OHUDHERA 5
‘Mulabihedhege pama mudhidhi weenyu’
‘Mukale mento wihina muheedde ninga ataduwa, mbwenye ninga athu athotho, mulabihedhege pama mudhidhi weenyu.’— EFÉ. 5:15, 16.
JHIBO 8 Jeová é um refúgio
DHITHU NNAHUDHERIHU *
1. Enanikavihera ojha mudhidhi wowinjhivene ni Yehova ddi?
IYO NNODHIVELIWA ojha mudhidhi wowinjhivene naathu nnaadhivelihu. Motajhiha, anamatelana enathabwa odhivelana, enodhiveliwa okala vamodha. Azombwe enodhiveliwa waredha vamodha naakwiwa. Teto atenihu nnodhiveliwa ojha mudhidhi wowinjhivene naaddibilihu ammulogoni. Mbwenye opitha dhatedhene ndha, nnodhiveliwa vanlubale ojha mudhidhi wowinjhivene ni Mulugwihu. Enanikavihera werana ndo ddiniyani? Futhapanya nuliye woodhela olobela, omwileri Bibliya ni opendda woodhela mpaganyo dhaye dhosogolo ni dhikalelo dhaye dhapama anniyena. Kunarumedha wihina mudhidhi nnajhihu ni Yehova bwathima? — Sal. 139:17.
2. Mwahaya malabo mamodha, eganirusa ojha mudhidhi ni Yehova?
2 Mwebaribarene ojha mudhidhi vamodha ni Yehova, ethu enanihagalasa vanlubale, mbwenye malabo mamodha kinanikweyela. Woona wi egumihu peeno enedda ethamagaga, malabo mamodha kannagumela mudhidhi wopwasedha dhithu dhomuzimuni. Mabasa, murala dhehu ni mutholo dhimodha ninnihuna, podi onijhaga mudhidhi wowinjhivene. Mwaha wa yeyo, iyo podi wambela wubuwela wi kaninna mudhidhi wolobela, wohudhera obe wokarati wihina nipendde nihudherihu.
3. Nnofwanelela okala pasope ni murako baani?
3 Ohiya eyo, nihikanna murako mmodha nnahowelihu okala pasope. Malabo mamodha iyo nnopinyaminyeya ni mabasa yahili abure, mbwenye mabasa yayo podi oniyela mudhidhi wehu wonfiyedha Yehova. Motajhiha, kubuwela muselu wowaredha. Iyo atene nnodhiveliwa withuwa ni waredha, naarive yaredhelo yehu yahili yabure, naathabwaga ononga mudhidhi ni yaredhelo dhehu, iyo podi ohukanna mudhidhi wowapara mabasa oomuzimuni. Bumwahaya, enofwanelela onona mudhidhi baani onafwanelela waredha. — Pro. 25:27; 1 Tim. 4:8.
4. Muwari mwa musolo ola nnaasuze ddi?
4 Muwari mwa musolo ola, nnere osuza mwahaya bwaddi nigafwanelela okanna dhothoma dhapama. Ohiya eyo, nnere wahudhera makalelo apama ooparihedha mabasa mudhidhi wehu nnajhihu ni Yehova ni mwahaya bwaddi egahoweleya werana ndo.
ONONE OSAKULA NI OPWEHA MBURO WOBAJHA DHITHU DHINAHOWELEYA
5. Yolebela ya Efésios 5:15-17, enaamukavihere addi muzombwe wasakula makalelo apama oweddiha egumaye?
5 Osakule makalelo apama oweddiha egumawo. Azombwe enathabwa othuwathuwela makalelo enafuniwa weddiha egumiwa. Teto epaddi emodha, aporosoriwa ni amudhiwa yahili makiristawu enowakongomedha omukosa fakuldadi wihina ekale athu oovuwa. Makalelo yala osakula, podi ononga mudhidhi wowinjhivene. Vadhuluva, ababi ni addibila ammulogoni podi wakongomedha azombwe ojhavo egumiwa yaparaga mabasa a Yehova. Enaamukavihere muzombwe okanna dhothoma dhapama ddiniyani? Oliye podi omwileri Efésios 5:15-17. (Omwileri.) Amala podi wapendda makoho ala enihina: ‘Efunelo ya Yehova siivi’? Yothoma baani enaamuhagalese oliye? Wihina gilabihedhe pama mudhidhi ginnimina gisakule ddi? Ninga enasoriha yolebela ya Efésios, ‘malabo ala borusa’, teto elabo ela enalamuleliwa ni Saddana enere ofiya omakuthulo. Bumwahaya, akala nnofuna ojhavo egumihu, nsakule olabihedha mwamakalelo enamuhagalasa Yehova.
6. Mariya asakunle ddi, ki mwahaya bwaddi nigera oliye dasakunle pama?
6 Osakulege dhithu dhinahoweleya. Malabo mamodha negi nlabihedhe pama mudhidhi wehu, podi ohoweleyaga wasakula wapara mabasa menli yahili abure. Motajhiha, kuubuwela mudhidhi yole Yesu adhowiliye omwaredhela Marta ni Mariya. Mwebaribarene Marta ahihagalala vanlubale mwahaya womwakela Yesu vadeviwa, ni afuna ampiyele yojha yodhiva yamudhivele Yesu. Mbwenye ddibile Mariya, opatha mudhidhi yole, akarati omoddoni wa Yesu wihina anvuruwane muthenga baani afuniye wahudhiha. Marta aali muthu anonne osakula pama, mbwenye Mariya ‘disakunle epaddi yapama.’ (Lucas 10:38-42, nota) Podi wera mudhidhi nuuvira Mariya ahiddiwala yojha yajhiligiwa nlabo nenne, mbwenye ethu ahudherigiye ni Yesu owubuwelave. Vamentoni va Mariya, mudhidhi ole aajhiliye anvuruwanaga Yesu waali wathima. Nihiyoya nivahege thima mudhidhi nnajhihu ni Yehova. Ki nnande addi olabihedha pama mudhidhihu?
OLABIHEDHE PAMA MUDHIDHI ONAJHIWE NI YEHOVA
7. Mwahaya bwaddi olobela, ohudhera ni opendda fwathima?
7 Kuddiwale wihina olobela, ohudhera ni opendda makalelo mamodha owebedha. Olobela, makalelo oothapanya ni Baabihu oodhulu nnamudhivelihu vanlubale. (Sal. 5:7) Teto naamuhudheraga Bibliya, nnofwanyamo “enonelo ya Mulugu”, muthu athotho ahinaliganihiwa ni muthu mmodha. (Pro. 2:1-5) Nakanna elemelelo yopendda, onowanda wiwubusedha dhikalelo dhapama dha Yehova ni mpaganyo anniyena dha osogolo. Kunarumedha wihina ala makalelo apama oolabihedha mudhidhi? Woona wi egumihu enedda ethamagaga, nnande addi olabihedha pama mudhidhi ninnihuna?
Onoonamo avi osayela mudhidhi womaleya wihina werena ohudhera wawo wavayeka? (Osugwe ddima 8 ofiyera 9)
8. Malabo 40 Yesu amanliye agaali mwiddeddereni, aalabihedhe aavi mudhidhi waye, ki iyo nnahudheravo ddi?
8 Dhenyeya, osayelege mburo womaleya. Kubuwela yotajhiha ya Yesu. Ahinawambele mabasaye oolaleya, Yesu ahimala malabo 40 agaali mwiddeddereni. (Lucas 4:1, 2) Mburo yole womaleya, wahimwenya wihina Yesu alobele wa Yehova ni apendde woodhela efunelo ya Baabe. Werana ndo wahimukavihera Yesu wiwegeredha pama wodhela dhoweha dhadheege osogolo. Onahudheravo ddi ni yotajhiha ya Yesu? Akala vamuralani veenyu muhuthabwa winjhivavo, podi okala yorusa ogumela mburo womaleya ndala. Akala kunanda ogumela mburo womaleya, osayele makalelo oofwanya mburo mmodhaya wolapela ni vaade vawo. Siyeyo aneresana murogola Julie afunaga olobela wa Yehova. Oliye ni mamune enakala oFransa, mbwenye nyumbaya eng’ono, mwaha wa yeyo Julie onosimwelela mburo woopwaseyavo yeka, vahiri dhithu dhomunyonya. Oliye anihina: “Malabo mamodha, ginoomala nlabo nantero geeddaga wihina gifiye oparki. Wengo, ginowanda ofwanya mburo wookarativo meeka wihina giithaalevo wi githapanye pamadhene ni Yehova.”
9. Yesu ooneyihe addi wihina oovaha thima wandana waye ni Yehova?
9 Yesu aali muthu amabasa. Mudhidhi aaparaga mabasaye oolaleya, athu yakala omuharave yaajaga okaviheriwa. Nlabo nimodha, ‘athu atene a sidadi yele otugumana vamulago’ wihina emoone Yesu. Naarive dhigaali ndo, oliye waaja mudhidhi wihina alobele wa Yehova. Vihinathabwe osa, Yesu ovenyavo odhowa asayele ‘mburo womaleya’ wihina athapanye yekaye ni Baabe oodhulu. — Marcos 1:32-35.
10-11. Zelu baani Yesu avahiliye anamaharaye va Mateus 26:40, 41, ki vasogolova yapadduwe ddi?
10 Emahiyu ele Yesu ahinathi okwa, aajaga waakuthula mabasaye oolaleya, dila yanabili Yesu waaja mburo womaleya wihina alobele ni apendde. Oliye odhowa ojardi yo Jetisemani. (Mat. 26:36) Emahiyu yele, Yesu wavaha zelu yathima anamaharaye woodhela muselu wolobela.
11 Karajhiha wubuwela ethu yapadduwe emahiyu yele Yesu ni anamaharaye nuufiya ojardi yo Jetisemani. Podi wera yafilegewo nduwa nigamothelemo, vaari va mahiyu. Nuwindo Yesu wawaddela anamaharaye egihina: ‘Mukale mento’, nuwindo osusavo vang’ono wihina alobele. (Mat. 26:37-39) Mudhidhi yole alobelaga, anamaharaye wambela ogona, Yesu nuhogolowa aafwannye anamaharaye egonaga, nuwindo wawaddela dila yanabili egi: ‘Mukale mento ni mudidele olobela.’ (Omwileri Mateus 26:40, 41.) Yesu ahinona wi yahimala ogoma teto yahisimwela. Yesu aari oopwaaseya anonaga wihina ‘mwili kunna kopolo.’ Ki vano yapadduwe ddi? Yesu ohogolowelawo, odhowa olobela dila bili, vano nudhawo aafwannye anamaharaye egonagave. — Mat. 26:42-45.
Onoonamo avi olobela wahinathi ogoma? (Osugwe ddima 12)
12. Nnere ddi nakala owukuwene obe oogomeene ofiyera ohandaga olobela?
12 Osakule mudhidhi wofwanelela. Malabo mamodha, iyo podi okala owukuwene obe oogomeene ofiyera ohanda olobela. Eyo enowupadduwelaga? Kinupadduwela weka. Kito enahoweleya were ddi? Athu amodha yanna elemelelo yoolobela ehinathi ogona, ehona wi sapama olobela mutaneene ehinagome. Amodhaya ehona wi makalelo enakaliwa yaafunaga olobela enovolowelavo. Kito akala ohunathi olobela onakala oothuwathuwene ni ookwerebeyene, omwaaddele Yehova makalelo oriwe. Okanne ebaribari wihina babihu oodhulu ni oodhivela anere wuvuruwana. — Sal. 139:4.
Onoonamo avi ohawakula mensaje, e-mails, wonaga mutugumano? (Osugwe ddima 13 ofiyera 14)
13. Mwahaya bwaddi telefoni, tableti ni dhithu dhimodha podi oniyela mudhidhi nnajhihu ni Yehova?
13 Wahudheraga kuthabwege osugwa dhithu dhimodha. Makalelo oolibiha wandana wehu ni Yehova kahiyo olobelave baahi. Ohiya eyo, iyo podi omuhudhera Bibliya ni woona mutugumano. Onere ddi wafiya mudhidhi yola osakunliwe wihina wapare mabasa onniwena? Orajhihege wikoha: “Dhithu baani dhinagiyelesa mudhidhi gafunaga wegeredha mutugumano ni gafunaga omuhudhera Bibliya?” Dhithu dhiniiya mudhidhi fuligareliwa, osugwa e-mails, mensaje a mutelefonini obe dhithu dhimodha. Dhithu ndha nsorihilihu dhinonikavihera, teto kadda muthu ohukanna yaye. Anamasanyiha muselu amodha, ehona wihina muthu anakala oddabwinyave telefonaaye ahivumelaga podi wambela omwiyela mudhidhi. Purusori apisikolojiya enre “kaavo ananda okala mparabili.” Omambelelo wa musonkano dhehu, naari dhikale dha nlabo nimodha obe dha malabo mararu, nnorajhihiwa okongomedhiwa wihina akala nihikanna telefoni, komputadori obe tableti, nrajhihege ovugula volume wihina dhinanyonyege athu amodha. Iyo podi werana emodhave najhaga mudhidhi wehu ni Yehova?
14. Mowiwanana ni Filipenses 4:6, 7, Yehova anaanikavihere addi okala oopwaseya?
14 Omulobe nikavihero Yehova wihina okalege oopwaseyene. Malabo mamodha, iyo podi wubuwelaga dhithu dhimodha wula nihudheraga obe noonaga mutugumano. Akala eyo enowupadduwela, omulobe Yehova wihina ukavihere. Ebaribari wihina podi okala ethu yorusa opwasedha dhithu dhomuzimuni, wula nigari othuwathuwene obe nigasimwele. Mbwenye wilibihera werana ndo, ethu yapama. Mowindala, omulobe Mulugu murenddele, wihina abarele murima wawo ni ‘mubuwela’ wawo. — Omwileri Filipenses 4:6, 7.
EKALELE DDI YAPAMA OJHA MUDHIDHIHU VAMODHA NI YEHOVA?
15. Ekalele ddi yapama ojha mudhidhihu vamodha ni Yehova?
15 Sapama ovenyihavo mudhidhi wihina nthapanye ni Yehova, ninvuruwane ni nipendde wodhela oliye. Mwahaya bwaddi? Yobajha, onere wanda othoma dhithu dhapama. Bibliya ononroromeliha wihina ‘Muthu aneedda ni athu athotho anere okala athotho.’ (Pro. 13:20) Vowindo, wajhaga mudhidhi wawo ni Yehova, muthu yoyo ari athotho wakwaranya athu atene, mwebaribarene onere okala muthu athotho. We onere wahudhera makalelo apama oosakula pama dhothoma dhawo dhinamuhagalasa ohiya omuukula.
16. Mwahaya bwaddi ojha mudhidhi ni Yehova wiganikavihera okala anamahudhiha apama?
16 Yanabili, we onere okala namahudhiha apama. Efunelo yehu namahudheraga Bibliya, fumukavihera muthu okanna odhivela ni Yehova. Najhaga mudhidhi ni babi ehu oodhulu, odhivela wehu nuliye onerege wenjhedhedheya. Nerana ndo, nnere wanda omukavihera namahudherihu a Bibliya, okanna odhivela ni Yehova. Siyeyo yereyile ni Yesu. Oliye owoga makalelo amudhiveliye babe, mwaha wa yeyo wathukulela anamaharaye omudhivela Yehova. — João 17:25, 26.
17. Mwahaya bwaddi olobela ni okanna ohudhera wavayeka ogenjhedhedha nroromelo nehu?
17 Yanatharu, nroromelo nawo nnere oliba. Karajhiha wubuwela enapadduwa wamuloba Yehova wihina uholele, utodole ni ukavihere. Mudhidhi onoonigiwe wihina malobelo awo enowakuliwa, nroromelo nawo nnerege othabwa oliba. (1 João 5:15) Ethu emodha enakavihera wenjhedhedha nroromelo nehu, fukanna ohudhera wavayeka. Bibliya onihina ‘nroromelo nnahara ele eniwiwa.’ (Rom. 10:17) Naamuhudheraga Bibliya enakala ninga nnanvuruwana Yehova. Mbwenye negi nikanne nroromelo nooliba, kanikalege ohudherave baahi wodhela Yehova. Nnohowela werana ethu emodhaya. Ethu baani?
18. Salmos 77 anatonyihedha addi wihina opendda ethu yapama?
18 Nikanne elemelo yoopendda dhithu nnahudherihu. Kubuwela yereye ni namaleba a Salmo 77. Oliye ahisimwela ubuwelaga wihina amwaana Ezarayeli ehisukumiwa ni Yehova. Salmista othuwathuwa ofiyedha ohuddoddaga nikove. (Versu 2-8) Ki nuwindo erile ddi? Oliye omwaddela Yehova egi: ‘Ginere opendda dhowera dhenyu dhatedhene ni ginere wubuwela mabasa enyu.’ (Versu 12) Kannanganyedha wihina Salmista ahinona makalelo Yehova eddihiliye nlogo naaye kale. Naarive dhigari ndo, oliye aari oothuwathuwene ni owikoha egi: ‘Mulugu ere oddiwala opama waye, obe thagaraga dhaye dhere omala mwaha wotakaleliwa?’ (Versu 9) Nuwindo Salmista opendda mabasa amatene Yehova aweriliyena, ni makalelo eddeliye thagaraga ni nthebwa nlogo naaye malabo akale. (Versu 11) Nuwindo, mareeliho baani awakeliye? Salmista okanna ebaribari wi Yehova kadha asukuma nlogo naaye. (Versu 15) Mwamakalelo mamodhave, wapendda makalelo Yehova eddihiliye nlogo naaye, ni makalelo eddihiliye egumawo, nroromelo nawo nnere oliba.
19. Ethu emodha enanithukulela ojha mudhidhi ni Yehova ddiniyani?
19 Yanennayi ni yathimaya, odhivela wawo ni Yehova onere wenjhedhedheya. Okwaranya ekalelo emodha, fudhivela winuthukulele omwiwelela Yehova, wilibiheraga wihina omuhagalase ni omwiwelelagave naarive ofwanyiwaga makathamiho-bi-makathamiho. (Mat. 22:37-39; 1 Cor. 13:4, 7; 1 João 5:3) Kaavo ethu emodha yathima enapitha odhivela ni wandana ninnihuna ni Yehova! — Sal. 63:1-8.
20. Okuma peeno odhowa osogolo, onere ddi wihina ohiiyeliwe mudhidhawo onajhiwe ni Yehova?
20 Onaaddiwale wihina olobela, ohudhera ni opendda, makalelo mamodha owebedha. Ndo ninga Yesu, osayelege mudhidhi wopwaseya wihina ojhe mudhidhawo ni Yehova. Orabele wiiyeliwa mudhidhawo. Omulobe Yehova wihina ukavihere okala oopwaseya waaparaga mabasa awo oomuzimuni. Akala peeno onolabihedha pama mudhidhawo, Yehova anere wawenjhedhedha mareeliho awo opitha mabasa onapariwe. Teto onere okanna ofuru wokalawo malabo amatene elabo exa ya Mulugu. — Marcos 4:24.
JHIBO 28 Quem pode ser amigo de Jeová?
^ paragarafu 5 Yehova dimukwihu athima ninnihuna. Iyo nnovaha thima wandana ninnihuna nuliye ni nnafuna nimunone pamadhene. Wihina nimunone pama muthu onoovira mudhidhi wowinjhivene. Emodhave enapadduwa ni wandana wehu ni Yehova. Wihina olibe winovira mudhidhene. Woona wi egumihu peeno enedda ethamagaga, nnande addi opatha mudhidhi wolibiha wandana wehu ni Babihu oodhulu? Ekalele ddi yapama werana ndo?