OHUDHERA 26
‘Muhogolowele wa miyo’
‘Muhogolowele wa miyo, miyo ginere ohogolowela wa nyu.’—MAL. 3:7.
JHIBO 102 Ajude Os Que Estão Fracos
MUSELU NNAFUNIHU OSUZA *
1. Yehova anakala aviniya oona nimbila narimele nihogolowelaga wa oliye?
NINGA nonilihu muwari mwa yohudhera ya mundduli, Yehova oniliganiha yeka ni namakukula anasamalela apama mambila aye. Nihona wi nimbila narimela oliye onosayela. Yehova ahiwoga ni amwaana Ezarayeli yaari wolapela ni oliye egi: ‘Muhogolowele wa miyo, miyo ginere ohogolowela wa nyu.’ Iyo nihinona makalelo Yehova anakaliye peeno mwaha wa ele owogiliye egi: Miyo ‘kaginasadduwa.’ (Mal. 3:6, 7) Yesu ahiwoga wi Yehova vamodha ni angero enohagalala yawona ale yaari wolapela ni Yehova ehogolowelaga wa oliye.—Lucas 15:10, 32.
2. Peeno nnafuna nihudhere ddiniyani?
2 Nnere osuza maladdaniho mararu a Yesu enawoga wodhela makalelo owakavihera ale eri wolapela ni Yehova. Teto nnere osuza dhikalelo dhavayekiwa dhinahoweleya okanna wihina naakavihere amodha ohogolowela wa Yehova. Vasogolova, nnere woona mwahaya bwaddi edhe ekalege yathima wakavihera ale ooridha omuzimuni.
OVEDA KOROWA YAMUJHILA ERIMELE
3-4. Ninga munawogela Lucas 15:8-10, mwahaya bwaddi muhiyana ola adhe adidelege oveda korowaya yarileme?
3 Omukavihera muthu anafuna ohogolowela wa Yehova winovaha mabasa. Nladdaniho nnafwanyeya muwari mwa muthenga dhapama dha Yesu dhiri va Lucas, Yesu ohumusoriha muhiyana onaveda ethu yathima erimele enithaniwa—korowa ya drakima. Nladdaniho nna, nnowoniha makalelo muhiyana ole akaleliye ntidi oveda naari egari ethu yorusa ofwanya.—Omwileri Lucas 15:8-10.
4 Yesu anawoga wodhela makalelo muhiyana ole ariye nuumala ofwanya korowa yaye ya drakima yarimele. Malabo a Yesu, muhiyana ori mwana Ezarayeli, onvaha korowa ya drakima mwanaye amwana muhiyana labo nateliwiye. Podi wera korowa yarimele ya drakima ya muhiyana ola, ere ovahiwa naamaye. Muhiyana ola oororomela wi korowa ele yarimele mba mwaaye. Nuwindo, oliye ohiddiha panti wambela oveda, mbwenye koonile. Teto, panti yaye kayahidda pama mwaha kaalimo dizeli apameene, mwaha wa yeyo oliye kaawedhile woona korowa ele ng’ono ya parata. Vano oliye oxela pamadhene mba mwaye, nuumala oxela mbwebwe oliye woona korowaye ya drakima exeremelaga mwaha wo waara wa panti. Oliye ohagalala vanlubale! Vano wawithana akwaye amwanddamani wihina awaddele.
5. Mwahaya bwaddi ekala yorusa wafwanya ale edduddumadhe otugumana ni mulogo?
5 Ninga nonilihu ni nladdaniho na Yesu, osayela ethu erimele enovaha mabasa. Ni makalelo mamodhave, waveda ale edduddumadhe otugumana ni mulogo enorusa vanlubale, podi wera dhihivira yaka dhowinjhiva aliwa ehitugumanaga ni iyo, obe mburo witameliwa addibila a wewule kiyanonne. Mbwenye ovanane, ale edduddumadhe otugumana ni wapara mabasa oolaleya enafuna ehogolowele wa Yehova. Aliwa emmafuna emulabelege Yehova vamodha ni amudhiwa eri mwibaribarini, teto, enohowela nikavihero nehu.
6. Anafwanelela baani wasayela ale edduddumadhe otugumana ni wapara mabasa oolaleya?
6 Anafwanelela baani wasayela ale edduddumadhe otugumana ni wapara mabasa oolaleya? Anamaholela mulogo, apiyonero, amudhiwa, vamodha ni anamalaleya ammulogoni, iyo atene nihikanna mutholo—wowaveda. Ohukanna mukwawo obe mmudhawo odduddumadhe otugumana ni wapara mabasa oolaleya? Ogaari mmabasani oolaleya nyumba ni nyumba, onowabihaga onfwanya muthu odduddumadhe otugumana? Obe olaleyaga vinavira anamwinjhi, onowabihaga othapanya ni muthu owogile egi miyo giri Namona a Yehova mbwenye giri maddumadha otugumana ni mulogo? Athu ninga yayo, yafuna anya wuwaddela mburo vinakaliye obe numero naye na telefoni, orumedhe ni olebe wavahe anamaholela ammulogoni.
7. Ohudherevo ddi wodhela ele ewogile namaholela ammulogoni anithaniwa Thomas?
7 Thalo baani enahoweleya ohariwa ni anamaholela ammulogoni yaafunaga omukavihera muthu anafuna ohogolowela wa Yehova? Namaholela mulogo anithaniwa Thomas * anakala elabo yo Espanha, aakavihera Anamona a Yehova owakwana 40 ohogolowela mmulogoni, ohusoriha egi: “Vobajha miyo ginakoha addibila ni arogola akala ehinona murudda winakala athu yayo edduddumadhe. Obe ginomukoha namalaleya mmodha akala ohumunona ddibila obe murogola ahinatugumana. Owinjhiva ammulogoni enowakula ni kopolo woona aliwa ehinona wi nnolupelamo mmabasani owaveda ale edduddumadhe otugumana ni wapara mabasa oolaleya. Voharela, gawaredhelaga miyo ginowakohedha aniwa ni dhithu dhimodha dha mwigumini mwewa. Addibila ni arogola amodha edduddumadhe otugumana ni wapara mabasa oolaleya, enowathukulelesa aniwa omutugumanoni, aniwa amodha podi wera enowabihaga okala anamalelaya. Naaliwaya enohowela okaviheriwa ohogolowela wa Yehova.”
WAKAVIHERE AHIMA A YEHOVA ERIMELE OHOGOLOWELA WA OLIYE
8. Nladdaniho na mwaana odduddumadhe vaade nnafwanyeya va Lucas 15:17-24, babi onamwakela avi mwanaye othwaruwe vano afunaga ohogolowela vaade?
8 Dhikalelo baani dhinahowleya okanna naafunaga wakavihera ale enafuna ohogolowela wa Yehova? Woone ethu nnahudherihu ni nladdaniho na Yesu nnawoga wodhela mwana aadduddumadhe vade. (Omwileri Lucas 15:17-24.) Yesu ohuwogamo ni nladdaniho ethu enapadduwa mwaana adduddumadha vaade vano athwaruwa ni asakula ahogolowele vaade vaababe. Babi amoona mwanaye adhaga, onomuthamagela omukubarela atonyihedhaga odhivela oniyena ni mwanaye. Teto mwana onokanna mubuwelo wonyemela ni onowambela wubuwelaga wi oliye kanafwanelele withaniwa mwanaga ni ababe. Era ndo, mwaana onosoriha dhatedhene dhiri mmurimani mwaaye amwaddelaga babe, teto, babi onomukalela supajhe mwanaye, vano omwakela. Vasogolova, babi onowerana ethu-sithu wihina amoonihe mwanaye wi ohumwakela vade vaye ni malada menddi ni kadha omweddiha ninga namalaba mbwenye onere omweddiha pama woona oliye mwaana anafuniwa vanlubale vamuralani vewa. Wihina oonihe pamadhene wi eyo ebaribari, babi ahimukungela mathanga mwanaye otwaruwe ni omugulela dhowara dhapama.
9. Dhikalelo baani dhinahoweleya okanna naafunaga wakavihera addibila ni arogola edduddumadhe otugumana ni wapara mabasa oolaleya? (Osugwe kwaduru “ Makalelo oomukavihera muthu anafuna ohogolowela wa Yehova.”)
9 Yehova ari ninga babe ola a nladdaniho. Oliye onowadhivela addibila ni arogola edduddumadhe otugumana ni wapara mabasa oolaleya ni onofuna wi aliwa ehogolowele wa oliye. Iyo podi omutajhiha Yehova nilibiheraga wakavihera athu yayo ohogolowela wa oliye. Wihina nande werana eyo, enohoweleya okala athu oojhehera, asupajhe, athagaraga ni ookanna odhivela naaliwa. Mwahaya bwaddi nigahowela woniha dhikalelo ndha, ki vano nnawedhe addi woniha dhikalelo ndha?
10. Mwahaya bwaddi nigahowela okala ojhehera naafunaga wakavihera athu ohogolowela wa Yehova?
10 Enohoweleya iyo woniha ekalelo ela yojhehera, mwaha muthu egi ahogolowele wa Yehova onomala mudhidhi wowinjhivene. Amodha yadduddumadhe otugumana ni wapara mabasa oolaleya, enorumedha wi ehinathi ohogolowela wa Yehova, yaharedheliwa dila dhowinjhivadhene ni anamaholela mulogo vamodha ni addibila ammulogoni. Murogola anithaniwa Nancy anakala elabo yo Sudeste a Ásia ohuleba egi: “Mukwaga a vati vamurima oogikavihera vanlubale. Oliye ni miyo akala ninga diddibilaga apogoya, oogoniha vanlubale odhivela waaye. Oliye oogubusedha dhithu nakosesihu vamodha, oogivuruwana gawogaga dhammurimani mwaga ni oogivahesa dholaga. Owoniha okala mukwaga a vati vamurima ni oogikavihera mudhidhi wamutene.”
11. Mwahaya bwaddi egahowela okanna supajhe naafunaga omukavihera muthu onna mubuwelo woporeya?
11 Supajhe enakala ninga murombwe onavulumusa. Podi okavihera ovenyihedha mubuwelo woporeya wa muthu. Amodha edduddumadhe nikuru na Yehova, enokoya ntxiga ni muthu ammulogoni yaka dhowinjhivadhene. Mwaha wa yeyo enowarusa ohogolowela wa Yehova. Aliwa podi wubuwelaga wi kiyeddihiwe ni makalelo owogowa. Teto, aliwa podi ohowela amugumela muthu wi avuruwane pamadhene ele eri mmurimani mwewa ni aakavihere. (Tia. 1:19) María aadduddumadhe mudhidhene otugumana ni wapara mabasa oolaleya, ohusoriha egi: “Goomuhowela muthu agihiddele vanthurini agivuruwanege guunddaga ni agihiddele nlada neddege vamodha.”
12. Oladdanihe makalelo Yehova analabihediye odhivela waaye ni kadda muthu odduddumadhe omulabela oliye wula afunaga omuhogolowela?
12 Bibliya onowoga wi odhivela onna Yehova naathu winaligana ni kabala. Odhivela wa Yehova winaligana ni kabala ni makalelo baani? Kasugwa yoladdaniha ela: Kubuwela yahakale ninga wera oddadda mwiko, vano muthu wuvokedha salva vida. Ebaribari sowi, ogahitamalela vanlubale nikavihero nna mwaha wahere ohuvokeriwa salva vida, kiyakwiye wobola egumawo ni eere wukavihera ombeluwa ofiyedha orabela oridha wamanjhe. Teto, ovokeriwa salva vida baahi kiyakwane, yerege ohoweleya muthu wuvokera kabala wihina uuwete ofiyedha otavuwa. Yehova ahiwoga wodhela Amwana Izarayeli egi: ‘Gihidhowave gaweddihaga ni kabala dheemuthu, vamodha ni kabala dha odhivela.’ (Ose. 11:4) Peeno thagaraga dha Mulugu dhiri ndo naathu edduddumadhe omulabela oliye, vamodha naale enaddadda mwaha wa makathamiho. Yehova anafuna wi aliwa enone odhivela waaye naliwa ni enone wi onofuna aliwa ehogolowele wa oliye. Yehova podi wulabihedha wihina awonihe odhivela waaye ale edduddumadhe.
13. Yopadduwa ya Pablo enoniha addi wi odhivela wehu naddibilihu podi okavihera vamlubale?
13 Sathima wawaddela ale edduddumadhe omulabela Yehova wihina aliwa enofuniwave vanlubale nuliye ni wawaddela wi nihiyowa nihikannave odhivela naaliwa. Pablo osorihiwe muwari mwa yohudhera ya mundduli anakala elabo yo América do Sul amanle yaka 30 ahimulabelaga Yehova, ohusoriha egi: “Labo nimodha mambesi gikumaga vade, miyo gahinfwanya murogola owunuwelavo anriho. Oliye owoga nimiyo ni makalelo ooriha. Mwaha wa yeyo, miyo otomola kutho ninga mwaana. Vano miyo omwaddela murogola ole wera Yehova durumile wihina odhe owoge nimiyo. Mudhidhi yole, miyo osakula wihina gimuhogolowele Yehova.”
WAKAVIHERE NUDHIVELA ALE EKWEREBEYE
14. Ninga munawogela nladdaniho niri va Lucas 15:4, 5, namakukula erilena ethu baani numala ofwanya nimbila narimele?
14 Aliba odduddumadha omulabela Yehova enohowela malabo matene nikavihero nehu. Ninga yotajhiha awogile Yesu ya mwaana oodduddumadha vade, podi wera mubuwelo wewa ori wokwerebeyeene. Podi wera aliwa ekwerebeye omuzimuni, mwaha wa dhithu dhowadda dhinereya muwari mwa elabo ela enathongiwa ni Saddana. Woona dhiri ndo, enohoweleya wakavihera ale edduddumadhe omulabela Yehova wihina evenyihedhe nroromelo newa. Yotajhiha ya nimbila norimela, Yesu ohuwoga wi namakukula onokapatha nimbila nne narimele vano ohogolosela mburo viri mambila mamodha. Namakukula ole, ahinonga mudhidhi waaye ni kopolo dhaye avedaga ofwanya nimbila nne narimele. Teto, oliye ahinona wi nimbila nne, kanaakanne kopolo ofiyedha ohogolowa yeka. Ohiya eyenove, oliye ahinona wi enohoweleya othukulela nimbela nne mburo viri mambila mamodha.—Omwileri Lucas 15:4, 5.
15. Enahoweleya ddi werana wihina naakavihere ale edduddumadhe omulabela Yehova? (Osugwe kwaduru “ epano yathima vanlubale.”)
15 Podi ohoweleya ononga mudhidhi ni kopolo wihina naakavihere addibila amodha edduddumadhe omulabela Yehova wi egonjhihe makathamiho enafwanya. Teto, mwaha wa muzimu wootxena wa Yehova vamodha Bibliya ni malivuru, iyo podi wakavihera ale edduddumadhe omulabela Yehova ofiyedha aliwa okala ooliba omuzimuni ninga vakaleliwa. (Rom. 15:1) Ki nnakavihere ni makelelo baani? Namaholela mulogo athotho ohusoriha egi: “Amodha edduddumadhe omulabela Yehova, aliwa nuumala osakula omuhogolowela oliye, enomuhowela muthu wihina emusuzege Bibliya vamodha.” * Woona dhiri ndo, anamaholela mulogo yuuloba wi omuhudhige Bibliya muthu aaddumadhe omulabela Yehova, enohoweleya orumedha. Namaholela ola athotho ohusorihave egi: “Ole onamuhudhiha Bibliya aadduddumadhe omulabela Yehova, enohoweleya okala namalaleya owandaneyana ni oofwanelela ororomeliwa nnamaddumadha.”
OHAGALALA WODHULU NI WELABO YAVATI
16. Nnone addi wi nihikanna nikavihero naangero?
16 Iyo kaniri yekihu mmabasani owasayela ale edduddumadhe omulabela Yehova. Nihikanna nikavihero naangero. (Apo. 14:6) Dhoopadduwa dhowinjhiva dhinowoniha wi nihikanna nikavihero naangero. Motajhiha, Silvio a elabo yo Equador, numala okokora wihina alobele ni kopolo alobaga nikavihero wi ahogolowele mmulogoni, ahinathi omala alobela, anamaholela mulogo abili yahikokotha musiwo waaye. Anamaholela mulogo ale yahihagalala vanlubale mwaha wonvaha Silvio nikavihero ahoweliye wihina ahogolowele wa Yehova.
17. Murima wehu onakala avi naakavihera ale ekwerebeye omuzimuni?
17 Wakavihera ale ekwerebeye omuzimuni ofiyedha ohogolowela wa Yehova, winonihagalasa vanlubale. Ovuruwane awogile Salvador piyoneru anilibihera vanlubale wihina aakavihere ale edduddumadhe omulabela Yehova, oliye ohusoriha egi: “Malabo mamodha ginomoriha meeka mutori mwaha wohagalala. Winodhiha emwerumweru onona wi gihilaba vamodha ni Yehova gikaviheraga wihina noobowe nimbila nimodha narimele mwilaboni muna mwa Saddana.”—Atos 20:35.
18. Akala we ohuddumadha omulabela Yehova, okanne ebaribari yowi ddi?
18 Naari osukume otugumana ni nlogo na Mulugu, okanne ebaribari wi Yehova ohukanna nivano odhivela ni we. Oliye anafuna wi ohogolowele wa oliye. Mbwenye wafuna ohogolowele wa Yehova enohoweleya ohara thalo. Ninga babi ole anladdaniho osorihe Yesu, Yehova anafuna wi omuhogolowele. Oliye onna wujhehera wi ohogolowele mmadani mwaaye.
JHIBO 103 Os Anciãos São Um Presente de Jeová
^ paragarafu 5 Yehova anafuna wi ale edduddumadhe otugumana ni mulogo ehogolowele wa oliye. Iyo podi wakavihera athu edduddumadhe otugumana ni mulogo wi emurumeedhe conviti a Yehova anawoga egi: ‘Muhogolowele wa miyo.’ Muwari mwa yohudhera ela nnere osuza makalelo owakavihera ale edduddumadhe otugumana ni wapara mabasa oolaleya ofiyedha ohogolowela wa Yehova.
^ paragarafu 7 Mandina, mamodha ehimala osadduliwa.
^ paragarafu 15 Amodha eddumadhe omulabela Yehova, yahogolowela soofuneya wahudhiha epaddi ya Livuru Continue a Amar a Deus, obe amodha podi ovirisedha capitulu dha livuru Achegue-se a Jeová. Komisao ya mabasa ammulogoni binamuthoma namalaleya wihina amuhudhihege Bibliya ole aadduddumadhe omulabela Yehova.
^ paragarafu 68 YOTAPULELA YA FOTU: Addibila araru ohiyana enomukavihera ddibila anafuna ohogolowa. Aliwa enerana eyo, wodhela othapanya nuliye malabo matene ni omonelihamo wi Yehova vamodha ni mulogo ohukanna odhivela nuliye ni wodhela oonvuruwana pamadhene.
