MOWIWANANA ni nlamulo Mulugu anvahiliye Moses, wapelekiwa mukutho wa kangayiwa ni nziya Yehova oorumedha. Naasorihiwaga nlamulo nna namukutho, balame nda biili dhinasorihiwa vamodhave. Akala muthu kaakanna kangayiwa oopeleka nziya. (Lev. 1:14; 12:8; 14:30) Mwahaya edhe ekalege yapama? Ethu emodhaya sowihina kayari ethu yokweya wafwanya maziya. Mwahaya bwaddi?

Maziya balame dhineedda mburo dhohiyana-hiyana, dhinakala murudda dhowizrayeli thabwa-thabwa wafiya mudhidhi welimwe. Yaka dhatedhene mweri wa Outubro, maziya enovavela omayelo nduwa dhilabo dhoopaha ni dhinahogolowela wiZarayeli wambela oridha. (Cântico de Sal. 2:11, 12; Jer. 8:7) Eyo enatapulela wihina mudhidhi wakale, amwaana Izarayeli kayaakweyela opeleka nziya ninga mukutho.

Mbwenye kangayiwa kadhinakala murudda dhohiyana-iyana, bumwahaya nsaka thi nsaka yokweya ofwanya wiZarayeli. Ohiya eyo, athu amodha yofuwa kangayiwa vadeviwa. (Omuladdanihe ni João 2:14, 16.) Mowiwanana ni livuru ninna musolo Plantas e animais da Bíblia, “Athu aatene yakala oPalestina ni musidadimwa, kadda muthu oofuwa kangayiwa vade vaye. Kadda murala wofwanyavo nyumba ya kangayiwa, kangayiwa dhimodha dhotiba mwibiiwa osirini okalaga wewene.” — Omuliganihe ni Isaías 60:8.

Mwaha wowarumedha amwaana Izarayeli opeleka mukutho wa balame dhakweya ofwanya yaka dhatedhene, Yehova ahoniha wihina dodhivela ni dokweya.