1-2. Dhithu baani dhiri dhathima mwigumini mwa Anamona a Yehova?

ATENE iyo, kadda labo nnofuna​—otxeniha ni wakihedha onamathonga wa Mulugu. Iyo Anamona a Yehova nnodhiveliwa vanlubale owoga muselu dhendha. Muselu ndha sofuneya ni sathima! Ki othonga wa Mulugu ni otxeniha ndina naye dhithu dhoohiyana? Naari.

² Iyo nihisuza wi ndina na Mulugu nnofwanelela ofufuthiwa dhowoota dhatedhene nninkedhiwiwa. Ohiya eyeneve, nihoona wi enohoweleya woniha wi makalelo owubuwela a Yehova ni makalelo aye oothonga bapama. Bumwahaya, muselu ndha minli sathima mwigumini mwehu.

3. Ethu baani enavolowelavo wodhela ndina na Yehova?

³ Mwebaribarene wodhela ndina na Yehova, dhinovolowelavo dhatedhene dhinampatha Mulugu ehu ni makaleloya aye oothonga. Mudhidhi nnawogihu wi sathima ofufutha ndina na Yehova, nnawoga emodhave wi makalelo aye oothonga bapama. Ndina na Yehova nnaharana ni makalelo aye oothonga ninga namadhulu-dhulu akopolo dhatedhene.​—Osugwe kwaduru “ Epaddi ya muselu munlubale.”

4. Salmos 135:13 anawoga ddi wodhela ndina na Mulugu, ki makoho baani enakuliwe muwari mwa yohudhera ela?

⁴ Ndina na Yehova thavayekiwa. (Omwileri Salmos 135:13.) Mwahaya bwaddi ndina na Mulugu ndhe nikalege nathima? Winkedhiwa waaye wobajha wereyile alini? Mulugu anatxeniha ndina naye ni makalelo baani? Ki iyo nnaamukavihere ni makalelo baani obarela ndina naye? Makoho ala nnere wakuliwa muwari mwa yohudhera ela.

5. Athu amodha enikohesa ddi wodhela otxeniha ndina na Mulugu?

⁵ Yesu ohuwoga ethu yathima enahoweleya oloba naalobelaga. Oliye ohusoriha egi: ‘Ndina nenyu ntxenihiwe.’ (Mat. 6:9) Eyo enatapulela ddi? Otxeniha enatapulela osaddula ethu ofiyedha okala yapama, yoriya, ni yotxena. Athu amodha podi wikoha: Ndina na Yehova nihimala ofufuthiwa ni otxenihiwa, ki mwahaya  bwaddi egahoweleya otxenihave? Wihina nakule nikoho nna, enohoweleya wubuwela dhatedhene dhinapatha ndina.

6. Ethu baani enavaha thima ndina?

⁶ Ndina kahiyo madhuve baahi egumanihiwe mulivuruni obe enasorihiwa ni muthu di muthu. Kasugwa dhinasoriha Bibliya: ‘Yapamaya fukanna ndina napama ohiya dhoreela dhowinjhiva.’ (Pro. 22:1; Ecl. 7:1) Mwahaya bwaddi ndina nigasadduwa ofiyedha okala nathima? Ndina nnosadduwa ofiyedha okala nathima, mwaha mweddelo onovolowelavo. Ohiya eyeneve, enovolowelavo ele enubuwela athu wodhela mweddelo wa muthu yole othukunle ndina nne. Bumwahaya, makalelo ooleba ndina thi ndina​—obe osoriha makalelo ooromola​—kahiyo ethu yathima. Yathimaya siila: Mubuwelo onadha, athu yasugwa obe yiiwa ndina nno.

7. Athu enanyemula ndina na Yehova ni makalelo baani?

⁷ Athu enawoga dhowoota wodhela ndina na Yehova, aliwa enonyemula mweddelo wa Yehova. Vasogolova, enosayela makalelo ootakaliha ndina naye. Onyemula wobajha wodhela ndina ni dhowera dha Mulugu, wereyile nuumala opaddusiwa athu. Nnere woona ethu nnahudherihu wodhela onyemuliwa wa ndina na Yehova.

8. Adawu ni Eva aanonile ethu baani, ki makoho baani ekumelele?

⁸ Ohiya ononave baahi ndina na Yehova, Adawu ni Eva ahinona ebaribari yathima wodhela mwinya a ndina nna. Motajhiha, aliwa yahinona wi Yehova di Mpaddusi. Ohiya eyo, aliwa yahinona wi dhatedhene dhanniwana​—egumi, parayizu yoriya ni wiwanana wanniwana mmodha ni mukwaye​—waadhele wa Yehova. (Gén. 1:26-28; 2:18) Ki Adawu ni Eva yahilabihedha mubuwelo wewa wologomana wihina ependde dhatedhene aavahile Yehova? Aliwa yahoniha odhivela ni omutamalela Yehova? Dhowakula dha makoho yala, dhikumelele aliwa nuumala wehiwa ni mwiddani a Mulugu.

9. Ninga munawogela Génesis 2:16, 17 ni 3:1-5, Yehova aamwaddele ddi Adawu ni Eva, Ki vano Saddana aaviriganihe avi?

⁹ Omwileri Génesis 2:16, 17 ni 3:1-5. Alabihedhaga nowa Saddana ahimukoha Eva: ‘Ebaribarene Mulugu disorihile wi kahiyo ojha dhowima dhatedhene dhiri mmunddani muna?’ Nikoho nna nahikoya woota wanna ndibwi.  Mwebaribarene dhawogile Mulugu amwaddelaga Adawu ni Eva, yatapulela wi aliwa yahikanna oneti wojha dhowima dhamuthanko dhatedhene, mbwenye yahiwadelihiwa ojha dhowima dha muthanko mmodha. Podi wera mundda wa Edeni mwakala Adawu ni Eva, mwahikala muthanko dhowinjhiva dhavaha dhowima. (Gén. 2:9) Mohanganyedha, Yehova doovaha. Mbwenye oliye ahawadeliha ojha dhowima dhamuthanko mmodha baahi. Nikoho na Saddana nahiviriganiha muselu dhatedhene. Saddana afuna oonihe wi Yehova kahiyo Mulugu oovaha. Podi wera Eva ahiikoha: ‘Mulugu anagiwadeliha ethu yapama?’

10. Saddana nkedhile addi ndina na Mulugu, Ki eyo etotile makathamiho baani?

¹⁰ Mudhidhi yole, Eva oomwiwelela Mulugu. Eyo enowoneya wodhela makalelo amwakuliye Saddana. Oliye ahivirisedha madhu mamodhave aawogile Mulugu, ni ahawenjhedhedha wera nihiwadelihiwa ohidda muthanko ole. Oliye ahinona ele awogile Mulugu wi ohiwelela madhu ale, yere wathukulela okwa. Mbwenye Saddana wera: ‘Ebaribarene kamunakwa.’ (Gén. 3:2-4) Saddana ahiddemuleliha oratha waye. Oliye ahiremula ekokonko yowinkedha ndina na Mulugu, yakala ninga oliye era omwadela Eva wi Yehova maliba woota. Fivenvo Saddana vibanjheye okala Ddiyabo, obe maliba winkedha. Eva ahilekethiwa mohihiyedhedha, ofiyedha omurumedha Saddana. (1 Tim. 2:14) Vadhuluva, omuroromela bure saddana omwihiya Yehova. Eyo yahimuthukulela osakula ethu yabure opitha dhithu dhatedhene​—ohimwiwelela Yehova. Nuwindo, oliye obajha ojha, yowima ele awadelihe Yehova. Vasogolova, onvaha Adawu.​—Gén. 3:6.

11. Ethu baani yafwanelele werana Adawu ni Eva?

¹¹ Kubuwela vang’ono ethu yafwanelele werana Eva mudhidhi amwakulaga saddana. Yahakale ninga oliye akunle ayi: “We, miyo kagunonne, mbwenye gimunonne papaga Yehova. Miyo ginamodhivela oliye ni ginororomela wi dhatedhene dhinna Adawu ni miyo anivahile di Yehova. We oraani oomuwoga obure Yehova? Ogivenyelevo!” Aherena ndo, mohanganyedha Yehova ere ohagalala vanlubale mwaha womwiwa mwanaye mwihiyana onna odhivela nuliye ni anamuroromela awogaga madhu yala! (Pro. 27:11) Mbwenye Eva kaanna odhivela wororomeleya wodhela Yehova. Mwaha wa yeyo, Adawu ni mwariye kiyandile wakihedha ndina na babi ewa.

12. Saddana ohenlemo ni makalelo baani wanganyedha, mmubuweloni mwa Eva, ki ethu baani eherilena Adawu ni Eva?

¹² Ninga nonilihu, ethu yoroma erilena Saddana fuhela wanganyedha mmubuweloni mwa Eva. Oliye ahimuthukulela Eva onvanya muthu anithaniwa Yehova. Vasogolova, Adawu ni Eva kiyakihedhe ndina na Yehova newene kiyakihedhe mweddelo wa Yehova wodhela dhowoota dha Ddiyabo. Aliwa yahenya ogonjhihiwa ni Saddana ofiyedha omurugunuwela baabiwa ninga oliye. Peeno Saddana onnave onyemula ni winkedha ndina na Yehova. Ale enarumedha dhowoota  dha Saddana, kinaliba olekethiwa ofiyedha okoodda onamathonga wowogowa wa Yehova.

13. Ninga munawogela Ezequiel 36:23, muthenga ori mBibliyani mutomaya buvi?

¹³ Yehova nuumala woona onyemuliwa waaye, ahikuna moono okulawene omaala? Naari! Bibliya atene onowoga dhenerihedha Yehova wihina atxenihe ndina naye, wodhela woota owogiwe mmunddani mwa Edeni. (Gén. 3:15) Mwebaribarene, musolo wa muthenga wa Bibliya atene mogwaddela podi osorihiwa: Yehova anolabihedha Omwene onaadhena murenddele velaboni yavati yoyo onathongiwa ni mwanaye wihina atxenihe ndina naye. Muthenga dha mBibiliyani dhinonikavihera wonelamo Yehova anaande addi otxeniha ndina naye.​—Omwileri Ezequiel 36:23.

14. Obajha mudhidhi yole wereye ohiwelela mmunddani mwa Edeni, Yehova anoniha ni makalelo baani wi onotxenihave ndina naye?

¹⁴ Saddana anolabihedha murako dhatedhene wihina asaddule efunelo ya Yehova. Mbwenye kavo murako onowedha ononga efunelo ya Yehova. Bibliya onowoniha dhego dhinerana Yehova wihina oonihe wi kaavo muthu analigana nuliye. Mohanganyedha ohiwelela wa Saddana ni athu atene enamukavihera oliye, winomukuula Yehova. (Sal. 78:40) Mbwenye Yehova onowanda ogonjhiha onyemuliwa wula ni thotho, nuuvilela vamodha nuupama. Ohiya eyeneve, oliye anowoniha kopolo dhaye ni makalelo ohiyana-iyana. Teto, odhivela waaye winowoneya ni dhowera dhaye. (1 João 4:8) Yehova kanahiyege otxeniha ndina naye.

15. Peeno Saddana onanyemula ndina na Mulugu ni makalelo baani, ki eyo enaapupurusa addi athu?

¹⁵ Peeno Saddana anonyemulave ndina na Mulugu. Oliye anafuna athu yanganyedhege akala Yehova dakopolo, dapama, doodhivela obe naari. Motajhiha, Saddana onowilibihera wihina athu yubuwelege wi Yehova kahiyo mpaddusi. Naari athu ekanne ebaribari wi Mulugu ohukalawo, Saddana onowavaha mubuwelo wowi Mulugu vamodha ni malagano aye kahiyo owogowa ni boorusa wahariha. Oliye onofiyedha wasuziha athu wihina Mulugu  dabure ni onowawoniha goyi athu othukuthani wa motho. Athu yarumedhaga woota wula, podi wera enofiyedha​—okoodda Omwene wowogowa wa Yehova. Ofiyedha omakuthulo waaye, Saddana anerege madhowave anyemulaga ndina na Yehova, teto, onerege madhowave aalekethaga athu wihina ekale epaddi yaye. Ki Saddana, dhaye dhinere omweddela pama?

16. Ethu baani enawedha werana we, mbwenye Adawu ni Eva ehandiliwa werana?

¹⁶ Naari nigari athu oohilogomana, Yehova anonivaha ofuru wolupelamo wihina ntxenihe ndina naye. Mwebaribarene we podi werana ele eherilena Adawu ni Eva. Naari nigari mwilaboni mudhanle athu enanyemula ni enaruwana ndina na Yehova, we ohukanna ofuru wokala epaddi ya Mulugu ni owoga ebaribari wi Yehova dhotxena, dowogowa, dapama ni dodhivela. (Isa. 29:23) Teto, we podi woniha wi onokavihera Omwene wa Mulugu. Wakavihere athu wonelamo wi makalelo oothonga a Yehova bowogowa. Wakavihere wonelamo wi Yehova baahi dinaavahe athu atene ohagalala ni murenddele.​—Sal. 37:9, 37; 146: 5, 6, 10.

17. Yesu alaleyele ndina na Mulugu ni makalelo baani?

¹⁷ Naakihedhaga ndina na Yehova, nnerana ele erilena Yesu Kiristu. (João 17:26.) Yesu ahilaleya ndina naababe. Oliye kaalabihedha baahi ndina na Mulugu, mbwenye owakihedha mweddelo wa Yehova. Motajhiha, mweddelo wafarizewu wowatonyihedha athu wi Mulugu dowopiha. Dhowera dhewa, dhakala ninga Mulugu dabure, dookukusa ni kahiyo anthebwa. Mbwenye mweddelo wa Yesu kuwari ndo. Oliye owakavihera athu wonelamo wi Mulugu doovilela, doodhivela, doolevelela ni ekalelo yaye sowezeya. Ohiya eyeneve, oliye otajhiha pamadhene dhikalelo dha baabe. Mwaha wa yeyo, athu yowonelamo pama, ebaribarene Mulugu baani.​—João 14:9.

18. Makalelo oovanyiha woota ni onyemuliwa wa Yehova baavi?

¹⁸ Iyo podi ovanyiha winkedhiwa ni onyemuliwa wa Yehova. Ki ni makalelo baani? Wodhela otajhiha dherana Yesu. Ninga oliye, iyo podi wawaddela athu ndhe niwalihu wodhela Yehova ni woniha wi Mulugu dapama ni doodhivela. Ninga Yesu iyo podi omutajhiha Yehova. Eyo enowandeya naari nigari oohilogomana. (Efé. 5:1, 2) Kadda labo, dhatedhene dhinerihu dhakaviherege athu omonelemo Mulugu baani  ohiya weragana dhithu dhabure. Nerana yeyo, nnotxeniha ndina na Mulugu, teto, nnowatxova athu ofiyedha woona wi ndina na Mulugu thotxena. Vasogolova, nnobarela ndina na Mulugu ofiyedha wakavihera athu osukuma mubuwelo wabure enniwana mmuruni wodhela ndina na Yehova. * Ohiya eyeneve, nnowoniha wi athu oohilogomana enowanda okalave oororomeleya.​—Jó 27:5.

19. Ninga munawogela Isaías 63:7, naasuzihaga athu yoluba yehu ekalege eevi?

¹⁹ Kasugwa ethu emodha yathima. Naasuzihaga athu Bibliya, nnasoriha baahi wi onamathonga wa Mulugu, obe, oliye baahi dinna oneti wothonga elabo yatene. Hee, eyo ebaribari. Mbwenye naari ekala yathima osuziha malamulo a Mulugu, yoluba yehu ekale wakavihera athu okanna odhivela ni Yehova babi ehu ni okala oororomeleya nuliye. Bumwahaya, malabwene wasuzihaga osorihege dhikalelo dhapama dha Yehova. Wakaviherege athu wonelamo ndina na Yehova, nnamutonyihedha muthu baani. (Omwileri Isaías 63:7.) Naasuzihaga ni makalelo yala, nnere wakavihera athu okanna odhivela ni Yehova. Vasogolova, aliwa enerege ofunelemo okala oororomeleya nuliye ni okala oowiwelela.

20. Ethu baani nnafunihu osuza muwari mwa yohudhera enaharela?

²⁰ Nerena ethu baani, wihina mweddelo wehu ni makalelo ehu oosuziha ethithimihe ndina na Yehova, ofiyedha athu okalela murogo womulabela Yehova? Ohudhera winaharela winere wakula nikoho nna.