“Ddibilaga ambeliye owana ni miyo, gahimwihidda mmelo oroma omurigindda. Gafunime yari ompa baahi.”​—Paulo.

“Vaade muthu agiliga vang’ono baahi, kavajheya ntaba. Goopwesa dhatedhene goonimi nikome naaga.”​—Marco.

Podi wera iyo kanerilena dhendha. Mbwenye kadda muthu wa iyo ohukanna mudhidhi, oni wanfwanya, wivanya enakala ethu yorusa. Eyo enereya mwaha wokala athu evalihiwe othega wa Adawu ni Eva. (Rom. 5:12) Athu amodha yaligiwa enowarusa wivanya, ninga empadduwele Paulo ni Marcos. Amodha enowarusa mwaha mubuwelo wewa. Yaligiwa eniwona ninga kinna thima mwaha wa dhithu dhabure yerihedhiwa mundduli. Teto, amodha kinawedha owanana mararuwo, olezela ni ojha murombwe dhoviriganiha ogogo.

Ale ehinawedha ovanya mubuwelo wewa, dhofuna ni dhowera dhewa podi wawototela makathamiho mwigumini mwewa. Mbwenye eyo podi ohupadduwa ni iyo. Ni makalelo baani? Wodhela wunuwiha wivanya wehu. Wihina nikaviheriwe wodhela muselu yola, ohudhera wula winere wawaakula makoho mararu: (1) Wivanya ddiniyani? (2) Mwahaya bwaddi ekala ethu yofuneya? (3) Nnande addi okanna ekalelo ela? (Gál. 5:22, 23) Namala nnere woona ethu baani enahoweleya werana, noonamo wi malabo mamodha nnovirganihesa wivanya.

Muthu oniivanya kannerana ethu mwaha wotujiwa. Mbwenye anoparela nlumi naye wihina ahiwoge ni anerena ethu enamutakalela Mulugu.

Yesu ohutonyihedha ddiniyani wivanya. Bibliya onosoriha egi: ‘Aruwaniwaga, kaakula nuruwana, atabasiwaga, kawoopopiha, mbwenye dhatedhene apeleka wa ole anatoriha mowoogowa.’ (1 Ped. 2:23) Mudhidhi Yesu anyemuliwaga ni akomeliwaga vaamjhikwani na goyi ni amwiddani, ahoniha wi oowivanya. (Mat. 27:39-44) Ohiya eyeneve, oliye numala owoga mwaha waaye wa vathaddo mutempulu, ahoniha wi owivanya, anamasogolela Gereja numwiwananela wihina emmage. (Mat. 22:15-22) Mudhidhi ajudewu efunaga ompwesa ni mabwe, ahoniha wi dowivanya! Ohiya wahogolosela obure ‘Yesu ahipiita ofiyedha okumela ode wa mutempulu.’​—João 8:57-59.

Iyo podi omutajhiha Yesu. Murumiwi Peduru ohuleba egi: ‘Kiristu ohutabuwa mwaha wa nyu, ohuhiyedhani mweddelo wihina muharege manyalo aye.’ (1 Ped. 2:21) Naari nigari athu oothega, iyo podi omutajhiha Yesu okala owivanya. Ki mwahaya bwaddi eyo ekala ethu yofuneya vanlubale?

Wihina nirumwedhiwe ni Yehova, enohoweleya okala owivanya. Akala niromile omulabela Yehova  kale, iyo podi oyelela wandana wehu nuliye, akala makalelo ehu oowoga obe dhowerana dhehu dhinowoniha wi kaniri owivanya.

Kasugwa yotajhiha ya Moses. Mudhidhi yole, kariwo muthu oopwaseya aligana nuliye. (Núm. 12:3) Dhahivira yaka dhowinjhivadhene oliye oonihaga okala muthu opwaaseya ni amwaana Ezarayeli naarive aliwa empambihaga, mbwenye wahifiya mudhidhi dhaye omurusa. Oliye ahifiyedha onyanyuwa bure amwana Ezarayeli numpambiha dila dhowijhiva mwaha worameya manjhe. Oliye owoga nunyanyuwa vari vaathu yale wera: ‘Vano mwiwe, avuruvuru nyo! Iyo nnafuna naakumihe manjhe valibweni vala wihina nuuvaheni?’​—Núm. 20:2-11.

Moses ahiviganiha wivanya. Oliye kaamuthithimihe Yehova mwinyawa ofuna wavaha manjhe amwaana Ezarayeli. (Sal. 106:32, 33) Mwaha wa yeyo, Yehova kaamwenyile Moses ovolowa elabo apaganyiye amwaana Ezarayeli. (Núm. 20:12) Ofiyedha okwa waaye, podi wera Moses owikoha: Mwahaya bwaddi gidhe gihiivanyege? Gerela ddi?​—Deut. 3:23-27.

Nnahudheravo ethu baani? Akala niri mwibaribarini yaka dhowinjhivadhene, nilibihedhe wihina niwogege ni nriho naale enanerela ethu enanitakalela obe nasumululiwaga ni makalelo abure. (Efé. 4:32; Col. 3:12) Mwebaribarene nuluvalaga ovilela wehu winovuguwa. Mbwenye nimubuwelege Moses. Iyo kannafuna otakaliha webedha wehu niromilihuna kale mwaha wohiivanya. Ki ethu baani enahoweleya werana wihina nikanne ekalelo ela yathima?

Olobele, olobaga muzimo wotxena. Mwahaya bwaddi? Mwaha wivanya yowima ya muzimu wotxena wa Mulugu, teto, ale enamuloba Yehova enovahiwa yowima ela yamuzimu. (Luc. 11:13) Ni muzimu waaye, Yehova podi onivaha kopolo nnahowelihu. (Fil. 4:13) Muzimu wa Yehova, ononikavihera okanna odhivela winanivaha kopolo yokala owivanya.​—1 Cor. 13:5.

Orabele ethu-sithu enaagujhule makalelo awo owivanya. Motajhiha, kahiyo osugwaga dhithu dhabure mu websites. (Efé. 5:3, 4) Mwebaribarene, enohoweleya orabela dhatedhene dhinanithukulele werana ethu yabure. (Pro. 22:3; 1 Cor. 6:12) Motajhiha, muthu ononne wi ohukanna ekalelo yofuna werana mararuwo, enohoweleya oliye orabela malivuru ni osugwa vidiyu dhinawoga omwenddi ni ogaya.

 Dholaga nda podi orusa ohariha. Mbwenye nilibihera, Yehova anere onivaha kopolo nnahowelihu wihina naande olabihedha. (2 Ped. 1:5-8) Oliye anere onikavihera ovanya dhowubuwela dhehu, makalelo ehu oowoga, ni dhowera dhehu. Paulo ni Marcos esorihiwe mundduli, yeyo ehawereyela. Aliwa ehisuza wivanya ni okurumuwa. Kamubuwele ddibila eddihesa karo oonyanyuwene ni awobelaga owali amotorista amodha murampani. Ethu baani erilena oliye? Oliye ohusoriha egi: “Miyo godidela olobela malabo matene, gosuzesa muselu dhinawoga wivanya, ni okoya mmurimani dholebela dhathima dha mBibliyani dhinasoriha wivanya. Naari dhigavinre yaka dhowingivadhene gilibiheraga, vati vasa ginowoga meeka madhu ala: ‘Peeno yoluba yaga omaala.’ Goona wi gihikanna olenddo, gineresa omukuma mambesene miyo omukomelamo, karo dhihinathabwe winjhiva murampani. Gerana ndo, ginowibarela onyanyuwa.”

Malabo mamodha nnoviriganiha okala owivanya. Eyo yapadduwa, podi okanna manyazo olobela wa Yehova, mbwenye enofwanelela olobela wa Yehova nimulobaga wihina anilevelele. Enohoweleya werana yeyo dila dhowinjhivadhene ni mowaguva. Enohoweleya olobela wa oliye nipigireyaga wihina anilevelele, ni anikavihere ofiyedha oselela werana yothega emodhave. (Sal. 51:9-11) Werana ndo, Yehova newene kandha apwaza nikurumuwelo nnalobiwe ni murima watene. (Sal. 102:17) Murumiwi Juwawu, ohunubusedha wi nikame na Yesu mwaana a Yehova, ‘nnonisuwa dhoothega dhehu dhatedhene.’ (1 João 1:7; 2:1; Sal. 86:5) Kahiyo odduwala wi Yehova ahawaddela adhari aye dila dhowinjhivadhene wihina elevelelanege mmodha ni mukwaye. Mohanganyedha Yehova onere onerela yeyo mwigumini mwehu.​—Mat. 18:21, 22; Col. 3:13.

Mudhidhi Moses nuviriganiha woniha wivanya mwiddeddereni, Yehova ahimusinyusa. Naari dhigarive ndo, Yehova ahimulevelela. Madhu a Mulugu enomuwoga Moses wihina oliye tajhiha yapama yamuthu onna nroromelo. (Deut. 34:10; Heb. 11:24-28) Yehova kaamwenyile Moses ovolowa elabo ele apaganyiliye, naari dhigarive ndo, oliye anere odhiveliwa avahiwa ofuru wowakela egumi yohimala mParayizu elabo yela yavati. Ni iyowa nnere ohagalala vanlubale nilibihera okala owivanya.​—1 Cor. 9:25.