MUDHIDHI wa kale, wihina mulobwana atele, oliye obe amudhaaye yohowela omuliva lobolu emudhi ya mulobwana anafuna oteliwa. Muthengo ola waliviwa wakala dhoreela, anenyama obe korowa. Malabo mamodha, lobolu ola ooliviwa wodhela wapara mabasa. Motajhiha Jako, aharumedha omulaba ababe Raqueli yaka 7 wihina amutele. (Gén. 29:17, 18, 20) Mweddelo ola yavolowelavo ddi?

Livuru dhaala Carol Meyers nnihina: “Lobolu ola yaari makalelo ooliva emudhi ya muhiyana ole anafuna oteliwa, wihina ehithabwe omunlela mwaniwa ole anafuna ovinyavo vade. Ela yaari ethu yathima ya emudhi yaari anamalima.” Podi wera wi lobolu ola ooparihedhiwa mabasa wihina yandanihiwe emudhi ya muliba anafuna otela naale enafuna oteleliwa. Wandana wula weemudhi wokavihera thabwa-thabwa wafiya mudhidhi yoorusa. Mwaha kadda muthu mweemudhini yokaviherana mmodha ni mukwaye. Ohiya eyo, lobolu ola owoniha wihina muhiyana ole ohukanna mwinnya, teto aamukabelelege kahiyo ababe, mbwenye aakale mulobwana anafuna omutela.

Omuliva lobolu kiyatapulela wihina muhiyana ole era oguliwa ninga yoobo. Livuru dhaala ninna musolo Israel antigo—sua vida e suas instituições nnihina: “Nlamulo nna nooliva mwana muthengo wa korowa obe mwana korowa elobiwe ni emudhi ele ya muhiyana anafuna oteliwa, yothukulela matelo Amwaana Izarayeli okala ninga ethu yooguliwa. Mbwenye mwebaribarene lobolu aliviwa, yaari makalelo ooliva emudhi ele, opitha muthengo waguliwana muhiyana.”

Peeno, dhilabo dhimodha, ehihalana mweddelo ola womuliva lobolu. Ababi eri makiristawu yamulobaga lobolu, aliwa enohiya wihina okweya wewa ‘winoniwe naathu aatene’ kinaloba muthengo wokwima worusa oliviwa. (Fil. 4:5; 1 Cor. 10:32, 33) Ni makalelo yala enowoneya wihina kahiyo athu anrima obe ‘oodhivela korowa.’ (2 Tim. 3:2) Makiristawu ehimulobaga lobolu ookwima, mulobwana anafuna otela kanalegela otelawa aajaga korowa wihina atelena. Teto oliye kanahiye mabasaye oopiyonero wihina aapare mabasa mamodha ni ande okanna korowa dhowakwana wihina amulive lobolu ookwima alobiwe.

Dhilabo dhimodha, anamathonga binamusoriha lobolu anafuna oliviwa. Dhilabo ninga dhendho, makiristawu enowiwelela nlamulo nna. Mwahaya? Madhu a Mulugu enihina: ‘Athu aatene, yawiwelege anamathonga avadhulu’ ni yawiwelelege malamulo aanamathonga ehinaviriganiha malamulo a Mulugu. — Rom. 13:1; Atos 5:29.