OHUDHERA 1
‘Ale enamusayela Yehova kidha yahalela ethu yapama’
YOLEBELA YA YAKA YA 2022: ‘Ale enamusayela Yehova kidha yahalela ethu yapama.’—Sal. 34:10.
JHIBO 4 Jeová É o Meu Pastor
DHITHU NNAAHUDHERIHU *
Naarive agaari vaari va makathamiho, kaavo ethu yapama yamuhalela Davidi (Osugwe ddima 1 ofiyera 3) *
1. Mudhidhi baani woorusa wanfwanye Davidi?
DAVIDI era othawa, athawihaga egumaye. Sawuli, mwene akopolo owizarayeli ahithoma ompa Davidi. Mudhidhi yole athawaga, oliye wimela sidadi yo Nobi, mburo yole Davidi omuloba namakutha Ayimeleki, pawu tanu wihina ajhe. (1 Sam. 21:1, 3) Nuwindo, Davidi ni anyakoddo aye othawela okunguni wa nibwe. (1 Sam. 22:1) Yamuthukulele Davidi ofiya mburo yola yaari ddi?
2. Dhithu baani dhabure Sawuli eriliyena? (1 Samuel 23:16, 17)
2 Sawuli aari nrimave, oliye oomukalela nrima Davidi mwaha othabwa ononiwa naathu, teto athuya yathabwa omudhivela. Sawuli ahinona wihina Yehova ahimala omukodda ninga mwene mwaha wohiwelela waye. Davidi aakale mwene ooharela owizarayeli. (Omwileri 1 Samuel 23:16, 17.) Sawuli aari mwene owizarayeli, oliye ahikanna anyakoddo ni athu owinjhiva yamukavihera. Mbwenye Davidi kanna ethu emodhaya ehiri othawa. Sawuli ubuwela wihina ere owana ni Yehova ofiyedha omuhiha Davidi okala mwene? (Isa. 55:11) Bibliya kanaakula nikoho nna, mbwenye iyo nihikanna ebaribari wihina Sawuli era waredhana mootho. Kavo anawana ni Yehova ofiyedha ogonjhiha!
3. Naarive Davidi dhimpadduwelaga dhithu dhowinjhiva mwigumini mwaaye, oliye akala avi?
3 Davidi aari muthu owiyeviha. Oliye kaasakunle okala mwene owizarayeli. Yehova damuthomile okala mwene. (1 Sam. 16:1, 12, 13) Sawuli amoona Davidi ninga mwiddanaaye munlubale. Mbwenye Davidi kamwinkedha Yehova dhithu dhatedhene dhabure dhampadduwela, newene kunlana akala kanna yojha newene mwaha okala okunguni. Mwebaribarene, podi wera bu mudhidhi yole Davidi agiipite okunguni, alembiye yolebela ya yakela: ‘Ale enamusayela Yehova kidha yahalela ethu yapama.’ — Sal. 34:10.
4. Yohudhera ela enawakule makoho baani, ki mwahaya edhe ekalege yathima?
4 Adhaari owinjhiva a Yehova peeno, kinakanna yojha yowakwana ni dhithu dhimodha dhinahoweliwa. * Teto koronaviru ohuthabwiha makathamiho. Woona wi ninna waddamela ‘mahoso manlubale’, dhithudha dhinerege othabwa. (Mat. 24:21) Ni mubuwelo yola, nnafuna noone dhowakula dha makoho mannayi a musolo yola, enihina: Davidi kiyamuhalela ethu yapama ni makalelo baani? Mwahaya bwaddi enofwanelela ohagalala ni dhithu ninnihuna? Mwahaya bwaddi nihanganyedhaga wihina Yehova anere onikabelela? Ki nniwegeredhe addi peeno wa dhithu dhinereye osogolo?
‘KAAVO ENAGIHALELA’
5-6. Salmos 23:1-6 ananikavihera addi wonelamo yolebela ya yakela?
5 Davidi wera ‘ale enamusayela Yehova kidha yahalela ethu yapama’, oliye afuna awoge ddi? Davidi ohalabihedha madhu mamodhave amulebaga Salmos 23. Bumwahaya Salmo ola podi onikavihera onona ethu afuna owoga Davidi. (Omwileri Salmos 23:1-6.) Davidi onamwambela Salmo ola ni madhu owi ‘Yehova di namakukula aaga. Kinaagihalele ethu.’ Nuwindo, Davidi owogagave dhithu dhinna thima mwigumini. Motajhiha, mareeliho oomuzimuni anniyena mwaha omurumedha Yehova ninga namakukula aye. Yehova oomweeddiha Davidi ‘dila dhowogowa,’ ni ookalave nuliye mudhidhi wapama ni mudhidhi wabure. Monelo wa Davidi, omulabela Yehova yakala ninga ‘okinantela mpodda mukiiti.’ Naari dhigari ndo, oliye ahinona wi agahikanna makathamiho mwigumini mwaaye, agahikanna amwiddanaaye, malabo mamodha oliye owukuwa vanlubale, okalaga ninga aneedda ‘mujhijhini muri yiihi yowopiha.’ Oliye ahinona wi Yehova di namakukula aye, ‘koove ethu.’
6 Davidi ‘kiyamuhalela ethu yapama’ mwigumini mwaaye nimakalelo baani? Davidi ahikanna dhatedhene ahoweliye wihina wandana anniyena ni Yehova odhowege vasogolo. Davidi kahowela dhorela dhowinjhiva wihina akale oohagalala. Oliye oohagalala ni dhithu dhatedhene aakeliye wa Yehova. Ethu yamuhagalasa fuubareliwa ni oreelihiwa ni Yehova.
7. Mowiwanana ni Lucas 21:20-24, dhithu baani dhorusa makistawu ooJudeya yaafwanyiwiwa?
7 Madhu alembe Davidi enonihudhiha okanna monelo wapama wodhela dhoreela. Kahi yabure okanna dhoreela, yabureya fupweha mburo wobajha mwigumini mwehu. Ela ethu yaahudhere makiristawu yakala oJudeya. (Omwileri Lucas 21:20-24.) Yesu ahiwoga wi sidadi yo Jeruzale yere orijhiwa. Eyo yereya, yofwanelela ‘ethawele mmwangoni.’ Okumamo mu Jeruzale yere ovulusa egumiwa, mbwenye yofwanelela ohiya dhithu dhowinjhiva. Yaka dhamundduli, Namasugwera ahiwoga wodhela makiristawu ooJudeya egi: “Aliwa yahihiya munddadhiwa ni nyumbadhiwa, newene kayavenyihemo ethu munyumbani mwiwa, eroromelaga obareliwa ni okaviheriwa ni Yehova. Opweha webedha wewa osogolo wa dhatedhene dhooniwa ninga dhithu dhathima.”
8. Nnahudheravo ddi niile yaapadduwele makiristawu yakala oJudeya?
8 Ki iyo nnahudheravo ddi niile yapadduwele makiristawu yakala oJudeya? Namasugwera asorihiwe ddima 6 anihina: “Podi ohanganyedheyaga monelo ninnihuna ni dhoreela, akala dhithu dhathima, obe ethu yathima fuvulusiwa athu atene eri epaddi ya Mulugu. Podi wera othawa wehu winere onitatamulela makathamiho ofiyera ohowelaga dhithu dhimodha. Nnofwanelela wiwegeredha werana ethu-siithu ninga yenrena addibilihu ansaka noobajha yathanwe ojudeya.” *
9. Nawilerigi madhu enafwanyeya va Hebreus 13:5, 6, ebaribari baani nnahowelihu okanna?
9 Onowanda wubuwela makathamiho yafwanye makiristawu ale? Ohiya dhoreela dhewa dhatedhe vano wambela dila biili. Yohowela omuroromela Yehova wihina ere wavaha dhithu yahoweliwa. Dhithu dhimodha dhakavihere makiristawu ale, si yolaga Pawulo avahiliye makistawu Eberewu yaka tanu mundduli, ARomano ehinathi omurijha Jeruzale. Oliye wera: ‘Makalelo eenyu ookalawo yonihege wihina kamunadhivela korowa ni munohagalala ni dhithu munninyuna. Mwaha oliye enre: ‘Kagidha guhiya ni kagidha gunyanyala.’’ (Heb. 13:5, 6) Mwebaribarene yaali ethu yokweya makiristawu yahanre yolaga ya Pawulo wirugunusedha ni okanna egumi yokweya nukuma ojeruzale. Aliwa yohowela okanna ebaribari wihina Yehova ere wavaha dhithu yahoweliwa epaddi yomwilini. Madhu a Pawulo enonikavihera okanna ebaribari emodhave, Yehova anere onivaha dhithu dhatedhene nnahowelihu epaddi yomwilini.
‘NAKANNA ETHU YOJHA NI YOWARA NNERE OHAGALALA’
10. Yamuthukulela Pawulo okala ‘oohagalala’ ddi?
10 Murumiwi Pawulo ahinvaha Timotiyu yolaga yooligana ni yela. Yolaga emodhave enonikavihera iyo peeno. Oliye wera: ‘Mowindo, nakanna ethu yoojha ni yowara, nnere ohagalala.’ (1 Tim. 6:8) Eyo enatapulela wihina kanigulege dhoojha dhapama, okanna nyumba yapama obe okanna dhowara dhixa? Kahi yeyo Pawulo afuniye owoga. Pawulo afuna ere iyo nnofwanelela ohagalala naari nikanne vang’no obe dhinjhive. (Fil. 4:12) Eyo sithu ‘yamuhagalasa’ Pawulo. Ethu yathima ninnihuna mwigumini mwehu fuwandana ni Yehova, kahiyo dhithu dhoreela baahi ninnihuna.— Hab. 3:17, 18.
Kaavo ethu yapama yaahalela amwaana Ezarayeli muwari mwa yaka 40 egaari mwiddeddereni. Ki iyo, nnohagalala ni dhithu ninnihuna? (Osugwe ddima 11) *
11. Madhu a Moses wodhela ohagalala ni dhithu ninnihuna awaddele amwaana Ezarayeli, enanihudhiha ddi?
11 Iyo podi wubuwelaga wi nnohowela okanna ethu-sithu, mbwenye mubuwelo wa Yehova buyoyo. Kubuwela ethu Moses awaddeliye amwaana Ezarayeli aliwa nuumala yaka 40 mwiddeddereni: ‘Mwaha Yehova Mulugu enyu, onowureelihani mwa dhatedhene munerinyuna. Oliye ohunona pamadhene olenddo muneeddinyu mwiddeddereni muna enlubale. Yehova, Mulugu enyu aari ni nyu muwari mwa yaka 40, teto kavo ethu yuhalela.’ (Deut. 2:7) Yehova ahaakabelela amwaana Ezarayeli mudhidhi yole watene. Ovira yaka 40 aliwa yamujha mana malabo amatene. Ohiya eyo, dhowara yaakumiliwana Wijipitu, si dhowara dhimodhave yanniwana muwari mwa yaka 40. (Deut. 8:3, 4) Podi wera malabo mamodha eyo kayakwana, mbwenye Moses wawubusedha amwaana Ezarayeli wihina yahikanna dhithu dhatedhene yahoweliwa. Iyo nnohowela omutajhiha Moses ohagalala ni dhithu ninnihuna. Iyo naavahaga thima naarive dhikaleve dhithu dhing’ono Yehova ananivahiye, teto nasugwaga dhithu ndha ninga mareeliho, iyo nnere omuhagalasa Mulugu ehu.
OKANNE EBARIBARI WIHINA YEHOVA ANERE WUKABELELA
12. Enoniha ddi wihina Davidi amuroromela Yehova ohiya ororomela enonelo anniyena?
12 Davidi ahinona wi Yehova, Mulugu oororomeleya anaakabelela ale enamudhivela. Davidi nuufwanyiwa mudhidhi worusa wula amulebaga Salmos 34, oliye ahikanna ebaribari wi ‘mungero a Yehova’ ‘onakala vakukuvivene va adhaari aye,’ teto ‘oliye onowawobola.’ (Sal. 34:7) Podi wera Davidi amuliganiha mungero a Yehova ni munyakoddo, anakala mento ajheeheraga akala anere ofiya mwiddani. Davidi aali munyakoddo ooliba murima. Yehova ahimpaganya wihina ere okala mwene ooharela. Naari dhigarive ndo, Davidi kaaroromela enonelo yaye anniyena yovoka fisga obe olabihedha supadda wihina aagonjhihena amwiddani. (1 Sam. 16:13; 24:12) David athabwa omuroromela Yehova, oliye kanganyedha wihina mungero a Yehova ‘onowawakihedha ale enamulabela.’ Iyo kannajhehera wihina Yehova awerena matikiniho wihina anibarele makathamiho oorusa. Mbwenye nikanne ebaribari wihina atene yaale enamuroromela Yehova kidha efwanyiwa makathamiho yahinadha emala.
Ohoseya winlubale wafiya, podi wera Googwe ni Magogwe vamodha naatoropaye enere onivolowela mmavaade mwehu. Mbwenye kannanganyedha wihina Yesu vamodha ni angero aye enowona dhatedhene dhinapadduwa, aliwa enere onaakihedha (Osugwe ddima 13)
13. Goge ni Magoge anirijha enakalege ninga mulogo wokweya orijhiwa. Mwahaya bwaddi kannafwanelela woova? (Osugwe fotu yavakapani.)
13 Vohilegela nroromelo ninnihuna wa Yehova nnere wehiwa. Goge ni Magoge nikuru naanyakoddo narijha nlogo na Mulugu, podi wera nnakalege ninga kaninna nikavihero. Mbwenye nnofwanelela okanna ebaribari wihina Yehova anere onibarela. Vamentoni va malogo, nnakalege ninga Mambila yahinna namakukula ni yahinna muthu owawakihedha. (Eze. 38:10-12) Vamentoni va malogo nnakale ninga nlogo nookweya orijhiwa, mwaha kaninna futhi ni kannahudherege owana koddo. Mwaha ohukanna nroromelo ni Yehova, aliwa kinande woona dhithu nnafunihu woona ni mento ehu anroromelo— muthithi ni muthithi wa angero onasugwera nlogo na Mulugu ori owiwegeredhene wihina onibarele. Kubuwela makalelo dhinafuniiwa waapa mbani yanona wihina muthithi ni muthithi wa angero ori odhulu eri epaddi yehu! — Apo. 19:11, 14, 15.
WIWEGEREDHE OVANENE WA DHITHU DHINADHA OSOGOLO
14. Nnere ddi ovanene wihina niwegeredhe wa dhithu dhinadha osogolo?
14 Nnere ddi wihina niyegeredhe wa dhithu dhinadha osogolo? Ethu yobajha kanthabwege ovaha thima dhoorela, mwaha nlabo nimodha nnodha niyelele dhithu ndha. Ohiya eyo, nihagalalege ni ndhe ninnihuna ni ndhe dhiri dhathima, wandana wehu ni Yehova. Nathabwa omunona pama Mulugu ehu, nnere okanna ebaribari wihina Goge ni Magoge anirijha Yehova anere onibarela.
15. Davidi anonne addi wi oofwanelela omuroromela Yehova?
15 Nnafuna noone dhithu dhimodha dhimukavihere Davidi afwanyiwaga makathamiho, ni makalelo baani dhithu dhimodhave dhinanikaviheriwa. Davidi wera: ‘Mulawihe ni moone opama wa Yehova; oohagalala di muthu yoyo, anathawela wa Yehova.’ (Sal. 34:8) Madhu ala enowoniha wihina Davidi aroromela nikavihero na Yehova. Davidi amuroromelesa malabwene Yehova, bumwahaya Yehova kanamunyanyalege. Davidi agaari muzombwe, ni mudhidhi yole awaniye ni munyakoddo munlubale Goliya, ahisoriha egi: ‘Nlabo na peeno Yehova anere wupeleka mmadani mwaaga.’ (1 Sam. 17:46) Dila dhowinjhivadhene Sawuli ahixixa ompa Davidi. Mbwenye ‘Yehova aari ni Davidi.’ (1 Sam. 18:12) Davidi ahinona wihina Yehova aakalegeve nuliye, ni erege omukavihera owanana makathamiho aye.
16. Dhopadduwa baani dhaanthukulele woona ‘opama’ wa Yehova?
16 Naathabwaga omuroromela Yehova dhinovevala, kannadha nanganyedha wihina osogolo anere onikavihera. Motajhiha, nnofwanelela omuroromela Yehova nadhowaga omuloba patarawu ehu wihina anenye odhowa omusonkanoni wa nlabo nimodha obe wa malabo mararu. Ohiya eyo, nnofwanelela okanna nroromelo nathapanyaga ni patarawu ehu wihina aakakanihe mudhidhi nnalabihu wihina nandege woona mutugumano ni wapara mabasa oolaleya. Ki patarawu ehu ahirumedha nnamulobihu vano anooniigara omabasani, nnere ororomela wi Yehova anere onikavihera ni anere onivaha dhithu nnahowelihu? (Heb. 13:5) Owinjhiva enaapara mabasa amudhidhi wamutene, enosoriha dhopadduwa dha mwigumini mwewa dhinoniha makalelo Yehova aakabeleliye mudhidhi yahoweliwa nikavihero. Yehova dororomeleya.
17. Yolebela ya yaka ya 2022 sivi, ki mwahaya bwaddi edhe esakuliwege yolebela yela?
17 Yehova akala epaddi yehu, kannahowela woova dhithu dhinaanipadduwele osogolo. Nampweha Yehova mburo wobajha mwigumini mwehu, oliye kadha aninyanyala. Wihina anikavihere wubuwela thima erivo yowiwegeredha ovanene wodhela makathamiho enanifwanye, ni wihina nimuroromele Yehova, Nikuru Nolamulela nihisakula yolebela ya Salmos 34:10 ninga yolebela ya yaka ya 2022: ‘Ale enamusayela Yehova kidha yahalela ethu yapama.’
JHIBO 38 Jeová Vai Dar-te Força
^ paragarafu 5 Yolebela ya yakela ekumihiwe va Salmos 34:10: ‘Ale enamusayela Yehova kidha yahalela ethu yapama.’ Adhaari owinjhiva peeno, kithabwile oreela, esakunle okweyiha egumiwa. Ki mwahaya bwaddi nigasoriha negi ‘kidha yahalela ethu yapama’ wa aliwa? Mwahaya nigera wawonelamo madhu ala enere onegeredha dhithu dhinaapadduwe osogolo?
^ paragarafu 4 Osugwe “Perguntas dos Leitores” Sentinela a 15 a Setembro a 2014.
^ paragarafu 54 FOTU DHILI EPADDI: Naarive amuthawaga mwene Sawuli ni iipitaga okunguni, Davidi ootamalela dhithu dhatedhene Yehova anvahiye.
^ paragarafu 56 FOTU DHILI EPADDI: Amwaana Ezarayeli nukuma Wijipitu, Yehova wavaha mana wihina emujhege, ni weeriha wihina dhowara dhewa dhahitalege.