Yehova enre amwaana Ezarayeli ekale oweela. Wihina aakavihere werana ndo, Yehova wavaha dhoholela dhawoga: ‘Vaari va nlogo nenyu, kamukanne elemelelo yowaabana modha ni mukwaye. Kumuganegena obure mwanddamanaawo. Miyo giri Yehova.’​—Lev. 19:2, 16.

Madhu owi ‘kuvenyihe nlada wodhela’, enooneleyamo letira nimodha nimodha ni Ebarayiku. Madhu ala enatapulela ddi? Muselu dhaala onawoga wodhela Ajudewu onihina: “Madhu a versikulu ela, enoorusa wawonelamo, mwaha kinoneye pama enatapulela ddi ni Ebarayiku, teto neera nileri letira nimodha nimodha enatapulela ‘ohimela wodhela, epaddi obe waddamela.’”

Anamahudhera amodha enihina enowiwanana ni versu 15, enihina: ‘Mwawogaga muladdu okale owoobowa. Kukanne nsakulo ni muthu oohawa obe ooreela. Owogege muladdu dha mwanddamani awo ni wogowa.’ (Lev. 19:15) Akala siyeyo, malamulo enafwanyeya va versu 16, yerege woneleyamo pama weddiha mwamakalelo owogowa, otiribunale, mmalonddani obe vemudhini. Mwana Ezarayeli kafwanelela werana ethu mohogowa wihina akanne razawu obe mukwaye empadduwele ethu yabure. Mwebaribarene iyo, kannafwanela werana ndo, mbwenye siyeyo enowoneleyamo nilerigi versu 16.

Kasugwa pamadhene enawoga epaddi modha ya versikulu ela. Versu ela enihina Mulugu ahiwoga ni nlogo naaye wi ehikanne elemelelo yowaabana. Teto sapama wubuwela wi waaba ethu yowopiya opitha wawoga obure athu amodha. (Pro. 10:19; Ecl. 10:12-14; 1 Tim. 5:11-15; Tiago 3:6) Muthu ambela waaba, oliye anna owoga dhego dhowoota wihina atakalihe emuthu yamukwaye. Anaaba, podi ofiyera omwinkedha mukwaye, naarive anonaga wi muthu oyo podi ofiyera opiwa. Yotajhiha enaligana ni yeyo, saalobwana abili yamwinkedhe Naboti, ethu aheriliyena. Winkedhiwa wule, wahifiyedha omuthukulela Naboti ovonyiwa ni mabwe ofiyedha okwa eherilena ethu. (1 Reis 21:8-13) Obe nere, ninga enawogela Levítico 19:16, muthu anaaba, eri ninga muthu anamuganana obure mwanddamanaye wihina apiwe.

Ohiya eyo, muthu anamwaba mukwaye, enatapulela wihina onoomwidda. Va 1 João 3:15, vinihina: ‘Yole onamwidda ddibile namapa, nyu muhunona pamadhene wi kaavo namapa onaakele egumi yohimala.’ Sapama onona wihina Yehova nusoriha ndo, wihina kayari yapama omuganana obure mwanddamanihu, oliye osorihave egi: ‘Kumwidde ddibilo mmurimani mwawo.’ — Lev. 19:17.

Bumwahaya malamulo ala ehiyana ni Levítico 19:16, enawaddela makiristawu okala pasope. Iyo nnofwanelela orabela mubuwelo ola, onanthukulele wawaba athu amodha. Akala iyo nnowaganana obure athu amodha, nawabaga obe naari nawogaga obure, nnere otonyihedha mmurimani mwehu wihina nnoomwidda muthu yole. Ninga makiristawu, iyo kanerege ndo.​—Mat. 12:36, 37.