OHUDHERA 7
Nlamulo na okalawo namasogolela mmulogoni
‘Kiristu di musolo wa mulogo ni duliye anavulusa.’ — EFÉ. 5:23.
JHIBO 137 Mulheres Fiéis
DHITHU NNAHUDHERIHU *
1. Enathukulela emudhi ya Yehova okala yowiwanana ddi?
IYO nnodhiveliwa vanlubale okala epaddi ya emudhi ya Yehova. Mwahaya bwaddi edhe ekalege ya murenddele ni yowiwanana? Eneriha sowihina nnowilibihera vanlubale oriha nlamulo Yehova avahiliye na okalawo namasogolela. Mwebaribarene, nonelagamo pamadhene nlamulo nna nnothabwa wiwanana.
2. Makoho baani enakuliwe ohudhera wula?
2 Ohudhera wula nnere woona nlamulo na osogolela mmulogoni. Teto nnere wawakula makoho ala: Mutholo wahiyana mmulogoni buuvi? Addibila atene musolo wa arogola atene mmulogoni? Anamaholela mulogo ni anamasogolela emudhi enalabihedha mutholo wewa ni makalelo mamodhave? Vobajha, nnafuna noone makalelo owaweddiha arogola.
MAKALELO OWAWEDDIHA AROGOLA MMULOGONI?
3. Enenjhedhedhe makalelo ehu owatamalela arogola mwaha wa mabasa enapariwa ddi?
3 Nnowariiha arogola enilibihera osamalela emudhi, olaleya muthenga wapama ni okavihera mmulogoni. Yohudhera ela nnere woona makalelo Yehova ni Yesu enawoneliwamo ahiyana, teto nnere woona makalelo Pawulo aweddihiye ahiyana. Eyo enere wenjhedhedha makalelo ehu owatamalela.
4. Dhopadduwa baani dhili mBibliyani dhinoniha wi Yehova anowariha alobwana vamodha ni ahiyana?
4 Bibliya anowoniha wi Yehova anowariha alobwana vamodha ni ahiyana. Kubuwela ethu epadduwe mudhidhi wa arumiwi. Alobwana vamodha ni ahiyana yahakela muzimu wotxena wa Yehova wihina yaparege mabasa ootikiniha, ninga owoga dhiwogelo dhohiyana-iyana. (Atos 2:1-4, 15-18) Teto ahiyana vamodha ni alobwana ehithikitheliwa ni muzimu wotxena wihina ethongege vamodha ni Yesu odhulu. (Gál. 3:26-29) Teto makuru mamenli enere oreelihiwa ni egumi yohimala mwilaboni ya vati. (Apo. 7:9, 10, 13-15) Alobwana vamodha ni ahiyana ehakela mutholo wolaleya ni ohudhiha muthenga dhapama. (Mat. 28:19, 20) Motajhiha, livuru na Atos nnowoga wodhela mabasa apama aapanre murogola ithaniwa Pirisila. Oliye vamodha ni mamune Akila yahimukavihera Apolo, mulobwana anna enonelo, wihina oonelemo pama ebaribari. — Atos 18:24-26.
5. Ninga munawogela Lucas 10:38, 39, 42, Yesu awonamo avi ahiyana?
5 Yesu oowariha ahiyana. Yesu ahihiyana ni afarizewu a mudhidhi yole. Alobwana ala yawona ahiyana ninga athu ehinna thima. Kiyaafuna newene othapanya naliwa vaanamwinjhi, thabwa-thabwa othapanya naliwa wodhela Dholebela. Mbwenye Yesu kathapanya muselu dha mBibliyani naalobwana baahi, mbwenye nahiyanaya. * (Omwileri Lucas 10:38, 39, 42.) Oliye orumedha wi ahiyana emuharege mulenddoni mwaaye ni mmabasani olaleya. (Luc. 8:1-3) Yesu ahavaha gari ahiyana yowawaddela arumiwi wihina ahivenyihiwa muukwani. — João 20:16-18.
6. Murumiwi Pawulo onihe avi wi oowariha ahiyana?
6 Murumiwi Pawulo ahimubusedha Timotiyu wihina ohowela waariha ahiyana. Pawulo owoga ni Timotiyu wihina ohowela owoona ahiyana owunnuwelavo ninga amaye teto azombwe ninga arogoliye. (1 Tim. 5:1, 2) Pawulo ahimukavihera vanlubale Timotiyu okala mukiristawu owithwelavo omuzimuni, mbwenye oliye owonelamo wi amaye ni avwaye Timotiyu yaali obajha omuhudhiha ‘Madhu a Mulugu.’ (2 Tim. 1:5; 3:14, 15) Alebelaga akudda Roma, Pawulo walojhela arogola aromolaga mandina ewa, ohiya woonave mabasa yapariwa oliye owoga wi ovaha thima mabasa ewa. — Rom. 16:1-4, 6, 12; Fil. 4:3.
7. Nnone yowakula ya makoho baani?
7 Ddima dhivirile dhinowoniha wi Bibliya kanarumedha mubuwelo wowi ahiyana kinna thima. Arogolihu ehikanna odhivela ni doovaha, aliwa enokavihera vanlubale mmulogoni. Wihina munlogoni na Mulugu mwikale wiwanana ni murenddele anamaholela mulogo enowaroromela ahiyana. Mbwenye nnohowela onona dhowakula dha makoho mamodha. Motajhiha: Mwahaya bwaddi Yehova agawoga wi arogola epothege muru ni lenso? Mwaha othomiwa ninga namaholela mulogo obe mudhaari okavihera, enatapulela wi kadda ddibila musolo wa arogola atene?
ADDIBILA ATENE MUSOLO WA AROGOLA ATENE MMULOGONI?
8. Ninga munawogela Efésios 5:23, addibila atene musolo wa arogola atene mmulogoni? Kawogamo.
8 Yowakulaya sowi naari. Kiristu baahi dili musolo wa arogola atene a mmulogoni. (Omwileri Efésios 5:23.) Va muralani, mulobwana dili namaholela a muhiyana. Mwanamulobwana obaddiziwa kahi musolo wa maye. (Efé. 6:1, 2) Teto mmulogoni, mutholo enna anamaholela mulogo wodhela addibila ni arogola ohukanna manddile (1 Tes. 5:12; Heb. 13:17) Murogola ahiteliwe mbwenye ahinakala vaade va ababe anodidelave waariha makolo aye vamodha ni anamaholela mulogo. Mbwenye ninga addibila atene a mmulogoni, musolo waye di Yesu kiristu.
Azombwe ehinakala ni makolwiwa musolo wewa di Yesu (Osugwe ddima 8)
9. Mwahaya bwaddi malabo mamodha ahiyana enohowela opotha muru?
9 Naari dhigarive ndo, Yehova athomme alobwana wihina esogolelege mmulogoni. Oliye kavanhe mutholo ola ahiyana. (1 Tim. 2:12) Mwaha wa ddi? Emuthukulenle wera yeyo emodhave emuthukulenle omuthoma Yesu ninga musolo wa mulobwana — wihina mmulogoni mwikale wiwanana. Murogola podi othomeliwa werana ethu anerana ddibila. Yapadduwa yeyo, apothe muru ni lenso. * (1 Cor. 11:4-7) Yehova kanawogela mwaha wihina ahiyana kinna thima, mbwenye anawogela wihina avahe gari yowoniha wihina enoriha onamasogolela. Ni mubuwelo yola, kabeni vano nakule nikoho nna: Mutholo baani enna anamaholela mulogo vamodha ni anamasogolela a emudhi?
MUTHOLO WA ANAMAHOLELA MULOGO NI ANAMASOGOLELA A EMUDHI
10. Enamuthukulele namaholela mulogo waakumiha malamulo mmulogoni ddi?
10 Anamaholela mulogo enomudhivela Yesu ni enodhivela mambila avanhe Yehova ni Yesu. (João 21:15-17) Mwaha wathuwa-thuwela addibila, namaholela mulogo podi obajha wubuwela wi babi a mulogo. Oliye podi obajha woona wi ninga babi anaakumihiye malamulo wi abarele emudhi, oliye podi obajha wakumihaga malamulo wihina abarele mulogo. Malabo mamodha addibila amodha ehifunaga podi omuthukulela namaholela mulogo waakumiha malamulo. Yaafunaga othoma ethu aliwa enamusayela namaholela mulogo wihina awaddele yowerana. Mbwenye nikoho nnakuma thinna, mutholo anna namaholela mulogo mmodhave anna mulobwana otela anasogolela emudhi?
Anamaholela mulogo enosamalela epaddi yomuzimuni ni ya mubuwelo wa addibila a mmulogoni. Yehova ohavaha mutholo wihina mulogo okalege wapamene. (Osugwe ddima 11 ni 12)
11. Mutholo wa namasogolela emudhi ni wa namaholela mulogo oniwanana avi?
11 Murumiwi Pawulo anowoniha wihina wihikala wiwanana wodhela mutholo anna namaholela mulogo ni namasogolela emudhi. (1 Tim. 3:4, 5) Motajhiha, Yehova anafuna wihina anamwani emwiwelelege babiwa. (Col. 3:20) Teto anafuna wi addibila atene yawiwelelege anamaholela mulogo. Yehova anajheha wihina namaholela a emudhi asamalelege epaddi yomwilini, yomuzimuni ni yamubuwelo ya emudhi yaye, emodhave ni anamaholela mulogo. Teto ninga enerana anamasogolela apama a emudhi anamaholela mulogo enowasamalela addibila enafwanyiwa makathamiho. (Tia. 2:15-17) Ohiya eyo, Yehova anajheha wi anamasogolela emudhi ni anamaholela mulogo yakaviherege amodha wiwelela malamulo aye. Mbwenye, Yehova onowoga wi anamasogolela emudhi ni anamaholela mulogo yasamalelaga mutholo dhewa “kiyalupege malagano” amBibliyani. — 1 Cor. 4:6.
Yehova ohunvaha mutholo namasogolela a emudhi wihina akumihege malamulo vaade. Mbwenye ahinakumihe malamulo, namasogolela a emudhi oodhivela anothapanya ni mwariye (Osugwe ddima 13)
12-13. Ninga munawogela Romanos 7:2, ohiyana baani orivo wodhela mutholo anna namasogolela emudhi ni namaholela mulogo?
12 Mbwenye vihikala ohiyana winlubale wodhela mutholo wa anamaholela mulogo ni namasogolela emudhi. Motajhiha, Yehova ohavaha anamaholela mulogo mutholo wowatoriha addibila, teto wawigaramo mmulogoni ale ehinathwaruwa. — 1 Cor. 5:11-13.
13 Mbwenye Yehova ohavaha anamasogolela emudhi mutholo ohavanhiye anamaholela mulogo. Motajhiha, oliye ohunvaha namasogolela emudhi mutholo wokumiha malamulo ni wihina malamulo ala yiweleliwege. (Omwileri Romanos 7:2.) Namasogolela emudhi podi othoma mudhidhi wihina anaaye efiyege vaade. Aliwa yahiwelela oliye ohukanna ofuru wowasinyusa. (Efé. 6:1) Ebaribari wihina ahinathi okumiha nlamulo nenna namasogolela emudhi oodhivela anere othapanya ni mwariye mwaha wihina aliwa ‘nnigo nimodha.’ * — Mat. 19:6.
OMUTHITHIMIHE YESU NINGA MUSOLO WA MMULOGONI
Yesu anomwiwelela Yehova ni anovaha dholaga mulogo (Osugwe ddima 14)
14. a) Ninga munawogela Marcos 10:45, mwahaya bwaddi Yehova adhe amuthomege Yesu ninga musolo wa mulogo? b) Mutholo wa Nikuru Nolamulela buuvi? (Osugwe kwaduru “ Mutholo wa Nikuru Nolamulela.”)
14 Wodhela mukutho wa Yesu, Yehova ohugula egumi ya kadda muthu mmulogoni ni ya kadda muthu anafuna okala namahara a Yesu. (Omwileri Marcos 10:45; At. 20:28; 1 Cor. 15:21, 22) Woona wihina Yesu dilevile egumi yaye wihina anivuluse, Yehova ohumuthoma ninga musolo wa Mulugu. Yesu ohukanna mutholo wowakumiha malamulo wihina kadda muthu, emudhi, mulogo eharege. Teto malamulo anaakumihiye enofwanelela wiweleliwaga. (Gál. 6:2) Mbwenye Yesu kanakumiha malamulove, oliye anonjhiha epaddi yomuzimuni ni anomusamalela kadda muthu wa iyo nuudhivela. — Efé. 5:29.
15-16. Ohudhere ddi ni madhu awogile murogola Marley vamodha ni ddibila Benjami?
15 Yesu daathomme alobwana wi yasamalelege arogola. Bumwahaya, arogola yaharaga dholaga enakeliwa wa addibila enowoniha wi enomuthithimiha Yesu. Marley, murogola dhaala anakala elabo yo Estadu Unidu, anowoga ni ndina na arogola amodha egi: “Mutholo waaga ninga mwihiyana oteliwa ni murogola a munlogoni ohukanna thima vanlubale. Miyo ginowilibihera wihina goonege ni makalelo apama nlamulo Yehova akumihiliye nokalawo namasogolela. Mbwenye mamunaga vamodha ni addibila a mmulogoni, enogiriha ni enotamalela dhatedhene gineriminna. Eyo enogikavihera ni enogikweyihedha wiwelela.”
16 Addibila yarihaga arogola, enowoniha wi enowoonelamo pama nlamulo Yehova akuminhiye nokalawo namasogolela. Benjami, ddibila anakale elabo yo Inglatera, anowoga egi: “Miyo ginohudhera vanlubale ni dhowakula dhaarogola mmulogoni. Aliwa enowoga dhithu dhapama dhinakavihera muthu ahudheraga ni okala namalaleya apama. Aliwa enokavihera mulogo mwaha wa dhithu eneriwana.”
17. Mwahaya bwaddi sapama atenihu oriha nlamulo na okalawo namasogolela?
17 Addibila atene mmulogoni — alobwana, ahiyana, vamodha ni anamasogolela emudhi ni anamaholela mulogo — yonelagamo pamadhene nlamulo aakumihe Yehova nokalawo namasogolela, mmulogoni munokala murenddele. Teto yinlubaleya, nnonvuwiha Babihu Odhulu, Yehova. — Sal. 150:6.
JHIBO 123 Obedecemos a Jeová e á Sua Organização
^ paragarafu 5 Mutholo wahiyana mmulogoni buuvi? Addibila atene musolo wa arogola atene mmulogoni? Anamaholela mulogo ni anamasogolela emudhi enalabihedha mutholo wewa ni makalelo mamodhave? Ohudhera wula, nnere woona makalelo Bibliya ananikaviheriye wakula makoho ala.
^ paragarafu 5 Osugwe ddima 6 ohudhera onna musolo “Wakavihere arogola ammulogoni mwawo”, va Namasugwera a Setembro a 2020.
^ paragarafu 9 Osugwe kwaduru “ Mudhidhi baani anafwanelela mwihiyana opotha muru?”
^ paragarafu 13 Wihina ononeve muthu anna mutholo wothoma mulogo winatugumanege kadda emudhi, osugwe ddima 17 ni 19 wa ohudhera onna musolo Ovahe thima mburo waathu amodha mmulogoni mwa Yehova, Namasugwera a Agosto a 2020.
^ paragarafu 59 Wegi wonelemo pama muselu ola, osugwe livuru Mantenha-se no Amor de Deus, epaddi 209 ofiyedha 212.
^ paragarafu 64 Wegi onone muselu dhimodha wodhela Nikuru Nolamulela, omusugwe Sentinela a 15 a Julho a 2013, epaddi 20 ofiyedha 25.
