IYO ATENE nnorumedha wi nnakala ‘malabo ookuthula’, Yehova onoweddiha ni onosapela nlogo naye epaddi yomuzimuni. (2 Tim. 3:1) Iyo nnakala avi Yehova anivaha dholaga? Malabo nnakalihu enakala ninga amwaana Ezarayeli egari mwiddeddereni. Aliwa yiiwa wobiwa wa palaza, yohoweleya wi yerana ethu-sithu.

Yehova ahimuruma Moses wihina asasanye palaza biili dha parata dhobulungiwa ni maritelo. Palaza ndha, dhalabihedhiwa wafiya mudhidhi wo wawithana ‘amwaana Ezarayeli ni ovaha yintelelo akala ohufiya mudhidhi womukunga akampamento muxa.’ (Núm. 10:2) Yohoweleya Anamakutha wooba palaza ni makalelo ohiyana-iyana wihina nlogo na Yehova nnone ethu yahoweleya werana. (Núm. 10:3-8) Peeno nlogo na Mulugu nnovahiwa dholaga ni makalelo ohiyana-iyana. Makalelo ala enonubusedha wobiwa wa palaza mudhidhi wamwaana Ezarayeli. Nnafuna nihudhere yeyo ni makalelo mararu: Nithaneliwa mutugumano munlubale, anamaholela mulogo yithaniwa wihina exagihiwe ni wafiya mudhidhi wowakela dholaga dhixa dhinakosa epaddi ya dhohudhera dhinakelihu mmulogoni.

Mwiddeddereni, nihimo naamwaana Ezarayeli yamukunga akampamento seresere ya tabernakulu, mbwenye oogawiwene makuru-makuru ofiyedha makuru mannayi. Malabo mamodha, Yehova oothonga wihina etugumane ‘mulogo watene’ omadhelo nduwa wa tabernakulu. (Núm. 10:3) Wafiya mudhidhi wo wawithana mahimo, anamakutha yowoba palaza dhaabilidhene. Amwaana Ezarayeli atene yowanda wonelamo mobelo wa palaza wi ohufiya mudhidhi wotugumana. Ale yamwaddamele tabernakulu, yakala arajhi ofiya. Mbwenye ale yakala wolapela ni tabernakulu yowedda mukwaha wihina efiye. Dhiruse dhihiruse, Yehova oojhehera wi atene edhe etugumane wihina evuruwane dholaga dhaye.

Peeno iyo kanintugumana mutabernakulu, mbwenye nnosokiwa wihina ntugumane ni adhari a Mulugu. Nnowerana eyo, wafiya mudhidhi wamusonkano wa malabo mararu ni mutugumano dhimodha dhavayekiwa, wengo nnakelihu dholaga dhathima. Wapela elabo yatene Anamona a Yehova enamwakela porogarama mmodhave. Adhari atene a Yehova enarumedha osokiwa wula, enokosa epaddi ya nikuru ninlubale namurenddele. Amodha enowedda olenddo wolapela, amodha olenddo wokwivela. Werana ethu-sithu wihina noone mutugumano ndha dhinlubale, ethu yathima mwigumini mwehu.

Ki addibila ale enakala othemba obe wolapela ni mburo dhinereya mutugumano ndha dhinlubale? Mwaha wa tekonolojiya, athu owinjhiva podi woona mutugumano ndha ninga niri mburo mmodhave. Moladdaniha, Beteli yo Benin numwakela ddibila a nikuru nolamulela aadhele wawaredhela, yahilabihedha tekonolojiya wihina ewedhe omoona porogarama mmodhave ni luwani yo Niger enakala vaari va eddeddere yo Saara, niithaniwa Arlit. Addibila ni  arogola vamodha ni anamahudhera yamoonile porogarama ola, yahakwana 21. Naari egaari wolapelawene, aliwa yahikosa epaddi ya nikuru naathu owakwana 44 131 yatugumanile wihina yoone mutugumano ola munlubale. Ddibila dhaala ohuleba egi: “Nnotamalela ni murima wehu watene, mwaha omoona porogarama ola. Eyo enowoniha wi nyu muhukanna odhivela ni iyo!”

Anamakutha yooba palaza modha baahi, ‘apogo yasogolela matxikwi ni matxikwi amwaana Ezarayeli’, yodhowa ovolowa musasa wa mutugumano. (Núm. 10:4) Aliwa yavolowa yooxagihiwa ni Moses. Dhoxagiha yakeliwa dhowakavihera yaparaga mabasa ewa owasamalela mahimo. Ahakale ninga ari we, mohanganyedha yobiwa palaza modha, werege werana ethu-sithu wihina odhowe omutugumanoni.

Peeno ‘apogo’ baale enaholela mmulogoni. Aliwa kinasamalela mambila a Mulugu ni makalelo abure. (1 Ped. 5:1-3) Mbwenye aliwa enowilibihera wihina esamalele mambila a Mulugu ni makalelo apama. Mwaha wa yeyo, yithaniwa wihina exagihiwe ni Escola do Ministério do Reino, aliwa enoyawo mowaguva. Wafiya mudhidhi yoyo, anamaholela mulogo enoxagihiwa wihina yeddihege muselu dha mmulogoni ni makalelo apama. Aliwa yaparihedha mabasa dhoxagiha, mulogo onowunnuwa epaddi yomuzimuni. Akala kunakannege ofuru woya eskola yela, podi wera onna otxoveya naale exagihiwe ni eskola ela.

Malabo mamodha anamakutha yowoba palaza ni ndhu nogurumela. Amwaana Ezarayeli yiiwa ndo, yahinona wi ohufiya mudhidhi wihina nimaruwe neddege olenddo nakalege mburo mmodhene. (Núm. 10:5, 6) Amwaana Ezarayeli yatama ni makalelo oodhuwanyeya, teto, wiwegeredha wihina emaruwe weedda olenddo yaari mabasa manlubale. Malabo mamodha podi wera amodha yoona ninga ethu yorusa vanlubale otamela mburo mmodhene. Ki mwahaya bwaddi?

Podi wera yofiyedha wubuwela wi wobiwa wula wa palaza, winobiwa bure-bure. Ohiya eyenove, malabo mamodha ‘murabo wookala wowimeleene wambela mahiyu ofiyedha mambesi.’ Malabo mamodha mudhidhi wootama womala ‘malabo menli’, ‘mweri mmodha’ obe ‘mudhidhene.’ (Núm. 9:21, 22) Ki amwaana Ezarayeli akampamento envenyihile dila ngasi? Livuro na Números, kapitulu 33 nnawoga wi amwaana Ezarayeli ehitamela mburo dhohiyana-iyana dhowakwana 40.

Malabo mamodha amwaana Ezarayeli yamukunga akampamento vamuruntini — ela yaari ethu yapama muwari mwa ‘eddeddere ele enlubale ni yowopiha.’ (Deut. 1:19) Naari egarive ndo, yaari ethu yoweha vanlubale. Mwaha wa yeyo, amwaana Ezarayeli egahubuwela wi otama mburo yola wapama, kahiyo mubuwelo wapama.

Wafiya mudhidhi womaruwa wihina mahimo yambela olenddo, amodha yogana amaruwa podi mudhidhi wewa womaruwa ohunafiye. Atene yiiwa palaza ni ndhu nogurumela, kiyamaruwa mudhidhi mmodhave. Yobiwa palaza dila yobajha, namaruwa naali nihimo nakala omadhelo wa nduwa, okudda Juda, Issacar ni Zebulão. (Núm. 2:3-7; 10:5, 6) Vano, mahimo mararu yabajha weedda, anamakutha yowoba palaza dila yanabili ni ndhu nogurumela. Eyo yaari yintelelo wihina mahimo mararu oomayelo nduwa naliwene ebajhe weedda. Anamakutha yeresana ndo ofiyedha akampamento atene okala mulenddoni.

Podi wera mmulogoni mwa Yehova mwakumelela mweddelo muxa, enorusa orumedha. Podi wera onowabihaga ohona oriya mwaha wa masadduwo ohiyana-iyana wahajheheriwe. Podi wera onowabihaga okala ohagalalene ni mweddelo wa mmulogoni ofiyedha ogana wihina ohusadduliwe. Obe ori oogomeene mwaha wowiwelela ni ohara masadduwo, obe naari, ohuvira mudhidhene wihina olemela mweddelo muxa munikuruni mwa Yehova. Naari dhigarive ndo, nilibihera ohara makalelo nnonihu wi bapama Mulugu anere onivaha mareeliho.

Malabo a Moses, Yehova ohaweddiha mwiddeddereni matxikwi ni matxikwi aalobwana ni aahiyana vamodha naahima. Ahere Yehova ahiya, wasamalela ni waholela aliwa kiyakalawo. Malabo yala ookuthula, Yehova dinaneddiha omuzimuni. Nnikavihero naye, iyo kannokalawove baahi mbwenye nnothukuwa vanlubale! Bumwahaya, wiwa yobiwaga palaza, watajhihege amwaana Ezarayeli oororomeleya: orumedhe mowaguva!