MAHEBEREWU egaari elabo yothomeliwa, yaka yambela omagomihero wa Setembro ni omambelelo wa Outubro, mudhidhi yegeredhiwa munddadhiwa wihina yambele waala.

Athu yowanda onona malabo enakanna mweri wantero, wodhela malabo enalegela mweri, onakanna malabo 29 obe 30. Ni yowanda onona malabo enakanna yaka yantero wodhela nduwa. Mbwenye malabo yaafwanyiwa esugwagwa mudhidhi onalegela mweri, yari ookwiva opitha malabo enalegela nduwa. Mwaha wa yeyo, yohoweleya wafwanya makalelo mamodha wihina yawiwananihe makalelo ala aameli wi yande okanna malabo eebaribari. Eyo yowereya yawenjhedhedhagawo malabo mamodha osongolowa. Malabo mamodha, kadda mweri yowenjhedhedhawo nlabo nimodha ehinambele yaka exa. Ni makalelo yala kalendariyu owiwanana ni nsaka nolima ni nohadda.

Malabo a Moses, Mulugu ahiwoga ni nlogo naye wihina yaka yambelege mweri wa Abibi, obe Nisa, obe nere nsaka noridha. (Êxo. 12:2; 13:4) Mweri yola wa Nisa yokalawo mathanga yiwanana ni ohaddiwa wa sevada. —Êxo. 23:15, 16.

Muliba osanyiha muselu Emil Schürer, mulivuruni mwaye ohuleba egihina: Wihina muthu anone akala enohoweleya wenjhedhedha kadda mweri nlabo nimodha obe naari, kayarusa. “Mathanga a paskwa, yereya labo na (14 a Nisa), mweri wamala okuma, eyo yereya omambelelo wa nsaka noridha, mudhidhi wa ekinosiyu [obe nere labo namutana ni namahiyu olegelawa were oligana] . . . Kito akala omagomihero wa yaka, yowona wihina Paskwa ooharela aamorele mudhidhi wa ekinosiyu ohunafiye? Yereya ndo yaka yele, mweri mmodha yowenjhedhedhawo labo nimodha.”

Anamona a Yehova enamuhara there yola, yegi efwanye labo nnubuweliwe okwa wa Yesu, anereya nsaka noridha analiganyedha labo na 14 mweri wa Nisa kalendariwu Ebarayiko. Mulogo dhelabo yatene, enowaddeliwa mutanene labo nna nihinafiye. *

Amwaana Ezarayeli yanda addi onona wihina mweri ola ohumala ni ohambela mweri mmodha? Peeno dhithudha dhihimala okweyihiwa, enahoweleya fumusugwa kalendariyu awo obe telefonawo. Mbwenye kale, kadhakwenye ndala.

Nsaka namutokora, mweri dhatedhene dhakanna malabo 30. (Gén. 7:11, 24; 8:3, 4) Mbwenye vasongolova, nuufiya mudhidhi wamwana Ezarayeli mweri dhatedhene okannaga malabo 30. Ni kalendariyo Ebarayiko, mweri dhatedhene dhambela yoona mweri okumaga. Mowindala, kadda mweri wokanna malabo 29 obe 30.

Malabo mamodha, Davidi obe naari Jonata, ehiwoga wodhela mambelelo a mweri yegihina: ‘Mangwana mweri muxa.’ (1 Sam. 20:5, 18) Ni makalelo yaala podi wera mudhidhi wa Davidi, yowanda onona malabo yanna mweri mutanene. Amwana Ezarayeli yanona addi wihina nna labo nobajha na mweri muxa? Iyo podi ofwanya muselu dhimodha dhiniwanana ni muselu yola ni Mishnah anawoga malamulo owinjhiva ni mweddelo wahara maJudewu. Enanonelihamo wihina aJudewu nuhogolowa oBabiloniya nikuru na onamathonga winlubale nakudda Juda thanna mutholo wosakula labo nenno. Yakwana malabo 30 a mweri ndha mitanu nabili, yoworeya mathanga owinjhiva sinedriyu yatugumana. Alobwana ala basakula nlabo nnambela mweri woharela. Aliwa yamuhara there bani wihina esakule nlabo nna?

Alobwana amodha yakala mburo wootama woJeruzale yosugwa odhulu, wihina yoone akala ohambela mweri muxa. Aliwa yowawaddela mohulegela alobwana aatene yakala oSinedriyu. Vano yahidda ebaribari wihina mweri muxa ohukuma, aliwa yowawaddela athu atene wi mweri muxa ohambeliwa. Ki akala odhuluwa wahikala murabo ni anamasugweraya kiyanda onona wi mweri muxa ohukuma? Yereya ndo, aliwa yothoma wihina mweri yole enniwana okanne malabo 30, mowindala mweri muxa were wambela.

 Mishnah anihina, egi Sinedriwu awaddele amwaana Ezarayeli wihina mweri muxa ohukuma, aliwa yohiddiha motho mburo dhootama dhakala waddamela oJeruzale. Murudda dhamwana Ezarayeli mootho dhahiddihiwesa wihina ovuwihe muthenga. Malabo amundduli, aliba ovaviha muthenga yolabiheriwa wihina evavihe muselu mmodhave. Ni makalelo yala, athu aatene yakala oJeruzale, wiZarayeli ni murudda dhimodha dholapela yowanda onona wihina mweri muxa ohambela. Bumwahaya, aatene yowanda waajha mathanga ala mudhidhi mmodhave.

Podi wera tabela enafwanyeya musolo ola enere wukavihera woonelamo pama makalelo yakontariwa mweri ni kalendariyu Ebarayiko, mathanga, masaka ni woonelamo pama makalelo dhithu ndha dhiiwananiwa.