1. Makalelo baani Yehova oriye ninga mayi onamukalela supajhe mwanaye?

‘MUHIYANA podi omudduwala mwanaye ofiyedha ohumukalela supajhe?’ Nna nikoho Yehova okosiliye mudhidhi wa namavuhulela Isaia. Mulugu ahiwoga ni nlogo naye egi ‘Naarive ahiyana ayo yaadduwalaga aniwa, miyo kagidha gudduwala.’ (Isa. 49:15) Kahiyo wera Yehova awoga wi giri mayi, mudhidhi yole oliye awoga nladdaniho. Yehova alabihedha wandana anna mayi ni mwanaye wihina oonihe makalelo anathuwathuwiliye adhari aye. Amayi owinjhiva podi owoga ninga murogola anithaniwa Jasmin osorihile egi: “Wamukalelaga supajhe mwanawo, munere okanna wandana woliba malabo matene.”

2. Yehova anakala avi amoona mwanaye mmodha ahogolowelaga mundduli?

² Yehova onomoona mwanaye asukuma otugumana ni makiristawu akwaye, ni ahiya odhowa mmabasani oolaleya. Kubuwela makalelo owukuwa a Yehova, awonaga matxikwi ni matxikwi adhari aye edduddumadhaga * kadda yaka!

3. Ethu baani Yehova anafuniye?

³ Addibilihu ni arogolihu owinjhiva enadduddumadha, yahogolowela mmulogoni aliwa enowakeliwa ni malada menddi! Yehova onofuna vanlubale wi ehogolowe, teto, ni iyoya nnofuna ethu emodhave. (1 Ped. 2:25) Nnere ddi wihina nakavihere? Nihinathi waakula nikoho nna, naabihe onona mwahaya bwaddi amodha egadduddumadhaga odhowa omutugumanoni ni wapara mabasa olaleya.

4. Ganyo yehu enavolowela addi webedha wehu?

⁴ Amodha enodduddumadha mwaha wa ganyo. Ddibila Hung * anakala o Sudeste elabo yo Ásia onorumedha egi: “Gaheenya wi ganyo yaga ekale ethu yathima mwigumini mwaga. Gahifiyedha owoga meeka wi, gakala ooreela, ginere owedha omulabela pama Yehova. Gadhiveliwa baahi ojha mudhidhi wowinjhiva omabasani. Nuwindo, miyo oroma ojhomba omutugumanoni vang’ono vang’ono. Ofiya mudhidhi miyo kuhudhowagawo. Kasugwa dhigipadduwele, enakala ninga elabo ela esasanyiwe wihina athu emusukumege Mulugu vang’ono vang’ono.”

5. Makathamiho baani enfwanyile murogola Anne?

⁵ Addibila ni arogola amodha enofwanyiwa makathamiho owinjhiva. Murogola Anne anakala elabo yo Grã-Bretanha onna ahima atanu, ohusoriha egi: “Mwanaga mmodha, obaleyile ni oredda wowopiha. Vasogolova, mwanaga mwana muhiyana ohutxosiwa, teto, mwanaga mmodha a mwana mulobwana ofwanyiwa oredda wamurumuru. Mwaha wa yeyo, okwerebeya ogifwanya, miyo ohiya otugumana, ni olaleya ofiyedha odduddumadha opara mabasa oomuzimuni.” Sowukuliha vanlubale onona wi Anne ni emudhi yaye vamodha ni addibila awinjhiva enohowela okaviheriwa wihina egonjhihe makathamiho enafwanya!

6. Mwahaya bwaddi muthu ahinahara yolebela ya Colossenses 3:13, podi olapelana ni adhari a Yehova?

⁶ Omwileri Colossenses 3:13. Adhari amodha a Yehova enanyanyuwa ddibila obe murogola a mmulogoni erana ethu ehinadhivela. Murumiwi Pawulo oorumedha wi, malabo mamodha iyo podi ‘okanna muladdu ni ddibila obe ni murogola ofiyedha omusumela.’ Mwebaribarene, iyovano nereliwa obure nahikala pasope podi okoya ntxiga. Okoya ntxiga podi omuhiya muthu okala wolapela ni mulogo wa Yehova. Kasugwa empadduwele ddibila Pablo anakala elabo yo America do Sul. Oliye ahinkedhiwa wi oherana yothega, mwaha wa yeyo, oliye oyelela mabasa anniyena mmulogoni. Ki nuwereya ndo, oliye erilena ethu baani? Oliye ohusoriha egi: “Gahinyanyuwa vanlubale”, vang’ono vang’ono miyo obajha osukuma mulogo.

7. Muthu onna mubuwelo wonyemela onakala avi?

⁷ Addibila amodha enohalana mubuwelo wonyemela, mwaha wa yothega yeriliwana kale ofiyedha wubuwela wi Mulugu kanna odhivela naaliwa. Naari egaleveleliwe, podi wubuwelaga wi kinafwanelela okala ni nlogo na Mulugu. Ddibila anithaniwa Francisco uubuwelesa ndo, ohusoriha egi: “Miyo gahisinyusiwa mwaha wa mararuwo. Podi dhigereye ndo, godhowesa omutugumanoni. Mbwenye gafiya vari va nlogo na Yehova, gookannesa manyazo. Mubuwelo waaga woginyemela ni gowanganyedhesa akala Yehova ohigilevelela obe naari. Vano nuvira mudhidhi vang’ono, miyo ohiya otugumana ni mulogo.” Onawoona avi addibila ni arogola enna makathamiho mamodhave ninga ddibila Francisco? Onowaweddela thagaraga aliwa? Ki mubuwelo wa Yehova buvi wodhela aliwa?

8. Yehova onowadduwala ale yamwebedha oliye vano enoohogolowela mundduli? Kawogamo.

⁸ Yehova kanadduwala ale enamulabela oliye vamodha ale ehinatugumana mudhidhene ni nlogo naye. Newene kadha adduwala mabasa yapamre aliwa. (Heb. 6:10) Namavuhulela Izayiya ononubusedha yoladdaniha yapama, enoniha wi Yehova onowasamalela athu yala, oliye ohusoriha egi. ‘Ninga namakukula oliye anowasamalela mambila aye.’ ‘Ni mono waaye  onere watugumanya mambila ni onere wabaala odduli.’ (Isa. 40:11) Namakukula apama, nimbila nimodha narimela anakala avi? Yesu ahoniha makalelo Yehova anakaliye nuumala wakoha anamahara aye egi: ‘Munoonamo avi? Akala mulobwana mmodha ohukanna mambila owakwana 100 vano nimodha nnoorimeela, oliye kanaahiya 99 onikunguni wihina asayele nne nrimele? Vano oliye afwanya, ginowuwaddelani ebaribarene wi, onere ohagalala vanlubale ni nna nrimele opitha 99 ehirimele.’​—Mat. 18:12, 13.

9. Namakukula apama amalabo amundduli yeddiha mambila ewa ni makalelo baani? (Osugwe fotu ya vakapani.)

⁹ Mwahaya bwaddi nimuliganihaga Yehova ni namakukula? Mwaha mudhidhi wa mundduli, namakukula apama owasamalela ni nthebwa mambila aye. Motajhiha, Davidi ahiwana ni poddogoma, nnikurukumwa wihina aabarele mambila aye. (1 Sam. 17:34, 35) Enohoweleya namakukula apama wasugwera mambila aye wihina oone akala nihirimelavo nimodha obe naari. (João 10:3, 14) Namakukula apama, enowileva ofiyedha wahiya mambila 99 obe wakoya mburo wobareleya wihina avede nne nrimele. Yesu ohulabihedha nladdaniho nna na namakukula wihina anisuzehe ebaribari yathima, oliye ohusoriha egi: ‘Babi aaga, ori odhulu, kanafuna orimela newene mmodha wa ang’ono ala.’​—Mat. 18:14.

10. Ninga munawogela Ezequiel 34:11-16, Yehova olibele ethu baani ni mambila aye erimele?

¹⁰ Yehova ohukanna odhivela ni kadda muthu wa iyo, naaleya ehiyile “vang’ono vang’ono” omulabela oliye ofiyedha odduddumadha mabasa oomuzimuni. Amulabihedhaga namavuhulela Ezekiyeli, Yehova ohulibela wi onere wasayela mambila atene erimele wihina aakavihere ohogolowela okala oolibene omuzimuni. Oliye ahileba thalo dhahoweleya wihina namakukula owizarayeli aharege nimbila narimela. (Omwileri Ezequiel 34:11-16.) Vobajha, namakukula aafunaga osayela nimbila, ohowela mudhidhi wowinjhiva ni wilibihera. Mowindo, namakukula afwanya nimbila naarimele, oothukulela vili mambila mamodha. Ohiya  eyenove, akala nimbilana nahivoliwa obe nahikanna makwadda, yohoweleya namakukula osamalela pamadhene. Yohoweleya onvaha yojha ni osamalela makwadda aninbila. Anamaholela mulogo, anamakukula a ‘mambila a Mulugu,’ enohoweleya aliwa ohara thalo dhimodhave yaafunaga omukavihera muthu ori wolapela ni mulogo. (1 Ped. 5:2, 3) Anamaholela ala, enowaveda mambila a Mulugu wihina yaakavihere ohogolowela mmulogoni, ni wawoniha odhivela wodhela wakavihera ni dhithu dhomuzimuni dhinahowela aliwa. *

11. Namakukula apama ononelamo ethu baani mowaguva aakukulaga mambila aye?

¹¹ Namakukula apama onowoona wi nimbila nnafuna nrimele. Akala nimbilana nihipupuruwa weddaga dila emodhene wolapela ni mambila mamodha, namakukula kanasinyusa ni makalelo abure. Woone yotajhiha ya Mulugu, oliye ahakavihera adhari aye ale yaali wolapelana ni Yehova.

12. Yehova aamweddihe Jonasi ni makalelo baani?

¹² Namavuhulela Jonasi ahithomiwa wihina adhowe o Ninive, teto oliye kamwilele Yehova. Mbwenye Yehova kaamusukume Jonasi mowaguva. Ninga namakukula apama, Yehova ahimukurumuwela Jonasi ni omukavihera oliye wakwaneliha mabasa aye. (Jonas 2:7; 3:1, 2) Voharela, Yehova omeliha mukuzalinya wihina amukavihere Jonasi wonelamo wi egumi ya muthu sathima. (Jonas 4:10, 11) Ethu baani nnahudherihu wodhela yopadduwa ela? Anamaholela mulogo kahiyo wasukuma mowaguva ale edduddumadhe mabasa oomuzimuni. Ohiya eyo, enohoweleya anamaholela mulogo osayela makalelo oonona muladdu othukulele nimbila nna na Mulugu opupuruwa. Vano nimbila nna nahogolowela wa Yehova, enohoweleya anamaholela mulogo emukaviheregeve ni makalelo oodhivela, ni onvaha dhithu dhatedhene dhomuzimuni dhinahowela oliye.

13. Nnahudheravo ddi wodhela makalelo Yehova amweddihiye namaleba a Salmo 73?

¹³ Maliba amulebile Salmos 73, ahikwerebeya ooniliye obure othabwaga. Oliye ahifiyedha  wanganyedha akala yaali ethu yapama obe naari werana efunelo ya Mulugu. (Sal. 73:12, 13, 16) Ki Yehova numoona enre ddi? Oliye kamutorihe mulobwana ole, ohiya eyo, oliye ahimubusedha madhu eri mBibliyani. Nuwindo namaleba a Salmo okanna wandana wapama ni Yehova. Wandana wula waari wathima opitha ethu-sithu afuniye mwigumini mwaye. (Sal. 73:23, 24, 26, 28) Ethu baani nnahudherihu? Anamaholela mulogo kahiyo watorihaga mowaguva ale enanganyedha akala omulabela Yehova winodhana mareeliho obe naari. Ohiya watoriha aliwa, enohoweleya anamaholela mulogo exixe wonelamo mwahaya bwaddi aliwa egawogaga ndo. Anamaholela mulogo yerana ndo, enere onona yolebela baani ya mBibliyani enafwanelela olabihedha wihina emukavihere.

14. Mwahaya bwaddi Eliyaji adhe ahowelege nikavihero, ki Yehova amukavihere ni makalelo baani?

¹⁴ Namavuhulela Eliyaji ahimuthawa musano Jezabel. (1 Reis 19:1-3) Oliye owubuwela wi kaavo muthu alaba ninga namavuhulela a Yehova, ni oona wi mabasa aye oovuhulela kiyanna thima. Oliye ookubanya ofiyedha oloba okwa. (1 Reis 19:4, 10) Ohiya omutoriha Eliyaji, Yehova ahimukavihera oliye ofiyedha woona mwinya wi kaari yeeka ni yohowela ororomela kopolo dha Mulugu, teto, woona wi osogolo eere wapara mabasa athima. Nuwindo Yehova woona athuwathuwa wa Eliyaji, vano onvaha mabasa maxa. (1 Reis 19:11-16, 18) Ethu baani nnahudherihu? Iyo atene, thabwathabwa anamaholela mulogo, nihikanna mutholo wowasamalela ni makalelo apama mambila a Yehova. Muthu awogaga ni obure obe aanganyedhaga  thagaraga dha Yehova, anamaholela mulogo enomwithana onvuruwana dhatedhene dhiri mmurimani mwaye. Yamala, enowilibihera vanlubale omukavihera ofiyedha woona yeka wi Yehova ononvaha thima.

15. Ninga munawogela João 6:39, Yesu anonne ddi wodhela mambila a Ababe?

¹⁵ Yehova anafuna wi iyo nnonne ddi wodhela mambila aye erimele? Yesu ohunihiyedha mweddelo wihina iyo niharege. Oliye ahinona wi Yehova onowavaha thima mambila aye, siyeyo yamuthukulele oliye owoga wi ere wakavihera ‘mambila aakudda Ezarayeli erimele’ ofiyedha ohogolowela wa Yehova. (Mat. 15:24; Luc. 19:9, 10) Yesu aari namakukula apama, oliye owilibihera wihina mambila a Yehova ehirimele nee nimodha.​—Omwileri João 6:39.

16-17. Anamaholela mulogo enoonamo avi wodhela wakavihera ale edduddumadhe mabasa oomuzimuni? (Osugwe kwaduru “ Nimbila norimela podi wera nnakala avi?”)

¹⁶ Murumiwi Pawulo ahakongomedha anamaholela mulogo a elabo yo Efeziyu wihina emutajhihe Yesu. Oliye ahiwoga egi: “Enohoweleya wakavihera athu oolodhowa ofiyedha okanna mmusoloni madhu a Nabuya Yesu, enihina: ‘ovaha winodhana ohagalala ohiya wakela.’” (Atos 20:17, 35) Mohanganyedha, peeno anamaholela mulogo ehikanna mutholo mmodhave. Ddibila Salvador anakala elabo yo Espanha analaba ninga namaholela mulogo, ohusoriha egi: “Wubuwela wi Yehova onowavaha thima mambila matene, winogivaha kopolo yowerana ethu-sithu wihina gaakavihere.” Oliye ohusorihave egi: “Ninga namakukula oomuzimuni, miyo gihinona wi Yehova anafuna wi gaasamalelege mambila aye.”

¹⁷ Oodduddumadha atene ewogiwe muwari mwa yohudhera ela, ehikaviheriwa ohogolowela wa Yehova. Peeno owinjhiva edduddumadhe mabasa oomuzimuni, enofuna werena emodhave. Yohudhera enaharela, enere osoriha makalelo oohara thalo dhinahoweleya wihina naakavihere ale edduddumadhe mabasa oomuzimuni ofiyedha ohogolowela wa Yehova.