ohogolowela okanna wandana ni Yehova ni eere ohogolowela wareeliha.
5. Yehova oonihile aavi wihina kaanyanyanle nlogo naye? (2 Reis 17:13, 14)
5 Naarive amwaana Ezarayeli egaali nlogo nosakuliwa ni Mulugu, dila dhowinjhivadhene aliwa kiyamwiwelela. Ohiya wawebeedhave amulugu amodha, aliwa yoothabwa werana dhithu dhabure. Mwaha wa yeyo, yahithabwa woona goyi. Mbwenye Yehova kaaselele wakavihera aliwa naarive yeragana dhithu dhabure. Dila dhowinjhivadhene owaaruma anamavuhulela wihina yaalobe aliwa wihina ethwaruwe ni emulabelege Yehova ni murima waatene. — Mmwileri 2 Reis 17:13, 14.
6. Yehova aalabihedhe aavi anamavuhulela aye wihina ahudhihe nlogo naye wi sofuneya othwaruwa? (Musugwe fotu.)
6 Kabeni noone makalelo Yehova alabihedhiye anamavuhulela wihina yawaddele amwaana Ezarayeli, ethu yapadduwele mwaha wa dhithu dhabure yeriwana ni makalelo aakaviheriye othwaruwa ni wawerana masadduwo. Motajhiha, Yehova omuruma Jeremiya wi awoge ni nlogo eraga: ‘Gihogoloweleni avuruvuru nyu . . . Kaginusugweni ngaali oonyanyuweene mwaha gili oororomeleya . . . Kaginukoyeleni ntxiga. Mbwenye murumedhe yothega yenyu, mwaha kammwiwelele Yehova, Mulugu enyu.’ (Jer. 3:12, 13) Amulabihedhaga Joweli Yehova weera: ‘Muhogolowele wa miyo ni murima weenyu waatene.’ (Joel 2:12, 13) Teto Yehova ahimulabihedha Izayiya wihina awaddele eraga: ‘Mwiisuwe, mwiifufuthe, nvenyihevo vamentoni vaaga obure waatene munerinyuna; muhiye werana dhithu dhabure.’ (Isa. 1:16-19) Vano Yehova omulabihedha Ezekiyeli wihina akohe nlogo egihina: ‘Nerege miyo ginohagalala nuukwa wa muthu abure? . . . Miyo kaginafuna wihina muthu abure ahiye dila yaye wi akalegewove? Miyo kaginahagalala nuukwa wa muthu, . . . bumwahaya, muthwaruwe wihina mukalegewove.’ (Eze. 18:23, 32) Yehova onohagalala amoona muthu agaathwarunwe, mwaha anafuna wihina aakele egumi yohimala! Yehova kanajheha wihina athu ethwaruwe wihina akavihere, mwahaya bwaddi nigawoga ndo kabeni none dhotajhiha dhinoniha pamadhene eyo.
Yehova owalabihedha anamavuhulela wihina akavihere nlogo naaye othwaruwa (Musugwe ddima 6 ni 7.)
7. Yehova alabihedhaga yopadduwa ya Ozeya ni mwariye ethu baani oliye ahudhinhiye nlogo naye?
7 Moone makalelo Yehova alabihedhiye yopadduwa wihina ahudhihe nlogo naaye wodhela othwaruwa. Yehova ahiwoga ethu yereyile ni Goomer, mwadha namavuhulela Ozeya. Oliye okuma mba odhowa oraruwaga naalobwana amodha. Ethu eeriliyena yahithabwa okala yabure ofiyedha ohukanna makalelo oomukavihera? Yehova anoona dhithu dhili mmurima owoga ni Ozeya egi: ‘Ohogolowele omudhivela muhiyana anadhiveliwa ni mulobwana mmodha ni anawerana mararuwo, ndo ninga Yehova anaadhiveliye nlogo naamwaana Ezarayeli wula aliwa yaahogolowelaga amulugu amodha.’ (Ose. 3:1; Pro. 16:2) Moone wihina mwaadha Ozeya annave werana dhithu dhabure obe yothega yinlubale. Naarive dhigaali ndo, Yehova omuruma Ozeya wihina anvede Goomer ni amuhogolowele. a Nimakalelo mamodhave, Yehova kaanyanyanle amwaana Ezarayeli naarive edidelaga werana dhithu dhabure. Eyo enowoniha wihina Yehova owadhivela ni oofuna wakavihera ofiyedha othwaruwa ni ohiya mweddelo wewa. Mwaha yopadduwa ela noonilihu podi okumelela nikoho ninga nna: ‘Eyo enatapulela wihina Yehova napendda dhithu dhili mmurimani anowasayela athu enerana dhotheega dhinlubale wihina aakavihere ofiyedha othwaruwa?’ (Pro. 17:3) Kabeni noone.
YEHOVA EERILE DDI WIHINA AAKAVIHERE ATHU OOTHEGA OTHWARUWA?
8. Yehova eerile ddi wihina amukavihere Kayini wi athwaruwe? (Génesis 4:3-7) (Musugwe fotu.)
8 Kayini aali mwaana oobajha a Adawu ni Eva. Ninga iyo aatene Kayini ahivalihiwa yothega ni makolo aaye. Bibiliya anihina: ‘dhowera dhaye dhaali dhabure.’ (1 Juwa. 3:12) Podi wera siyeyo yamuthukulele Yehova ‘ohuhagalala ni Kayini newene ni mukutho waye.’ Ohiya osaddula ekalelo yaye, ‘Kayini onyanyuwa ni okala owuukuweene.’ Ethu baani eerilena Yehova wihina amukavihere? Yehova othapanya ni Kayini. (Mmwileri Génesis 4:3-7.) Moone wihina Yehova ahipendda ni Kayini egi eerana dhithu dhapama Yehova eere omureeliha. Teto Yehova ahiwoga dhithu dhaampadduwele adidela werana dhithu dhabure. Mowukuula, Kayini kaavuruwane, oliye kafuna onvuruwana Mulugu ni kafuna othwaruwa. Mwebaribarene Yehova ahithabwa wukuuwa. Nerege mwaha wa yeyo Yehova othoma ohumukavihera muthu di muthu ofiyedha othwaruwa? Naari!
Yehova ahixixa omukavihera Kayini wihina athwaruwe ni oliye omoniha mwahaya bwaddi sowopiha werana yothega (Musugwe ddima 8)
9. Ethu baani Yehova eriliyena wihina amukavihere Davidi othwaruwa?
9 Yehova oothabwa omudhivela mwene Davidi, ofiyedha owoga egihina oliye muthu: ‘anahagalasa murima waaga.’ (Dho. 13:22) Mbwenye Davidi ahithabwa werana dhotheega dhinlubale ninga okuma mba ni ompa muthu. Mowiwanana ni Nlamulo aavahiwe Moyizeji, Davidi afwanelela opiwa baahi. (Lev. 20:10; Núm. 35:31) Naarive dhigaali ndo, Yehova oofuna omukavihera mwene Davidi othwaruwa. b Oliye omuruma namavuhulela Nata wihina amwaredhele Davidi, naarive Davidi ahonihile wihina ahithwaruwa. Nata olabihedha nladdaniho niwanana ni museluya wihina adahinye murima wa Davidi, vano Davidi wonelamo museluya. Oliye wonelamo wihina ahithabwa omuukula Yehova vano oliye wukuuwa vanlubale. (2 Sam. 12:1-14) Madhu enafwanyeya mulivuruni na Salmo enowooniha wihina Davidi ahithwaruwa. (Sal. 51, musolo) Athu owinjhiva enafiyedha otheega yawileri madhu enafwanyeya va Salmo enawona madhu ala ninga elebeliwe aliwa. Wuubuwela makalelo Yehova amonihiliye odhivela Davidi ni omukavihera ofiyedha othwaruwa, onakala aavi?
10. Onakala aavi wapenddaga ovilela ni olevelela wa Yehova?
10 Yehova anoothabwa widda yothega ni aneere watoriha athu aatene ehinathwaruwa. (Sal. 5:4, 5) Mbwenye oliye ohunona wihina iyo aatene nili athu oothega teto oherana dhaatedhene wihina anikavihere ogonjhiha yothega. Yehova anna wilibihedha wakavihera athu aatene othwaruwa naaleya enerana dhithu dhonyakavala. Nubuwela wodhela ovilela ni olevelela wa Yehova nnothoma odidelave okalave oororomeleya ni othwaruwa mowaguva noona wi niherana ethu yabure. Vano, kabeni noone ethu Yesu aahudhihiye anamahara aye wodhela othwaruwa.
YESU AAHUDHIHE DDI ANAMAHARA AYE WODHELA OTHWARUWA?
11-12. Yesu aakavihere aavi anamahara aye wonelamo wihina Yehova Mulugu oolevelela? (Musugwe fotu .)
11 Nsaka noobajha, wahifiya mudhidhi wihina athwanyuwe Mesiya. Ninga nihudherihu osuza wivirile, Yehova ohumulabihedha Juwawu Namabaddiza ni Yesu Kiristu wihina yahudhihe athu wi sofuneya othwaruwa. — Mat. 3:1, 2; 4:17.
12 Yesu agaali mwilaboni yavati, ahahudhiha anamahara aye wihina Yehova onofuna vanlubale walevelela athu. Wihina oonihe wi awoga ebaribari, oliye owoga nladdaniho na mwaana aadduddumadhe vaade. Nladdaniho nno, nnomuwoga muzombwe anathoma ovenya vaade nuwindo odhowa weddelaga dhaye. Mbwenye nuuvira mudhidhi oliye ‘othwaruwa’ ni ohogolowela vaade. Ki baabe amwaakele aavi? Yesu owoga egi, mwanaye “agaali wolapelawene, ababe omoona ni omweddela thagaraga. Aliwa omuthamagela, omukubarela ni ombejari.” Muzombwe ole afuna aalobe ababe wihina emoonege ninga namalaba ewa, mbwenye ababe owoga yegi: “Mwanaga ola . . . ahirimela vano ukumelela.” Ndo ababe omwaakela vaade vewa. (Luk. 15:11-32) Mwebaribarene, Yesu agaali odhulu dila dhowinjhivadhene owawoona ababe yaweeddelaga athu thagaraga ni yalevelelaga mowaguva ale yathwaruwa. Nladdaniho nna awonge Yesu nnoonlibiha ni nnowoniha wihina baabihu Yehova anoneeddela thagaraga!
Nladdaniho awogile Yesu wodhela mwaana aadduddumadhe vaade, baabe anomuthamagela mwanaye ahogolowele vaade nuwindo omwabarasari (Musugwe ddima 11-12)
13-14. Murumiwi Peduru ahudhere ddi wodhela othwaruwa, ki aahudhihe ddi amodha? (Musugwe fotu.)
13 Peduru ahihudhera ni Yesu wodhela othwaruwa ni olevelela. Peduru oothabwa oviriganiha, naarive dhigaali ndo Yesu omulevelela. Motajhiha, Peduru omukoodda Yesu dila tharu, mwaha wa yeyo, oliye wukuuwa vanlubale. (Mat. 26:34, 35, 69-75) Mbwenye Yesu nuvenyihiwa muukwani, oliye omuthanyuwedha Peduru, podi wera mudhidhi yole aalivo yeka. (Luk. 24:33, 34; 1 Kor. 15:3-5) Ebaribari wihina Yesu ahinona wi Peduru ahithwaruwa mbwenye afuna amoonihe wi ahimulevelela. — Omusugwe Marku 16:7 nota na estudu “e Pedro.”
14 Mwaha Peduru oleveleliwa ni Yehova vamodha ni Yesu, eere wanda wahudhiha amodha wodhela othwaruwa ni olevelela. Nuuvira mudhidhi, nuujhiwa mathanga a Pentekoste, Peduru owoga mwaha vamentoni vamaJudewu yahamurumedhe Yesu egihina aliwa yahikanna nibili mwaha opiwa wa Mesiya. Naarive dhigaali ndo, nuudhivela Peduru owoga naaliwa egihina: “Muthwaruwe ni musaddule murima dhenyu wihina dhothega dhenyu dhileveleliwe, vano Yehova uvaheni malabo a murenddele.” (Dho. 3:14, 15, 17, 19) Peduru ahakavihera athu ale woonelamo wihina futhwaruwa winamuthukulela muthu ohiya mubuwelo ni dhowera dhaaye dhabure. Ni madhu mamodha muthu ole atheegile anothukula mweddelo muxa wi amuhagalasege Yehova. Peduru wakavihera wonelamo wihina Yehova eere othimiha dhothega dhaathu. Vasogolova, Peduru wakavihera makiristawu okanna ebaribari wihina: ‘Yehova . . . onovilela ni nyu, mwaha kanafuna wi muthu di muthu agujhuliwe, mbwenye anafuna wi aatene ethwaruwe.’ (2 Ped. 3:9) Muthenga ola boolibiha vanlubale mwaha onowoniha wihina Yehova podi walevelela ale emutheegenle oliye!
Yesu omulevelela ni omulibiha murumiwi aye athwaruwile (Musugwe ddima 13-14)
15-16. a) Nimakalelo baani murumiwi Pawulo aahudhenriye wodhela olevelela? (1 Timotiyu 1:12-15) b) Ohudhera winaharela nnaasuze ddi?
15 Athu vang’ono yohowela othwaruwa ni oleveleliwa ni Mulugu ndale ninga Saawulu ooTarsu. Oliye oothabwa waharahara makiristawu. Monelo wa makiristawu owinjhiva, Saawulu kafwanelela oleveleliwa, teto aali muthu ahande okaviheriwa ofiyedha osaddula mweddelo waye. Mbwenye monelo wa Yesu wahihiyana ni moonelo waathu amodha. Yesu ahinona wi Saawulu eere wanda osaddula egumi yaye ni othwaruwa. Yesu ni Yehova yowoona wi Saawulu ahikanna dhikalelo dhapama. Bumwahaya Yesu adhe awogege eraga: “Mulobwana oyo amusakule dimiyo.” (Dho. 9:15) Yesu ahifiyedha werana matikiniho wihina amukavihere Saawulu othwaruwa. (Dho. 7:58–8:3; 9:1-9, 17-20) Saawulu anoniwe ninga murumiwi Pawulo nuukala mukiristawu, ohoniha dila dhowinjhivadhene wihina ootamalela opama wa Yehova ni wa Yesu. (Mmwileri 1 Timotiyu 1:12-15.) Bumwahaya Pawulo adhe awogege egi: ‘Mulugu, nuupama waye, anafuna wihina othwaruwe.’ — Rom. 2:4.
16 Labo dhaala Pawulo onona wodhela yothega yonyakavala eerilena mulobwana dhaala aali mulogo woKorintiyu. Mulobwana oyo eere oraruwa mbwenye odidela okala mmulogoni. Ethu baani eerilena murumiwi Pawulo? Ethu Pawulo aalebeliye akudda Korintiyu enonihudhiha makalelo Yehova anonihiye odhivela mwaha wasinyusa adhaari aye ni makalelo anamooniye thagaraga muthu athwaruwa. Ohudhera winaharela, nnere woona ethu epadduwile mulogo yole ni makalelo ootajhiha thagaraga dha Yehova.
JHIBO 33 Onvokedhe mutholwawo Yehova
a Ela epadduwe dila modha baahi. Peeno, Yehova kanawoga wihina muthu araruweliwe adidele okala ni mamune obe ni mwariye. Yesu aholeliwaga ni Yehova owoga wihina muthu araruweliwe podi osakula wapwadha mateloya obe naari. — Mat. 5:32; 19:9.
