Murumiwi Pawulo ahalebela makiristawu oTesalonika egihina: ‘Pasope ni muthu ahinawiwelela madhu ala eli mukartani mwehu muna.’ (2 Tes. 3:14) Wale, nuubuwela wihina enahowela ohara yoholela ela baanamaholela mulogo. Akala muthu aanna walupa malagano a mBibiliyani, anamaholela mulogo yowoga mwaha wihina yakongomedhe addibila okala pasope ni muthu yoyo. Yereya ndo, anamalaleya kiyajha mudhidhi wowinjhiva ni muthu yoyo, mbwenye naarive dhigaali ndo yotugumana ni yolaleya vamodha nuliye.

Mbwenye vano nnohowela osaddula monelo wehu. Vano nnowonelamo wihina yothomaya sa kadda mukiristawu. Vano kinahoweleya anamaholela mulogo owoga mwaha yaawaddelaga addibila wi ekale pasope ni muthu anaalupa malagano a mBibiliyani. Mwahaya bwaddi ndhe nisaddulege monelo wehu? Kabeni noone ethu yamuthukulele murumiwi Pawulo ovaha yolaga ela.

Pawulo ohuwoga wihina amodha yaali athu ‘oohiwelela.’ Oliye ahavaha dholaga dha mBibiliyani mbwenye aliwa kayiwelele. Dila yogomihedha oliye wawaredhela ahakongomedhaga egihina: “Akala muthu kanafuna wapara mabasa, kajhe.” Mbwenye amodha naarive eganna kopolo dhowapara mabasa aliwa kayafuna wisamalela. Teto yovolowela muselu dhaathu amodha. Ki vano makiristawu yaweeddihege aavi athu ninga yala oohiwelela? —2 Tes. 3:6, 10-12.

Pawulo wera “pasope naathu yala.” Ni egerego, madhu ala enatapulela wanona munyaathu yala nindo iyo okala pasope wihina mweddelo wewa onanivolowele. Yolaga ela Pawulo kaavahile anamaholela mulogo baahi, mbwenye mulogo waatene. (2 Tes. 1:1; 3:6) Bumwahaya kadda mukiristawu amoona ddibila obe murogola alupaga malagano a mBibiliyani eere othoma ‘oheddaga ni muthu yoyo’ ahiniwelela.

Eyo enatapulela wihina muthu oyo ooniwege ninga eere okumihiwa mmulogoni? Naari, mwaha Pawulo ohuwoga egi: ‘Mudidele omukavihera.’ Bumwahaya kadda mukiristawu eerege omugumanana muthu oyo omutugumanoni obe mmalaleyelo, mbwenye oliye eere othoma oharedha nuliye. Mwaha wa ddi? Pawulo ohuwoga egihina: “Wihina akanne manyazo.” Namurabelaga ddibila oyo, podi wera anere okanna manyazo mwaha wa dhithu aneriyena ni podi osaddula mweddelo waye. — 2 Tes. 3:14, 15.

Muthu ananona aavi akala podi omurabela ddibila? Vobajha, ninga murumiwi Pawulo alebiliye sapama okanna ebaribari wi muthuya ‘dohiiwelela.’ Oliye kamwagana muthu anna monelo wohiyana ni wehu wodhela muselu bumuselu ohunalupa malagano a mBibiliyani. Teto kamwagana muthu anitheegele nuwindo iyo kuheddihagana pama. Mbwenye amwagana muthu anaapwaza malagano a mBibiliyani

Peeno noona wihina ddibila obe murogola anoopwaza dholaga dha mBibiliyani a iyo podi othoma oharedha obe ojha mudhidhi nuliye. Woona wihina yothoma eyo sehu kannahowela owoga naathu amodha ehili amudhihu baahi. Ebaribari wihina nnerege oogumana ni muthu yoyo omutugumanoni obe nerege olaleya vamodha. Vano asaddula emuthu yaye ni dhowera dhaye nnere ohogolowela waredha nuliye.