1-2. a) Mulugu awaddele ddi arumiwi araru wihina yerena, ki aliwa yahiwelela? b) Musolo ola nnahudhere muselu baani?

NUUVIRA paskwa a yaka 32 mudhidhi wehu, murumiwi Peduru, Tiyagu ni Juwawu, woona ethu yootikiniha. Egari va mwango woolapa, podi wera ari mwango hermoni, Yesu osadduliwa vamento vewa. Bibliya onihina: ‘Vakoveni vaye voojerimela ninga nduwa, dhowara dhaye dhojerimela ninga waara.’ (Mat. 17:1-4) Mudhidhi vang’ono matikiniho ala nuumala, arumiwi ala omwiwa Mulugu egihina: ‘Ola di Mwanaga, ginamudhivelimi ni ginamurumedhimi. Munvuruwanege.’ (Mat. 17:5) Arumiwi ale araru werana ndo. Ofiyera okwa wewa, aliwa yokalawo yonihaga wi yovuruwana ndhu na Yesu. Iyo nnafuna naatajhihe aliwa.

² Musulo ovirile, nihoona wihina ovuruwana ndhu na Yesu enovolowelavo oselela werana dhithu dhimodha. Musulo ola nnere woona dhithu bili Yesu awogiliye wihina neregena.

3. Mowiwana ni Mateus 7:13, 14, Yesu anirumme wera ddi?

³ Omwileri Mateus 7:13, 14. Yesu erile dhihikalawo musiwo menddi dhohiyana. Kadda musiwo ehikalawo dila winatukuleliwa. Dila emodha sorambalala, dila emodhaya sopurana. Kawo dila yanatharu, dhiriwo bili dhendha baahi. Kadda muthu anohowela osakula dila baani anaharegiye, ela yothoma yathima enahoweleya wihina nerena — teto yosakula yehu sinanithulele wakela egumi yohimala.

4. Dila ‘yorambalala’ eri avi?

⁴ Kaniddiwaale wihina dila dhabilidhene sohiyana. Athu owinjhiva enasakula dila yorambalala, mwaha sokweya weeddamo  olenddo. Sowuukula onona wi athu owinjhiva, enoodidela ohara dila yela ni yaatajhihaga athu owinjhiva eneriwana. Mbwenye annyaya kinonelamo wihina dila ela, sa Saddana. Dila ela mburo winathukuleliwa fuumakwelo.​—1 Cor. 6:9, 10; 1 João 5:19.

5. Athu owinjhiva yerilena ddi wihina efwanye dila ‘yopurana’ ni oharagave dila yela?

⁵ Dila ‘yopura’ sohiyana, teto Yesu wera athu ang’onove binafwanya dila yela. Mwahaya bwaddi? Mwaha wanamavuhulela owoota. Bumwahaya Yesu adhe aakongomedhege anamaharaye va Mateus 7:15. Athu amodha enihina dhihikalawo dhigereja dhohiyana-iyana, mbwenye dhatedhene enihina enahudhiha ebaribari yeyo. Mwaha wa yeyo athu owinjhiva enohiya osayela webedha webaribari, amodhaya enosimwela mwaha wa dhithu dhinahudhihiwa mugereja. Mbwenye enowandeya ofwanya dila enathukulela wigumini. Yesu enre: ‘Mwadidela wawiwelela madhu aaga, muri anamahara aaga, munere onona ebaribari, vano ebaribari enere wuwobolani.’ (João 8:31, 32) Akala we ohufwanya dila yeebaribari ni ohuthoma uhahara anamwinjhi, onotamaleliwa vanlubale. We ohumuhudhera pamadhene Bibliya, ni ohunona Mulugu anajheheriye wihina werena, vano onovuruwana ndhu na Yesu. Motajhiha, we ohuhudhera wi Yehova anajhehera wihina okodde dhohudhiha dhowoota dha mugereja, teto oselela ojha festa dhinajhiwa naamalabo. Mwebaribarene ohonelamo wi onyanyala dhithu ndha ni werana ele Yehova analobiye, podi okala ethu yorusa. (Mat. 10:34-36) Podi wera kayari ethu yokweya wihina werana masadduwo. Naari dhigari ndo, kuselele mwaha onowadhivela Ababo Yehova, teto onofuna ohagalasa murima waye. Mwebaribarene Yehova anere ohagalala mwa wawo!​—Pro. 27:11.

6. Mowiwanana ni Salmos 119:9, 10, 45, 133, enaanikavihere ddi odidela weeddave dila yopurana?

⁶ Enaanikavihere ddi odidela weedda dila yopurana? Kubuwela ayii: Dila dhimodha yopurana dhinakala mburo dhootama ninga mmwangoni. Teto makome omenli enokanna txinga, enamukavihera motorista okala obareleyene aharaga dila yele. Dilaya yahere yahikalawo txinga, motorista ere oholowa mudilamwa ofiyera ompadduwela ngovi. Mbwenye mwebaribarene, kaavo muthu aafiyedhe owoga egi, txinga ndha kadhinakavihera ethu, dhinanipwesa muru baahi. Ni makalelo mamodhave, malagano a Yehova enafwanyeya mBibliyani enaligana ni txinga dhendha. Enoonibarela ni enonikavihera odidela oharave dila yopurana.​—Omwileri Salmos 119:9, 10, 45, 133.

7. Mwahaya bwaddi we ninga muzombwe, kinafwanelela wubuwela wihina dila yopurana kinuuvahe egumi?

⁷ Akala ori muzombwe, onokala nowubuwela wihina malagano a Yehova ehithabwa orusa, teto kinuuhiya werana dhithu onafuniwe? Siyeyo Saddana anubuweliye wihina wubuwelege. Ethu anafuniye fuwubuweliha wihina ethu yapama fuuhara dila yorambalala, mwemmo athu owinjhiva eneriwana onafuniwa. Saddana anowufunana wihina kunojhavo egumi. Oliye anowalabihedha akwawo ooskola ni interneti wihina wubuwelege dhendho. Oliye anafuna wubuwelege wi omulabela Yehova winoovonganyedha egumawo. * Mbwenye onadduwale: Saddana kanafuna wi woone ethu baani enupadduwele omagomihero wa  dila yela onahariwe. Mbwenye Yehova dohiyana, oliye anafuna wi we woonege egumi yapama enadha osogolo, enuukavihere odidela weeddagave dila yegumi​—Sal. 37:29; Isa. 35:5, 6; 65:21-23.

8. Azombwe enahudhera ddiniyani ni ele empadduwele Olaf?

⁸ Kasugwa empadduwele ddibila dhala anithaniwa Olaf. * Akwaye amodha a Olaf yomutujesa wihina aagonihege anahiyana dhala ooskola. Vano oliye nuwawaddela wi namona a Yehova, teto egumaye eeddiha mowiwana ni Bibliya anahudhihiye, anahiyana amodha a musala mwaaye woonaga eyo ninga ethu yorusa. Aliwa yowerana dhatedhene wihina aagonihe, mbwenye Olaf omaga murima newene kamorele mukwegweni. Mbwenye ela kayari yoweha yobajha anafwanyiwigiye, Olaf anihina: “Apurusori aaga ogitujela omukosa fakuldadi, mwaha gerana ndo athu owinjhiva yerege ogiriha, teto gere okala muthu oovuwa.” Emukavihere Olaf ogonjhiha dhoweha ndha ddi? Oliye anihina: “Miyo gahandana  vanlubale ni addibila ammulogoni, aliwa yakala ninga amudhaga. Vano miyo othabwaga omuhudhera Bibliya. Kadda labo gamuhudherimi, fwathabwimi woonelamo wihina gihifwanya ebaribari. Bumwahaya miyo wiikoma wihina gimulabele Yehova.”

9. Akala nnofuna odidela oharagave dila yopurana, nere ddi?

⁹ Saddana anagana ninga oholowe dila enadhowa mwigumini. Vano oharege dila anamwinjhi enahariwa, dila yorambalala ‘enathukulela omatolosiwelo.’ (Mat. 7:13) Mbwenye iyo nihiikoma ovuruwanagave ndhu na Yesu ni odidela ohara dila yopurana, eri ninga ethu enanibarela. Vano nnafuna noone ethu emodhaya Yesu asorihiliye wihina neregena.

10. Mowiwanana ni Mateus 5:23, 24, Yesu erile nnohowela nere ddi?

¹⁰ Omwileri Mateus 5:23, 24. Va yolebela ela Yesu onowoga vang’ono wodhela mweddelo wathima waaJudewu. Karajhiha wubuwela muthu agari mu Tempulu ahalaga nenna numwinkelela namakutha mwanenyama oomukuthana mukutho. Nuwindo oliye wubuwela wi ohukanna muladdu ni mukwaye, vano orajhiha omuhiya mwanenyama ole nikome, ‘odhowa’ otxokotxela muladdu ni ddibile. Mwahaya bwaddi adhe eeregena ndo? Mwaha oliye ahikanna ethu yathima afuniye werana, opitha omukuthela mukutho Yehova. Yesu kaakuwile, oliye wera: ‘Orajhihe otxokotxela muladdu onniwena nddibilo.’

11. Jako andile addi otxokotxela muladdu anniyena ni ddibile?

¹¹ Yopadduwa yereye mwigumini mwa Jako, podi onihudhiha ethu yathima wodhela otxokotxela muladdu. Jako nuumala yaka 20 wolapela ni elabo abaliwiiye, Yehova amulabihedhaga mungero, omwaddela Jako wihina ahogolowele mundduli. (Gén. 31:11, 13, 38) Mbwenye vahikala muladdu. Ezawu ddibile apogoya, ahithoma wihina ampe Jako. (Gén. 27:41) Jako ‘osimwela ni wambela woova’ ubuwelaga wihina ddibile ohukannave ntxiga nuliye. (Gén. 32:7) Jako andile addi otxokotxela muladdu ni ddibile? Vobajha, arajhihile olobela wa Yehova, ni murima wamutene amwaddelaga makathamiho anniyena. Nuwindo, oliye okala muthu oovaha. Jako ovahedhela mukono wihina yanvahe Ezawu. (Gén. 32:9-15) Oliye omuthithimiha vanlubale, omukokorela, kahiyo dila emodha obe bili baahi, mbwenye omukokorela dila tanu nabili! Jako ahanda otxokotxela muladdu anniyena ni ddibile, mwaha wowiyeviha ni wooniha nriho.​—Gén. 33:3, 4.

12. Nnahudheravo ddi ni yotajhiha ya Jako?

¹² Iyo podi ohudhera ethu yathima ni ele Jako eriliyena wihina atxokotxele muladdu anniyena ni ddibile. Jako ari muthu owiyeviha ni ahiloba nikavihero na Yehova. Vasogolova oliye werana epaddi yaye, oliye werana dhatedhene andiye wihina dhatedhene dhimweddele pama aagumanaga ni ddibile. Nuugumana ni Ezawu, Jako kasayele waaja akala duliye anna razawu obe naari. Mbwenye Jako afuniye fuutxokotxela muladdu anniyena ni ddibile. Eyo yaali efunelo yaye. Ki iyo nnande addi omutajhiha Jako?

13-14. Noona wihina nihimuthegela ddibilihu nere ddi?

¹³ Naafunaga weeddagave dila enathukulela wigumini, enofwanelela okanna murenddele naaddibilihu. (Rom. 12:18) Ki to akala nihimuthegela ddibilihu nnohowela nere ddi? Akala nnofuna omutajhiha Jako,  nnofwanelela olobela wa Yehova. Iyo podi omuloba Yehova wihina anikavihere okanna murenddele ni addibilihu.

¹⁴ Nnohowela waaja mudhidhi, ni wawubuwela makoho ala enihina: ‘Ginowanda ohiya withukula waaga gikala muthu owithukula? Ni ginoloba nikurumuwelo wihina vikale murenddele? Yehova ni Yesu, enagone avi wi miyo daali muthu oobajha, wihina gitxokotxele muladdu ginnimina ni ddibilaga obe murogolaga?’ Wipendda ni makalelo yala, podi onivaha kopolo wihina nivuruwane ndhu na Yesu, ni nikale athu owiyeviha ni nimusayele ddibilihu wihina ni teyihane. Nerana ndo, nnere omutajhiha Jako.

15. Oparihedha mabasa Efésios 4:2, 3, enaanikavihere addi otxokotxela muladdu ninnihuna ni ddibilihu?

¹⁵ Onowubuwela yapadduwe Jako ahere ithukula labo agumaniliye ni Ezawu? Podi wera dhithudha kadhamweddele pama. Mowindala, akala nnafuna natxokotxela muladdu ninnihuna ni ddibilihu, nnofwanelela nikale athu owiyeviha. (Omwileri Efésios 4:2, 3.) Provérbios 18:19 anihina: ‘Ddibila ootakaleliwa, onoopitha txinga enlubale yoliba, ni ohukalawo widdana winaligana ninga kongolo dhinafugiwana txinga enlubale yooliga.’ Oloba nikurumuwelo mwamakalelo owiyeviha, podi onikavihera ofugula ni ovenyiha kongolo dhifugiwena musiwo ola.

16. Dhithu baani dhinahoweleya wubuwela nadhowaga otxokotxela muladdu ni ddibilihu, ki mwahaya bwaddi?

¹⁶ Nnohowela wubuwelavo pama ethu nnafunihu owoga ni ddibilihu, ni makalelo nnafunihu owoga. Vano noona wi nihimala wiwegeredha, nimwaaje ddibilaya nimutheg elihu ni nerena dhatedhene wihina nandanevo dila bili. Podi wera omambelelowene oliye anere owoga dhithu dhihinanidhivele. Mudhidhi yoyo iyo podi otakaleliwa, vano naajege makalelo owibarela. Mbwenye werana ndo kawinanikavihere. Ohuddiwale, otxokotxela muladdu onniwena ni ddibilo sathima vanlubale, ohiya omwaajaga anna razawu obe muthu aviriganihile.​—1 Cor. 6:7.

17. Onahudheravo ddi ni yotajhiha ya Gilbert?

¹⁷ Ddibila dhala anithaniwa Gilbert ahilibihera vanlubale wihina atxokotxele muladdu anniyena. Oliye wera: “Miyo ni mwanaga mwana muhiyana kaneeddihana pama. Miyo gahimala yaka bili gaajaga makalelo oomuwogana nuupwaseya wihina vikale murenddele.” Ethu emodha eriliyena ddi? “Malabo aamatene gaafunaga owoga ni mwanaga, gahinathi  garajhiha olobela. Miyo garajhiha wegeredha mubuweloya ekalela naatapanyaga aginyanyuwela. Gahinona wi ginoofwanelela omukurumuwela. Miyo woona wi gagafwanelela wiwaja wiwoona akala gihikanna razawu, vano miyo woona wi mutholo waaga fuukanna murenddele nuliye.” Gilbert anosoriha mareeliho awakeliye: “Peeno miyo ginowedda ni murenddele, mwaha gihandana pamadhene naamudhaga aatene.”

18-19. Noona wihina nihimuthegela ddibilihu, enofwanelela nere ddi?

¹⁸ Noona wihina nimuukula ddibila, nithome nere ddi? Oparihedhe mabasa yolaga ya Yesu, teto waaje makalelo ookalavo murenddele. Omwaaddele Yehova muladdu wawo, ororomele nikavihero na muzimu wotxena wihina murenddele weenyu odhowegeve. Werana yeyo, onere ohagalala ni onere wooniha wihina mwebaribarene onovuruwana ndhu na Yesu.​—Mat. 5:9.

¹⁹ Sohagalasa onona wihina Yehova mwamakalelo oodhivela, anomulabihedha Yesu kiristu ‘musolo wa mulogo’, wihina aholelege egumiihu. (Efé. 5:23) Mowindala ninga arumiwi Peduru, Tiyagu ni Juwawu, iyo nihiikoma ovuruwanagave ndhu na Kiristu. (Mat. 17:5) Musolo ola, nihawoona makalelo ootxokotxela muladdu ni ddibilihu. Mowindo, nahiselela ohara dila yopurana enathukulela wigumini, nnere ohagala obajha peeno, teto osogolo nnere okanna ohagala wahinadha wimala.