Dhovuhulela dhimodha dhinawogiwa vala, dhinapadduwa mudhidhi mmodhave. Dhovuhulela dhatedhene dhinowoniha wi nnakala ‘malabo ookuthula.’​—Dan. 12:4.

• Yolebela obe (dholebela) Apo. 11:7; 12:13, 17; 13:1-8, 12

  Yovuhulela. ‘Mwanenyama owopiha’ onowedda velaboni yavati yaka matxikwi ni matxikwi. Mudhidhi wokuthula, musolo wanetanu nabili onoporosiwa. Vasogolova, musolo onere ovola vano ‘elabo yatene yavati’ enere omuhara mwanenyama owopiha. Saddana onamulabihedha mwanenyama ola owopiha wi ‘awane koddo naale ehanle.’

  Wakwanela. Mutokora nuuvira, ehikumelela anamathonga eri amwiddani a Yehova. Nuuvira yaka dhowinjhivadhene, mudhidhi ewaniwaga koddo yooroma ya elabo yatene, Império Britânico ahikwerebeya vanlubale. Yamukavihere ofiyedha okanna kopolo dila bili, fuwandana waye ni Estados Unidos. Thabwathabwa mudhidhi wokuthula, Saddana anolabihedha onamathonga watene wihina aharahare nlogo na Mulugu.

• Yolebela obe (dholebela) Dan. 11:25-45

  Yovuhulela. Mudhidhi wokuthula, mwene oonorti ni mwene oosul enere owanela othonga.

  Wakwanela. Yaka ya 1945, Alemanha ni a Potência Mundial Anglo-Americana, yahitatamula koddo ewanelaga othonga, teto, União Soviética ni eniwananiyena okala mwene o norte. Yaka ya 1991 União Soviética opwaramwasuwa, nuuvira mudhidhi, Rússia ni eniwananiyena okala mwene oonorti.

• Yolebela obe (dholebela) Isa. 61:1; Mal. 3:1; Luc. 4:18

  Yovuhulela. Yehova anere omuruma ‘mwimeleli’ aye, wihina ‘egeredhe dila’ ohunathi ofiya mudhidhi wotikitedhiwa Omwene wa Mesiya. Nikuru nna, nnere obajha “olaleya muthenga dhapama, yaalaleyaga athu owogowa murima.”

  Wakwanela. Obajha yaka ya 1870, C. T. Russell vamodha naakwaye, yahilaba nuuviheya wihina evenyihedhe ebaribari ya mBibliyani. Yaka ya 1880 aliwa yahifiyedha woona wi enohoweleya adhari a Mulugu olaleya. Aliwa yahasasanya marevista yawoga wi “Enohoweleya anamalaleya owakwana 1000” ni “Oothikitheliwa wihina elaleyege.”

• Yolebela obe (dholebela) Mat. 13:24-30, 36-43

  Yovuhulela. Mwiddani odhowa mmunddani mwa mulobwana, odhalamo nthaajhe. Vano mulobwana ohiya nthaajhe nne wunnuwa vamodha ni tirigu ofiyedha mudhidhi wohadda. Nuufiya mudhidhi wohadda, nthaajhe omwalanihiwa ni tirigu.

  Wakwanela. Obajha yaka ya 1800, makiristawu eebaribari enowoneya wi bohiyana ni makiristawu owoota. Mudhidhi ola wookuthula, makiristawu eebaribari enotukumanyiwa ni enomwalanihiwa ni makiristawu owoota.

• Yolebela obe (dholebela) Dan. 2:31-33, 41-43

  Yovuhulela. Manyalo a mujhila ni oologo ahekwamuthu yubiwe ni mujhila dhohiyana-iyana.

  Wakwanela. Ologo enatapulela athu enathongiwa ni Potência Mundial Anglo-Americana, wula empambihaga. Mwaha wa yeyo, Potência Mundial Anglo-Americana analiganihiwa ni mujhila, kanawedha olabihedha kopolo dhaye mowakwanela.

• Yolebela obe (dholebela) Mat. 13:30; 24:14, 45; 28:19, 20

  Yovuhulela. ‘Tirigu’ anere oheleliwa ‘vasasarani’, teto, ‘mudhari oororomeleya ni athotho’ dinaasakuliwe wihina akabelelege ‘nikuru ning’ono.’ Olaleyiwa wa muthenga ‘dhapama Dhomwene’ winere ‘wafwanya athu atene enakala mwilaboni yavati.’

  Wakwanela. Yaka ya 1919 mudhari oororomeleya disakuliwe wihina asamalelege nlogo na Mulugu. Obajha mudhidhi yole ofiyedha peeno, anamahudhera a Bibliya enowilibihera wihina ethukuwihe mabasa oomwene. Peeno, Anamona a Yehova enowapara mabasa oolaleya okwaranya dhilabo 200 ni enokumiha dhipano dha mBibliyani okwaranya dhiwogelo 1000.

• Yolebela obe (dholebela) Dan. 12:11; Apo. 13:​11, 14, 15

  Yovuhulela. Mwanenyama owopiha onna manyaga menli ommadha awoge naathu enakala elabo yavati wihina ‘esasanye ekwamuthu ya mwanenyama owopiha.’ Vasogolova, mwanenyama anere ovaha ‘muuya ekwamuthu.’

  Wakwanela. Potência Mundial Anglo-Americana, divahile mubuwelo wihina egeredhiwe Liga das Nações. Nikuru nna nnokaviheriwa ni dhilabo dhimodha. Mwene oonorti ahitaganela ni Liga das Nações yaka ya 1926 baahi ofiyedha 1933. Peeno athu enaroromela wi Nações Unidas (ONU) amukavihera Liga das Nações, dhewa dhinere waweddela pama ni enubuwela wi aliwa enere odhana murenddele mwilaboni. Mbwenye Omwene wa Mulugu baahi, bunaadhena murenddele.

• Yolebela obe (dholebela) Dan. 8:23, 24

  Yovuhulela. Mwene onna owali anere otota ‘otolosa ni makalelo ootikiniha.’

  Wakwanela. Potência Mundial Anglo-Americana, ahitota otolosiwa waathu dila dhowinjhivadhene. Mootajhiha, mudhidhi ewaniwaga koddo yanabili ya elabo yatene, Estados Unidos, ahatolosa amwiidani amodha a Potência Mundial Anglo-Americana ni makalelo ootikiniha wodhela bomba bili atômicas.

• Yolebela obe (dholebela) Dan. 11:31; Apo. 17:3, 7-11, 16

  Yovuhulela. ‘Mwanenyama owopiha onna malemba ninga nyarugwe’ anokumelela mukwegweni, di mwene anetanu natharu. Manyaga aye owakwana kumi enomporosa ‘namararuwa’, vasogolova mwanenyama owopiha ommadha agujhuliwe. Livuru na Daniel nnomuliganiha mwene anetanu natharu ni ‘ethu yotakala enadhana makathamiho.’

  Wakwanela. Liga das Nações apwaramwasuwe mudhidhi ewaniwaga koddo yanabili ya elabo yatene. Koddo nuumala, ‘okungiwa’ ONU. Ninga vawogesa Liga das Nações, ONU onosoriha wi anere odhana murenddele, ethu enaadhiwena baahi ni Omwene wa Mulugu. Teto osogolo winayihu, ONU anere ogujhula webedha wowoota.

• Yolebela obe (dholebela) 1 Tes. 5:3; Apo. 17:16

  Yovuhulela. Anamathonga enere olaleya ‘murenddele ni obareleya’, teto, ‘Manyaga kumi ni mwanenyama owopiha’ enere omurijha ‘namararuwa.’ Voharela, anamathonga enmadha egujhuliwe.

  Wakwanela. Anamathonga podi wera enere owoga wi nihanda odhana murenddele ni obareleya mwilaboni. Vasogolova, anamathonga enamukavihera ONU enere ogujhula webedha wowoota. Eyo enere odhana ohoseya winlubale. Ohoseya wula, winaamale ni ogujhuliwa wa elabo ya Saddana wodhela koddo ya Armajedo.

• Yolebela obe (dholebela) Eze. 38:11, 14-17; Mat. 24:31

  Yovuhulela. Googwe anere orijha elabo ya nlogo na Mulugu. Mbwenye angero enere watugumanya ‘oothikitheliwa.’

  Wakwanela Mwene oonorti, ni amwene amodha a mwilaboni, enmadha erijha nlogo na Mulugu. Orijhiwa wula wambala, mudhidhi yoyo, oothikitheliwa enaahale mwilaboni, emmadha ethukuleliwa odhulo.

• Yolebela obe (dholebela) Eze. 38:18-23; Dan. 2:34, 35, 44, 45; Apo. 6:2; 16:14, 16; 17:14; 19:20

  Yovuhulela. ‘Ole omugwenle’ ‘kavalo ootxena’, anere wakwaneliha ‘ogonjhiha waye’.amugujhula Googwe ni atoropa atene. ‘Mwanenyama owopiha’ anere ovokeriwa ‘vathiyani vinahidda munlo wathukutha’, teto, ekwamuthu yunlubale enmadha epwesiwe.

  Wakwanela. Yesu mwene, a Omwene wa Mulugu, anadha wihina avuluse nlogo na Mulugu. Amwene owakwana 144 mil vamodha nnikuru naangero, enere omariha malogo matene enaharahara nikuru na Yehova. Onamathonga watene wa Saddana wimmadha wigujhuliwe.