1. Ethu baani enerana nlogo na Yehova mwaha wodhivela?

 BIBLIYA oowogesa wihina nlogo na Mulugu, ‘enerege wivelela ofunawiwa’ Yeregena ndo, eharaga dhoholela dha Yesu. (Sal. 110:3) Mwebaribarene yovuhulela ela, enna wakwanela peeno. Yaka dhatedhene adhaari a Yehova, enojha mudhidhi wowinjhivene elaleyaga nuviheya muthenga womwene. Aliwa enowerana ndo ehiwaddihedhiwe. Malabo mamodha enolabihedha dhokannadhiwa wihina yapare mabasa ala. Ohiya eyo, aliwa enowakavihera addibila ammuroromeloni, epaddi yomuzimuni ni epaddi yomwilini yaafwanyiwaga makathamiho. Anamaholela mulogo ni adhaari ookavihera, enojha mudhidhi wowinjhivene yegeredhaga epaddi dhewa dha mutugumano, ni yawaredhelaga addibila. Nlogo na Yehova nnowerana ndo nuudhivela. Odhivela enniwana ni Yehova vamodha naathu. — Mat. 22:37-39.

2. Mowiwanana ni Romanos 15:1-3, mweddelo baani Yesu anihiyedhiye?

² Yesu oohiya mweddelo wapama wohara, oliye athabwesa wathuwathuwela athu amodha ohiya withuwathuwela yeka. Nihiyoya ninna wilibihera wihina nimutajhihe oliye. (Omwileri Romanos 15:1-3.) Nerana ndo, nnere wawonelamo madhu aasorihe Yesu enihina: ‘Ovaha winothabwa ohagalasa opitha ovahiwa.’ — Atos 20:35.

3. Musolo ola, nnaasuze ddi?

³ Musolo ola, nnere woona dhithu dhimodha Yesu eriliyena wihina aakavihere athu amodha ni makalelo nnafunihu omutajhiha. Ohiya eyo, negi nikanne efunelo yowakavihera athu amodha neere ddi.

4. Yesu andile addi opweha osogolo efunelo yaathu amodha ohiya efunelo yaye?

⁴ Yesu owakavihera athu amodha naarive agaagomile. Yesu ahivireliwa emahiyu yantero alobelaga, oliye aari vamwangoni podi wera waddamela murudda wo Kafarnawu. Kubuwela makalelo aariye nuwoona muthithi ni muthithi waathu odhaga ogumana nuliye. Oliye owaweddela thagaraga, naarive agaathabwile ogoma, wambela wavulumusa aredda. Kenrena yelave baani. Mudhidhi yole, oliye owoga mwaha woovuwa, ononiwe peeno ninga mwaha wavamwangoni. — Lucas 6:12-20.

5. Musolo wamurala onande addi omutajhiha Yesu yathabwa ogoma?

⁵ Musolo wamurala onande addi omutajhiha Yesu? Kubuwela ayi, ogamanle nduwa nantero waaparaga mabasa, vano babi avade ofiya vade oogomeene, vano wubuwelaga wihina ohudhera weemudhi, peeno kunakalewo. Olobela wa Yehova amulobaga kopolo. Yehova wakula nlobelo naaye ni ohudhera weemudhi wereya labo nenne. Mwaha wa yeyo, anaaye enohudhera ethu yathima, aliwa enowoonelamo wi ababiwa enopweha mburo wobajha dhithu dhomuzimuni.

6. Osorihe nladdaniho nooniha makalelo Yesu aakaviheriye athu, naarive afunaga okalavo yeka.

⁶ Yesu oopatha mudhidhi wihina athapanye naathu, naarive afunaga okalavo yeka. Onorajhihaga wubuwela makalelo aari Yesu nuwiwa wihina mukwaye João Batista ohupiwa? Yesu ahukuuwa vanlubale. Bibliya anihina: ‘Yesu nuwiwa [wodhela okwa wa Juwawu], ogwela mmwanddeyani odhowa mburo womaleya wihina akalewo yekaye.’ (Mat. 14:10-13) Enowoneleyamo mwahaya bwaddi adhe eeregena ndo. Athu amodhaya yamuyelela muthu mukwani enowerana emodhave. Yesu afuna erena ndo, mbwenye kandile. Muthithi waathu onona Yesu wageleliye, nowindo aliwa okala oobajha Yesu ahinafiyewo. Ki Yesu aari avi? Oliye ahubuwela makathamiho yaafwanya athu ale ni ‘wambela waweddela thagaraga.’ Oliye ahoonelamo wihina athu ale ehipupuruwa epaddi yomuzimuni ni yohowela nikavihero. Nuwindo ‘oliye wambela wahudhiha dhithu dhowinjhiva.’ — Marcos 6:31-34; Lucas 9:10, 11.

7-8. Owoge nladdaniho nnooniha makalelo anamaholela mulogo enamutajhihiwa Yesu, ddibila ammulogoni ahoowelaga nikavihero.

 ⁷ Anamaholela mulogo enande addi omutajhiha Yesu. Iyo nnowavaha thima mabasa amatene enaapara anamaholela mulogo wihina enikavihere. Malabo mamodha mulogo kinnona mabasa amatene enaapariwa. Motajhiha, wapadduwa oredda morurumusa, anamaholela mulogo enakosa komisawu yospitale, enowakavihera addibila mowaguveya. Malabo mamodha makathamiho ola podi wereya vaari vamahiyu! Mbwenye nnamaholela mulogo naamudhiwa, enopweha mburo wobajha efunelo yaaddibila ohiya yewa, aliwa enowerana ndo nuudhivela.

⁸ Anamaholela mulogo enokavihera yaapariwaga mabasa oomaga nyumba yomwene ni perediyu dhimodha munebedhiwamo Yehova. Ohiya eyo, enokavihera yapadduwa ngovi, teto nihidduwalaga mudhidhi wowinjhiva enajhiwa wihina ehudhihe ni yaalibihe addibila ammulogoni. Addibila ala namudhiwaya enofwanelela watamalela. Nnowalobelela wihina Yehova aareelihege. Ehe, nihinona wihina iyo atenihu nnohowela werana emodhave. Anamaholela mulogo, enofwanelela okanna manddile, aliwa kahiyo othabwaga ononga mudhidhi ni muselu dhammulogoni, ofiyera opwaza murala wewa.

9. Mowiwanana ni Filipenses 2:4, 5, ekalelo baani makiristawu enafwaneleliwa okanna?

⁹ Omwileri Filipenses 2:4, 5. Yesu ohunihiyedha yotajhiha yopweha efunelo yaathu amodha mburo wobajha, ohiya yehu. Kahiyo  anamaholelave mulogo enahowela ohara yotajhiha ela, mwebaribarene iyo aatene, nnofwanelela werana emodhave. Bibliya anihina: Oliye ‘othukula ekalelo ya mudhaari.’ (Fil. 2:7) Kubuwela ethu nnahudherihu ni muselu yola. Mudhaari obe naari namalaba, oosayelesa makalelo oomuhagalasa patarawaye. Iyo niri adhaari a Yehova ni adhaari aaddibilihu, bumwahaya nnafuna nimutajhihe Yesu, nerena dhatedhene wihina nimuhagalase Yehova ni naalabele addibilihu. Vano, nnafuna noone dholaga dhinaanikavihere, makalelo nnafunihu werana.

10. Makoho baani nnafwanelelihu wikoha?

¹⁰ Wubuwele ekalelo yawo. Wikohe: ‘Giwegerendhe makalelo baani wihina gerena dhatedhene gaakaviheraga addibilaga? Motajhiha, ekalelo yaga yakale avi gahalobiwe wihina gamwaredhele ddibila ari mwanakalaba obe nyumba munithuwa anakalaba? Obe onvaha boleya murogola ari mwanakalaba wihina adhowe omutugumanoni? Ginoddoddoma galobiwa wihina gakavihere oxela oSalawu obe mburo dhineriwa musonkano?’ Niipeleka mmadani mwa Yehova, nnompaganya wihina nnere omulabela egumihu yatene. Makalelo owerana ndo fuuleva mudhidhihu ni dhokanna dhehu wihina naakavihere addibilihu. Yehova anohagalala aanoonaga neragana ndo. Ki vano, noona wihina nnohowela wiwomihedha epaddi yela, nere ddi?

11. Nlobelo nnaanikavihere addi okanna efunelo yowakavihera athu amodha?

¹¹ Olobelege ni murimaawo wamutene wa Yehova. Podi wera wi ohonelamo wi onohowela owomihedha ekalelo yawo, wihina wandege opweha mburo wobajha efunelo yaathu amodha, ohiya efunelo yawo. Podi wera Malabo mamodha kunanda werana ndala. Akala siyeyo enupadduwela, olobele ni murimaawo wamutene wa Yehova. Kumukuwe, omwaaddele dhatedhene dhinupadduwela. Omulobe Yehova ‘efunelo ni kopolo yowerana anafuniye.’ — Fil. 2:13.

12. Azombwe ebaddiziwe, enaakavihere addi nikuru na Yehova?

¹² Akala we ori muzombwe teto ohubaddiziwa, olobele wa Yehova olobaga nikavihero, wihina oparihedhiwege mabasa mmulogoni. Dhilabo dhimodha, mmulogoni munothabwa odhalamo anamaholela mulogo ohiya adhaari ookavihera, teto adhaari ala ookavihera owinjhiva kahiyo azombwe. Nikuru na Yehova ninna wunnuwa, bumwahaya, nnowahowela azombwe wihina yakaviherege anamaholela mulogo weddiha mulogo. We wivahedhela wihina wawenjhedhedha mabasaawo, onere ohagalala. Mwahaya bwaddi? Mwahaya bowi onere omuhagalasa Yehova, addibila enerege wuroromela, teto onere ohagalala mwaha wowakavihera athu amodha.

13-14. Wihina nakavihere addibilihu nere ddi? (Osugwe fotu yavakapani.)

¹³ Osugwerege dhithu dhinahoowela athu amodha. Murumiwi Pawulo ahawaddela makiristawu ooJudeya egi: ‘Kamuddiwale werana opama ni ogawana ele munninyuna, mwaha mukutho ndho Mulugu onodhiveliwa.’ (Heb. 13:16) Yolaga ela yahakavihera! Ohunamale mudhidhi wowinjhivene nuwakela karta nna, makiristawu ooJudeya ohoweleyaga ‘othawela mmwangoni.’ Ehiyaga nyumbadhiwa, malonddiwa ni amudhiwa yahari makiristawu. (Mat. 24:16) Nsaka nenna, addibila yohowela okaviherana mmodha ni mukwaye. Akala yahikanna elamalelo yogawana dhithu yanniwana mmodha ni mukwaye, mwebaribarene yahikweya olemela okalawo ni dhithu vag’ono.

 ¹⁴ Kahiyo Malabo amatene ddibila obe naari murogola, ananilobiye nikavihero. Motajhiha, ddibila ohumuyelela mwariye, vano oliye wukuuwa vanlubale. Nerege ddibila ola, anohowela nikavihero ni mabasa avaade, ninga opiya obe naari boleya? Podi wera wi oliye kanaloba nikavihero mwaha wi kanafuna omunyonya muthu. Mbwenye oliye ere otamalela vanlubale nahere nimukavihera, naarive ahinalobe. Kanubuwelege wihina addibila amodha enna omukavihera, obe akala ddibila oyo onohowela nikavihero, oliyeene anodha alobe. Karajhiha wikoha, wahakale vamburoni vaye, wadhiveliwe wahereliwe ddi?

15. Ethu baani nnafwanelelihu werana akala nnofuna wakavihera athu amodha?

¹⁵ Okale ookweya. Mwebaribarene, mmulogoni mwawo muhukala addibila obe arogola, enna efunelo yowakavihera athu amodha. Mbwenye aliwa kinonelamo wihina enonyonyiwa. Iyo nihinona wi nahowelaga nikavihero, iyo podi waloba, teto aliwa yotajhiha yapama nnafwanelelihu ohara! Niwogaga wodhela muselu yola, namaholela dhaala anithaniwa Alan, anna yaka 40, anafuna okala muthu ookweya, anawoga egi: “Athu a yaka dhatedhene, kiyakanna manyazo omusayela Yesu wihina emulobe nikavihero. Aliwa yowonelamo wi Yesu owathuwathuwela. Mwebaribarene miyo ginafuna gimutajhihe Yesu wodhela ononiwa ninga muthu oolemeleya, ookweya ni anaakavihera athu amodha.”

16. Omparihedha mabasa Salmos 119:59, 60 onanikavihere addi omutajhiha Yesu?

¹⁶ Akala kannanda omutajhiha Yesu mwamakalelo oologomana, kanikwerebeye. (Tia. 3:2) Omubuwele muthu anafuna osuza omeesili ahinanda otajhiha mabasa aapanre muthu onamuhudhiha. Mbwenye mudhidhi  onavirigiwa oliye podi ohudhera ni dhoviriganiha dhaye teto wula ilibiheraga omutajhiha pamadhene muthu ole onamuhudhiha. Vasogolova oliye podi odha okala meesili apama. Ni makalelo mamodhave, naparihedhaga mabasa nde nnahudherihu mBibliyani, nilibiheraga wihina niiwomihedhe, nnere wanda omutajhiha Yesu pamadhene.— Omwileri Salmos 119:59, 60.

17-18. Mareeliho baani nnawakelihu mwaha wopweha mburo wobajha efunelo yaathu amodha?

¹⁷ Niivelelaga wihina nikavihere, athu amodha enerege onitajhiha. Namaholela dhaala anithaniwa Tim anihina: “Addibila amodha eri azombwe ehithomiwa ninga adhaari ookavihera. Ethu yathukulele othomiwa fuwawona amodha ekaviheraga, naaliwaya werana emodhave. Azombwe ala enowakavihera mabasa ammulogoni ni anamaholela mulogo.”

¹⁸ Iyo nnakala elabo yapeliwe ninrima. Mbwenye adhaari a Yehova bohiyana. Yotajhiha ya Yesu, yopweha mburo wobajha efunelo yaathu amodha, ohiya yaye, enonitikiniha vanlubale, iyo nnafuna nerena emodhave. Nihinona wihina iyo kannande omutajhiha mwamakalelo oologomana, mbwenye iyo podi ‘wahara mohihiyedhedha manyalo aye.’ (1 Ped. 2:21) Nilibiheraga omutajhiha Yesu, nnere okanna ohagalala mwaha wonona wihina Yehova onorumedha.