Yesu ohudhera odhulu okanna dhikalelo dhinahoweleya wihina alabe pama ni amodha. Nuwindo, nuudha elabo yavati, oliye wahudhiha anamaharaye dhikalelo dhendha dhapama. Nihiyoya podi ohudhera ni yotajhiha ya Yesu. Vano nnafuna nawoge malagano mararu, nnandihu ohudhera noonaga ni yohudhera ya Yesu. Malagano ala, enere onikavihera olaba pama naamodha, ni okala owiwanana naaparaga mabasa vamodha naaddibilihu.

Nikale owiyeviha. Muthu owindala onowavaha thima akwaye oomabasani ni kukalege ninga ori mwinya amabasaya. Wiyeviha wa Yesu wari ndo, teto ahudhenre ni ababe Yehova. Nihinona wihina Yehova baahi dinithaniwa mpaddusi, naari dhigari ndo, oliye oheriha wi athu amodha enone wi mwanaye ohumukavihera. Eyo enowoneya pamadhene namwileri Gén. 1:26. Oliye wera: ‘Nimpadduse muthu ooligana ni iyo.’ Madhu ala ehimuhudhiha Yesu woona wi Yehova dowiyeviha.​—Sal. 18:35.

Yesu agaari elabo yavati, oliye ari owiyeviha. Motajhiha Yesu atamaleliwaga, oliye oomuthithimiha Yehova. (Marcos 10:17, 18; João 7:15, 16) Nuliyeya owilibihera wihina okalevo murenddele ni anamaharaye. Teto Yesu awoona ninga anamaharaye ohiya adharaaye. (João 15:15) Yesu ahaasuwa manyalo anamaharaye wihina aahudhihe ethu wodhela okala owiyeviha. (João 13:5, 12-14) Ni iyowa nimutajhihege Yesu, wodhela opweha mburo wobajha efunelo yaaddibilihu ohiya yehu. Nnere wanda olaba pamadhene, naathithimihanaga  mmodha ni mukwaye ohiya othuwathuwela akala nnere otamaleliwa obe naari, wodhela mabasa naapanrihu.​—Rom. 12:10.

Muthu owiyeviha ohunona wi akala vaari vaanamalaga ‘porogaramaya onowedda pama.’ (Pro. 15:22) Sathima wubuwela wi kaavo muthu anonne dhatedhene, naarive akale muthu athotho obe anone dhithu dhowinjhiva mwigumini mwaaye. Mwinnyene Yesu ahirumedha wi kaanonne dhithu dhatedhene. (Mat. 24:36) Oliye afuna anone mubuwelo wa anamahara aye, naarive anonaga wi aliwaya kiyalogomane. (Mat. 16:13-16) Eyo enowoneyiha pamadhene mwahaya bwaddi anamahara emulemelege Yesu! Nihiyoya nikale owiyeviha ninga oliye. Nanona wihina kannonne dhithu dhatedhene ni ovuruwana mubuwelo waathu amodha, nnere okanna murenddele teto dhehu dhinerege oneeddela pama.

Thabwathabwa anamaholela mulogo, enohowela omutajhiha Yesu yalabaga vamodha. Aliwa enohowela wubuwela wi muzimu wotxena podi omulabihera namaholela mulogo bure-bure, owoga ethu enakavihere nikuru nanamaholela mulogo othoma ethu yathotho. Anamaholela mulogo yatugumana atene yahikannaga manyazo ovaha mubuwelo wewa, enakale yokweya werana dhothoma dhapama. Mowindala mulogo wamutene onere orelihiwa.

Wihina nande olaba pama ni amodha, nikale ookweya, ohiya wunlelaga wi dhithu dhatedhene dheriwegena ninga nnafunihu. Malabo mamodha, Yesu ahikanna ofuru omoona makalelo Yehova ariye ookweya ni ookanna manddile. Motajhiha oliye ohumona Yehova makalelo aweddeliye thagaraga athu. Mwaha wa yothega athu yahithongeliwa okwa, mbwenye mwaha okweya wa Yehova, oliye onivaha mukutho wihina anoobole.​—João 3:16.

Yesu ari ookweya ni owaguva mwa dhithu dhimodha. Yotajhiha enatonyihera yeyo bu mudhidhi aamukaviheriye muhiyana dhala oofenisiya. Yesu aarumiwe wihina akavihere nlogo na Yehova, ohiya malogo amatene. Naari dhigari ndo, oliye aari owaguva ni omukavihera muhiyana yole. (Mat. 15:22-28) Yesu aari ookweya ni kaakukusa anamaharaye ekale owogowa. Ethu enoneyiha eyo, bu mudhidhi amukurumuweliye mukwaye Peduru, naarive agaamukodde dila tharu wihina kaamunonne. Vasogolova Yesu onvaha mutholo dhinlubale Peduru. (Lucas 22:32; João 21:17; Atos 2:14; 8:14-17; 10:44, 45) Yotajhiha ya Yesu enonihudhiha wihina nnohowela okala owaguva wihina ‘okweya wehu ononiwe ni athu atene.’​—Fil. 4:5.

 Okweya winere onikavihera onona wisaddula olaba ni murenddele ni athu atene. Yesu owaweddiha athu atene naarive amwiddanaaye emoonaga Yesu ninga muliba wandana ni anamakukusa musoko ni anamathega ni yarumedha muthenga waye. (Mat. 11:19) Nnaamutajhihe addi Yesu ovahana naathu amodha? Louis, Ddibila alambe yaka dhowinjhivadhene alabaga naathu oohiyana-hiyana, ninga nameeddela mulogo ni oobeteli anasoriha egi: “Mubuwelo waga olaba naathu amodha enaligana ni omaga txinga ni mabwe oohiya-iyana. Omaga txinga yowogowa ni mabwe oohiyana-iyana kahiyo ethu yokweya, mbwenye enowandeya werana eyo, napweha kadda nibwe mburo onafwaneleliwavo. Yahoweleyaga ginowanda wisaddula mowaguva wihina okalevo murenddele ni gande olaba pama naathu amodha.” Ni iyowa nikale ndo!

Mudhidhi baani nnahowelihu okala ookweya ni owaguva naaddibilihu ammulogoni? Nihikanna ofuru wapama wowerana ndo, naalabaga nnikuru nehu noomalaleyelo. Iyo podi olaba naanamalaleya oohiyana-iyana ni ayaka dhohiyana-iyana. Iyo podi okala owaguva ni wisaddula ni ekalelo ya kadda namalaleya nnalabihuna, obe omuhanyedha kadda namalaleya makalelo oolaleya anafuniye.

Muthu analaba pama naamodha anakala owiwegeredhene wihina avahe. (1 Tim. 6:18) Mudhidhi wamutene Yesu alambeye naababe odhulu, Oliye owonelamo wi Yehova omwaddela mabasa amatene aapariye. Yehova nuwegeredha elabo yodhulu ni dhithu dhatedhene, Yesu aari wengo amusugwaga, oliye oohudhera pamadhene dhithu dhatedhene ooniliye. (Pro. 8:27) Agaari elabo yavati Yesu ahawaddela anamaharaye dhithu dhatedhene addeliwiye naababe. (João 15:15) Ni iyoya neregena emodhave, nawaddelege athu amodha ele nnonilihu ni dhithu dhinipadduwele mwigumini mwehu. Kanihiye wawaddela athu amodha ndhe nnonnihu obe omuhudhiha muthu mmodha, noovaga wihina nihilabihedhiwege obe ninyanyaliwe. Mohiyana ni yeyo, iyo nnakala oohagalalene nawaddelaga athu amodha dhithu nihudherihu.

Iyo podi walibiha athu amodha ni madhu apama naathu nnalabihuna. We kunahagalala muthu uthetheela obe utamalela ni murima wamutene woodhela ethu weriliwena? Mohanganyera. Yesu oowaja makalelo owatamalela anamaharaye. (Osugwe Mateus 25:19-23; Lucas 10:17-20.) Yeswene ohuwoga ni anamaharaye wi yere wapara mabasa owinjhiva okwaranya mabasa oliye aapariliye. (João 14:12) Omahiyu Yesu ahinathi okwa, oliye watamalela anamaharaye oororomeleya egihina: ‘Nyu kamwaginyanyale mudhidhi geehiwaga.’ (Lucas 22:28) Onowubuwela makalelo yakaviheriwa ni madhu ale? Mwebaribarene, yahikanna kopolo wihina yaparege mabasa yaadhege osogolo! Nanona watamalela athu nnalabihuna vamodha, mwebaribarene aliwa enakala oohagalalene ni enolaba nikopolo.

Ddibila dhaala anithaniwa Kayode ohusoriha egi: “We kunahowela ologomana wihina olabe vamodha nihiyo. Ethu onahoweliwe fuhiya athuya onalabiwena yahanganyedhaga wihina mabasa enapariwa bookweya.” We onolaba pama naathu amodha? Ononelamo aavi wakoha addibila obe arogola amodha wodhela muselu yola? Akala aliwa enodhiveliwa olaba vamodha niwe, ninga anamahara a Yesu yadhiveliwiwa olaba vamodha nuliye, onere owoga emodhave awonge murumiwi Pawulo asorihe egihina: ‘Mabasa ala nnaapara vamodha wihina mukanne ohagalala.’​—2 Cor. 1:24.