OHUDHERA 6
Onororomela makalelo Yehova aneddihiye dhithudha?
‘Nibwe, dhatedhene aneriyena soologomanave, mwaha dila dhaye dhatedhene sowogowa. Mulugu oororomeleya, ahinerana obure; owogowa ni apama duliye.’—DEUT. 32:4.
JHIBO 3 Murenddele, kopolo dhinadha wa nyu Yehova
DHITHU NNAAHUDHERIHU *
1-2. a) Mwahaya bwaddi athu owinjhiva ehandaga wawiwelela ale enathonga? b) Musolo ola nnahudhere ddi?
PEENO owinjhiva, enowarusa waroromela ale enathonga. Aliwa enowoonelamo wi anamathonga enathabwa waariha aliba ovuwa ni aliba ooreela, mbwenye muthu oohawa kinampwatha. Bibliya anowenya egi: ‘Athu yathongaga enaatotela goyi amodhaya.’ (Ecl 8:9) Ohiya eyo, anamaholela gereja amodha, enowerana dhithu dhabure. Eyo enowathukulela athu oharoromela. Mowindo, namuhudhihaga muthu Bibliya, nnohowela omukavihera omuroromela Yehova, naaleya onaalabiheriye wihina eholelege mulogwaye.
2 Mbwenye, kahi anamahudherave Bibliya enahowela ohudhera omuroromela Yehova ni nlogo naaye. Naarive naleya ebanjhe omulabela Yehova kale, aliwa podi ohiya ororomela wihina makalelo Yehova aneriyena dhithudha bapama. Malabo mamodha, podi okumelela dhithu, dhineha ororomeleya wehu wa Yehova. Yohudhera ela, nnere woona dhopadduwa tharu, dhinehe nroromelo nehu: Yobajha, nahonelagamo pama yolebela ya Bibliya, yanabili, naakela dhoholela dha mmulogoni dhinadhela wa Yehova, ni yanatharu, naafwanyiwaga makathamiho osogolo.
OMUROROMELE YEHOVA WAMWILERIGI BIBLIYA
3. Mwahaya bwaddi dhopadduwa dhimodha dhamBibliyani podi weha nroromelo nehu?
3 Namwilerigi Bibliya podi okumelela dhithu nihinonelihumo pama, makalelo Yehova aweddihiliye athu amodha ni dhothoma eriliyena. Motajhiha, yopadduwa enafwanyeya va livuru na Números, nihoona wihina Yehova ahiwoga ni mwaana Ezarayeli afwanelela okwa, mwaha oreba kwini labo na Sabadu. Teto livuru nanabili na Samuweli, nnowoga wi nuuvira mudhidhene, mwene Davidi wawerana mararuwo ni ompiha mulobwanaya, mbwenye Yehova omulevelela. (Núm. 15:32, 35; 2 Sam. 12:9, 13) Amodha podi wubuwelaga yegi: “Mwahaya bwaddi Yehova adhe amulevelelege Davidi naarive agararuwile ni agampile muthu, mbwenye muthu ole aarebile kwini opiwa wodhela ethu yooniwa ninga ethu yahari yowopiha?” Wihina nonelemo pama kabeni noone dhithu tharu, nnahowelihu wubuwela namwilerigi Bibliya.
4. Génesis 18:20, 21, Deuteronómio 10:17, dhinalibiha avi nroromelo nehu wodhela otoriha wa Yehova?
4 Bibliya kanawoga dhithu dhatedhene dhipadduwe. Motajhiha, iyo nihinona wi Davidi ahithwaruwa ni murima waye watene. (Sal. 51:2-4) Ki wodhela mulobwana ole ahiwelele nlamulo na Sabadu? Oliye ahithwaruwa ele eriliyena? Anorajhihaga omuthegela Yehova? Onootorihiwaga vano ahithwaruwa? Bibliya kanawoga, bumwahaya kanitorihe yothoma ya Yehova, mwaha kaninna ebaribari yatene. Mbwenye iyo podi okanna ebaribari wi ‘Mulugu dororomeleya, ahinerana obure.’ (Deut. 32:4) Oliye anerana dhothoma dhaye wodhela ebaribari—ohiya ele aniwiye, nsakulo, obe ethu-siithu enamuthukulele werana yotoriha yabure. (Omwileri Génesis 18:20, 21; Deuteronómio 10:17.) Nahudhera wodhela Yehova ni makalelo aneriyena dhithudha, nnerege ororomela pamadhene dhothoma dhaye. Naarive naafwanye madhu amBibliyani nihinawonelihumo pama, nihinona pamadhene wihina ‘dila dhatedhene dha Yehova sowogowa.’ — Sal. 145:17.
5. Ohilogomana onanthukulele avi ohitoriha pama? (Osugwe kwaduru “ Ohilogomana kunanihiya woona dhithu mwamakalelo Yehova anooniye.”)
5 Niri athu ohilogomana ni kannanda otoriha pamadhene. Yehova anipadduse moligana ni oliye, bumwahaya nigafunaga wawona athu yeeddihiwaga ni makalelo apama. (Gén. 1:26) Mwaha wohilogomana wehu, naarive nubuwelaga wi nihinona dhithu dhatedhene, iyo podi ohitoriha ni makalelo apama. Siyeyo yapadduwe ni Jonasi. Podi wera onowubuwela wi Jonasi kaadhiveliwe yothoma ya Yehova, owakalela thagaraga athu ooNinive. (Jonas 3:10–4:1) Mbwenye kubuwela omakuthulowa. Athu ookwaranya 120,000 ooNinive yahithwaruwa teto ovulusiwa! Mowindo, baani ahowela osumululiwa Jonasi obe Yehova?
6. Yehova anohowela onaddela dhothoma dhaye?
6 Yehova kanawaddihedhiwa owoga ethu enamuthukulela werana dhothoma dhaye. Ebaribari wi malabo mamodha, Yehova owenya wi adharaaye ewoge mubuwelo wewa wodhela dhothoma dhaye. (Gén. 18:25; Jonas 4:2, 3) Malabo mamodha oowoga mwahaya bwaddi adhe eeregena yothoma yele. (Jonas 4:10, 11) Sapama wubuwela wi kaavo anamuwadda Yehova onaddela dhothoma dhaye. Ninga mpaddusi ehu, oliye kanahowela wi iyo nrumedhe dhothoma dhaye, newene ahinathi obe agamanle werana yothoma yaye.— Isa. 40:13, 14; 55:9.
OMUROROMELE YEHOVA WAKELA DHOHOLELA
7. Ethu baani yanikathamihe, ki mwahaya bwaddi?
7 Mwebaribarene, kannanganyedha wihina Yehova anerana ele eri yapama. Mbwenye podi wera makathamiho ninnihuna, waroromela athu Yehova aasakuliye wihina yeeddihege nlogo naaye. Iyo podi wambela wanganyedha akala mwebaribarene alobwana ala enohara dhoholela dha Yehova obe enahara mubuwelo wewa. Podi wera athu akale yahikanna mubuwelo yola. Kubuwela dhotajhiha nifwanyilihu ddima yanatharu. Podi wera mmudhi a mulobwana ole aathegele nlamulo nna Sabadu ahikoha egi: Mwebaribarene Moses ahinalamule wihina mulobwana ola apiwe, ohurajhiha omukohedha Yehova? Obe mukwaye Uriya aari mamune Batiseba, ahubuwela egi, Davidi avuluwile muukwani, mwaha okala mwene. Ebaribariya sowi, kinandeya iyo owoga wi nnomuroromela Yehova wula niharoromelaga athu Yehova aasakuliye wihina yeeddihege nlogo naaye.
8. Nikuru na Yehova peeno, enaanda addi ohara ele elobiwe va Atos 16:4, 5?
8 Yehova peeno, onomulabihera ‘mudhaari oororomeleya ni athotho,’ wihina aholele nikuru naaye niri elabo yela yavati. (Mat. 24:45) Mudhaari ola, anahara yotajhiha na Nikuru Nolamulela a nsaka noobajha. Aliwa enokabelela nlogo na Yehova na elabo yatene, enowavaha dhoxagiha anamaholela mulogo. (Omwileri Atos 16:4, 5.) Anamaholela mulogo enokabelela wihina dhoholela dhihariwe mmulogoni. Niwelelaga dhoholela nnakalihu dha nikuru ni dha anamaholela mulogo, nnowoniha wi nnororomela makalelo Yehova aneriyena dhithudha.
9. Dhithu baani dhaanikathamihe ohara dhoholela dha anamaholela mulogo, ki mwahaya?
9 Malabo mamodha podi okala yorusa ohara dhothoma dha anamaholela mulogo. Motajhiha, yaka nda dhogomihera murudda dhowinjhiva ni mulogo dhihisadduliwa. Teto dhithu dhimodha wihina dhilabihedhiwe pama nyumba dhehu dhomwene, anamaholela mulogo ehaloba wi anamalaleya amodha etamele mulogo dhimodha. Podi we wurusaga otama mulogo oriwe, erimo akwawo vamodha ni amudhawo. Yehova anowoga kove ni kove ni anamaholela mulogo wihina yaathomele anamalaleya mulogo enafuniwa odhowa? Naari. Podi wera siyeyo enanikathamiha ohara dhoholela nnakelihu. Mbwenye Yehova onowaroromela anamaholela mulogo wi enere werana yothoma yapama, nihiyoya nahanyedhege. *
10. Mowiwanana ni Hebreus 13:17, mwahaya bwaddi egahoweleyaga iyo okavihera dhothoma dha anamaholela mulogo?
10 Mwahaya bwaddi nigahowela okavihera dhoholela dha anamaholela mulogo, naarive nihirumedhaga dhothoma dhewa? Nahaanyedhaga anamaholela mulogo, nnokavihera nikuru na Yehova okala nowiwanana. (Efé. 4:2, 3) Iyo aatene nuwiyeviha naharaga dhothoma dha anamaholela mulogo, mulogo onokavihereya. (Omwileri Hebreus 13:17.) Ethu yathimaya sowi, nnowoniha wi nnomuroromela Yehova, naakaviheraga ale Yehova aasakunliye wihina ekabelelege mulogo.— Atos 20:28.
11. Enaakavihere ddi ororomela dhothoma dha anamaholela mulogo?
11 Ethu enaanikavihere ororomela dhothoma dha anamaholela mulogo, fuwubuwela wi aliwa enolobela elobaga muzimu wotxena, yaafunaga osanyiha muladdu wammulogoni. Aliwa enoopendda dholaga dhamBibliyani ni enohara dhoholela dha nikuru nolamulela. Mwebaribarene aliwa, enafuna emuhagalase Yehova ni okabelela nlogo naaye mwamakalelo apama. Anamaholela mulogo athu oororomeleya, teto ehinona wi enere wakulela vamentoni va Yehova makalelo enaweddihiwa addibila ammulogoni. (1 Ped. 5:2, 3) Kubuwela ayi, elabo nnakalihumo ehigawanyeyamo mahimo oohiya-iyana, webedha teto ni pulitika. Mbwenye nikuru na Yehova thowiwanana mwaha enamwebedha Mulugu mmodha eebaribari. Wiwanana wula winowenyeya mwaha Yehova anna oreeliha nikuru naaye!
12. Anamaholela mulogo enohowela onona dhithu baani wihina enone akala muthuya ohuthwaruwa ni murima watene?
12 Yehova ohavaha anamaholela mulogo mutholo munlubale mulogo okala woweela epaddi yomuzimuni. Muthu erana yothega enlubale, Yehova anafuna wi anamaholela mulogo, etorihe wi akala muthu yole anofwanelela okala mmulogoni obe igariwemo. Anamaholela mulogo enofwanelela onona pamadhene akala muthuya ohuthwaruwa wodhela ele eriliyena. Wihina yande, aliwa enohowela wikoha ayi: “Oliye podi wera gihithwaruwa, mbwenye mwebaribarene anowonelamo yothega eriliyena? Ohuthoma ohuhogolowela werana yothega emodhave? Akala oliye atheegile mwaha wandana ni athu abure, oliye ohuthoma ohiya weedda ni athu yala?” Anamaholela mulogo enolobela wa Yehova, enoopendda ele Bibliya anawogiye, enosanyiha dhatedhene dhipadduwe, teto wodhela muthuya ariye wodhela yothega eriliyena. Yamala, finathomiiwa kala muthuya anofwanelela okalave mmulogoni. Malabo mamodha anohowela otxosiwa. — 1 Cor. 5:11-13.
13. Ethu baani yakumelele mmudhihu obe mukwihu atxosiwa?
13 Ororomeleya wehu ninnihuna ni anamaholela mulogo onehiwe ni makalelo baani? Akala muthuya atxosiwe ahikala mukwihu obe mmudhihu, podi okala yokweya weenya dhoholela dha anamaholela mulogo. Mbwenye ki akala muthuya atxosiwe ddi mmudhihu obe mukwihu? Iyo podi wanganyedha wi aliwa kithomme pama, ethomme ni maruluya, akala anamaholela mulogo etorihe enonaga dhatedhene dhipadduwe obe akala aliwa ewogile muladduya yubuwelaga monelo wa Yehova Mulugu. Enaanikavihere ddi iyo okavihera dhothoma dha anamaholela mulogo?
14. Anamaholela mulogo yathoma wi mukwihu obe mmudhihu anofwanelela otxosiwa enaanikavihere ddi?
14 Kaniddiwaale wihina Yehova anaalabihera otxosiwa wihina atxenihe mulogwaye. Teto podi omukavihera muthu yole atxosiwe ni ahithwarunwe, ahere akalave mmulogoni ere wathukulela amodha werana yothega emodhave. (Gál. 5:9) Oliye ahere ahitxosiwa erege wubuwela wi yothega eriliyena kahiyo yowopiha, teto kanahowela osaddula dhowera dhaye ni mubuwelwaye, ni makalelo yala, yakale yorusa muthuya ovenyihedha epaddaaye yomuzimuni ofiyera orumedhiwa ni Yehova. (Ecl. 8:11) Mbwenye iyo podi okanna ebaribari wi anamaholela mulogo ehinona wihina mutholo munlubale othoma akala muthu anohowela otxosiwa obe naari. Mowindala, aliwa ehinona wi ninga anamatoriha aamwaana Izarayeli akale, aliwa kirumiwe naathu wihina etorihege, mbwenye erumiwe ni Yehova. — 2 Cró. 19:6, 7.
OMUROROMELA YEHOVA PEENO WINERE ONIKAVIHERA OSOGOLO
Ddi enaanikavihere omuroromela Yehova ni wiwelela dhoholela dhaye yohosa enlubale yafiya? (Osugwe ddima 15)
15. Mwahaya bwaddi egahoweleyaga ororomela dhoholela dha Yehova peeno ohiya kale?
15 Omagomihero wa elabo yela yabure wihaddamela, bumwahaya, nnohowela ovanene ororomela makalelo Yehova aneddihiye dhithudha opitha kale. Mwahaya? Mwaha ohoseya winlubale wafiya, podi wera nnere wakela dhoholela dhinaakale dhorusa wonelamo obe wiwelela. Mwebaribarene nihinona wi Yehova kanawoge ni iyo kove ni kove. Podi wera anaalabihera addibila enaniholela wihina enivahe dhoholela. Mudhidhi yoyo, kunaakale mudhidhi wosayela onona pama wodhela dhoholela nakenlihu, podi wera nnerege wikoha: ‘Ebaribarene dhoholela nda dhinadhela wa Yehova? Ki dhothoma dha addibila enaholela siivi?’ We onere orumedha omuroromela Yehova ni mulogwaye mudhidhi yoyo? Yowakulaya enere woneya akala we peeno onohara dhoholela. Akala onororomela dhoholela dha anamaholela mulogo peeno, teto wiwelelaga ohubuwele dila biili, podi wera onere werana emodhave wafiya ohoseya winlubale.—Lucas 16:10.
16. Ororomeleya wehu wa Yehova onehiwe addi osogolo?
16 Teto nnohowela wubuwela pamadhene makalelo nnafunihu wonelamo otoriha wa Yehova omakuthulo wa elabo ela yabure. Iyo nnojhehera wihina owinjhiva ehinamulabela Yehova, naamudhihuya erome omulabela oliye omakuthulo ohunathi ofiya. Mbwenye Armajedo afiya, kahi iyo nnaathome baani aneeddeliwe thagaraga ni Yehova. (Mat. 25:31-33; 2 Tes. 1:7-9) Anakale Yehova amulabiheraga Yesu anaathome ethu enaapadduwele athu yala. (Mat. 25:34, 41, 46) Nnere ororomela otoriha wa Yehova obe nnere ohiya omulabela mwaha wi kannenya dhothoma dhaye? Mohanganyedha nnohowela olibiha ororomeleya wehu ovanene, wihina osogolo nande omuroromela pamadhene.
17. Dhithu baani dhapama dhinaapadduwe mwaha otoriha wa Yehova mukoddoni ya Armajedo?
17 Onorajhihaga okarati vano wubuwela nnaakale avi mwilaboni exa, nawonaga mareeliho a otoriha wa Yehova eriliyena mu armajedo? Gereja yowoota kidha ekalawo, aliba malondda enawoniha goyi athu, dhinaakale dhithu dhamundduli. Oredda, wuluvala, wayelela athu nnadhivelihu muukwani, dhatedhene dhendho dhinere ovira. Saddana vamodha ni ademoniyu enere omala yaka 1000 egaari mukambura. Dhithu dhatedhene dhabure yenriwana kadhidha dhikalawo. (Apo. 20:2, 3) Nnere wonelamo wi makalelo Yehova aneddihiye dhithudha bapama!
18. Dhithu baani nihudherihu ni amwaana Ezarayeli dhinafwanyeya va Números 11:4-6 ni 21:5?
18 Mwilaboni exa nnere ofwanyiwa makathamiho enehe ororomeleya wehu wa Yehova? Motajhiha, wubuwele ethu yaapadduwele amwaana Izarayeli nuuhiya elabo yo Wijipitu, wengo yaariwawo adhaari. Amodhaya wambela wawunlana makathamiho mwaha dhoojha dhahanniwana dhajhiwa Wijipitu ni mana Yehova aavahiye. (Omwileri Números 11:4-6; 21:5.) Ki eyo podi onipadduwela iyo Armajedo avira? Iyo kannonne mabasa nnakannihuna wihina negeredhe elabo yavati ni mudhidhi nnaamalihu negeredhaga elabo yavati okala parayizu. Podi wera nnere okanna mabasa owinjhiva owapara, naarive dhigari ndo, eyo kinatapulela wihina dhithu dhatedhene dhinere ologomana omambelelowene. Nnere oliba murima ohunlana dhoholela dha Yehova anaanivahiye mudhidhi yoyo? Mbwenye kannanganyedha wi naavahaga thima dhithu Yehova ananivahiye peeno, enakale yokweya ovaha thima dhoholela nnaakeligihu osogolo.
19. Musolo ola waavirisedhe ni makalelo baani?
19 Musolo ola nihoona wi dhithu dhatedhene dhinerana Yehova sapamave. Ethu nihinafwanelelihu wanganyedha. Teto nihoona wi nnohowela waroromela ale Yehova aasakunliye, wihina esamalelege nlogo naaye. Ohaddiwale madhu Yehova anvetheliye namavuhulela Izayiya waleba: ‘Kopolo dhenyu dhinadha mwaha okala oopwaseya ni oororomela.’ — Isa. 30:15.
JHIBO 98 Bibliya —nvaho wa Mulugu
^ paragarafu 5 Yohudhera ela enere onikavihera mwahaya edhe ekalege yathima olibiha nroromelo nehu ni Yehova, ni ale aasakunliye wihina eholelege nlogo naaye elabo yela yavati. Teto, nnere woona makalelo enanikaviheriwa omuroromela Yehova peeno, ni enaanegeredhiwa wihina nande owanana dhoweha osogolo.
^ paragarafu 9 Malabo mamodha, podi wagumanana makathamiho enamuthukulela muthu obe murala wantero ohutamela mulogo mmodha. Omusugwe Nosso Ministério do Reino Novembro 2002, “Perguntas respondidas.”
