1-3. Dhithu baani dhinanthukulela iyo wunla?

 ONOWUBUWELA labo noogomihera wunliliwe? Malabo mamodha iyo nnowunla mwaha wohagalala. Mbwenye malabo owinjhiva nnowunla mwaha wowukuwa. Motajhiha, kannanda omalana mitori nakweliwa muthu namudhivelihu. Lorilei, murogola anakala Wistado Unidu ohuleba ayi: “Malabo mamodha gothabwa wukuwa mwaha okwa mwanaga, teto gubuwela wi kavo ethu yande ogimaliha. Mudhidhi dhendha murimaga wowiddela ni kaganda wonelamo akala ginoofwanelela okalagawove.” *

² Ni iyoya podi wunla wodhela dhithu dhimodha. Hiromi, piyonera anakala o Japawu anihina: “Miyo goowukuwa mwaha wawona athu amodha ehikannaga efunelo yomuhudhera Bibliya. Malabo mamodha, goolobela wa Yehova gunlaga, gilobaga wihina agikavihere onfwanya muthu anafuna ohudhera ebaribari.”

³ Ki we, onorajhihaga okala ndala ninga Lorilei obe Hiromi? Owinjhiva wa iyo nnokalaga ndala. (1 Ped. 5:9) Iyo nnafuna nimulabele ‘Yehova nuuhagalala,’ mbwenye malabo mamodha, nnomulabela oliye ni mitori mwaha womuyelela muthu namudhivelihu, mwaha wa okwerebeya obe mwaha wa dhithu dhinanipadduwela dhineha ororomeleya wehu wa Mulugu. (Sal. 6:6; 100:2) Enaanikavihere ddi ogonjhiha dhoweha ndha dhatedhene?

4. Va yohudhera ela nnaasuze ddi?

⁴ Yotajhiha ya Yesu podi onikavihera. Ni Yesuya ahifwanyiwa makathamiho oorusa yamuthukulele ‘oliye wunla.’ (João 11:35; Lucas 19:41; 22:44; Heb. 5:7) Nnafuna nihudhere dila  ngasi-ngasi Yesu unliliye, ni noone ethu nnahudherihuvo ni Yehova vamodha ni Yesu wodhela eyo. Teto nnafuna noone ethu enaanikavihere oparihedha mabasa ni owanana makathamiho enanunliha.

5. Ohudhere ddi wodhela Yesu omwilerigi João 11:32-36?

⁵ Yaka ya 32 mudhidhi wehu ohunafiye, Yesu ahimuyelela muukwani mukwaye amudhiveliye. Lazaru okala muredda vano okwa. (João 11:3, 14) Lazaru ahikanna arogoliye abili, Marta ni Mariya, teto Yesu oodhivela vanlubale emudhi yela. Ahiyana ala abili, yahukuuwa vanlubale mwaha omuyelela murogoliwa. Lazaru nuukwa, Yesu omaga olenddo odhowa obetaniya, wengo Mariya ni Marta yakaliiwawo. Marta nunona wi Yesu ohufiya, oliye omuthamagelaga Yesu. Kubuwela makalelo awukuwiliye awogaga egi: ‘Nabuya mwahere mukala wewuno, murogolaga kaakwe.’ (João 11:21) Voharela, Yesu numoona Mariya ni amodhaya yunlaga, nuliyeya ‘wambela wunla.’ — Omwileri João 11:32-36.

6. Mwahaya bwaddi Yesu adhe unlege?

⁶ Mwahaya bwaddi Yesu adhe unlege mudhidhi yole? Livuru Estudo Perspicaz das Escrituras nnowakula nikoho nna: “Okwa wa mukwaye Yesu, Lazaru, ni wukuwa wa arogoliye a Lazaru, ehimuthukulela Yesu ‘wukuwa ofiyera omoriha mitori.’” * Podi wera Yesu ahubuwela makalelo mukwaye Lazaru ooniliye goyi mwaha wa oredda ole ni makalelo ariye nunona wi dhendhavala ginna okwa. Mwebaribarene, nuumona Marta ni Mariya egaari owukuwene, mwaha okweliwa ddibiliwa Lazaru, yahimuthukulela Yesu wunla. Akala ohumuyelela mukwawo mukwani obe mmudhaawo, mwebaribarene onowonelamo makalelo aariye. Vano kabeni noone dhithu tharu nnahudherihu ni yopadduwa ela.

7. Mitori aakumihe Yesu mwaha omuyelela mukwaye, enanihudhiha ddi wodhela Yehova?

⁷ Yehova anowonelamo wukuuwa wawo. Bibliya anihina wi Yesu ‘dinaligana ni waara  wa’ aBabe. (Heb. 1:3) Nuwindala, akala Yesu ahunla, nnowonelamo wihina naaBabeya yahukuuwa vanlubale. (João 14:9) Akala onna woona goyi mwaha ohumuyelela muthu onamudhiveliwe muukwani, onone wihina Yehova onowonelamo wukuwa wawo, teto nuliyeya anowukuwa. Oliye anofuna vanlubale wusamalela, ni ovugula widdela onooniwe.— Sal. 34:18; 147:3.

8. Mwahaya bwaddi nigakanna ebaribari wihina Yesu anere wahogolosela egumi yaale ekwile?

⁸ Yesu ari munigwave wi anvenyihe muukwani ole onamudhiveliwe. Ahinathi wunla, Yesu omuroromeliha Marta egi: ‘Murogoliyo anere ovenyihiwa muukwani.’ Teto Marta ahinona wihina Yesu awoga ebaribari. (João 11:23-27) Marta aari mudhaari oororomeleya a Yehova. Mwaha wa yeyo, ahinona wi malabo a mundduli namavuhulela Eliyaji ni Elizewu, yahavenyiha athu muukwani. (1 Reis 17:17-24; 2 Reis 4:32-37) Teto podi wera oliyeene ahiiwa wihina Yesu ahavenyiha athu muukwani. (Lucas 7:11-15; 8:41, 42, 49-56) We podi okanna ebaribari emodhave anna Marta, onere ohogolowela wawona amudhawo ni akwawo ekwile. Mitori amorihe Yesu aamalihaga akwaye, yowoniha yeebaribari wi Yesu anofuna wahogolosela egumi yaale ekwile.

9. Ninga Yesu, nnaakavihere addi ale emuyelele muthu muukwani? Osorihe yotajhiha.

⁹ We podi omukavihera ole amuyelele muthu mukwani. Yesu ahunla ni Marta vamodha ni Mariya, mbwenye oliye ahavuruwana aliwa ele yawogiwa, ni ahawoga madhu owalibihana. Ni iyoya nnohowela omutajhiha Yesu. Dan, namaholela anakala elabo yo Awustraliya anihina: “Miyo gohowela vanlubale nikavihero nuumuyelela mwaraga. Anamatelana owinjhiva, yahiivelela wihina egivuruwane mudhidhi-bu-mudhidhi, naari vikale mutana obe mahiyu. Aliwa yoogihiya miyo owoga dhatedhene, teto gambela wunla naaliwaya yakala owukuwene. Ohiya eyo, aliwa yogikavihera ni dhithu gahowelimi. Yokalawo malabo gahandimi werana ethu, mbwenye aliwa yoosuwa karo yaga, yoogula dhoojha, teto yoogipiyela. Malabwene aliwa yoolobela vamodha ni miyo. Aliwa yahoniha pamadhene wihina yaari akwaga eebaribari ni addibila eniivahedha wihina ekavihere ‘wafwanyiwa makathamiho.’” — Pro. 17:17.

10. Yesu nufiya oJeruzale labo na 9 a Nisa yapadduwe ddi?

¹⁰ Labo 9 a Nisa yaka ya 33 mudhidhi wehu, Yesu odhowa o Jeruzale. Avolowaga musidadi mune, athu owinjhiva otugumana wihina emwakele. Aliwa yotadela dhowara dhewa mudila wihina Yesu aviremo. Athu ala yamoona Yesu ninga Mweniiwa. Mwebaribarene labo nne, naari labo noohagalasa. (Omwileri Lucas 19:36-40.) Bumwahaya, podi wera anamaharaye kiyonelamo mwahaya bwaddi Yesu adhe erege ndale, aliwa nuuvolowa musidadi mune. ‘Vano, nuwaddamela oJeruzale, osugwa sidadi ele, oliye wambela wunlela.’ Unlaga, Yesu owoga ethu yafuna wapadduwela athu oJeruzale. — Lucas 19:41-44.

11. Mwahaya bwaddi Yesu adhe awunlelege athu oJeruzale?

¹¹ Yesu ahukuuwa mwaha ahinona wi naari athu ale egamwakenle pamadhene, aJudewu owinjhiva kiyavuruwane muthenga oliye alaleyiye. Mwaha wa ekalelo yela yewa, Jeruzale ere ogujhuliwa, mbwenye maJudewu yaavuluwe, yere othukuliwa ninga adhaari. (Lucas 21:20-24) Madhu a Yesu wakwanela, mbwenye mowukuliha athu owinjhiva yahikoodda muthenga wa Yesu. Murudda onalaleyiwe athu enorumedha pama muthengaya?  Akala athu owinjhiva kinarumedha, onaahudhere ddi ni yotajhiha ya Yesu? Kabeni noone dhithu tharu nnahudherihu.

12. Mitori dha Yesu awunleliye athu oJeruzale dhinanihudhiha ddi wodhela Yehova?

¹² Yehova anowapwatha athu. Mitori a Yesu enonubusedha makalelo Yehova anaapwathiye athu. Bibliya onihina: ‘Oliye kanafuna wi muthu di muthu agujhuliwe, mbwenye anafuna wi atene ethwaruwe.’ (2 Ped. 3:9) Ni iyowa podi wooniha wi nnowadhivela amwanddamanihu wodhela wilibihera wihina ndahinye murima dhewa ni muthenga dhapama. — Mat. 22:39. *

13-14. Yesu oonihe aavi wi owaweddela thagaraga athu, ki nnaamutajhihe aavi?

¹³ Yesu owilibihera mmalaleyelo. Yesu owadhivela athu, bumwahaya, owalaleya mburo-bu-mburo aafwanyiyevo. (Luc. 19:47, 48) Mwahaya bwaddi oliye adhe eeregena ndo? Mwaha oliye owaweddela thagaraga athuya. Malabo mamodha, athu yahowela nikavihero ni yafuna onvuruwana Yesu yowinjhiva, mwaha wa yeyo oliye vamodha ni anamahara aye kiyanna mudhidhi wihina ‘ejhe ethu-siithu.’ (Mar. 3:20) Yesu ohufiyedha olaleya mahiyu, mulobwana dhala afunaga ovuruwana muthenga anniyena. (João 3:1, 2) Ebaribari wi athu owinjhiva kayavuruwana muthenga wa Yesu, teto kiyarumedha okala anamahara aye. Mbwenye mohanganyedha aatene yaale yahiiwa muthenga wa Yesu. Ni iyowa nnafuna wi athu aatene evuruwane muthenga dhapama. (Atos 10:42) Wihina nande werana eyo podi wera malabo mamodha nnohowela osaddula makalelo ehu oolaleya.

¹⁴ Nithome wirugunusedha mmalaleyelo. Iyo naalaleyaga mawora mamodhave, podi wera kannafwanye athu enafuna ohudhera ebaribari. Piyonera dhaala anithaniwa Matilda ohuwoga egi: “Miyo vamodha ni mamunaga nnowilibihera walaleya athu mudhidhi wohiyana-iyana. Mambeseene, nnodhowa olaleya omusika. Mutana athu owinjhiva yakala mudila nnolaleya nikarinyu ya malivuru. Vano txiguwo nnowanda wafwanya athu mmavaade mwewa.” Ohiya olaleya baahi  mudhidhi nnonihu wi bofwanelela, enohoweleya osaddula wihina nilaleye mudhidhi wofwanelela wafwanya athu mmavaade mwewa. Nerana ndo, nikanne ebaribari wihina Yehova anere othabwa ohagalala.

15. Mowiwanana ni Lucas 22:39-44, yapadduwe ddi emahiyu yogomihera Yesu agaari mwilaboni yavati?

¹⁵ Omakuthulo wa emahiyu ya labo na 14 a nisa, Yesu ahidhowa Jardi yo Jetisemani. Vano onfugulela Yehova murima waye. (Omwileri Lucas 22:39-44.) Bumudhidhi yoyo Yesu ‘alobeliye nuubebedha, nimutori.’ (Heb. 5:7) Emahiyu ele Yesu ahalaga neena nuukwa, alobelaga aloba ddi? Oliye ahilobela alobaga kopolo wihina akaleve oororomeleya ofiyedha omakuthulo ni erena efunelo yaye Mulugu. Yehova ahivuruwana nlobelo nno ni omuruma mungero wihina amulibihe.

16. Yamuthukulele Yesu wunla mudhidhi alobelaga o Jardi yo Jetisemani ddi?

¹⁶ Nlobelo erilena Yesu agaari Jardi yo Jetisemani, oliye ahunla mwaha oova athu yubuwelege wi oliye kaariha ndina na Mulugu. Teto oliye ahinnona wi ahikanna mutholo munlubale — okalave oororomeleya wa Mulugu ni okavihera onamathonga winlubale wa Yehova. Akala onofwanyiwa makathamiho manlubale eneeha ororomeleya wawo wa Yehova, onaahudhere ddi ni mitori dha Yesu? Osugwe dhithu tharu dhinukavihere.

17. Nnahudhera ddi wodhela makalelo Yehova awaakuliye malobelo a Yesu?

¹⁷ Yehova anovuruwana malobelo ehu. Yehova ahivuruwana dhooloba dha Yesu. Mwahaya bwaddi? Mwaha yoluba ya Yesu waali okalave oororomeleya ni obarela ndina naaBabe. Nakanna yoluba emodhave, Yehova anere wawakula malobelo ehu. — Sal. 145:18, 19.

18. Yesu analigana ni muthu anonelamo dhinanipadduwela nimakalelo baani?

¹⁸ Yesu anowonelamo makathamiho enanifwanya. Naafwanyiwaga makathamiho manlubale sapama othapanya ni muthu anonelamo ndhe dhinanifwanya, thabwathabwa akala muthuya anofwanyiwaga makathamiho mamodhave enanifwanya. Yesu ari ninga muthu yoyo. Oliye anowonelamo naafwanyiwaga makathamiho ni nahowelaga nikavihero. Yesu  ohaanona makathamiho ehu ni anere werana dhatedhene wihina anikavihere ‘mudhidhi wofwanelela.’ (Heb. 4:15, 16) Yesu agaari jardi yo Jetisemani ahirumedha nikavihero na mungero. Ni iyowa nrumedhege nikavihero na Yehova ananivahiye, podi akala nifwannye mmalivuruni, nvidiyuni, mmwahani obe wodhela mukwihu owithwelavo obe namaholela mulogo.

19. Enaanikavihere owanana makathamiho oorusa eneeha ororomeleya wehu wa Yehova ddi? Owoge yopadduwa.

¹⁹ Onere wakela ‘murenddele wa Mulugu’. Nalobelaga wa Yehova, oliye onere onivaha kopolo nnahowelihu. Nnere okanna ‘murenddele wa Mulugu onapitha mubuwelelo wa muthu.’ (Fil. 4:6, 7) Murenddele oyo, onere opwaseyiha murima wehu ni onere onikavihera wubuwelaga mwamakalelo oopwaseya. Siyeyo yampadduwele murogola dhaala anithaniwa Luz. Oliye anosoriha egi: “Miyo ginakalesa sutukumwe teto mubuwelo oyo onothabwa ogoniha goyi. Malabo mamodha ginakala ookwerebeyene ni gubuwelaga wihina Yehova kanagidhivela. Vano mubuwelo ndho dhagifwanya, ginorajhiha wimela miyo omwaddela Yehova makathamiho enagifwanya. Malobelo enogikavihera osugwera mubuwelo waaga.” Madhu a murogola Luz enawoniha wihina malobelo podi onivaha murenddele.

20. Mitori dha Yesu dhinanihudhiha ddi?

²⁰ Ohudhera wodhela mitori dha Yesu winonlibiha vanlubale, teto nihisuza dhithu dhowinjhiva vayohudhera ela! Nihoona wihina sapama walibiha ale emuyelele mmudhiwa. Teto sapama ororomela wihina Yehova ni Yesu enere onikavihera nafwanyiwa makathamiho mamodhave. Teto niihudhera wihina sapama walaleya athu ni okanna oodhivela, mwaha Yehova vamodha ni Yesu enonihudhiha okanna dhikalele ndho. Onona wihina Yehova vamodha ni Yesu enowoonelamo mubuwelo wehu ni makathamiho enanifwanya, enonlibiha ni enere onikavihera okalave oovilela. Bumwahaya, ndideleve oparihedha mabasa dhithu nihudherihu musolo ola, ofiyedha labo Yehova anaakwanihedhiye mpaganyo waye wohagalasa ‘wovuda mitori dhatedhene mmwintoni [mwehu]’! — Apo. 21:4.