1. Ebaribari baani alembe mwene Salomawu va Eclesiastes 7:20?

 MWENE Salomawu ohuleba egi: ‘Kawo muthu oologomana elabo yela yavati anerana dhatedhene dhapamave ni ahinathegege.’ (Ecl. 7:20) Eyo ebaribari iyo aatene nili athu othega. (1 João 1:8) Bumwahaya iyo aatene nnohowela oleveleliwa ni Mulugu ni naathu amodha.

2. Mukwawo nuwulevelela murimawo waali aavi?

² Mwebaribarene onowubuwela nlabo nimodha onamukuulegiwe mukwawo. We wahikubanya vanlubale mwaha ele wawogiliwe ni wofuna wi muthapanyedhe muselule, bumwahaya odhe omulobege ni murimawo wamutene wihina mukwawo ulevelele. Waari avi mukwawo nuwulevelela? Murimawo wahikurumuwa ni wahihagalala vanlubale, kahi ebaribari?

3. Musolo ola nnahudhere ddi?

³ Iyo nnafuna wihina Yehova akale mukwihu nyingala-ginyingalevo, woona wi kanilogomane nlabo nimodha nnere werana obe owoga ethu enamukuule. Nnande addi okanna ebaribari wi Yehova anowenya onilevelela? Mwahaya bwaddi nigawoga wi olevelela wa Yehova ohunnuwa okwaranya makalelo nnalevelelihu athu amodha? Baani anafwanelela oleveleliwa ni Yehova?

4. Nnone addi wihina Yehova anowenya onilelevelela?

⁴ Madhu a Mulugu enonroromeliha wihina Yehova onofuna  onilevelela. Yehova ahiwoga ni Moses wodhela oliyene amulabihedhaga mungerwaye vamwangoni va Sinayi egihina: ‘Yehova, Yehova, Mulugu athagaraga ni oohaguvela onyanyuwa, oojheha, anna odhivela ohunamala ni eebaribari, anawooniha anamwinjhi odhivela ohunamala, analevelela dhothega ni dhoviriganiha.’ (Êxo. 34:6, 7) Yehova Mulugu apama ni athagaraga. Oliye onowenya walevelela ale enathwaruwa ni murima wamutene.—Nee. 9:17; Sal. 86:15.

5. Mowiwanana ni Salmos 103:13, 14, ethu baani anerana Yehova, mwaha woninona pamadhene?

⁵ Woona Yehova dinipaddusile ohunona dhatedhene wodhela iyo. Sotikiniha nakarati nubuwela wi Yehova ohunona dhatedhene dhinereya mwigumini mwa kadda muthu anakala elabo ela yavati. (Sal. 139:15-17) Oliye onowanda woona yothega yatene enivalihe makolwihu. Ohiya eyo Yehova ohunona dhithu dhatedhene dhinipadduwele mwigumini mwehu. Oliye ohunona makalelo dhinisadduliwa egumi yehu. Mwaha Yehova onona pamadhene emuthu yehu, eyo enomuthukulela oneeddela thagaraga. — Sal. 78:39; omwileri Salmos 103:13, 14.

6. Yehova onihile addi wi ohenya onilevelela?

⁶ Yehova ohoniha wi onofuna onilevelela. Yehova ohunona wihina iyo aatene nihithega ni nihithomeliwa okwa mwaha wa yothega. (Rom. 5:12) Iyo kaninna makalelo owawobola athu amodha obe egumihu yayothega nuukwa. (Sal. 49:7-9) Mbwenye Mulugu ehu odhivela ohoniha thagaraga dhaye wodhela werana ethu wihina anobole. Erilena ddi? Ninga enawoga João 3:16, Yehova ohumuruma mwanaye wihina adhe anikwele. (Mat. 20:28; Rom. 5:19) Yesu akwile wihina awobole athu aatene etheegile thabwathabwa ale enamuroromela. (Heb. 2:9) Wubuwele makalelo yampiliwa mbani Yehova omoonaga mwanaye anamudhiveliye okwaga mwamakalelo abure ni amanyazo. We onubuwela wihina Yehova agamuhiya mwanaye okwa ahere wi keenyile onilevelela?

7. Dhopadduwa baani biili dhinoniha wihina Yehova onofuna onilevelela?

⁷ MBibliyani mwiikala dhopadduwa dhaathu Yehova aaleveleliye. (Efé. 4:32) Podi wera muthu obajha onamubuweliye di mwene Manase. Muthu ola abure aherana dhothega dhowopiha. Oliye ahivolowela webedha  wowoota ni ahakongomedha athu amodha werana emodhave. Oliye ahakutha mukutho anaaye amulugu owoota. Oliye ahifiyedha opweha ekwamuthu yosema Mutempulu mwa Yehova. Bibliya anosoriha wodhela Manase wihina: ‘Oliye aherana dhithu dhowinjhiva dhamutakalela Yehova wihina ampihe mbani.’ (2 Cró. 33:2-7) Mbwenye Manase nuthwaruwa ni murima wamutene Yehova omulevelela. Yehova weenya wihina Manase ahogolowele omwene waye. (2 Cró. 33:12, 13) Podi wera mwene Davidi oliye ahimuthegela vanlubale Yehova. Ninga omukumiha mba mwadhamwinya ni okuthula nikame, mbwenye Davidi nuthwaruwa ni nuwonelamo yothega yaye, Yehova omulevelela. (2 Sam. 12:9, 10, 13, 14) Dhopadduwa ndha biili dhinowoniha wi Yehova onowenya onilevelela. Mowindala, ninga nnafunihu woona, makalelo Yehova analeveleliye athu enopitha makalelo nnalevelelihu athu amodha.

8. Mwahaya bwaddi nigera wi Yehova namatoriha apama wakwaranya anamatoriha aatene?

⁸ Yehova ‘Namatoriha eelabo yatene.’ (Gén. 18:25) Namatoriha apama anofwanelela aanone pamadhene malamulo. Iyo podi owoga wi Yehova namatoriha ologomana, mwahaya ohiya okalave namatoriha ehu duliyene awitile malamulo eli mBibliyani. (Isa. 33:22) Kawo muthu mmodha anonne ethu yapama ni yabure omukwaranya Yehova. Ekalelo emodha yapama enafwanelela okanna namatoriha sivi? Yapadduwa ethu enofwanelela ahanganyedhege dhatedhene dhereye ahinathome werana ethu-sithu. Bumwahaya nigera wihina Yehova namatoriha apama wakwaranya aatene, mwaha yapadduwa ethu oliye doobajha onona dhatene.

9. Yehova afunaga omulevelela muthu ethu baani ahinaddiwaliye?

⁹ Yehova kari ninga anamatoriha omwiilini, Yehova anakala murajhi onona dhinavolowelavo yapadduwa ethu. (Gén. 18:20, 21; Sal. 90:8) Anamatoriha omwiilini kinanda onona dhatedhene dhipadduwe ni dhinoniwa, mbwenye Yehova kari ndo. Oliye onowonelamo pamadhene dhinamuthukulela muthu werana ethu, ninga makalelo apaddusiwiye, makalelo aleliwiye, mburo winakaliye mowindala ninga mubuwelo waye ni emuthu yaye yatene. Ohiya eyo, oliye ohunona dhinubuwela murima wamuthu. Oliye onowonelamo pamadhene dhithu baani dhinnathukulela werana ethu-sithu. Yehova onowoona dhatedhene. (Heb. 4:13) Vano Yehova amulevelela muthu oliye ohunona dhatedhene dhinampaduwela muthu yole.

10. Mwahaya bwaddi nigawoga wi makalelo amatene otoriha a Yehova bowogowa? (Deuteronómio 32:4)

¹⁰ Yehova, Mulugu ahinna nsakulo. Makalelo aye otoriha bowogowa. Yehova amulevelela muthu, oliye kanasugwa mwiili waye, dhoorela dhaye, dhithu dhinonniye werana, newene akala muthuya doovuwa. (1 Sam. 16:7; Tia. 2:1-4) Iyo kannamuwaddihedha Yehova werana ethu, newene kannamuleketha. (2 Cró. 19:7) Yehova athoma ethu siyene, kavo anamwihiha. (Êxo. 34:7) Iyo kananganyedha wi kawo namatoriha apama omukwaranya Yehova, mwaha oliye ohunona dhatedhene wodhela emuthu Yehu ni dhithu dhinanipadduwela. — Omwileri Deuteronómio 32:4.

11. Mwahaya bwaddi nigawoga wi olevelela wa Yehova kawinaligana ni muthu mmodha?

¹¹ Dholebela dha Ebarayiku dhinowoniha wihina olevelela wa Yehova kawinaligana ni muthu mmodha. Dila dhimodha ehilabiheriwa  madhu Ebarayiku mowiwanana ni Disiyonariyu amBibliyani enathabwa olabiheriwa madhu ala wihina “etapulele makalelo Mulugu analeveleliye ale emuthegele. Madhu ala kinatapulela makalelo muthu oomwiilini anamuleveleliye mukwaye, enna manddile mohiyana ni Mulugu.” Yehova baahi, dinna kopolo yomulevelela muthu athegile mbwenye athwaruwile. Mbwenye olevelela wa Yehova onatapulela ddi wa iyo?

12-13. a) Ethu baani nnakelihu Yehova anilevelela? b) Nerege Yehova podi onisinyusa mwaha wa dhothega anileveleliye?

¹² Iyo noonelamo ni narumedha wi Yehova onilevelela, iyo nnokanna ‘malabo amurenddele. Egumihu enakala murenddeleve ni mubuwelo kunaninyemela. Ela ekalelo nnakannihuna ‘Yehova’ anilevelela. (At. 3:19) Yehova anilevelela anorumedha dila biili wandana wehu nuliye, okalaga ninga kannamuthegelege.

¹³ Yehova anilevelela kanadha anisinyusa mwaha wa yothega emodhave. (Isa. 43:25; Jer. 31:34) Yehova onovokedha dhothega dhehu wolapela nuliye ‘ndo ninga omadhelo nduwa ni omayelo nduwa wilapeliwana.’ * (Sal. 103:12) Napendda makalelo wunnuwale olevelela wa Yehova, mmurimani mwehu mwinodhala otikina nuutamalela. (Sal. 130:4) Mbwenye baani anafwanelela oleveleliwa ni Yehova?

14. Ofiyedha vala musolo ola nihudhere ddi wodhela olevelela wa Yehova?

¹⁴ Ninga nonilihu Yehova kanamulevelela muthu mwaha wothabwa othega. Nihoona makalelo Yehova ariye mpaddusi ehu, namatoriha ehu, wi duliye anivahile malamulo nnaharihu, wi oliye dinafwanelela othoma akala anofwanelela omulevelela muthu ole obe naari. Mbwenye dhithu baani dhinamuthukulela Yehova othoma omulevelela muthu?

15. Mowiwanana ni Lucas 12:47, 48, ethu baani Yehova anaathabwiye osugwa afunaga omulevelela muthu?

¹⁵ Ethu Yehova anathabwiye osugwa, fuunona akala muthu ole atheegile yapudhave. Yesu kakuwile muselu ola awogaga madhu enafwanyeya va Lucas 12:47, 48. (Omwileri.)  Muthu amukunga porogarama wihina erena ethu yabure anonniye wi Yehova onokoddiha, oliye annawerana yothega enlubale. Muthu ola podi ohufwanelela oleveleliwa ni Yehova. (Mar. 3:29; João 9:41) Ebaribari wihina iyo aatene niherana ethu nanonilihu wi sabure. Naarive dhigari ndo, iyo podi oleveleliwa? Hee! Eyo enowereya mwaha akala ethu Yehova anathabwiye osugwa.

16. Enavolowelavo ddi othwaruwa ni murima wamutene, ki ekalele ddi yathima wihina nleveleliwe ni Yehova?

¹⁶ Ethu emodha Yehova anathabwiye osugwa, fuwoona akala mwebaribarene muthu ole ohuthwaruwa ni murima wamutene. Muthu anoniha addi wihina ohuthwaruwa ni murima wamutene? Wihina oonihe wi ohuthwaruwa enohoweleya osaddula mubuwelo waye, ekalelo obe efunelo anna muthuya. Eyo enowoneya akala muthu ola anakubanya vanlubale mwaha wowerana ethu yabure obe mwaha wowihiya werana ethu ahoweliye werana. Muthu athwaruwe ni murima wamutene kanakubanya baahi mwaha yothega eriliyena, mbwenye mwaha wohiya wandana waye ni Yehova othembwa ofiyedha werana ethu yabure. Kuddiwale wihina amwene ala aabilene Manases ni Davidi yaherana dhothega dhinlubale, naarive dhigari ndo Yehova ahalevelela mwaha yahithwaruwa ni murima wamutene. (1 Reis 14:8) Enowoneya wi Yehova ananilevelela anona wi nihithwaruwa ni murima wamutene. Mbwenye wikubanyedhave baahi mwaha wa yothega nerilihuna kinakwana, nnofwanelela werana ethu emodhaya. * Mbwenye ehikalawo ethu emodha Yehova anasugwiye.

17. Ohogolowela mundduli enatapulela ddi, ki mwahaya bwaddi eyo edhe ekalege yathima nahifunaga ohogolowela werana dhithu dhabure? (Isa. 55:7)

¹⁷ Ethu emodhaya yathima Yehova anasugwiye. Bumudhidhi namathega “anahogoloweliye” mundduli obe nere muthu anaweriyena masadduwo owinjhiva mwigumini mwaaye wodhela oselela werana dhithu dhabure. (Omwileri Isaías 55:7.) Muthu, oyo anohowela osaddula makalelo aye owubuwela wihina  egumaye yeddihiwege mowiwanana ni mubuwelo wa Yehova ni eregena dhithu dhapama dhinamuhagalasa Yehova. (Rom. 12:2; Efé. 4:23) Indo, anofwanelela wilibihera wihina aselele werana ni wubuwela dhithu dhabure. (Col. 3:7-10) Mbwenye nihinona wi ni mukutho wa Yesu bunamuthukulela Yehova onilevelela ni othimiha dhothega dhehu. Mbwenye Yehova anere olabihedha mukutho wa Yesu, aanonaga nilibiheraga wihina niselele mweddelo wabure nannihuna.—1 João 1:7.

18. Nihudhere ddi wodhela makalelo analevelela Yehova?

¹⁸ Vano kabeni nivirisedhe dhatedhene nihudherihu muwari mwa musolo ola. Nihoona wi kawo muthu anonne olevelela ompitha Yehova. Mwahaya bwaddi nigawoga ndo? Vobajha Yehova onowenya onilevelela. Ohiya eyo, kawo muthu annonne pama ompitha Yehova, mwaha oliye ohunona dhatedhene wodhela egumihu. Kawo muthu mmodha ompitha oliye ananda onona akala mwebaribarene iyo nihithwaruwa obe naari. Vogomihera nihoona wi Yehova alevelela anothimiha dhothega dhehu dhatedhene. Eyo enoneriha ohukanna mubuwelo wohunyemela ni orumedhiwa vamentoni vaye.

19. Naarive nihilogomane teto nthegagave, mwahaya bwaddi nigahagalala?

¹⁹ Hee, nihinona wihina mwaha wohilogomana nnerege othegave. Mbwenye ethu enanlibiha bi madhu enafwanyeya muwari mwa livuru Estudo Perspicaz das Escrituras, Volume 2, epaddi 771, enihina: “Woona wi Yehova dathagaraga ni onowoona ohulogomana wadhaari aye, aliwa kinafwanelela wikubanyedha malabo amatene mwaha wa yothega enivalihe Adawu. (Sal. 103:8-14; 130:3) Waharaga pamadhene dila dha Mulugu we podi okala ohagalala. (Fil. 4:4-6; 1 João 3:19-22).” Wawubuwela madhu yala, enonlibiha vanlubale!

20. Musolo onaharela onawakule makoho baani?

²⁰ Iyo podi omutamalela vanlubale Yehova mwaha woonilevelela nathwaruwa ni murima wamutene mwaha wa yothega nerilihuna. Iyo nnande addi omutajhiha Yehova makalelo analeveleliye? Makalelo ananilevelela Yehova ni makalelo ehu olevelela enaligana avi? Ki ohiyana baani orivo? Mwahaya bwaddi sathima wonelamo ohiyana wula? Musolo onaharela onere wawakula makoho yala.