OHUDHERA 4
Ethu baani enanthukulela wubuwela okwa wa Yesu?
‘Mudidele werana ndala mugubuwelaga miyo.’—LUCAS. 22:19.
JHIBO 20 Jeová Deu-nos o Seu Melhor
DHITHU NNAAHUDHERIHU *
1-2. a) Labo baani nnathabwihu omubuwela muthu akwile? b) Omahiyu Yesu ahinakwe, ethu baani awogiliye ni anamahara aye wihina yeregena?
AKALA muthu onamudhiveliwe ohukwa, ohunona wihina, naarive ogavinre mudhidhi wowinjhivene kudha omudduwala. Yaka dhatedhene nafiya labo nenne akwile muthu ole, mohanganyedha onothabwa omubuwela.
2 Nafiya labo akwile Yesu, matxikwi ni matxikwi aathu wapela elabo yatene enotugumana wihina yubuwele labo nenno. (1 Ped. 1:8) Iyo nnowubuwela ejhehedho anivahile Yesu — oliye ohuvaha egumaye ninga mukutho wihina anoobole muuthegani ni muukwani. (Mat. 20:28) Teto Yesu anafuna wihina anamahara aye yubuwelege okwa waye. Omahiyu Yesu ahinakwe, ahasoriha madhu ala egihina: ‘Mudidele werana ndala mugubuwelaga miyo.’ * — Lucas 22:19.
3. Osuza wula nnahudhere ddi?
3 Vaari va matxikwi ni matxikwi aathu enubuwela okwa wa Yesu yaka dhatedhene, enna ejhehedhelo yodhowa odhulu eri vang’onove. Mbwenye matxikwi ni matxikwi aathu enna ejhehedho yokala mwilaboni yavati. Ohudhera wula nnere woona ethu enanithukulela wubuwela okwa wa Yesu, naarive akala ejhehedhelo yehu fudhowa odhulu obe okala elabo yavati. Teto nnere woona mwahaya bwaddi ekala yapama wubuwela okwa wa Yesu. Mbwenye voobajha, nnafuna noone mwahaya bwaddi makiristawu oothikitheliwa egahowela okalavo labo na Wubuwela okwa wa Yesu.
ETHU BAANI ENAATHUKULELA MAKIRISTAWU OOTHIKITHERIWA WUBUWELA OKWA WA YESU?
4. Mwahaya bwaddi makiristawu oothikitheliwa egajha ekathe ni egamung’wa vinyu labo na Wubuwela okwa wa Yesu?
4 Yaka dhatedhene makiristawu oothikitheliwa enokalavo labo noWubuwela okwa wa Yesu obe enojha ekathe ni enomung’wa vinyu. Enaathukulela werana ndo ddi? Wihina noonelemo, sapama onona ethu epadduwe emahiyu yogomihera Yesu agaali elabo yavati. Yesu ni anamahara aye yajha mathanga aaJudewu enithaniwa Paskwa; vano nuumala Yesu wiita Ojha wa Nabwiya, obe ninga enoniwe peeno Wubuwela okwa wa Yesu. Oliye wagawela anamahara aye 11 oororomeleya ekathe ni vinyu, owoga egi ejhe ekathe ele ni emung’we vinyu. Ohiya eyo, Yesu owoga naliwa wodhela mapangano menddi — nipangano nixa ni na Omwene. * (Lucas 22:19, 20, 28-30) Mwaha wa mapangano ayo arumiwi vamodha ni anamahara a Yesu, obe makiristawu oothikitheliwa, enere wanda okala anamathonga ni anamakutha odhulu. (Apo. 5:10; 14:1) Makiristawu oothikitheliwa * ehanle mwilaboni yavati binajha ekathe ni binamung’wa vinyu labo na Wubuwela okwa wa Yesu, mwaha enokosa epaddi ya mapangano ale menddi.
5. Ejhehero baani enna makiristawu oothikitheliwa, ki enahoweleya yere ddi wihina yakele mukono oyo?
5 Ehikalawo ethu emodhaya enaathukulela makiristawu oothikitheliwa ovaha thima labo na Wubuwela okwa wa Yesu. Wubuwela okwa wa Yesu, mudhidhi wapama wihina makiristawu yubuwele ejhehedho enniwana. Yesu uhavaha ejhehero yohagalasa. Aliwa yadhowa odhulu kidha ekwaga, teto enerege olaba vamodha ni Yesu Kiristu ni makiristawu mamodha oothikitheliwa, ni enere okanna gari yinlubale, yokala vamentoni va Yehova Mulugu! (1 Cor. 15:51-53; 1 João 3:2) Makiristawu oothikitheliwa ehinona wi yegi yakele mukono oyo, enohoweleya okala oororomeleya wa Yehova ofiyedha okwa wewa. (2 Tim. 4:7, 8) Makiristawu oothikitheliwa enohagalala vanlubale yubuwelaga wodhela ejhehedhelo wewa. (Tito 2:13) Ki vano, wodhela ‘mambila mamodha’? (João 10:16) Ethu baani enaathukulela wubuwela okwa wa Yesu?
ETHU BAANI ENAATHUKULELA MAMBILA MAMODHA WUBUWELA OKWA WA YESU?
6. Mwahaya bwaddi mambila mamodha egubuwela okwa wa Yesu yaka dhatedhene?
6 Mambila mamodha enowubuwela okwa wa Yesu, mbwenye kinajha ekathe newene kinamug’wa vinyu. Mbwenye naarive dhigari ndo, aliwa enohagalala mwaha okalawo labo nowubuwela okwa wa Yesu. Athu enna ejhehero yokala elabo yavati, ebanjhe wubuwela okwa wa Yesu, yaka ya 1938. Sentinela 1 a Março a 1938 ohusoriha egi: “Ethu yapama ni yofwanelela mambila mamodha okalavo labo nowubuwela okwa wa Yesu. . . . Naaliwaya enofwanelela ohagalala.” Mambila mamodha yubuwelaga okwa wa Yesu, enothabwa ohagalala ndo ninga muthu anahagalala iithaneliwa wihina adhowe omateloni.
7. Mwahaya bwaddi ekala yofuneya mambila mamodha ovuruwana mwaha wowubuwela okwa wa Yesu?
7 Mambila mamodha enohagalala yaapenddaga ejhehero enniwana. Aliwa enofuna vanlubale ovuruwana mwaha wowubuwela okwa wa Yesu. Mwaha oyo, onawoga wodhela dhithu anerena Yesu vamodha ni makiristawu oothikitheliwa owakwana 144 000 mumweneni mwa yaka txikwi wa Yesu Kiristu. Yesu vamodha nnikavihero na makiristawu oothikitheliwa enere osaddula elabo wihina ekale parayizu, ni enere wakavihera athu ofiyedha okala oologomana. Matxikwi ni matxikwi aathu enubuwela okwa wa Yesu, enothabwa ohagalala yubuwelaga makalelo elabo enasadduwiwa osogolo, dhaakwanela dhovuhulela dha mBibliyani dhinafwanyeya va Isaías 35:5, 6; 65:21-23; ni Apocalipse 21:3, 4. Ethu enaanikavihere olibiha ejhehero yehu yosogolo, ni yothoma yehu yohuhiya omulabela Yehova, fuwubuwela nigari mwilaboni exa naakwihu vamodha namudhihu.—Mat. 24:13; Gál. 6:9.
8. Ethu emodha enaathukulela mambila mamodha wubuwela okwa wa Yesu ddi?
8 Ethu emodha enaathukulela mambila mamodha wubuwela okwa wa Yesu, sowihina aliwa enafuna yonihe wi enowadhivela ni enowakavihera makiristawu oothikitheliwa. Bibliya ahiwoga wi makiristawu oothikitheliwa ni mambila mamodha yaaparege vamodha mabasa. Vano kabeni noone dhovuhulela tharu.
9. Yovuhulela ya Zacarias 8:23 enoniha avi makalelo mambila mamodha enaadhiveliwa makiristawu oothikitheliwa?
9 Omwileri Zacarias 8:23. Yovuhulela ela enowoga pamadhene makalelo mambila mamodha enaadhiveliwa addibiliwa ni arogoliwa oothikitheliwa. Madhu ala owi ‘muJudewu’ ni ‘nyu’ enagana nikuru nimodhave— makiristawu oothikitheliwa. (Rom. 2:28, 29) ‘Alobwana kumi a dhiwogelo a malogo amatene’ enawagana mambila mamodha. Aliwa ‘enomparela pamadhene’, obe nere, enowandana pamadhene ni makiristawu oothikitheliwa emwebedhaga vamodha Yehova. Bumwahaya, labo nowubuwela okwa wa Yesu egeerana dhatedhene wihina ekalevo, yaakaviheraga ni murima wamutene makiristawu oothikitheliwa.
10. Yehova anaakwanihedha avi yovuhulela ya Ezequiel 37:15-19, 24, 25?
10 Omwileri Ezequiel 37:15-19, 24, 25. Yehova annawakwaneliha yovuhulela ela, aakaviheraga makiristawu oothikitheliwa ni mambila mamodha olaba vamodha ni okala owiwanana. Yovuhulela ela enawoga wodhela muthanko menli. Ale enna ejhehero yodhowa odhulu onakala ninga ‘muthanko wa Juda’, nihimo Yehova aasakuliyewo mamwene. Ale enna ejhehero yokala mwilaboni yavati enakala ninga ‘muthanko wa Efrayim.’ * Yehova ere wataganyihedha makuru ayo wihina okale ‘muthanko mmodha’ baahi. Eyo enatapulela wihina makuru ayo menddi enalaba vamodha emwiwelelaga mwene ewa, Yesu kiristu. Ethu enoniha eyo, sowihina makiristawu oothikitheliwa vamodha ni mambila mamodha enubuwela vamodha okwa wa Nabwiya Yesu Kiristu, ohiya ninga makuru menddi mbwenye ‘nikuru nimodha’ baahi. — João 10:16.
11. ‘Mambila’ enaakavihera addi addibile Kiristu? (Mateus 25:31-36, 40)
11 Omwileri Mateus 25:31-36, 40. ‘Mambila’ ala enasorihiwa muwari mwa nladdaniho nna baani? Baathu owogowa enakala malabo ookuthula enna ejhehero yokala elabo yela yavati. Yesu ohawithana ninga mambila mamodha. Mambila ala ehikanna mutholo owakavihera makiristawu oothikitheliwa eri elabo yela yavati. Aliwa enowerana ndo, thabwathabwa yaaparaga mabasa oolaleya ni yahudhihaga athu amalogo amatene.—Mat. 24:14; 28:19, 20.
12-13. Makalelo mamodha mambila enalabihedhiwa wihina yaakavihere addibila a Kiristu baavi?
12 Yaka dhatedhene nihinathi ofiya labo nowubuwela okwa wa Yesu, enopadduwa ethu yavayekiwa. Mambila mamodha enowakavihera makiristawu oothikitheliwa wapara mabasa oolaleya avayekiwa. Kampanya ela yegeredheliwe wihina nawithane athu wi edhe yoone muthupo wowubuwela okwa wa Yesu. (Osugwe kwaduru “ onnana wiwegeredha wihina woone muthupo wowubuwela okwa wa Yesu?”) Mambila mamodha enokavihera yegeredhaga muthupo ola wowubuwela okwa wa Yesu mmulogoni mwewa, naarive mmulogonimwa ahilimo ddibila oothikitheliwa. Vamentoni vewa, oneti munlubale wakavihera addibila a Kiristu mwamakalelo yala. Mambila mamodha ehinona wihina vamentoni va Yesu, nikavihero-thi-nikavihero nnavahihu addibila ala oothikitheriwa, nnakala ninga nnamukavihera Yeswene. — Mat. 25:37-40.
13 Dhithu baani dhinanithukulela iyo aatene wubuwela okwa wa Yesu naarive akala ejhehero yehu fudhowa odhulu obe okala elabo yavati?
ETHU BAANI ENANTHUKULELA IYO AATENE WUBUWELA OKWA WA YESU?
14. Ni makalelo baani Yehova ni Yesu yonihiliwa wi enonidhivela?
14 Woona muthupo ola wowubuwela okwa wa Yesu, makalelo mamodha ootamalela odhivela wa Yehova ni Yesu enniwana ni iyo. Yehova uhoniha mwamakalelo oohiyana-iyana wi ononidhivela vanlubale. Mbwenye makalelo mamodha bavayekiwa. Mwaha odhivela waye, Yehova ohumuruma mwanaye anamudhiveliye wihina oone goyi ni anikwele. (João 3:16) Ohiya eyo, nihiyoya nnomutamalela Yesu. Kaavo amuwaddihedhe Yesu ovaha egumaye, mbwenye oliye uherana ndo mwaha odhivela anniyena. (João 15:13) Iyo kannadha naanda omuliva Yehova ni Yesu odhivela entonyihedheliwa, mbwenye iyo podi wooniha wi nnotamalela wodhela makalelo nnakalihu kadda labo. (Col. 3:15) Bumwahaya nigakalavo wakalawo muthupo wowubuwela okwa wa Yesu. Ni muthupo yola nnowanda wubuwela odhivela entonyihedheliwa, ni nnowanda woniha odhivela ninnihuna ni Yehova vamodha ni Yesu.
15. Mukutho wa Yesu okalele ddi wathima vamentoni vaaddibila oothikitheriwa ni mambila mamodha enaakale elabo yela yavati?
15 Iyo nnovaha thima mukutho wa Yesu. (Mat. 20:28) Makiristawu oothikitheliwa enovaha thima mukutho wa Yesu, mwaha mukutho ola winowavaha ejhehero yodhowa okala odhulu. Mwaha ororomela mukutho wa Yesu, makiristawu oothikitheliwa enooniwa ninga owogowa vamentoni va Yehova, ni enithaniwa ninga anaaye. (Rom. 5:1; 8:15-17, 23) Mukutho wa Yesu ohukanna thima vamentoni va mambila mamodha. Mwaha wa nroromelo enniwana ni mukutho wa Yesu, aliwa podi okanna mubuwelo oohunyemela vamentoni va Yehova, oneti womulabela oliye mwamakalelo apama ni ejhehero yovulusiwa ‘ohoseya winlubale’ wafiya. (Apo. 7:13-15) Naarive oganna ejhehero yodhowa odhulu obe okala elabo yela yavati, we podi wooniha wi mukutho wa Yesu ohukanna thima vanlubale, wodhela woona muthupo wowubuwela okwa wa Yesu oneriwa kadda yaka.
16. What is another reason why we attend the Memorial?
16 Ethu emodha enanithukulela wubuwela okwa wa Yesu, sowihina nnafuna nimwiwelele Yesu. Iyo aatene nnafuna nimwiwelele Yesu anirumiliye, kannapwatha ejhehero baani ninihunna. Emahiyu yele Yesu ahinathi okwa oliye wera: ‘Mudidele werana ndala mugubuwelaga miyo.’ — 1 Cor. 11:23, 24.
EKALELE DDI YAPAMA WUBUWELA OKWA WA YESU?
17. Wubuwela okwa wa Yesu onanikavihera addi wandana pama ni Yehova?
17 Iyo nnokanna wandana wapama ni Yehova. (Tia. 4:8) Ninga nonilihu, wubuwela okwa wa Yesu, muthupo onanubuwesedha ejhehero Yehova anivahiliye, ni anonubusedha odhivela anonihiliye. (Jer. 29:11; 1 João 4:8-10) Neragana ndo, odhivela wehu ni Yehova winoliba, teto nnothabwa wandana nuliye. — Rom. 8:38, 39.
18. Wubuwelela yotajhiha ya Yesu winonikavihera wiikoma wihina nere ddi?
18 Nnowikoma ohara yotajhiha ya Yesu. (1 Ped. 2:21) Wihina negeredhe murima wehu muthupo ola wowubuwela okwa wa Yesu wahinafiye, nnowileri dholebela dhiniwanana ni malabo ookuthula a Yesu ahinathi okwa. Nindo muthupo wafiya, mwaha wavathaddo ononikavihera wubuwela odhivela Yesu oonihiliye nihiyo. (Efé. 5:2; 1 João 3:16) Nilerigi ni nubuwelaga egumi ya Yesu, nnowikoma ‘weedda vamodha nuliye, ndo ninga oliye eeddiliye.’ — 1 João 2:6.
19. Wandana wehu ni Yehova winaalibe neera ddi?
19 Iyo nnothabwa wiikoma wihina nikanneve wandana wapama ni Yehova. (Judas 20, 21) Wandana wehu ni Yehova winere oliba naamwiwelelaga oliye, nilibiheraga wihina ntxenihe ndina naaye, ni naahagalasaga murima waye. (Pro. 27:11; Mat. 6:9; 1 João 5:3) Woona muthupo wowubuwela okwa wa Yesu winonikavihera wiikoma okanna mweddelo onamuhagalasa Yehova, okalaga ninga nnawoga ‘ginafuna gimulabelegeve Nabwiya malabo amatene!’
20. Dhithu baani dhinanithukulela wubuwela okwa wa Yesu?
20 Naarive akala ejhehero yehu fudhowa odhulu obe okala elabo yela yavati malabo amatene, iyo aatene nihikanna ethu enanithukulela wubuwela okwa wa Yesu. Nna nlabo, nnubuwelihu okwa wa muthu nnamudhivelihu vanlubale, Yesu Kiristu. Ohiya eyo, nnowubuwela odhivela Yehova anonihiliye mwaha omuruma mwanaye ninga mukutho. Ala makalelo oodhivela yahande weriwa ni muthu bure-bure. Yakela muthupo wowubuwela okwa wa Yesu, onaakale emahiyu ya Xixano, 15 a Abril a 2022. Iyo nnomudhivela vanlubale Yehova ni Yesu, bumwahaya mwigumini mwehu kaavo ethu yathima yahili okalavo labo nenna nowubuwela okwa wa Yesu.
JHIBO 16 Jeová escolheu o nosso Rei
^ paragarafu 5 Gari yinlubale wubuwela okwa wa Yesu yaka dhatedhene, naarive akala ejhehedhelo yehu sokala mwilaboni yavati obe odhulu. Va yohudhera ela nnere woona dhithu baani dhinanthukulela wubuwela okwa wa Yesu ni mwahaya bwaddi ekala yapama wubuwelaga okwa wa Yesu.
^ paragarafu 2 Madhu ala ehitapuleliwa ayi: “Mweregena ndo mugubuwelaga miyo.” (Bíblia fácil de ler).
^ paragarafu 4 Wegi onone dhithu dhimodha wodhela nipangano nixa ni nipangano na Omwene, osugwe ohudhera oni “Vocês se tornarão ‘um reino de sacerdotes’” va A Sentinela a 15 a Outubro a 2014, epaddi 15 ofiyera 17.
^ paragarafu 4 WONELAMO: Madhu owi oothikitheliwa ehanle enagiwana makiristawu oothikitheliwa atene eri mwilaboni yavati.
^ paragarafu 10 Wegi wonelemo pama wodhela yovuhulela ya muthanko menli enawogiwa va Ezequiel kapitulu 37, osugwe livuru A Adoração Pura de Jeová É Restaurada!, epaddi 130-135, ddima 3-17.
