1. Enathukulela alobwana ohaweddiha pama ahiyaniwa obe aniwa ddi?

MONELO wawo okala musolo, obe namasogolela emudhi enatapulela ddi? Alobwana amodha enohiya wi dhilemelelo, mweddelo wa elabo yewa ni makalelo ebaliwiwa evolowele makalelo enaweddihiwa a mwariwa ni aniwa. Sugwa yopadduwa ya murogola anithaniwa Yanita eelabo yo Ewuropa, anowoga egi: “Elabo yaga ethu eli mmuruni mwa athu sowihina ahiyana kinna thima teto ebaliwe wihina yaparege mabasa.” Ddibila mmodha anithaniwa Luke anakala Estadu Unidu, anowoga egi: “Ababi amodha enowahudhiha aniwa wi ahiyana ebaliwe wihina yoniwege ohiya wihina evuruwaniwege, obe, dhithu enawoga ahiyana kadhinna thima.” Mbwenye Yehova kanafuna wihina alobwana yaweddihege ndo ahiyana. (Omusugwe Marcos 7:13.) Ki mulobwana anahudhere avi makalelo okala namasogolela apama a murala?

2. Ethu baani enahoweleya namasogolela emudhi onona, ki mwaha wa ddi?

² Mulobwana anafuna okala namasogolela apama anohowela onona ethu Yehova anajhehiye wa oliye. Teto sapama onona mwahaya bwaddi Yehova adhe ahelege nipara na namasogolela ni ethu enahoweleya werana wihina amutajhihe pama Yehova vamodha ni Yesu. Mwahaya bwaddi sapama anamasogolela emudhi wonelamo ponto ndha? Mwaha wihina Yehova ohavaha mutholo teto anajheha wihina elabihedhege ni makalelo apama mutholo ola avahiliye. — Luc. 12:48b.

3. 1 Coríntios 11:3 ananihudhiha ddi wodhela okala namasogolela?

³ Omwileri 1 Coríntios 11:3. Yolebela ela enonooniha makalelo Yehova egerendhiye emudhi yatene elabo yodhulu ni elabo ya vati. Dhikalawo dhithu bili dhinavolowela onamasogolela: okanna mutholo ni wakulela. Yehova di “musolo”, obe musolo  munlubale, anaaye atene, eli odhulu ni elabo ya vati enere wakulela vamentoni vaye. (Rom. 14:10; Efé. 3:14, 15) Yehova ohumuthoma Yesu ninga namasogolela mulogo. Mbwenye Yesu anere wakulela vamentoni va Yehova mwaha makalelo aneddihiye mulogo. (1 Cor. 15:27) Yehova ohumuthoma mulobwana wihina akale namasogolela a mwariye ni anaaye. Mbwenye mulobwana anere wakulela makalelo anaweddihiye amudhaaye vamentoni va Yehova vamodha ni Yesu. — 1 Ped. 3:7.

4. Yehova ni Yesu enna mutholo baani?

⁴ Mwaha wokala musolo wa emudhi yatene Yehova onowakumiha malamulo ni onoojheha wihina anamwani atene yawiwelelege malamulo yayo. (Isa. 33:22) Teto mwaha Yesu okala musolo wa mulogo onowakumiha malamulo ni ojheha wihina malamulo ayo yiweleliwege. — Gál. 6:2; Col. 1:18-20.

5. Anamasogolela a emudhi enna mutholo baani, ki mwahaya bwaddi nigawoga negi mutholo wewa ohukanna manddile?

⁵ Ninga Yehova ni Yesu, namasogolela emudhi ohukanna mutholo wowakumiha malamulo wi amudhaaye yawiwelelege. (Rom. 7:2; Efé. 6:4) Mbwenye mutholo waye kunaligana ni wa Yehova vamodha ni Yesu. Motajhiha, malamulo anakumiha namasogolela emudhi edheelege mmadhuni a Mulugu. (Pro. 3:5, 6) Teto anamasogolela a emudhi kinna mutholo wowakumiha malamulo wihina athu amodha ehinakala vaade vewa yawiwelelege. (Rom. 14:4) Ohiya eyo, anamwani yunnuwa yavenyavo vaade enoodidelave waariha makolo ewa, mbwenye enaasogolela kahi makolo ewa. — Mat. 19:5.

6. Mwahaya bwaddi Yehova adhe akumihege nlamulo nokalawo namasogolela?

⁶ Yothoma ela wihina wikalege namasogolela nvaho Yehova anivahiliye mwaha wihina anonidhivela. Vakala namasogolela dhinowenyeya wihina murala wa Yehova weddege ni murenddele ni wowegeredheyene. (1 Cor. 14:33, 40) Kuhukala yeyo, emudhi ya Yehova kiyakale yowegeredheya teto kavo ahagalalege. Yerege orusa omunona muthu anathomege malamulo wihina yeddeliwege.

7. Ninga munawogela Efésios 5:25, 28, Yehova anafuna wi alobwana yaweddihege ahiyana ni makalelo baani?

⁷ Akala nlamulo nna nokalawo namasogolela thapama, mwahaya bwaddi ahiyana amodha egoona wihina kinna ofuru ni egatabusiwa ni amamuniwa? Enapadduwela mwaha wihina alobwana owinjhiva enowahiya malamulo a Yehova enawoga wodhela emudhi, yindo oharaga dhilemelelo ni mweddelo dha elabo yewa. Malabo mamodha aliwa enowataabusa ahiyana ewa wihina yerena dhithu dhinaadhivela. Motajhiha, mulobwana podi omusugweraga mwadhiye wihina arihiwege ni onihe wi anathonga duliye. Oliye podi wubuwela egi: “Miyo kaginande wihina mwaraga agidhivelege, mbwenye podi omuthusaga wihina agoovege.” Oliye podi olabihedha othusa wihina amusugwerege mwariye. * Makalelo ala owubuwela ni owerana dhithu kinaakavihera wihina muhiyana eddihiwege ni nriho, teto enohiyana ni ele Yehova anajhehiye wa alobwana. — Omwileri Efésios 5:25, 28.

8. Mulobwana anahudhere avi okala namasogolela a emudhi apama?

⁸ Mulobwana podi ohudhera makalelo okala namasogolela apama wodhela omutajhiha Yehova vamodha ni Yesu. Vobajha nnafuna noone dhikalelo bili anoniha Yehova ni  Yesu yalabihedhaga owedha enniwana. Namala nnere woona makalelo anamasogolela emudhi enatajhihiwa dhikalelo ndha yaweddihaga a mwariwa vamodha ni anamwani.

9. Yehova anoniha avi wiyeviha waye?

⁹ Wiyeviha. Yehova muthu athotho wapitha athu atene eli elabo yodhulu ni ya vati. Naari dhigari ndo, oliye onowavuruwana adhaari aye. (Gén. 18:23, 24, 32) Malabo mamodha oliye anorumedha dhithu enawoga adhaari aye. (1 Reis 22:19-22) Yehova doologomana mbwenye oliye kanajheha wihina iyo nikale oologomana. Anorumedha wihina nimulabelege ni makalelo apama nnandihu. (Sal. 113:6, 7) Kahi yowoota Bibliya agamwithana Yehova ninga ‘namakavihera.’ (Sal. 27:9; Heb. 13:6) Mwene Davidi ohuwoga egi nnanda wakwaneliha mutholo ninnihuna mwaha Yehova dowiyeviha. — 2 Sam. 22:36.

10. Yesu onihile avi wi aali muthu owiyeviha?

¹⁰ Sugwa yotajhiha ya Yesu. Oliye aali namahudhiha ni Nabwiya anamahara aye. Naari dhigarive ndo, oliye ahisuwa manyalo anamahara aye. Mwahaya bwaddi Yehova adhe ahelege yopadduwa ela mBibliyani? Afuna wihina, anamasogolela a emudhi ni amodha eharege yopadduwa ela yapama. Mwinnyene Yesu ohuwoga egi: “Gihuhiyedhani mweddelo wihina ninga gerilimmina ni nyunwa mweregena.” (João 13:12-17) Naarive aganna mutholo munlubale, Yesu kajheha wihina alabeliwege oliye owalabela. — Mat. 20:28.

11. Anamasogolela emudhi enatajhihe avi wiyeviha wa Yehova ni Yesu?

¹¹ Dhithu nnahudherihu. Namasogolela emudhi podi wooniha wiyeviha ni makalelo owinjhiva. Motajhiha, oliye kanajheha wi mwariye vamodha ni anaaye ekale ologomana. Naarive amudhaaye ehirumedhaga ndhe anawogiye oliye anowavuruwana. Marley, anakala elabo yo Estadu Unidu, ohuwoga egi: “Miyo ni mamunaga malabo mamodha dhokala dhithu dhimodha nihiniwananihu. Mbwenye mamunaga anovaha thima mubuwelo waaga. Oliye ahinerena ethu-sithu anowabiha othapanya ni miyo.” Anamasogolela eli owiyeviha enowapara mabasa a vaade, naarive athu a vamuruddani ewogaga wi ayo kahi mabasa a mulobwana. Okala muthu owiyeviha kahi ethu yokweya. Mwaha wa ddi? Murogola dhaala anithaniwa Rachel anowoga egi: “Elabo gidhelimi,  mulobwana amukaviheraga muhiyana osuwa parato ni oxela, amwanddamani enowanganyedha akala oliyeya dapamene. Aliwa enowubuwela: ‘Oliye kananda omuruma mwariye.’” Akala murudda onadheliwe ohukalawo mubuwelo ola wubuwele wihina Yesu ahisuwa manyalo anamahara aye, naarive egaali mabasa a mudhaari. Namasogolela apama a emudhi kanapwatha dhithu enawoga athu amodha oliye anowilibihera wihina mwariye obe amudhaaye yeddege pama. Mbwenye ehikalawo ekalelo emodha yofuneya enahoweleya namasogolela emudhi akalena. Sivi?

12. Yehova ni Yesu enoniha avi wi enonidhivela?

¹² Odhivela. Enamuthukulela Yehova werana dhithu dhatedhene odhivela. (1 João 4:7, 8) Oliye anowoniha wi ononidhivela mwaha osamalela epaddi yehu yomuzimuni alabihedhaga Madhu aye nnikuru naaye. Teto oliye onosamalela emuthu yehu mwaha woniha wi ononidhivela. Ki epaddi yehu yomwilini? Bibliya onihina Yehova ‘ononireeliha ni dhithu dhatene dhinanihagalasa.’ (1 Tim. 6:17) Nathega, Yehova ononisumulula, mbwenye kanahiya onidhivela. Fudhivela waye omuthukulele onivaha mwanaye. Teto Yesu ohoniha wi ononidhivela mwaha onivaha egumi yaye wihina anoobole. (João 3:16; 15:13) Kavo ethu enamuhihe Yehova ni Yesu wadhivela ale eli oororomeleya. — João 13:1; Rom. 8:35, 38, 39.

13. Mwahaya bwaddi sapama namasogolela emudhi oonihege wi anomudhivela mwariye ni anaaye? (Osugwe kwaduru “ Mulobwana atenle ovanene anamuthukulele mwariye omuriha ni makalelo baani?”)

¹³ Dhithu nnahudherihu. Odhivela omuthukulelege namasogolela emudhi werana dhithu dhatedhene. Mwahaya bwaddi ekala yofuneya? Murumiwi Juwawu ohuwoga egi: ‘Muthu ahinamudhivela ddibile [obe murala waye], anamoniye, kinandeya omudhivela Mulugu, ohunamoniye.’ (1 João 4:11, 20) Namasogolela emudhi apama anamudhivela mwariye ni anaaye, ni anahara yotajhiha ya Yehova ni ya Yesu, anonsamalela epaddi yomuzimuni, yomwilini ni mubuwelo ya emudhi. (1 Tim. 5:8) Oliye anowaxagiha ni anowasumulula anaaye. Anothoma dhithu dhinanvuwiha Yehova ni  dhinakavihera emudhi yaye. Vano, kabeni noone anamasogolela emudhi makalelo enamutajhihiwa Yehova vamodha ni Yesu yeddelaga ponto ndha.

14. Namasogolela a emudhi anasamalela avi epaddi yomuzimuni ya emudhi yaye?

¹⁴ Osamalela epaddi yomuzimuni ya emudhaye. Atajhihaga mweddelo wa Yehova, Yesu osamalela epaddi yomuzimuni ya anamahara aye. (Mat. 5:3, 6; Mar. 6:34) Emodhave, anamasogolela emudhi ehikanna mutholo munlubale oli ojhiha epaddi yomuzimuni ya emudhi. (Deut. 6:6-9) Egi namasogolela ande oliye vamodha ni amudhaaye enowawileri Madhu a Mulugu, odhowa omutugumanoni, olaleya muthenga dhapama, ni olibiha wandana wewa ni Yehova.

15. Namasogolela emudhi anaande addi osamalela mubuwelo wa mwariye ni anaaye?

¹⁵ Osamalela mubuwelo wa emudhaye. Yehova ahoniha pamadhene wi omudhivela mwanaye, Yesu, naarive agaali vaari vaathu owinjhiva. (Mat. 3:17) Yesu oherana emodhave ni anamahara aye. Oliye ohoniha wi owadhivela anamahara aye wodhela dhithu ereye ni awogiye. Etajhihaga mweddelo waye, anamahara aye wooniha wihina yomudhivela Yesu. (João 15:9, 12, 13; 21:16) Namasogolela emudhi podi woniha wi anomudhivela mwariye vamodha ni anaaye wodhela dhithu aneriyena, ninga motajhiha, omwileri Bibliya naaliwa. Makalelo mamodha owoniha wi onomudhivela, onomuriha ni ononvaha thima mwariye vamodha ni anaaye fuwatamalela vamentoni va athu amodha dhenyeyaga. — Pro. 31:28, 29.

16. Ethu emodhaya enahoweleya wihina namasogolela emudhi eeregena ddi, ki mwahaya bwaddi ekala yapama okanna monelo wapama?

¹⁶ Osamalela epaddi yomwilini ya emudhi. Yehova ahididela osamalela epaddi yomwilini ya amwaana Ezarayeli naarive aliwa ehimwiwelelaga ni ehowelaga otorihiwa. (Deut. 2:7; 29:5) Peeno onosamalela epaddi yehu yomwilini. (Mat. 6:31-33; 7:11) Emodhave, Yesu owajhiha anamahara aye. (Mat. 14:17-20) Oosamalela epaddi yewa yomwilini. (Mat. 4:24) Namasogolela emudhi anafuna omuhagalasa Yehova anofwanelela osamalela epaddi yomwilini ya mwariye ni ya anaaye. Mbwenye anofwanelela okanna mubuwelo wapama wodhela wapara mabasa. Oliye kathabwe othuwa-thuwa ni mabasa ofiyedha osukuma epaddi yomuzimuni ni mubuwelo ya emudhi.

17. Yehova ni Yesu enanxagiha ni enanisinyusa avi?

¹⁷ Oxagiha. Yehova anonixagiha ni anonisinyusa wihina dhehu dhineddelege pama. (Heb. 12:7-9) Atajhihaga mweddelo wa ababe, Yesu anowaxagiha athu nuudhivela. (João 15:14, 15) Oliye doliba murima, naari dhigarive ndo dodhivela. (Mat. 20:24-28) Ohunona wi nili athu othega ni wi mwili wehu ononithukulela werana ele eli yabure. — Mat. 26:41.

18. Dhithu namasogolela eemudhi anahoweliye wubuwela sivi?

 ¹⁸ Namasogolela emudhi anamutajhiha Yehova ni Yesu ohunona wihina amudhaaye kahi athu ologomana. Bumwahaya, oliye ‘kanamunyanyuwela’ mwariye vamodha ni anaaye. (Col. 3:19) Teto anohara yolaga eli va Gálatas 6:1 ni onowasumulula “ni makalelo apama”, ubuwelaga wihina nuliyeya muthu oothega. Ninga Yesu, oliye ohunona wi makalelo apama ohudhiha fuwera dhithu wi amudhaaye emutajhihege. — 1 Ped. 2:21.

19-20. Namasogolela emudhi anamutajhihe avi Yehova ni Yesu wodhela makalelo othoma dhithu?

¹⁹ Othoma dhithu dhinaakavihere emudhi yaye. Yehova anowakumiha malamulo ubuwelaga opama waathu amodha. Motajhiha, oliye ohupaddusa egumi, wihina nihagalalegena ohiya omuhagalasa oliye. Teto kaavo anwaddihendhe wihina anvahe mwanaye wi anikwele. Efunelo yaye simuthukulele werana yeyo, ubuwelaga opama waathu amodha. (Rom. 15:3) Yesu oothoma dhithu dhaakavihera athu amodha. Motajhiha, oliye oleva withuwa wihina ahudhihe muthithi waathu. — Mar. 6:31-34.

²⁰ Namasogolela eemudhi apama ohunona wi mutholo munlubale ni worusa futhoma dhithu dhinaakavihere emudhi yaye, teto mutholo ola oliye kanavudhuwana. Anowilibihera wihina ahithomege dhithu ehirivo ethu yapamene emuthukulele othoma dhithu ndha. Mbwenye, anomuhiya wihina Yehova amuhudhihe makalelo apama othoma dhithu. * (Pro. 2:6, 7) Ni makalelo yala, oliye anothoma dhithu dhinakavihera emudhaye, ohiya dhithu dhinamukavihere mwinnya. — Fil. 2:4.

21. Yohudhera enadhawo nnahudhere ddi?

²¹ Yehova ohavaha anamasogolela emudhi mutholo munlubale teto anajheha wihina yeddihege pama mutholo ola avahiliye. Namasogolela emudhi anilibihera omutajhiha Yehova vamodha ni Yesu dhaye dhinerege omweddela pama. Teto muhiyana erana epaddi yaye anere okanna matelo ohagalasa. Muhiyana onegemo avi mutholo wa mamune? Makathamiho baani enanfwanya? Yohudhera enadhawo enere owoga muselu yoyo.